1 PETER 4:2 - Cho Bible Common Language 2016

² Tuhbäi khomdek pumsa awn nami ghin nak ba ah a khin ung, chang ah ng’yak hlü ah kä ghing ne, Khanpughi ah m’hni ah nami ghin vai.

1 PETER 4:2 Referans Kwoze

1 PETER 1:14

Khanpughi ah thu ngai u ne, kä nami hmuhmat pha ung nami om ih ng’yak hlü man ah mäih ah kä nami ghin om ba vai nei.

EPHESIAN 6:6

Nami bawi gui naw ami ning yum gui vai ah, ami ma bäng ah ami thu nami läk ciah kä kya ne, Bawi Khrit ah changshäm ah nami kyak ciah kyasei, Khanpughi ah ang yak hlü ah nami m’lung ngaih avan nawn nami hnün thawh vai nei.

ROMAN 6:11

Acun ah mäih ah nang mi cun phi, sih nak näng ne, katnak nawng shüt ne, Bawi Khrit Jesuh awn, Khanpughi ung lünlawi ne nami om vai.

2 KORIN 5:15

Bawipa cu chang van ah hmawk ah sik ci, cun ah kyasei chang gui cu ami ghin yah ung ami mät ah hmawk ah kä ghing ba u ne, ngahmi ah hmawk ah a hnun gui pe ne, tho ne ghing ba ciah Bawipa ah hmawk ah a mi ghin vai ah kyak ci.

EPHESIAN 2:3

Zanä mikmi phi ngami ah mäih ah mi kya man ci. Pumsa ah ng’yak hlü ah mi om ne, pumsa la m’lungngaih ah ni vai düt ah mi bilo man ci. Mikmi cun phi pumsa lam ung, a hei chang gui ah mäih ah Khanpughi ah m’lungshe nak gah khin ciah mi kyak ci.

ROMAN 6:2

Cun ah kä kyak ci nei, katnak mi hnu nah pyi ciah chang cu, a i ah kya sei katnak ung mi ng’len ba lä vai ang!

EPHESIAN 4:17

Cun ah kyasei nang mi cu kä yum ci gui ah mäih ah, kä nami om ih ngaih-tüh ba lä vai ah Bawipa ming ung ka ning khän gui ci nei.

ROMAN 14:7

Mikmi ungka a u chang phi amät ah hmawk bäng ah kä ghing ci, amät ah hmawk bäng ah kä sik ci.

1 PETER 2:1

Nami shetkat nak avan ng’hlah ta u ne, kä hleeihlak ne, kä thuvi ne, käm thüi m’khang ne, kä nawmpang kä ng’plah taang ne nami om vai nei.

SAM 143:10

Nang cu ka ning Khanpughi nei; na ng’yak hlü bi vai ah na m’htei ä. Kei ung ni ne, phyawn nak ah lam cu na m’shüm ä.

JOHAN 7:17

Khanpughi ah ang yak hlü ah om hlük ciah chang phung naw, kei ah ng’thu pyein gui cu ang ngaih ung, Khanpughi ah ng’thu la kei ka mät ah ng’thu ah a kyak ah, ng’thumcha ne hmat khai nei.

MAKUH 7:21

Chan ah pukhui m’lung kyong ungka shetkat ciah ngaih tüh nak gui cu lut lawk ci; cun gui cu ng’yo ng’pawm hlü nak, m’guk nak, chang ngawn nak;

MAKUH 3:35

Khanpughi ah ang yak hlü ah bilo ciah chang phung cu, kei ah nau, kei ah be, kei ah nu ah kyak ci nei” cine kyak na gui ci.

HOSEA 6:7

“Cun ung phi Adam khonglei ung ami luh law vai am kei naw ngami awn ka bi ah thukhän cu m’shet ci gui.

1 JOHAN 2:17

Khomdek khan la khomdek khan ah chang ah ng’yak hlü gui cu, ng’pyi lawk ci gui nei; cun ung phi Khanpughi ah ang yak hlü ah hnüntho ci gui cu, angtäi sei ghing khai gui nei.

JAMES 1:18

Khanpughi naw amät ah ng’yak hlü ah, ang thudüng awn chang ghing ah nang dang sak gui ci, cun ah kyasei mikmi cu a tüisho gui nüng ung ak bä pi ah mi kyak ci.

