1 PETER 1:4 - Cho Bible Common Language 2016

⁴ Cun ah kyasei Khanpughi naw ak chang gui ah hmawk ah m’küm ne a gim ah ng’bühmang nak cu khäm vai ah mi ngaih u nak om ci. Cun gui cu nang mi ah hmawk ah kä chükmaih kä didam hlawt khai ah, Khanpughi naw khankho ah m’küm ci.

1 PETER 1:4 Referans Kwoze

THU PHLAAN 21:27

Cun ung phi kä theingcim ci phung api ah phi, cun ah mang gaw ah kä lut tuk khai. Thui ng’aa nak vai bik ci la hleeihlak ciah chang gui phi kä lut tuk khai gui. Htomehta ah ghin nak ca-uk ung angming guk ah chang gui bäng vah cun ah mang gaw ung lut tuk khai gui.

HEBRU 9:15

Cun ah kyasei Khanpughi naw a khü ah chang gui naw, Khanpughi ah a shaitaak ah angtäi m’shumphyuk nak ami gah vai ah, Bawi Khrit naw thukhän thai cu pyang ci. Cun ah abi cu, ak htük ah thukhän ah kaa ah ami om sang ung chang gui ah ami cheishoh nak gui cu, phiawn khai ah, sih nak tumat a om ah hmawk ah kyak ci.

1 PETER 5:4

Ang vaipi säih Htome uk ciah Bawipa ang dang law ung, angtäi ah pyü ne ng’shü ciah abämang nak ah ghui lukhu cu nami gah khai nei.

2 TIMOTHI 4:8

Tuhbäi ung Khanpughi ung düng ciah chang gui am ap vai ah näng nak lukhu naw kei cu na ngäng ci nei. Cun cu düng nak awn m’khoichak ciah Bawipa naw, m’khoichaa nak Hnüüp ung kei am na ap khai nei. Kei bäng ah kä kyak ciah, Bawipa a kyum law ba m’hni ne ngäng ciah chang gui phung am, cun na lukhu cu ap gui khai nei.

KOLOSE 1:5

Thudüng, thuni a gawk law htük yah ung ng’shut lawk ciah ngaih u nak cu nami ng’ya pyi ci nei. Cun ah kyasei nami yum nak la nami m’hni nak cu khankho ah gim ah ngaih u nak ung ng’yung ci nei.

MATTHE 25:34

Cun kawn ah ghangpughang naw akpat lam ah om ciah chang gui-am, ‘Law vä, Kapa ah phyutheh nak nami gah ciah chang gui, khomdek a tüi pyan ung tün ne nangmi ah hmawk ah a pyan ah uknak kho ung om vä.

EPHESIAN 1:18

Kei naw ani ah ak dei cu nami m’lung awn nami hmuh vai ah ka ning k’thäh pe gui ci, cun ah kyasei, a i nami ngaih u vai ah a ning khü gui ah mawng, ak chang gui-am a peit ah shaitaak cu a i hlawk ah cäicat vai ah abä nak ah mawng,

EZEKIEL 47:12

Tuilawng ah akem päng ung, ei vai ah kyak ciah sing ghing avan cu thou khai gui. Ami hnah gui cu kä ng’yai phung khai, kä ng’düm phung ne m’theih khai gui. Cun gui cu ak cha päng ung ak thieng ah m’theih khai gui, a i ah kyasei ci ung, cun gui cu Taigüim ung ka long lawk ciah tui awn shawi gui ah kyak ci. Cun ah sing gui naw ei vai pek kai gui, ami hnah gui cu chang gui ah gai nak vai ah mang vai ah kyak khai.”

EPHESIAN 1:14

Cun ah Mumcha Theing cu Khanpughi naw ak chang gui-am apeit ah shaitaak cu mi gah vai ah ang kyän nak ah kyak ci. Cun ah kyasei Khanpughi naw, amät ah chang gui-am kümbe ciah phiawn nak, na pe gui ci, cicu ngaih gep vai kyak ci. A bämang nak cu mi m’kümto khai nei!

EPHESIAN 1:11

Apäng avan cu Khanpughi naw am hnüt ak bäi ah mäih ah om kyak ci gui. Khanpughi naw cäu ä ge tün ne a mät ah k’bäi ah ng’bü nak awn, mikmi cu Bawi Khrit ung na kawng ät sak gui ne ak chang ah ana ghü gui hnga ah kyak ci.

