YÔSUĀ 1:8 - TÖHET LĪPÖRE (Re-edited) Bible (BSI)

⁸ Un ṙā-ang elvāng meh min ngih līpöre ngam chöngö nö kiröönngöre, peuheū harap pöri më-eṅ asīn nup i mat e hòṅ meh la-evṙen haköpkö nup tökūichö nö i mat e: kôlò ap min talöökö meh yē meh ngatī, ngaich më-eṅ min teunglen

YÔSUĀ 1:8 Referans Kwoze

Salmai 119:15

Piṙūtkö minë chöngö Meh chin min: milēḵ inrē tö minë talöökö Meh.

Salmai 19:14

Hökngen nup ṙô ngih elvāng chu, nup piṙūtkö ngih ellōn chu inrē nö töhō-ov nö i kūö meh: Ō Mā Tēv chu, ihong chu, ṙamānyen chu inrē.

KÒLÒSĪ 3:16

Hökngen ngam ṙô Kristū nö pōilöreṙen nö in yīö, nö i nup mikah, haköpten höö, halēnö höö, i nup salmai, nöinyö ngam Tēv, töhet tinkökö inrē, havaiṙôre tikökṙôre i ngam Tēv ellōn yīö.

INCHŌḴ-OṘÔ 3:1

Kūön chu, um vaichngö tö inköptöre tö chu, hökngen ngam ellōn meh pöri nö haköp në chöngö chu;

I. CHÖNGÖ 29:9

Lökten haköp në ṙô ngih kinlēḵngô, la-evṙen inrē tö u, hòṅ yīö kôlòṙen i nup vahīṙen.

T. YÔHAN 14:21

Ngòh tö-īnu tö në chöngö Chu, ngaich haköpö u, anga-aṅ an tö hāngenlōn tö Chu. Anga-aṅ ngam töhāngelōn tö Chu, hanghuṙen min tö ngam Yöng Chu; ngaich hāngenlōn Chū-ö min tö ò, ngaich hameuktöre Öich in ò.

T. LŪKÖS 11:28

Ngö ṙô pöri Anga-aṅ, Hôṅ kô; tökôlò yin vē hamang ṙô ngam Tēv, ngaich haköpö e.

T. MËTIV 7:24

Lökten ngòh hamang në ṙô Chu, ngaich kēken u; asātu anga-aṅ, nö sā ap tö-akaha tarik, öp vamī-iṅl patīre nö i kui ihong.

Salmai 119:11

Halinngen ngam ṙô Meh chin ellōn re: pò chu sōḵ köölö fālen in Meh.

Salmai 119:97

Ō, Yöng hanāngen chu töm chöngö Meh! Angū-ö an piṙūtkö chu i el në sakāmö nö ṙòkhöre.

T. MËTIV 7:21

Rö-övö yin min nö ṙòkhöre nö kuhēthötre nö im pūlngö ngam halīöngö, vē töngö ṙô tö Chu, ‘Mā Tēv, ‘Mā Tēv,’ höng vē töla-evṙen pöri tö lōn ngam Yöng Chu, aṅ el halīöngö.

T. YÔHAN 13:17

Akahalōn yin yih ngaich tö u; tökôlò yin, yē yīö la-evṙen tö u.

YÔSUĀ 1:7

Höng hangëḵeṅre më-eṅ um pa-ekūö inrē, haköpkö ngam chöngö la-evṙen asā-a e nö ṙòkhöre ngam tinöölô meh tö Môsös ök tarik chu: um havööngö kūöre tö e lahāmö hēk la tavē, hòṅ meh teunglen ip töng kū-ö meh kirööngöre.

I. CHÖNGÖ 30:14

Röhta pöri ngam ṙô nö in meh, elvāng meh, ellōn meh inrē, pôm hōtu la-evṙen tö e.

I. CHÖNGÖ 5:29

Ngatī tal öre öp ellōn in cha, hòṅ cha öre nö pa-ekūö tö chu, ngaich örheūheu nö haköp në chöngö chu, hòn löök nö in cha nö örheūheu, in yip kūön cha inrē!

Salmai 119:99

Mööḵlö mikah elmat chin tö vē haköptöre nö ṙòkhöre: pò minë chöngö Meh nö anū-ö piṙūtkö chu.

