INLAHEN 1:8 - TÖHET LĪPÖRE (Re-edited) Bible (BSI)

⁸ Teūngen pöri min yī-ö tö kanô-òṅ, hē ngam Töhet Fanöinylö nö i kui yīö. Ngaich yī-ö min ameūken Chu, i Yērusalem, keuheūtngöre chūök i Yūtā, Samariā, ane inrē söl ip manā-angkūö ngih pangam.

INLAHEN 1:8 Referans Kwoze

T. MËTIV 28:19

Lökten yin kuṙòh; vīten vē taṙòkhöre tarik nö mahaköp; vōkö cha i Mine-eny ngam Yöng, Kūön, Töhet Fanöinylö inrē.

T. MĀKÖS 16:15

Ngö ṙô Anga-aṅ tö cha; Kuṙòh; chuh i në taṙòkhöre yin panam, mumkahten taṙòkhöre tarik tö ngih tölöök inhānga.

RŌMA 15:19

I kanô-òṅ nup minkahngö, pinngangkūö inrē, i kanô-òṅ ngam Töhet Fanöinylö; hòn löktökūö Yerūsalem, vinngö nö Illirikum, öich keuheūt ahangkö ngam tölöök inhangkö Kristū;

INLAHEN 5:32

Ihö in ameūkö u; ngatī inrē ngam Töhet Fanöinylö, ngam kahëtö ngam Tēv nö i yip hamang chöngö Ò.

INLAHEN 4:33

Ngaich holtö minhôiṅyö yik tanīnöṙô nö eūkö invanlö ngam Mā Yēsū; pōyen inlōnti aṅ in cha-a inrē nö ṙòkhöre.

INLAHEN 6:8

Ngaich ang Satēpan nö inlōntuvö, minhôiṅyu inrē; ngaich tī tö yöng pinngangkūö, minkahngö inrē nö i yik tarik.

RŌMA 10:18

Ngö ṙô pöri chu-ö; Kô aich nö öt hang? Höng rö-ö, keuheūtngöre chūök chahuhu ap ṙô cha nö ing panam: söl i manā-angkūö ngih pa- nam nup ṙô cha inrē.

T. YÔHAN 15:27

Eū-a yī-ö inrē, pò yīö in Chu tök ranehten.

T. LŪKÖS 10:19

Yĕh meuk; ngaich Chin kē-ĕkūö yīö tö kanô-òṅ yīö rööntökui pēch, tökanaptöritre inrē, ane inrē i kumlēḵ ngòh tökunyahaṅelmat. Öt töchökhuṙenvö min tö yīö.

INLAHEN 1:5

Pò Yôhan nö aṅtī tö mak nö vōk; aṅtī tö ngam Töhet Fanöinylö pöri yī-ö min vōk, öt ṙōl töre sumkam.

T. MËTIV 24:14

Ahangka min ngih tölöök inhangkö ngam pūlngö, i në taṙòkhöre panam, inmeukhömat taṙòkhöre tarik; ngaich möl min öp manāngen nö yih.

INLAHEN 2:32

Anga-aṅ ngòh Yēsū töhacholöngö tö ngam Tēv; ṙòkhöre in ihö vamënyen Ò.

SAKARIĀ 4:6

Ngaich sapṙô anga-aṅ nö vë-ekūö chu, nö ngö ṙô, Ṙô ngam Mā Tēv an nö in Sērupāpĕl, nö ngö ṙô: Öt lökten i kumlēḵ, öt rēhĕn nö lökten minā-aṅ, lökten im Fanöinylö chu pöri, ṙô ngam Mā Tēv yip tömaṙôngö.

INLAHEN 22:15

Pò meh min ameūken Ò i taṙòkhöre tarik, eūkö nup maheuṅk meh, ahang meh inrē.

MAIKA 3:8

Kô-en pöri chū-ö tööḵlö tö minhôiṅyö aṅ im töhet Fanöinylö ngam Mā Tēv, inkaha, fālen inrē, kumlēḵ inrē öich vë-enynang Israel inrē tö tökööl ò.

Salmai 22:27

Ṙòkhöre i manā-angkūö ngih panam min nö köpölōn, ngaich havöötöre nö im Mā Tēv: ngaich ṙòkhöre min aṅ në pumnāmö tarik nö salāmö meh.

