MANEUTNYI 3:18 - TÖHET LĪPÖRE (Re-edited) Bible (BSI)

¹⁸ Ngaich chā-a min nö hang ṙô meh: ngaich më-eṅ yih ip rācha aṅ Aikup, tö yip mā kūö Israĕl inrē, ngaich ngöṙô min yī-ö tö ò, meūkö kūö in tö ngam Mā Tēv, ngam Tēv yip Hīprū: yĕh, vë-ekūö meh in, hökngen ih kiröönngöre el tönyaṅlnyi, lūöi sumkam rô-òlkūö, hòṅ ih kētö tökētu im Mā Tēv, ngam Tēv ih.

MANEUTNYI 3:18 Referans Kwoze

MANEUTNYI 9:1

Ngaich ngam Mā Tēv nö ngö ṙô tö Môsös, Kuṙòh kuhēthötre man in Fërō, vë-eny nang ò, Ngö ṙô an ngam Mā Tēv, ngam Tēv yip Hīprū. Hökngen më tarik chu nö kiröönngöre, hòṅ cha nö lök la-en chu.

MANEUTNYI 7:16

Ngaich ngö ṙô pömchö tö ò, Tīntu chin in meh tö ngam Mā Tēv, ngam Tēv yip Hīprū, nö ngö Ṙô, Hökngen yip tarik Chu nö kiröönngöre, hòṅ cha nö lök la-en Chu nö el nyaṅlnyi: meuk mana, tö meh höng öl hang.

MANEUTNYI 10:3

Ngaich nā Môsös nā Āròn, nö chuh in Fërō, ngaich ngö ṙô tö ò, Ngö ṙô an ngam Mā Tēv, ngam Tēv yip Hīprū. Irô-òten öm min sōḵ hayāichngöre i kūö chu? Hökngen më tarik chu nö kiröönngöre, hòṅ cha nö lök la-en chu.

MANEUTNYI 9:13

Ngaich ngö ṙô ngam Mā Tēv tö Môsös, ka-euilö kūö man choholre ip peuheū, söklöre öm i kūö Fërō, ngö ṙô tö ò, Ngö ṙô An ngam Mā Tēv, ngam Tēv yip Hīprū, hökngen më tarik Chu nö kiröönngöre hòṅ cha nö lök la-en Chu.

Salmai 110:3

Hòṅ yip tarik Meh nö kētöre ip sakāmö minhôiṅyö Meh: i vanāiyö ngam hanëtö meh, im peuheū, ap inyālö nö sā tacham.

2 KINṘÖTNGÖ 30:12

I kui Yūtā ngam kël ngam Tēv nö kētö tö hĕng ellōn cha nö la-evṙen tö hinôtöre tök rācha tö yik kūön rācha inrē nö löktö im ṙô ngam Mā Tēv.

YÔSUĀ 1:17

Sā ih misī hang ṙô Môsös i tökeuheūttöre ngatī min īhö hang ṙô meh: höng in meh an yēḵ ngam Tēv meh ngam Mā Tēv, sā ò misī nö in Môsös.

KINṘEŪKÖ 17:4

Ngaich më-eṅ min hulalngö u el ap rūkui manūlö i kūö ngam minkahngö kanô-en, i chūök hā kô-en höö kūö.

MANEUTNYI 30:6

Ngaich ṙātö e min më-eṅ i kūö öp ranangkūö öp ranghö öp kasòng tökô-en inmeuktö i kūö ngam anūichö miṙēlōn ngam i kui ngam tökô-en inmeuktö, i chūök chu min meuk kūö meh.

MANEUTNYI 25:22

In e Chin min meukkūö meh, ngaich löknyö kui ngam anūichö miṙēlōn ṙô Chū-ö min vë-ekūö meh, löknyö hôi minë tö nët kërup i kui ngam kasòng Chöngö ngam minkahngö kanô-en, tö nup taṙòkhöre kahëtö Chu min in meh inchöngten yip kūön Israĕl.

MANEUTNYI 19:1

Im linūöyö chingëṅt unôichrit yik kūön Israĕl nö kunyī-inyre nö ṙā-ang panam Aikup, im sakāmö angū-ö chā-a nö sölta ip tönyaṅlnyi i Sināi.

MANEUTNYI 4:31

Ṙātö ellōnre ngaich yik tarik: ngaich hē cha nö hang ngam Mā Tēv, tö Ò inrē nö meuk kanihngen cha, ngaich sōntö kuire chā-a nö Salām.

MANEUTNYI 4:24

Ngaich el talöökö ò nö chuh ik chūökre, ngaich meuk kūön ò ngam Mā Tēv, ngaich nö hòṅ fëlngen ò.

MANEUTNYI 3:16

Kuṙòh, hamūl yip mā i Israĕl, ngöṙô tö cha, meūkö an tö chu Ngam Mā Tēv, ngam Tēv yik yöng yīö, Tēv Aprahām, Isāk, Yāköp inrē, ngöṙô an tö chu, Chöhken yīö chini, meuk nup inlanken yīö chin i Aikup:

MANEUTNYI 3:12

Ngaich ngöṙô Angā-aṅ, In meh takô Chin min; ngih ön min minkahngö nö in meh tö Chu öich tīnten meh: yē meh min ngaich kēnyö yip tarik nö ṙā-ang Aikup. Ngaich yī-ö min lök la-en ngam Tēv ikui ngih rôngö.

