1 PETER 1:8 - Cho Bible Common Language 2016

⁸ Nangmi naw kä nami hmuh man ung phi Bawi Khrit cu nami m’hni ci, tuhbäi kä nami hmuh ung phi, ani cu nami yum ci. Cun ah kiasei nangmi cu ng’thu awn kä pyein hlawt vai ah lünlawi yeikyai ne nami om ci.

1 PETER 1:8 Referans Kwoze

JOHAN 20:29

Bawipa Jesuh naw, “Nang naw kei cu hmu netah na na yum ci, kei kä na hmuh ah na yum ci gui ah khan ah yeikyai nak be ci nei” cine pyein ci.

2 KORIN 5:7

Mi ghin nak ung yum nak cu ak tung ah kyak ci, mik awn hmuh nak cu ak tung ah kä kyak ci.

ROMAN 15:13

Zum ne ngaih u nak ah ang yung ah kyak ciah Khanpughi naw, ani ung nami yum nak awn, yeikyai nak la dimdeeih nak cu ning k’be gui sä. Cun ah kya sei yum ne nami ngaih u nak cu, Mumcha Theing hlüngtai nak awn, phung ghing ne ng’ghotai khai nei.

HEBRU 11:1

Yumnak cicu ngaih u nak gui akcang ah dang lawk khai, kä hmuh hning gui akcang om ci gui, ciah ngaih gep nak ah kyak ci.

JOHAN 16:22

Nangmi tuhbäi nami thüisei ci, cun ung phi kei awn mi ng’hmu ba mä khai kyasei nami m’lung cu yeikyai nak awn be khai, cun ah yeikyai nak cu hnicim chang naw kä m’shet hlawt khai.

2 KORIN 4:18

Kei mi naw mik awn hmuh cu kä kami kheing ci, mik awn kä hmuh vah kami kheing ci. Mik awn hmuh cu a shängta khäng ne, Mik awn kä hmuh cu angtäi sei khäng ci.

1 PETER 1:6

Nangmi cu yaica geinvai nak a hlü hlü om sei tuhbäi nami thüisei ung phi, ak khan ah a mawng gui cu ngai ne yeikyai vä.

HEBRU 11:27

Moses naw ghangpughang ah m’lungshe nak cu kä kyih ne, Egypt kho ungka ang düih law ba cu, a yum nak awn ah kyak ci. Ani naw mik awn kä hmuh ah Khanpughi cu hmuk ciah mäih ah hnu ah ng’hlah ba vai cu maa khenggeng ci.

1 PETER 2:7

Cun ah k’toulung cu nami yum ci gui ah phäh ah, ak küikyang ah kyak ci, kä yum ciah chang phäh ah; “Lung im co ci naw a ghawh ah lung cu, Ak küikyang pi ah k’toulung ah kya lawk ci.”

PHILIPPIAN 4:4

Nang mi cu Bawipa ung nami ghin nak awn yeikyai vä, ka pyein ba mä cu yeikyai vä!

1 PETER 5:4

Ang vaipi säih Htome uk ciah Bawipa ang dang law ung, angtäi ah pyü ne ng’shü ciah abämang nak ah ghui lukhu cu nami gah khai nei.

EPHESIAN 6:24

Kä si hlawt ciah m’hni nak awn mi Bawipa Khrit m’hni ciah chang gui ah khan ah Khanpughi ah m’geinsei nak cu kümbe ne om sä.

PHILIPPIAN 1:25

Cun ah a mawng cu ka hmat ci kya ne, kei cu nang mi awn a täng ah ka om khai nei. Nami bühmang nak vai la yum nak ung nami yeikyai vai ah hmawk ah kei cu namg mi awn a täng ah ka om khai nei.

ROMAN 14:17

Khanpughi ah uknak ah kho cu ei nak la auk nak awn kä ng’phaa ci, Mumcha Theing ah peit ah ng’düng nak, dimdeeih nak la yeikyai nak awn vah ng’phaa ci.

JOHAN 14:24

Kei kä nam hni ciah chang naw, kei ah m’thei thang phi kä ngai khai. Kei ah ning m’thei thang gui cu ka mät ungka lawk ciah kä kyak ci, kei na tüi lawk ciah Kapa ungka lawk ciah kyak ci.

