HEPRĀI 11:12 - TÖHET LĪPÖRE (Re-edited) Bible (BSI)

¹² Lökten inrē nö lökten im tö hĕng tak, nö ngaich anga-aṅ nö ṙētö kupah, sā ṙôken taneūsömat ngam halīöngö tö ṙôngöre, sā kuyāyö inrē, nup i kūö mai, öt kanṙeūken.

HEPRĀI 11:12 Referans Kwoze

Ranehlö 22:17

Im inkôlò Chin hakôlò meh, i ṙinūöhöl ṙôken Chin öich ṙūölö ṙôken ngam kūön meh sā taneūsömat ngam halīöngö ane inrē sā kuyāyö ngam kūö mai; hayōm kūö inkūp yip tökunyāha elmat an min ngam kūön meh:

Ranehlö 32:12

Ngaich Më-eṅ tö ngöṙô, Kô-en Chin min hakôlò meh, ngaich vīlö ap kūön meh nö sā kuyāyö ngam mai, nö töt kanṙeūken tö ṙôngöre.

HŌSĪ 1:10

Sönen pöri min öp ṙôken kūön Israel ö sā kuyāyö mai, öp töt kanlahen ṙôken, öt rēhĕn nö kanṙeūken; ngaich ngö inlahen angū-ö min, nö ṙënngen ngam töṙônyu nö in cha, rö-ö yin yī-ö tarik chu, ngö pöri min ngam ṙô nö in cha, Kikōnyö yin yī-ö kūön ngam tö-aṅ Tēv.

YERIMIĀ 33:22

Sā minë tömaṙôngö el halīöngö nö öt kanṙeūken minë kuyāyö ngam mai inrē nö öt kanlahen ṙôken, ngatī chū-ö min ṙūölö ṙôken yip kūön Tāvit öp tarik chu, yik kūöṙô inrē lamökngörit Lēvi yip mameukṙen chu.

Ranehlö 15:5

Ngaich kēḵnyen ò Anga-aṅ nö el kahôiyö ngaich ngöṙô, Ngëichkö lā el halīöngö, kaheuk minë taneūsömat, yē meh kô kaheūkö u: ngaich ngöṙô Anga-aṅ tö ò, Ngatī ap kūön meh min.

Ranehlö 26:4

Ṙūölö ṙôken ap kūön meh Chin min sā taneūsömat ngam halīöngö; ngaich kē-ĕkūö ap kūön meh min tö në panam; ngaich ip kūön meh min nö ṙòkhöre vē mumā-aṅ tarik ing panam nö kanôluṙô;

INMEUKHÖMAT 20:8

Ngaich kunyī-inyre min nö hachīl vē pumnāmö tarik vē mī-i në tö fën nang ngih panam, ngaich Kôk, Mēkôk inrē, nö hamūlö cha nö mūl nö im kinyūngö: sā ṙôken kuyāyö ngam mai cha-a tö ṙôngöre.

Isayā 10:22

Pôn pòrô më tarik Israĕl nö sā kuyāyö mai, höng yip chööḵṙen cha min mahavan: kalēḵ öp kinheūtngö vah, taṙēchlöngö nö holtö lanöökö.

MANEUTNYI 32:13

Köpölōn tö Aprahām, Isāk, Israĕl inrē, yik tarik meh, yik chūök ṙô meh inrē kilēḵngôre, öm ngö ṙô tö cha, Ṙūölö ṙôken ngam kūön meh chin min sā taneūsömat ngam halīöngö, ngaich keuheūtlöre min ngih panam ngih ṙô chu nö kētu min tö chu ip kūön meh, ngaich cha-a min nö amin tö e nö örheūheu.

Isayā 48:19

Sā kuyāyö öre inrē yip kūön meh, yip lamöknyö in meh inrē nö sā pinhīöyö kuyāyö: öthō öre öp minë-eny ò nö rökiṙen öt rēhĕn nö piyāyi nö i kūö chu.

NAHIMIĀ 9:23

Ngaich më-eṅ ṙūölö ṙôngö yik kūön cha nö sā taneūsömat ngam halīöngö, ngaich kēten cha më-eṅ ip panam öp ṙô meh i yip yöng cha chūök cha nö kuhēthötre nö kē-ĕ e nö amin re.

1 KINṘÖTNGÖ 27:23

Öt kaheuktö yik tö lātaṙeū tö tö nët anāi samyeūheu ang Tāvit, pò ngam Mā Tēv nö kilēḵngôre nö vīlen Israĕl nö sā ṙôngö taneūsömat ngam halīöngö.

1 RĀCHA 4:20

Maṙôngö ngaich Yūtā tö Israĕl inrē, sā kuyāyö nup i kūö mai töṙôngöre, nyā-aṅvkūö òk inrē ṙāmölōn.

2 SAMUĔL 17:11

Halēnö meh pöri chū-ö öm hamūl yip aṅ Israĕl nö in meh, löktökūö Tën söl i Pīrsīpā, öi sā ṙôken kuyāyö i kūö mai tö ṙô ngöre; hakôtenre inrē më-eṅ kiyung.

1 SAMUĔL 12:5

Ngaich ngö ṙô anga-aṅ tö cha, Ngam Mā Tēv an mameuk lālô yīö, ngam hacham elkui ò inrē mameuk i ngih sakāmö, tö yīö öt kanôtukūö tö yô-òv eltī chu. Ngaich cha-a nö ngö ṙô, Anga-aṅ An mameuk.

KAMHÔKA 7:12

Ngaich yik aṅ Mītiā tö yik aṅ Amelek inrē ṙòkhöre inrē yik kūön aṅ lā chuhöt nö hulalhaka nö el ngam achāṙö sā ṙôken mufākö tö ṙôngöre: öt kanṙeūken nuk ūṅt cha, sā kuyāyö i kūö mai tö ṙôkenre.

YÔSUĀ 11:4

Kunyī-inyre ngaich, ṙòkhöre inrē yik kumyung in cha, pōyen tarik, höng sā kuyāyö i kuö mai tö ṙôkenre, nö kōravö inröluvö inrē nö pōyen.

I. CHÖNGÖ 28:62

Ngaich më-eṅ min höng öt ṙōltit tak tö ōtre, öi tö sā ṙôken taneūsömat ngam halīöngö tö ṙôngöre misī; pò meh öt hang ṙô ngam Tēv ngam Mā Tēv meh.

I. CHÖNGÖ 1:10

Maṙôngö tī an ngam Mā Tēv tö yīö ngam Tēv yīö, yĕh meuk, ngaich yin töngamuh sā minë taneūsömat ngam halīöngö tö ṙôngöre.

RŌMA 9:27

Ngaich Isayā nö ngö ṙô nö in Israĕl, Yē ṙôken yip kūön Israĕl nö sā kuyāyö ngam mai, höng yip chööḵ min tö hayöökaṙen:

HAPAKŪK 1:9

Ṙòkhöre yip nö yih nö töhòṅ chökhuṙen; ngë-eṅkūö yip nö kū-ötö lā chuhöt; hamūl töhakövö cha-a inrē sā ṙôken kuyāyö.