1 JOHAN 4:9 - Cho Bible Common Language 2016

⁹ Ahtapa awn ghin nak mi gah vai ah Khanpughi naw tumat bäng ah Ahtapa cu khomdek khan ah yuk m’kyum lawk ci, Acun ung Khanpughi naw anam hni nak gui cu dang ci.

1 JOHAN 4:9 Referans Kwoze

JOHAN 3:16

Khanpughi naw khomdek chang gui m’hni aih netah tumat bäng ah A htapa cu yuk m’kyum lawk ci, Ani yum ciah chang phung cu sihnak ung kä gawk ne angtäi ghin nak gah ci.

1 JOHAN 5:11

Saksi ah ang dang nak ah mawng cu; Khanpughi naw angtäi ghin nak cu na pe gui ci, cun ah ghin nak cu A Htapa ung phung ci.

ROMAN 8:32

Khanpughi naw amät ah Htapa cu kä ng’vang nah ne, chang van ah hmawk ah pe ne, na küikyan gui ci nei. A Htapa hngaw mikmi ah hmawk ah pek ciah Khanpughi naw, a päng avan cu, kä ng’vangca ah kä na pe gui ne kä om khai nei.

JOHAN 6:57

Ghing ciah Kapa naw ana tüih law ah kya ne, kei cun phi Kapa awn ka ghing ci. Acun ah mäih ah kei na ei ciah chang cu, kei awn ghing khai.

1 JOHAN 4:10

M’hni nak cicu mi mi naw Khanpughi mi m’hni nak ah kä kyak ci, Khanpughi naw nam hni gui ne, mi shetkat nak nak phiawn gui khaiah, Ahtapa a yuk m’kyum law cu m’hni nak ah kyak ci.

1 JOHAN 3:16

Bawi Khrit naw mikmi ah hmawk ah a hnun gui cu a peit ah kyasei, mikmi naw m’hni nak akcang cu mi hmat ci. Mikmi phi mi phäi nau ah phäh ah mi hnun gui mi peit vai hlü ci.

JOHAN 10:10

M’guk ei cu, m’guk khai, ngawn khai, plawhsheh khai ah lawk ci. Kei läi cu nangmi naw ghin nak nami gah vai la ghin nak akümbe vai ah ka lawk ci.

JOHAN 6:51

Kei cu khankho ah kaa kya lawk ciah ghing ciah m’htut ah ka kyak ci. Cun ah m’htut ei ciah chang phung cu, angtäi ah ghing khai. Kei naw ka ning peit gui ah m’htut cu, khomdek chang gui naw ghin nak ami gah nak vai ah, ka sa ah kyak ci,” cine m’thein gui ci.

JOHAN 3:18

Khanpughi ah Htapa yum ciah chang cu a hma m’kat nak kä om ci, kä yum ciah chang cu, Khanpughi ah Htapa kä ah yum ah hmawk ah, tuhbäi ge hma m’kat nak gah ci.

HEBRU 1:5

Khanpughi naw a u khanchang am phi, “Nang cu ka ning Htapa nei; tuhngawi kei cu nang ah Pa ah ka kya lawk ci,” cine kä pyein man ci. A i khanchang ah mawng ung phi Khanpughi naw, “Kei cu ani ah Pa ah ka kyak khai, ani cu kei ah Htapa ah kyak khai,” ci ne kä pyein man ci.

JOHAN 8:42

Bawipa Jesuh naw, “Khanpughi cu nami Pa akcang ah a kyak ung, nangmi naw kei nami nam hni khai, a i ah kyasei ci ung, kei cu Khanpughi ungka law ne, ka gawk lawk ci, ka mät ah ngaih ah ka lawk ciah kä kyak ci, ani naw ana tüih law ah kyak ci.

LUKA 4:18

“Khanpughi ah Mumcha cu kei khan ah gawk law pyi ci, Geinvai ci gui-am Thu Ni m’thein gui vai ah Kei cu na ghü pyi ci, Thawng ung kium ci gui ah phiawn nak vai, A mik m’dauh ci gui ah m’dei ba nak vai la Shedam nak gah ci gui ah phiawn nak vai ah mawng shäu ne pyein vai ah kei cu ghü ne na tüi pyi ci

MAKUH 12:6

Kho mah ung a hta pami tumat om ci. Cun ah kya sei, ‘Ka hta läi cu kyih aa khai gui’ cine ak hnu ah a hta pami cu tüi ci.

1 JOHAN 4:16

Khanpughi naw anam hni nak gui cu mi mät naw mi hmat ne mi yum ci. Khanpughi cu m’hni nak ah kyak ci, m’hni nak ung om ci cu Khanpughi ung om ciah kyak ci, Khanpughi phi ani ung om ci.

JOHAN 14:6

Bawipa Jesuh naw, “Kei cu lam ah ka kyak ci, thutak ah phi ka kyak ci, ghin nak ah phi ka kyak ci, kei ung kä hteit ciah chang phung cu Kapa ah om nak ah kä gawk khai.

JOHAN 6:29

Bawipa Jesuh naw, “Khanpughi ah ang yak hlü cu amät naw a tüih law ah akchang cu nami yum vai ah kyak ci nei” cine kyak na gui ci.

JOHAN 8:29

Kei na tüi lawk cicu kei awn a täng ah om ci; ani ah ng’yak hlü bäng ah angtäi sei ka bik ci kyasei, ani naw kei ka mät bäng kä na nawng ci” cine m’thein gui ci.

JOHAN 5:23

Cun ah kyak sei Apa kyih-aa ah mäih ah A Htapa phi chang van naw a kyih aa vai nei. A Htapa kä kyih aa ci cu, tüi lawk ciah Apa kä kyih-aa ciah kyak ci.

SAM 2:7

Ghangpughang naw, “Bawipa ah thu m’shäk cu kei naw ka ng’shäu khai. Ani naw kei am, “Nang cu ka ning htapa nei, Tuhngawi kei cu nang ah Pa ah ka kyak ci nei.

ATÜNNAK 22:2

Ang htei ah na m’hni ah na hta tumat bäng Isaak cu Moriah khaw ah hteh püi ne na hteh vai. A cun ah ka ning m’shüm ah khomhtung ah, Isaak cu mei awn m’khih ne khawihnah nak na bi vai.

JOHAN 9:3

Bawipa Jesuh naw, “Ani ah mik am dauh cu, amät ah katnak suh ah phi kä kyak ci, anupa ah katnak ah phäh ah phi kä kyak ci, Khanpughi ah hlüngtai nak ani ung ang dang vai ah hmawk ah kiak ci.

1 JOHAN 5:13

Kei naw shin ah ca ka ning guk law gui ah mawng cu, nangmi cu Khanpughi ah Htapa nami yum ci kyasei, angtäi ghin nak nami gah ah mawng cu, nami hmat vai ah hmawk ah kyak ci nei.