INRĀMÖRE 2:1 - TÖHET LĪPÖRE (Re-edited) Bible (BSI)

¹ Yöng tī ngam Mā i tanānyö ò nö ṙātö ngam kikānö kūön nö el katòh taṙul! Löktö el halīöngö tī an nö suktö ngam tövai aṅ in Israel nö el tumlat; hö-ö an nö köpölōn tö ngam ranöönö röönre hē öp sakāmö ò.

INRĀMÖRE 2:1 Referans Kwoze

Salmai 132:7

Chuh el minë inrūkui Ò in min: sōntöre in min ip ranöönö röön Ò.

1 KINṘÖTNGÖ 28:2

Choholre ngaich ök rācha Tāvit nö söklöre ngaich ngö ṙô: Hang ṙô chu, mak alaha chu tarik chu inrē. Tö ellōnu chin tö minānlö öp patī chūök ṙinātö ngam kasòng kinlēḵngô ngam Mā Tēv, nö ranööntö röön ngam Tēv hī inrē; ngaich chū-ö halēnken minānlö e.

T. LŪKÖS 10:18

Ngaich ngö ṙô Anga-aṅ tö cha, Meuk ngam sī-ö Chin, nö suktöre, sā hanyālö, nö ṙā-ang el halīöngö.

T. MËTIV 11:23

Me-eṅ inrē, kafarnahum; hapōilöng öm min el halīöngö? Chuh lataṙeū man min, el chūök tökapah; pò nuk minhôinyö öre la-en, nö ngaichngen nö i Sôtòm, nuk töngaichngen nö in meh; ṙòngmö ngöh öre angū-ö nö söl ing töngamuh.

YŌ-ĔL 2:2

Sakāmö sinngūlö an anūnngen inrē, sakāmö taṙul tökufëi inrē sinngūlö, sā pinrātngö minlīlö peuheū nö i kui minë rôngö; tökiröng tarik tökalēk inrē öt töngatī-ivö i tö misī, öt rēhĕn min nö hēktöre unôichrit cha, pòrô nö i ṙôken samyeūheu töṙōl köl chap.

ISIKĪ-ĔL 30:18

Sangūla min ngam sakāmö nö i Tehafnehes, hē chu min tiṙōlngö ngam pūlngö Aikup, ngam inkeūlen kumlēḵ ò inrē min nö yihih kinheūten; kahultöre kui an min töṙul, chuh el inkövö min yip kūön ò kikānö.

Salmai 99:5

Hapōilö ngam Tēv hī yin, ngam Mā Tēv; salāman inrē im anūichö Ò! Töhet An!

T. LŪKÖS 10:15

Me-eṅ inrē Kafarnahum; hapōilöngö öm min el halīöngö? Rö-ö; chuh el kitēlköre man min.

ISIKĪ-ĔL 24:21

Ngö ṙô tö ngam patī Israel; Ngö ṙô an ngam Mā Tēv: Yĕh meuk, hachōichngö ngam töhet chūök re chin min, ngam inkeūṙö mina-aṅ yīö, ngam kumchik elmat yīö, ngam kūilōn yīö inrē; ngaich yip kūön yīö min kīköinyö kikānö inrē yip töṙā-ayö tö yīö nö fuk kūö sanët min.

INRĀMÖRE 4:1

Sītih öng ngam humlum nö paheumngöre elmat, ngam töhet humlum nö haṙī-ingre! Minë töhet ihong parāta nö hulalhaka nö kö I kui kanröönö.

INRĀMÖRE 1:1

Yöng chanëvö ngih elpanam nö ūichhak ngih tötööḵlö tö tarik sin! Sitih öng nö vītöre nö sā tafīösi, ngam tökiröng sin nö in në pumnāmö tarik! Anga-aṅ ngam kūön Rānī sin nö i në elpanam vītöre ngaich nö aṅ el katòh.

Isayā 64:11

Haṙāpi tö tameūyö nup töhet tövai patī ih, i chūök yik muvöhngö ih nö ha-öinyö meh; ṙòkhöre nuk tölöök chehen ih nö piyāyi.

2 SAMUĔL 1:19

Fëliyö an ngam ineū-eu meh, Ō Israĕl nö i kūi ngam tömarô- òl kui chūökö: yöng fanuk- ngö ngam tökalēḵ!

1 SAMUĔL 4:21

Ngaich anga-aṅ nö kaheuk mine-eny ök nyīö nö Ichapōt nö ngö ṙô Ṙāngö in Israĕl ök nö ngaich kanôlò: pò ök kasòng ngam Tēv nö kē-ĕ, kūö ök yöng pīhö ò inrē tök pīhö ò.

INRĀMÖRE 2:17

Ngaich tī an ngam Mā Tēv im chööḵnyö ò, hateungngö ngam inngāṅngö an; halēnlö e an nö marô-òten misī, öt aṙē-ĕlōn an nö tiṙölhanga; ṙāmölōn tī an nö ngaich tö ngam tökunyaha elmat tö meh, ngaich nö hapōilö minhôṅyö më lā-al meh.

ISIKĪ-ĔL 19:12

I tanānyö pöri öp vāin nö teuklöngö, kavāli ngaich nö el tumlat; nyangngö ngaich tökūö kuföt chuhöt; köichi ngaich nuk ṙòng ò nyangngö ngaich ök töngëḵ kaha ò; ṙāpngökūö ngaich ngam tameūyö tö ò.

1 SAMUĔL 4:22

Ngaich ngö ṙô anga-aṅ, Ṙāngen Israĕl ök kanôlò: pòn kē-ĕnyö ök kasòng ngam Tēv.

Salmai 89:45

Hacheū-euyö nuk sakāmö inyālö tö Meh: kahūmiyö An tö Meh tö sumrōngkūö.

YERIMIĀ 30:14

Ṙòkhöre yik töhāngenlōn tö meh nö vaichngen meh; hö-ö yip nö kūö tenre tö meh: pò chu sā tī tökunyah elmat öich in meh, sā sācha öp töt aṙē-ĕlōn tökunyaha elmat, pò ngam fālen meh nö kiröng, kūö minë tökööl meh nö pachāla elmat.

INRĀMÖRE 1:12

Öt lökngöre öi yī-ö, ṙòkhöre yī-ö lamök ngö umuh? Ngëicha meuk inrē yĕn tö ngatī-iv miṙivlōn nö sā miṙivlōn chu ngam tökētu nö i kui chu, ngam tī ngam Mā Tēv ik sakāmö tökiröng tanānyö ò.

INRĀMÖRE 4:11

Hateungngö lanīnöre an ngam Mā Tēv, ṙösnyö ngam töṙāch an nö ngaich tanānyöre; tōttökūö tameūyö an inrē nö i Sīyôn, öp töṙāpngökūö tö rööntö machööḵlö e.

ISIKĪ-ĔL 13:13

Lökten ön ngam Mā Tēv nö ngö ṙô: Vītö kuföt chanôichö chin min nö im lanīnö chu; ngaich min inrē öp yöng kumṙah nö i tanānyö chu, tökiröng tökënngöre kumṙah inrē i lanīnö chu nö piyāingö e.