ROMAN 8:17

Mikmi cu Khanpughi ah hta gui ah mi kyak ci kyasei, ak chang gui ah hmawk ah Khanpughi naw am hnüt ah hrilham cu mi khäm khai. Bawi Khrit ah hmawk ah Khanpughi naw am hnüt ah bäkhäk nak cun phi mi khäm tuk khai. Mikmi cu Bawi Khrit awn a täng ah gein vai nak mi gah ah a kyak ung, ani awn a täng ah bämang nak phi mi gah khai.

LAMKTU 26:18

Nang naw changpakhui hei gui ah mik nam dei sak gui khai, ak hmüp ungka naw ak dei ah na ng’lat sak gui khai, khogam ah hlüng tai nak ungka naw Khanpughi ah hlüngtai nak ung na gawk sak gui khai. Cun ah kyasei ngami cu kei ami na yum nak awn, ami katnak phyawn nak gah ah u ne, Khanpughi ah ghü ah chang gui ah ng’lung ah ami hmun kho gah tuk khai gui.

LAMKTU 20:32

“Tuk bäi kei naw nang mi cu Khanpughi ah kut ung la, am gein nak ah Thu Ni ung ka ning ap gui ci. Cun ah Thu Ni naw, Khanpughi naw ak chang gui ah hmawk ah am hnüt ah, hriham ning pe gui ne ning düih sak gui khai.

SAM 31:19

Nang ning m’taam ci gui-am na gim pek gui cu, cäicat vai ah na ni, nang ung ng’ap ci gui, a i hlawk ah na shungvong gui cu, chang avan naw hmat ci gui nei.

JAMES 1:11

Hni liing naw aghing cu chawng sak ne, apai cu kiawi sak ci, cun ah kyasei akiom nak cu dimaih ci. Acun ah mäih ah bühmang ciah chang cu, amät ah bi abi yah chung ung dimaih nak om khai nei.

KALATIAN 3:18

A vai sü ah Khanpughi ah m’shumphyuk nak cu thukhän ung düi ciah a kyak ung, cun cu shaitaak ung düi ciah kä kya ba khai. Cun ung phi Khanpughi naw a shaitaak awn Abraham cu, cun ah am shumphyuk ah kyak ci.

1 KORIN 9:25

Ng’längna tuk khai ah ng’theithang ciah güng’lah ciah chang phung naw, ng’kheing ciah thum’hnüt cu läk ci. Cun cu kä ng’täi ciah lukhu gah vai ah hmawk ah kyak ci: cun ung phi mikmi läi cu ng’täi ciah lukhu gah vai ah mi bi ah kyak ci.

1 PETER 3:9

Akshe cu akshe awn kä thung ne, ak kaa cu ak kaa awn kä nami sah vai, cun nak vai sü ung m’shumphyuk nak nami peit vai, a i ah kyasei ci ung, m’shumphyuk nak cu, Khanpughi naw a ning khü gui yah ung a ning peit gui vai ah a shaitaak ah kyak ci.

SAM 47:4

Mi om nak vai kho ng’lei na ghü pe gui ne, am hni ah chang gui-am mang nak khawh k’peeih na pe gui ci.

ISAIAH 66:22

Khomdek thai la khankhaw thai cu kei ah huham awn khäng ne a om mäih ah, nangmi htangshon gui la nami ming cu khäng ne om khai nie.

MAKUH 10:17

Bawipa Jesuh cu a hei lam ung hteit khai ah a pawng yah ung chang tumat cu a pei ah law ne, m’khukdong netah, “Nik ciah sayapa, angtäi ghin nak ka gah vai ah a i ang ka bi kaw?” cine ng’shik ci.

KOLOSE 3:24

Nami shüm vai cu Bawipa naw akchang gui-am a gim peit gui ah m’cümhnah nak cu nangmi am ning pe gui khai nei, ciah kyak ci. Akhuut nami bi peit ah Bawipa akcang cu Bawi Khrit ah kyak ci nei.

HEBRU 10:34

Nangmi naw thawng ung cun ci gui cu nami chimgein ci, nami khawhcham avan ami ning khäm peit gui ung phi yei ne nami om düt ci, a i ah kyasei ci ung nangmi ung cun ah khawh chaam gui ah tah küikyang pi ne, käng pyii hlawt ciah khawh a om cu nami hmat ah hmawk ah kyak ci.