1 GHANGPUGHANG GUI 5:7 - Cho Bible Common Language 2016

⁷ Hiram naw Solomon ah thumkhäh ng’ya ne, yei aih neta apyen cu, “Cun ah dämduh ciah khaw ung, cüivai ciah htapa ah kya ne a hnün ung ngo ba khai ah David am pek ciah Bawipa cu tuhngawi m’tamkhah nei!”

1 GHANGPUGHANG GUI 5:7 Referans Kwoze

ISAIAH 9:6

Mik mi ah phäh ah a hmawhta ng’tüi pyi ci! A Htapa cu na pe gui pyi ci! Ani cu mikmi ah uk tu ah kyak khai. Ani ah ang ming cu, “Cäicat vai, ng’ge ng’pai tu,” “M’gäi ciah Khanpughi,” “Angtäi ghing ciah Pa,” “Dimdeeih nak ah manghta” ah khü khai gui.

NG'THU K'THUUK~ 23:24

Düng ciah chang ah apa cu a yeikyai nak vai ah amawng akni om ci. Nang cu cüvai ciah na hta awn na khäghah hning ci.

ISAIAH 8:18

Shin ung kei cu Bawipa naw ana pek ah ak hmaw gui awn atäng ah ka om ci nei. M’gäi ciah Bawipa, Zien m’htung ung among kyang om ci naw, Israel chang gui am, ghing ciah thu.

NG'THU K'THUUK~ 15:20

Cüivai ciah hta naw apa yeikyai sak ci, chang awng ang naw anu päipih ci.

NG'THU K'THUUK~ 13:1

Cüvai ciah htapa naw apa ah m’shungdüng cu ngai thei ci. Cun ung phi a i kä tä ciah chang naw akat nak kä ng’kiaa hlawt ci.

NG'THU K'THUUK~ 10:1

Shin gui cu Solomon ah thuthuuk gui ah kyak ci: Cüivai ciah hta nau naw apa yei sak ci. Gu-ang ciah hta nau naw anu thüi sak ci.

SAM 137:6

Kei naw kä ka ning shüm ah akyak ung, a hlüngtai pi bäih ka yeikyai nak ah kä ka ning ngaih-tüh ah a kyak ung, ng’äi kä ka m’cu ba hlawt khai ah kya sä!

1 GHANGPUGHANG GUI 10:9

Bawipa na khanpughi cu m’tamkhah ä! Ani naw Israel ghangpughang ah ning pyang ne, nang awn a täng ah a om ah phäh ah a i hlawk ah a yeikyai cu m’dang ci nei. A i ah kyasei ci ung ani naw Israel am hni nak cu angtäi ah kyak ci, ani naw nang cu ami ghangpughang ah ning pyang ci, nang naw thukhän la taga nak cu na bi hning ci.”

1 GHANGPUGHANG GUI 3:9

Cun ah kyasei cüivai nak cu na peä, kei naw na chang gui taga khai ah ka uk vai hlü ci nei, akni la akshe ah ng’lakmah nak ka hmat vai hlü ci nei. Kä cunung, shin ah dämduh ciah na chang gui cu a i hawk cha ah kei naw ka uk thei khai aw?”

1 GHANGPUGHANG GUI 1:48

taigü ci, ‘Israel Khanpughi, Bawipa cu mi m’tamkhah khai nei, ani naw kei ah ka hta ng’shon gui ungka tumat cu, kei ah hnün ung ghangpughang ah ngoh sak ci nei, acun ka hmuk khai ah kei cu na ghin sak ci nei!”

ATÜNNAK 33:5

Esau naw hnumi gui la a hmaw gui cu hmu law gui neta, “Shin ah na khah püi gui cu a u gui ang?” cine ng’shik ci. Jaokb naw, “Ka bawi aw, shin ah a hmaw gui cu Khanpughi naw bä ne ana pek ah kyak ci nei” cine m’shang ci.

1 GHANGPUGHANG GUI 5:6

Cun ah kyasei kei ah hmawk ah cedar sing gui chuk khai ah na chang gui cu lebanon ah tüi gui ä. Ka chang gui cu ngami awn a täng ah ng’bik khai gui, nang naw na k’bäi ah mäih ah, a i hawkcha ah sing chuk vai cicu kei ah ka chang gui naw nang ah chang gui hlawk ah kä hmat ci gui.”

1 GHANGPUGHANG GUI 5:8

Cun kawn ah Hiram naw Solomon am shikcha ah ng’thumkhä lawk ci, “Kei naw na ng’thumkhäh cu ka gah ci, nang naw nak thäh cun phi be ge vai ah ka yum ci. Kei naw cedar sing la m’htai ghing gui cu ka ning pek khai.

1 GHANGPUGHANG GUI 4:7

Solomon naw Israel ung khawpäng uktu gha lei goi m’düih ci. Ngami naw ami khawpäng uknak ungka ei awk vai cu ghangpughang ah mang im ung om ci gui am thak law ci gui, chang tumat naw kum ät ung cha ät ci ma nak ci gui.