YERIMIĀ 5:3 - TÖHET LĪPÖRE (Re-edited) Bible (BSI)

³ Ō Mā Tēv, röh ön minë mat Meh nö ngamëchkö kanô-en? Ngaich Man fōhoh cha, hö-ö pöri cha-a nö lökngöre tö chanökö; keuheūtngöre vah yin tö tī Meh, sōḵ pöri cha-a nö kēḵ chinökṙen re.

YERIMIĀ 5:3 Referans Kwoze

YERIMIĀ 7:28

Ngö ṙô min me-eṅ tö cha, Angū-ö ön ngih pumnāmö tarik töt hamang ṙô ngam Mā Tēv ngam Tēv cha, rö-ö inrē nö hō nö vëka; falāliyö öknö ngaich kanô-en; ngaich ök nö ṙöökiṙen nö i minuh cha.

YERIMIĀ 2:30

Chök alaha tī chin chökṙen yip kūön yīö, hö-ö cha-a nö kēḵ chinökṙenre; keuheūtngöre yik pròfĕt tökūö sanët yīö sā ngòh lāyön töyal.

SEFAINIĀ 3:7

Ngö ṙô chū-ö ngaich, Kô-en man min pa-ekūö tö chu, hōḵ man min kē minkahtenre; lökten ngam elyöngö ò nö ötrökiṙen, nö sā nup töhalēnlöng nö ngaich tö chu nö in ò: ka-euilö chanòhlö pöri cha-a ngaich hachōichngö nup la-enre.

Isayā 9:13

Sönngenre yip tarik nö öt havöötökūöre nö in ò ngam famôhò cha, öt rēhĕn cha-a nö chöh ngam Mā Tēv yip tömaṙôngö.

2 KINṘÖTNGÖ 16:9

Pò minë mat ngam Mā Tēv nö keuheūt maheuṅkre nö ing tumlat, nö hameuktö min hôiṅyöre nö lā in ò, kulō-ovṙen man ngaich in e angū-ö; pò meh min ngaich löktö kūö ing töngamuh öm höng īnu tö kinyūngö.

Isayā 42:25

Lökten nö hōngtö kui ò tö ngam tanānyö lanīnö ò, tö kumlēḵ ngam kinyūngö inrē; ngaich angū-ö nö ṙāten ò nö havīlöng tö tameūyö, sönngenre anga-aṅ nö öt akahalōn; ökngö kūö ngaich angū-ö tö ò, sönngenre anga-aṅ nö öt ṙātö e nö ellōn re.

HEPRĀI 12:9

Hēk inrē ayī-ö yöngu tö tarik nö chamökṙen hī, ngaich ayī-ö ṙung milēḵṙen tö cha: röh öi mötlö hòṅ hang chöngö ngam yöng ma-alaha, ngaich aṅ?

RŌMA 2:2

Akahalōn ayī-ö tö ngam kinṙôka aṅ im Tēv nö sā ngam kanô-en nö i yip maharūnöre nö i tö ngatī.

ISIKĪ-ĔL 24:13

Öp mum ötlanöökö yīö ap yech e. Pò chu hòṅ ahetlen yīö ngaich rö-ö yī-ö hetlöre ṙā-ang i nup mum yīö, hö-ö yin min hēk ahetlöng hanöng saha chu hatööḵngen ap tanānyö chu in yīö.

YERIMIĀ 32:19

Tökiröng i inlēnö tömihôiṅ inrē i la-en; tömātuvö tö töluvë-akkūö nö i në tatöökö tarik, rameushö tarik öm asā talöökö ò ṙòng nup la-en ò inrē;

YERIMIĀ 19:15

Ngö ṙô an ngam Mā Tēv yip tömaṙôngö, ngam Tēv Israel, Yĕh meuk, kētö tötlöök chin i kui ngih elpanam i kui në kun elpanam e inrē nup tötlöök tö ngaich nö ahangnyu nö in e, pò cha nö hakehngö likeunre, sō nö hang në ṙô chu.