INLAHEN 13:31

Ngaich ṙōl sumkam Anga-aṅ nö meūkö tö cha, yip yamih nö hol Ò nö i Yerūsalem, nö ṙā-ang Kelelī; yip ameūken Ò töngamuh nö i vē tarik.

T. LŪKÖS 1:35

Ngaich ngö ṙô ngam ma-ahānga nö sapṙô ò, Yih An min ngam Töhet Fanöinylö nö in meh; ane inrē ngam kanô-òṅ ngam Lamātulöng min nö hanyat tö kui meh; lökten min Öp töfötnyuvö, nö töhëtö invëka nö Kūön ngam Tēv.

INLAHEN 3:15

Ngaich fëlngö ngam löknnyö nômö, ngam tö hachohlöng nö ngaich tö ngam Tēv; ihö in ṙòkhöre mameūkö e.

Isayā 52:10

Hameuknyö ngam töhet kël re an ngam Mā Tēv nö i kūö yip pumnāmö tarik nö ṙòkhöre; söl manā-angkūö ngih tumlat yip min nö ṙòkhöre nö meuk, ngam inyööken aṅ im Tēv hī.

KÒLÒSĪ 1:23

Yē yīö ngati urāta im mikah, ultöre ngaich köp inrē, ngaich öt ṙuhöyö tö ngam mineūka ahang yīö aṅ im tölöök inhānga, ngam tö ngaich misī nö ahangnyu nö i në taṙòkhöre tövīlöngö elkatòh ngam halīöngö; ngam lökten chu chu-ö Pôl, vītu mameukṙen.

INLAHEN 1:22

Hēten tö ngam vinôkö tī Yôhan, söl im sakāmö hē Ò nö kēḵlöngö, nö ṙā-ang in hī; hòṅ hĕng taka öp tö cha, vame-eny ngam invanlö Ò, nö hol hī.

Isayā 66:19

Ngaich chū-ö min asöklö minkahngö in cha. Ṙeū-eung in cha min chū-ö tīntö yip tö-aṅ in yip pumnāmö tarik, i Tarsis, Put, Lut inrē, yip lumreiny, i Tūpòl, Yavān inrē, i nup kun panam tömarôvat, yip tö öl nö hang ineūnyö chu hēk öt meuk kanôlò chu; ngaich cha-a min nö vënyö kanôlò chu in vē pumnāmö tarik.

Isayā 49:6

Ngö ṙô anga-aṅ, töhöhövṙen an angū-ö tö meh öm tarik chu mahachohlö miyöngö Yāköp, mahavantö ngam töma-īṅlöng ang Israĕl; kēten meh chin min öm ëāṅvö i yip pumnāmö tarik, hòṅ ngam inyööken aṅ in chu nö sölngö i manā-angkūö ngih tumlat.

INLAHEN 8:1

Hōḵngö kinpaha ò inrē ang Sôl. Ngaich hē e, ök yöng ötinkôlò ngam māṅ i Yerūsalem; ngaich cha-a nö ṙòkhöre nö kö parātṙen keuheūngöre chūök i chīṙö Yūtā, Samariā inrē; höng yik tanīnöṙô hötītö.

Isayā 42:10

Tikökhökūö ngam Mā Tēv tö tufömngöre tinkökö öp nöinyö ò inrē löktökūö manā-angkūö ngam tumlat; yī-ö chamuh el mai, ṙòkhöre nup aṅ e inrē, minë kun panam, tö yip aṅ u inrē.

Salmai 98:3

Köpölōn An tö ngam miṙēlōn, ngam kanô-en Ò inrē nö i patī Israĕl: ṙòkhöre nup manā-angkūö ngih panam nö meuk ngam inyööken aṅ im Mā Tev hī.

T. LŪKÖS 24:29

Ngaich asökngen Ò cha-a, ngö ṙô, Höngngöh Man in ai; tön ngaich an nö hòṅ harap; meutti min ngam tavūöi nö ngaich. Ngaich anga-aṅ nö chuh in cha, nö höngngöh.

YERIMIĀ 16:19

Ō Mā Tēv, kumlēḵ chu chūök chu inrē töngëḵ, innyatlö chu ip sakāmö kanihngen, löö in meh yin nö yih vē pumnāmö tarik löktökūö i nup manā-angkūö ngih tumlat ngaich ngö ṙô: Öt amīnu yik yöng ih höng minyôiny-aṅ, chehen töt kanôluṙô nö töt taneunglen.