Isayā 59:21

In chu pöri, ngih ön kinlēḵngô chu in cha, Ṙô ngam Mā Tēv: öp töhet fanöinylö chu öp mī-ikui meh, nup ṙô chu inrē töchaphötvö nö elvāng meh tö chu, hö-ö min nö meutnyi nö ṙā-ang elvāng meh, ṙā-ang elvāng yip kūön meh hēk ṙā-ang elvāng yip kūön yip kūön meh, ṙô ngam Mā Tēv, löktökūö ngih hē höng örheūheu.

I. CHÖNGÖ 5:32

Haköpkö u yin min öi la-evṙen sā hinôtö yīö tö ngam Mā Tēv ngam Tēv yīö: hö-ö yin min kānngöre lā hāmö hēk lā tavē.

I. CHÖNGÖ 31:11

Hē Israĕl nö ṙòkhöre nö yih nö hameuktöre nö i kūö ngam Tēv ngam Mā Tēv meh ip chūökö atöllö ò min, vë-ekūö ngih chöngö më-eṅ min i kūö Israĕl nö ṙòkhöre nö elnang cha.

EFISÖS 4:29

Un töchōichu ṙô, löknyö elvāng yīö; öp tölöök pöri, hòṅ e nö hinòlṙen, kanôlò cha inrē yip hamang.

T. MËTIV 12:35

Ngòh tölöök tarik kē-ĕny tölöök chehen, aṅ i nup tölöök chehenre Ngòh tötlöök tarik kē-ĕny tötlöök chehen, aṅ i nup tötlöök chehenre.

Salmai 40:10

Rö-ö chin hanyatngö ngam lanöökö meh nö ellōn chu; ngaich chin vë-eny ngam kanô-en meh, inyöölen inrē aṅ in meh: rö-ö chin hayun-ngö ngam hanāngen neūkö-lōn meh kanô-en meh inrē, öich i vē tömaṙôngö.

T. MËTIV 28:20

Haköpten cha nö haköp nup taṙòkhöre tinölô yīö tö Chu. Yĕh meuk; örheūheu Chin holtöṙah yīö, söl ip manāngen ngih panam.

INMEUKHÖMAT 22:14

Tökôlò yip cha-a, yip samöich inyutre, pò cha nö huveū-en nö yihtöre nö im chōn nômö, ngaich kô-òren inrē nö kuhēthötre nö lökhöt minë inkūp ngam elpanam.

Ranehlö 24:63

Ngaich kunyī-inyre Isāk nö el kahôyö tö hē el harap nö chöh ellōnre: ngaich angā-aṅ nö chingôhòlkūöre, ngaich ngëcha, ngaich, yĕh meuk, yih nuk umuh ūṅt.

I. CHÖNGÖ 31:24

Ngaich angū-ö, hē Môsös nö keūheūtötī nö kūich ṙô ngih chöngö nö i mat līpöre, hanöng saha u nö keuheūten,

YÔSUĀ 8:34

Ngaich unôich anga-aṅ nö vë-ekūö nup ṙô ngam chöngö, ngam inkôlò tö ngam öt inkôlò, sā kinūichngö u nö i mat līpöre chöngö.

I. CHÖNGÖ 5:1

Ngaich Môsös nö havëten yip Israĕl nö ṙòkhöre, ngaich ngö ṙô tö cha, Ō Israĕl, hangihtöre yin tö në chöngö në inkaha fālen inrē nö ṙô chu el nang yīö töngamuh, hòṅ yīö haköpö u, ngaich köpen la-evṙen tö u.

I. CHÖNGÖ 29:8

Kē panam cha ngaich ayī-ö, ngaich kētö e nö amin yip Rūpön, yip Kāt inrē, ròngtī inrē öp miyöngö Manasē.

2 KINṘÖTNGÖ 26:5

Kētöre anga-aṅ nö chöh ngam Tēv hē nuk sakāmö Sakariyā, ök mahaköpten ò nö pa-ekūö tö ngam Tēv; ngaich irô-òten ò nö chöh ngam Mā Tēv, kôlò anga-aṅ ngaich tö tī ngam Tēv.