HEBRU 13:21

Nangmi naw dimdeeih nak ah Bawi, Khanpughi ah ang yak hlü nami läk nak hning vai ah, nik ci phung avan ning m’shumphyuk gui sä. Bawipa naw a mät ah ng’yak hlü ah mäih ah mikmi cu, Bawipa Jesuh Khrit awn na piangtham gui sä. Bawi Khrit cu Ngawiyä ang’täi sei Bawi mang ne om sä, Amen.

1 THESSALONIAN 5:18

amawng ama avan ung Khanpughi cu m’hlüngtai vä. Bawipa Jesuh Khrit ung kawng ät ne nami ghin nak awn cun ah nami bi vai ah Khanpughi naw ng’ya hlük ci nei.

KOLOSE 1:9

Shin ah mawng ung nangmi ah mawng kami ng’yak phung ung, nangmi ah hmawk ah kami taigü ci nei. Khanpughi naw ang yak hlü ah mäih ah Mumcha naw a peit ah kyak ciah, hmuhmat nak, cüivai nak la lunglang nak gui awn a ning be sak gui vai ah, kami k’thäh ci nei.

EPHESIAN 5:17

Cun ah kyasei ak gu k’aang ah kä nami om men vai, Bawipa naw nami bi vai ang yak hlü cu k’tha nah ne nami shui vai nei.

ROMAN 12:2

Khomdek khan ung yodäm nak ung kä nami ng’kü ng’neet tu vai, Khanpughi ung nami m’lung kyong avan ng’thawng sak u ne, m’lung ngaih ak thai awn nami om vai. Cun ung vah ni kyom nak, amät ung yeikyai nak la kümbe nak gui ah Khanpughi ah ang yak hlü cu nami hmat khai.

ROMAN 7:4

Phäi nau gui aw, shin ah mawng cu nang mi awn phi ng’lüng ci nei. Nang mi cu Bawi Khrit ah pumsa ah nami kya pyi ci kya ne, thukhän ung nami ghin nak cu si pyi ci nei. Khanpughi ah khuut bi nak ung hnüntho ciah mi kyak nak vai ah sih nak ung ka tho ba ciah Bawi Khrit ah chang ah nami kya pyi ci nei.

JOHAN 1:13

Cun ah hta gui cu amät ng’tüi lawk ci la chang pa nah ne ng’tüi lawk ci gui ah kä kya ci. Khanpughi ung ng’tüi lawk ci gui ah kyak ci.

MATTHE 21:31

Cun ung phi kä hteh ah om ci. Cun ah chang goi ungka a u naw ang apa ah beit ng’yak ciah a kyak kaw!” cine ng’shi gui ci. Ngami naw, “Hta vaipi naw beit yak ci nei,” cik ci gui. Bawipa Jesuh naw, “Kei naw akcang ka pyein cu, khawn look ci gui la chang hlawhlang gui cu, nangmi ah mä ma pi ne, Khanpughi ah uknak kho ah gawk khai gui nei.

MATTHE 12:50

Khankho ah om ciah Kapa Khanpughi ah ang yak hlü ah bik ciah chang phung cu, kei ah phäi, kei ah nau, kei ah be, kei ah nu ah kyak ci nei,” cine m’thein gui ci.

MATTHE 7:21

‘Bawipa, Bawipa,’ cine na khü ciah chang van düt, khankho ah kä lut hlawt khai, khankho ah om ciah ka Pa ah ang yak hlü ah om ciah chang bäng vah gawk hlawt khai.

KOLOSE 4:12

Bawi Khrit Jesuh ah akchang shäm, nami chang ah kyak ciah Epaphras naw phi ning yavaih na gui ci nei. Khäng sei nami ng’düih vai, kä nami püngheiu vai, be ciah khritha ah nami kiak vai, Khanpughi ah ng’yak hlü küm khai ah ang thu nami ngaih vai ah, ani naw akni ah ning taigü pe gui ci nei.

KOLOSE 3:3

Nangmi nami sih ung nami hnun gui cu Bawi Khrit awn Khanpughi ung ng’thup ciah kyak ci.

MATTHE 20:4

Cun gui-am, ‘Sapyit lo ah hteit ne bi bi tu vä, akhin vai ah ka ning cheng gui khai nei,’ cik ci.