JOHAN 8:42

Bawipa Jesuh naw, “Khanpughi cu nami Pa akcang ah a kyak ung, nangmi naw kei nami nam hni khai, a i ah kyasei ci ung, kei cu Khanpughi ungka law ne, ka gawk lawk ci, ka mät ah ngaih ah ka lawk ciah kä kyak ci, ani naw ana tüih law ah kyak ci.

PHILIPPIAN 3:3

Vun-ah nak bik ci gui ah chang cu ngami ah kä kyak ci, mikmi ah kyak ci. A i ah kya sei ci ung mikmi cu Mumcha awn Khanpughi cu mi khawihna u ne, Bawipa Jesuh Khrit awn mi kawng ät u ne, yeikyai nak mi gah ciah kyak ci. Mikmi cu a hei a i baw düt kä mi ngaih u ci.

KALATIAN 5:22

Cun ung phi Mumcha ah m’theih tak läi cu, m’hni nak, yeikyai nak, dimdeeih nak, hnimgei nak, ng’awi ng’gi nak, ni kyom nak, bekhüt nak;

KALATIAN 5:6

Mikmi cu Bawi Khrit Jesuh ung mi kawng ät kawn ah, vun ah la kä ah cu ak tung ah kä kyak ci, ak tung cu m’hni nak dang sak ciah yum nak ah kyak ci.

2 KORIN 9:15

Mikmi naw khei ung kä ng’pyi khai ah am gein nak ah hmawk ah Khanpughi cu mi m’hlüng m’tai khai nei.

2 KORIN 1:22

Khanpughi a mät naw m’khoi ne na khei gui ne, amät ah chang ah ng’kheing vai ah nam hnüt gui ci. Mikmi ah gah vai a na m’küm peit gui cu a kyän nak ah Mumcha Theing cu mi m’lung kyong ung na pe gui ci.

LAMKTU 16:34

Ani naw Paul la Silas cu a im ah khü goi ne, khin nah ne tu m’bei goi ci. Amät la akyong ungka gui ami van cu Khanpughi ami yum tu ah phäh ah ang htei ah yeikyai ci gui.

JOHAN 14:21

“Ka thukhän dou ne läk ciah chang cu kei nam hni ciah kyak ci. Kei nam hni cicu Kapa naw m’hni ci, kei naw phi ani cu m’hni ne, ani ung ka mät kang dang khai” cik ci.

JOHAN 14:15

“Kei nami nam hni ung ka thukhän cu nami läk khai.

MATTHE 10:37

‘Kei ah mä, anu apa m’hni pi ciah chang cu kei ah düihpüi ah kä kya hlawt khai. Kei ah mä, a hta m’hni pi ciah chang cu, kei ah düihpüi ah kä kya hlawt khai.

SOLOMON NG’Ä~ 5:16

Ani ah m’gawng cu ng’ui hlü vai ah tui ci; Ani ah amawng nü naw kei cu na k’pang ci. Kei ah ka m’hni cu shin ah mäih ah kyak ci nei, Jerusalem hnumi gui aw.

1 KORIN 16:22

A u chang phi Bawipa kä m’hni ci phung cu — kyuk sä! Marana tha — Kami Bawipa Kyum law ä!

SOLOMON NG’Ä~ 5:9

Hnumi gui ung kim pikbäih ci aw, Nang ah na m’hni cu chang päng awn kä täng ne ang? Nang am keimi naw shaitak kami ning pek vai ah ani ah mawng cäi aih vai a i ang a om?

SOLOMON NG’Ä~ 1:7

Ka m’hni aw, na m’thein ä, A hawi ang na htomak gui na shäm kaw? Kho hnüüp ling yah ung ngami a hawi ang ami ng’düm kaw? Kei naw a i ah kyasei nang cu ahei htome k’shäm gui ah ng’lung ah ka ning shui vai a hlü ang?

EPHESIAN 3:19

Ani ah m’hni nak cu nami hmat lawk khai, cun ung phi kümbe khai ah a i yah ung phi kä nami hmat hlawt khai — cun ah kiasei Khanpughi ung yungpyaa ne khänghtek vai ah ng’hläm ne nami ngaih gep vai nei.