YERIMIĀ 7:26

Sönngenre cha-a nö öt hang ṙô chu, hēk asītö elnang re, hangëṅ-eng likeun re pöri cha-a. Höichngen yin tö yik muvöhngö re.

Isayā 48:4

Pò chu akahalōn tö meh tömi-ô, ngam likeun meh inrē nö vët nö rahēḵ, mās inrē ngam māl meh;

INCHŌḴ-OṘÔ 27:22

Kiṙöpngö tökulō-ovö el chūök sanông nö sōngö nö holre tö sāiny tösōngö, sön öp kumlō-ov ò nö öt hōḵ nö ṙāngen ò.

INCHŌḴ-OṘÔ 23:35

Fōho chu yin, ṙô meh min hö-ö pöri chu-ö chök; fōho chu yin, öt akahaiṙen pöri chū-ö tö e, Ĕhē öich min aṅhen? Hòṅ chu chöh tahëng ka-eūtre.

INCHŌḴ-OṘÔ 22:12

Aṅtö mikah nun minë mat ngam Mā Tēv, kavalngö nup ṙô tötkô-en pöri anga-aṅ.

INCHŌḴ-OṘÔ 21:29

Hangëkūöre ngòh tötlöök tarik, ngëichkö talöököre pöri öp tö chiplen tarik.

Salmai 51:6

Yĕh meuk, hōtö tökô-en man lātuhēt: ngaich vīten chu min më-eṅ akahakūö tö mikah lā im tönyatngö.

2 KINṘÖTNGÖ 28:22

I hē ök kanihngen ò hanṙūöhangen anga-aṅ nö ötkô-en nö im Mā Tēv anga-aṅ ngòh rācha Ahas.

LA-EN LĒVĪ 26:23

Yē yīö min öt hanlööktitṙen tö Chu öi lökten i në, harīkngö talöököre pöri tö Chu;

2 RĀCHA 1:13

Hēk anga-aṅ nö tīnngö ök linūöi tak yöngkūö tötaneui anāi kumyung nö holtö yik tötaneūi anāi in ò. Ngaich ök linūöi tak yöngkūö tötaneui anāi kumyung nö kiröönngöre, yih ngaich anga-aṅ nö i kūö Ĕlaicha nö simngöre, ngaich vë-ekūö ò nö ngö ṙô, Ō tarik ngam Tēv, vë-ekūö meh chin, hökngen ngih nômö Chu tö nômö vē tarik meh tötaneūi anāi, nö tölöök yēḵ nö i kūö meh.

YERIMIĀ 8:5

Kūöyòh aich vē tarik nö havööngökūöre nöng iṙūöhen nö heūlritre? Haköptīre yin tö inchīlö, sōḵ yin nö havantöre.

YERIMIĀ 35:13

Ngö ṙô an ngam Mā Tēv yip tömaṙôngö, ngam Tēv Israel: Kuṙòh ngö ṙô tö yip tarik aṅ Yūtā yip aṅ Yērusalem inrē, Hö-ö yin hōḵ kē inköphöti hang në ṙô chu inrē? ṙô ngam Mā Tēv.

ISIKĪ-ĔL 2:4

Tösaṙākaṙen yin inrē vē tarik töngë-eṅ ellōn inrē tīnten meh chin in cha; ngö ṙô pömchö min tö cha; Ngö ṙô An ngam Mā Tēv.

TANĪ-ĔL 9:13

Sā kinūichngö e nö im chöngö Môsös, ṙòkhöre ngih öt kanôlò nö yih nö i kui hī, ngaich rö-ö ayī-ö havëka miṙēlōn im Mā Tēv ngam Tēv hī, öi havööngökūöre tö nup öt lanöököre ngaich hangihtöre töm kanô-en aṅ in ò.

AMŌS 4:6

Ngaich chin inrē kē-ĕkūö yīö tö hanëtö kanap i nup elpanam yīö nö ṙòkhöre nup nya-aṅkūö inrē i nup chūök yīö ṙòkhöre; ngaich rö-ö yī-ö havantöre in chu, ṙô ngam Mā Tēv.