Ranehlö 48:3

Ngaich Yāköp nö ngöṙô tö Yôsĕf, Meūkö an ngam Tēv tökeuheūttöre chöngö töchu nö i Lus ip panam Kanā-an, ngaich hakôlò chu,

Ranehlö 17:1

Ngaich hē Aprām nö machūötör anāi machūötör samyeūheu nö köiny, meūkö ngam Mā Tēv tö Aprām, ngaich ngöṙô tö ò, Chū-ö Chin Tēv tökeuheūttöre chöngö; lök ikūö Chu, hateūngöre më-eṅ inrē.

Ranehlö 15:1

Unôich tönë ngam ṙô ngam Mā Tēv nöyih nö in Aprām nö i inmeukhömat, nö ngöṙô, Aprām, un pa-ekūö: Chū-ö Chin lanaklö meh, kiröng nup min raneushö meh.

Ranehlö 12:1

Ngaich ngöṙô ngam Mā Tēv tö Aprām, Kēḵĕngre man ṙāngö ngam panam re, ṙāngö yip makalahare, ṙā-ang patī yöngre inrē, ip panam öp hameuktö Chu min in meh:

YERIMIĀ 26:5

Kūötenre inrē tö minë ṙô yip tarik chu pròfĕt yip tahīntö chu in yīö öich mileūchen, pòrô yī-ö öt hakūötenre,

YERIMIĀ 2:6

Hö-ö cha-a nö ngö ṙô Isuh ap Mā Tēv öp kamënyen ih ṙā-ang panam Aikup, öp mahachō-o ih el inchōn tönyalnyi, ip panam tönyalnyi kuyāyö tö-anūlu inrē ip panam tönyô tökufëi sinngūlö inrē, ip panam töhĕng tak lamök i chūök törö-ö tarik nö iyöng?

YERIMIĀ 2:2

Kuṙòh, ahangtö hāngö Yerusalem, Ngö ṙô an ngam Mā Tēv, köpölōn chin tö kanô-en hanāngen meh tö sā tö hapīhö, tö inlahen meh tömkörit chu el inchōn tönyalnyi, ip panam töt teūichtu aṅkūö.

Isayā 64:5

Höngkūö ò me-eṅ öp tö ṙāmölōn nö la-evṙen tö lanöökö, acha-a yip tö köpölōn tö meh i nup talöökö meh, Yĕh meuk, līn man, köölö fālen īhö: marô-òten in ngaich i në tökööl re, hayöökaṙen öi min?

MANEUTNYI 30:36

Sōngö e min më-eṅ nö pahīöya, ngaich ṙātö e i kūö öp tökô-en inmeuktö chu min meukkūö meh: ngaich angū-ö min nö in meh nö tölngö töhet.

Ranehlö 14:13

Ngaich umuh nö yihtöre ök hĕngtak tötkô-òngvah, ngaich vë-enynang Aprām ök Heprāi: iyöng inuk chōn tarpin angā-aṅ nuk chōn Mamrī aṅ Amôr, hanöngkisānö Askòl, hanöngkisānö Aner inrē; ngaich chā-a vē nö hol Aprām.

MANEUTNYI 4:1

Ngaich ngöṙô Môsös nö sapṙô, Yĕh meuk, hö-ö pöri min chā-a nö ṙātö ellōnre nö in chu, ötrēhĕn nö hangṙô chu: pòn ngöṙô min chā-a, Rö-ö an ngam Mā Tēv nö meūkö tö meh.

MANEUTNYI 5:1

Unôichngöre nā Môsös nā Āròn nö yih, ngaich ngöṙô tö Fërō, Ngöṙô an ngam Mā Tēv, ngam Tēv Israĕl, Hökngen më tarik chu nö kiröönngöre, hòṅ cha nö ip tö kiröng, nyinā-aṅ in chu nö el nyaṅlnyi.

MANEUTNYI 5:3

Ngaich ngöṙô chā-a, meūkökūö An ngam Tēv Hīprū tö ai: vë-ekūö meh an, hökngen ih kiröönngöre el nyaṅlnyi höng lūöi sumkam rô-òlkūö, öi kētö tökētu i ngam Mā Tēv ih, hòṅ ih ötlëlngö tö tī Ò tökūö invah hēk kūö sanët.

MANEUTNYI 8:1

Ngaich vë-ekūö Môsös ngam Mā Tēv, Kuṙòh chuh in Fërō man ngö ṙô tö ò. Ngö ṙô An ngam Mā Tēv, Hökngen yip tarik Chu nö kiröönngöre, hòṅ cha nö lök la-en Chu.

MANEUTNYI 8:20

Ngaich ngö ṙô ngam Mā Tēv tö Môsös, Chōholre man, ka-euilö kūö tö peuheū, söklöre i kūö Fërō, yĕh meūkan nö yih nö im mak, ngö ṙô tö ò, Ngö ṙô An ngam Mā Tēv, hökngen yip tarik Chu nö kiröönngöre, hòṅ cha nö lök la-en Chu.

MANEUTNYI 17:5

Ngaich ngö ṙô ngam Mā Tēv tö Môsös, Iṙūöhöröön man urēhĕkūö më tarik, ngôḵ yip mākūö Israĕl inrē nö hol meh; kuṙòh kiröönngöre, kēḵ öp tinkung nö eltī meh, öp aṅtī meh foh el ap tahël.

MANEUTNYI 4:23

Ngöṙô Chin tö meh. Hökngen ngam kūön chu nö kiröönngöre, hòṅ ò nö lök la-en chu: ngaich më-eṅ sōten ò nö kiröönngöre. Yĕh meuk, fëlngö ngam kūön meh chin min ngam lanòh meh.

MANEUTNYI 8:23

Haköhngen yip tarikre Chin tö yip tarik meh; ip huṙöich öp min angū-ö minkahngö.