5 Авйӧ да керӧ Кристос Исусыс моз.
Кин баитӧ, ме пӧ Сыкӧт ӧтлааси, мортыслӧ сэк и овны колӧ Кристосыс моз.
Босьтӧ ас выланыт Менчим сийӧсӧс, велӧтчӧ Месянь. Ме рам да небыт сьӧлӧма. Сэк тіян сьӧлӧммезныт шоччисясӧ.
Тійӧ корӧмӧсь сідз овны. Ачыс Кристосыс эд пессис-мырсис миян понда. Сія миянлӧ мыччаліс, кыдз миянлӧ мунны Сы туй вылӧт.
Кристосыс миян понда Аслас вывтырӧн уна пессис-мырсис. Сідзкӧ, и тійӧ лоӧ лӧсьӧтчӧмӧсь пессьыны-мырсьыны. Вывтырнас пессись-мырсись мортыс дугдӧ керны умӧльсӧ.
Керӧ ме моз: ме пыр вынсьӧтча лӧсявны быдӧнныскӧт. Ог кошшы бурсӧ ас пондасим, а мӧдіккез понда, медбы нія мезмисӧ.
Олӧ ӧтамӧднытӧ радейтӧмӧн, кыдз и Кристосыс радейтӧ миянӧс. Сія эд миян понда сетіс Асьсӧ Еныслӧ чӧскыт руа езъялан козин туйӧ.
Еныс сетӧ мыла да вынсьӧтӧ. Ась сія отсалӧ тіянлӧ лӧсявны ӧтамӧдныткӧт Кристос Исуслӧн велӧтӧм сьӧрті,
Быдӧсын ме тіянлӧ мыччалі, кыдз колӧ уджавны да отсавны вынтӧммеслӧ. Тӧдвыланыт видзӧ Дӧсвидзись Исуслісь кыввесӧ. Сія эд Ачыс висьталіс: сетавны босьтӧмысся буржык».
Кристосыс эд эз тӧждісь Ас йывсис. Вежа Гижӧтас тай висьталӧм: «Тэнӧ видіссеслӧн видӧммезныс усисӧ Ме вылӧ».
Кин ыджытжык: пызан саяс пукалісьыс али сылӧ кысъялісьыс? Абу разь пукалісьыс? Ме эд тіян коласын кысъялісь кодь.
Тэнат сёяныт вонтӧ тӧждісьӧмӧдз кӧ вайӧтӧ, сэк тэнат абу радейтӧмыт. Аслат сёянӧн эн уськӧт сійӧ, кин понда куліс Кристосыс.
Еныс Вежа Лолӧн да вынӧн мавтӧмӧн сувтӧтіс Назаретісь Исуссӧ. Ветлӧтікас Сія отирыслӧ керис уна бурсӧ: веськӧтліс да мездӧтліс кульыс кипод увтісь быдӧннысӧ, кӧдна сысянь пессисӧ-мырсисӧ. Сыкӧт эд вӧлі Еныс.
Гижӧтыс Павелсянь да Тимофейсянь, Кристос Исуслӧн раббезсянь. Ыстам Филип карын оліссезлӧ, Кристослӧн быдӧс вежа отирлӧ, вичкуын веськӧтліссезлӧ да нылӧн отсасиссезлӧ.