Ranehlö 19:34

Chalô tö e, im huṙöich, tö ök lanòh nö ngöṙô tök ṙālö, Yĕhmeuk, holtöṙah öp kikōnyö chin vahë yöngre tö hatööm ṙōlhaka: tā-a tai mihiyōingen ò tö vain i ngih hatööm inrē; ngaich kuhēthötre më-eṅ ṙōlngöre holtöṙah ò, hòṅ hā haköpkö mumātö ap yöngre kikōnyö.

1 RĀCHA 13:33

Unôichrit e ang Yērōpoām nö öt havanköritre nö ṙā-ang im tötlöök talöökö re, hēk pöri anga-aṅ nö ahetlö aṅ i yip töng tarika nö kūönṙô nup kui rung chūökö, öp töng lōn ò: pòn hōtu nö kūönṙô-òvö nup i kui rung chūökö.

Salmai 51:8

Vīten chu hang ṙanāmölōn: hòṅ në tangëḵ, në likölngö meh nö ṙāmölōn.

Salmai 55:20

Kiyānglö këlre nö in cha yip tö lāmta nö in ò: ha-chōichngö ngam kinlēḵngô.

Isayā 26:11

Mā Tēv chônghaka an ngam kël meh, sönngenre cha-a nö öt meuk: meuk ngam kumlēḵlōn meh pöri min cha-a nö in yip tarik, ngaich sirōngngöre kūö; hôṅ, ṙāpngö kūö an min ngam tameūyö tö yip lā-al meh.

YERIMIĀ 3:3

Lökten an ngam kumṙah nö öt chahūköti, ngam kumṙah kūö-arūṙö inrē nö öt yih; sönen me-eṅ māl tö māl mī-inyihköre kikānö, sō me-eṅ öm sirōngkūö.

YERIMIĀ 15:7

Kichāngö cha chin öich aṅtī tö lanòk kinchang i kūö minë inkūp ngam panam; miṙivngölōn cha chin, fëlngö yik tarik re chin; hö-ö cha-a nö havöötöre nö ṙā-ang i nup talöököre.

YERIMIĀ 17:23

Sönngenre cha-a nö öt hang hēk öt asītö elnangre, hakeh likeunre pöri cha-a, pòn sō nö hang sō inrē nö kē inköptöre.

YERIMIĀ 44:10

Öt hayāichngöre cha-a nö pòrô töngamuh, ötrēhĕn nö lök i chöngö chu, lök i nup ṙahātö chu i kūö yīö i kūö yik yöng yīö inrē.

AMŌS 4:8

Lökten nuk tönët hēk tölūöi elpanam nö chuh im töhĕng elpanam nö òk mak, ngaich rö-ö nö tööḵngen: sönngenre yī-ö öt havantöre in chu, ṙô ngam Mā Tēv.

AMŌS 4:9

Hachökö yīö chū-ö aṅtī tö nyanangngö nganāvngö inrē; nup töpōyen panô-òṅ yīö, panô-òṅ vāin yīö inrē, any-chīr chōn yīö, ôlīv chōn yīö keuheūt nö ngaich tö kūö kāta-ëm: sönngenre yī-ö öt hòṅ havantöre in chu, ṙô ngam ṙô Mā Tēv.

AMŌS 4:10

Ngaich chū-ö söömtö tölëlngö kūö invah in yīö tösā nup i Aikup: fëli tö chu nö yahatö fël yik ṙāl tarik yīö, ngaich nuk kōra yīö inrē nö kē-ĕyö; ngaich vīten öp inngeūṅtö öp elyöngö yīö nö meutlö nö löklö elmeh yīö; sönngenre yī-ö öt havatöre in chu, ṙô ngam Mā Tēv.

AMŌS 4:11

Tiṙöli tö chu nup rīkre in yīö sā tī ngam Tēv hē tinṙölngö Sôtöm Kômòra inrē, ngaich yī-ö sā öp hanūkūö tameūyö tö töknyu nö ṙā-ang im töhūkūö: sönngenre yī-ö öt havantöre in chu, ṙô ngam Mā Tēv.