3 Сідз керӧмыс бур, Мездӧтісь Еннымлӧ сьӧлӧмви.
Эд вунӧтлӧ керны бурсӧ. Мыйӧн вермат, отсасьӧ. Сэтшӧм езъялан козиныс Еныс сьӧрті.
Гижӧ Павел, Кристос Исуслӧн апостол. Апостолнас менӧ сувтӧтісӧ миянӧс Мездӧтісь Ен да Дӧсвидзись Кристос Исусыс, миян надеяным.
Тійӧ кӧ терпитат, кӧр тіянӧс вартлӧны умӧльсӧ керӧмныт понда, мый понда сэк тіянӧс ошкыны? Бурсӧ кӧ керат да пессьӧм-мырсьӧм коста вермат видзсьыны, сія Еныс сьӧрті.
Кин этадз кысъялӧ Кристосыслӧ, сія мортыс Еныс сьӧрті, да и отирыс сійӧ бурӧ пуктӧны.
Тійӧ и асьныт кыдз ловья иззэз. Ась и тіянісь Еныс лэбтӧ Аслас Ловлӧ оланінсӧ. Сэк тійӧ лоат вежауджаліссезӧн да Кристос Исусыс пыр, Ен Лов отсӧтӧн пондат вайны езъялан козиннэсӧ, кӧдна Еныслӧ сьӧлӧмви.
Воннэзӧ, миянсянь тійӧ тӧдат, кыдз колӧ овны Ен сьӧрті. Тійӧ сідз и олат. Но корам тіянӧс и кеймисям Кристос Исус нимӧн: вынсьӧтчӧ эшӧ буржыка овны Еныс сьӧрті.
Мийӧ кеймам, медбы тіян оланныт вайис Енлӧ ошкӧм и быдӧс керит Сы сьӧрті. Кеймам, медбы бурсӧ керӧмнаныт вайит воӧм да буржыка пондіт тӧдны Енсӧ.
Енӧ понда, Мездӧтісьӧ понда гажмис Менам лолӧ.
Кристос Исус отсӧтӧн Ен сьӧрті веськыта олӧмсяняныт ась лоас уна бур керӧмныт. Отирыс ась лэбтӧны-ошкӧны Енсӧ бурсӧ керӧмныт понда ─ Енлӧ бур воӧмсӧ вайӧмныт понда.
Дӧвалӧн эмӧсь кӧ челядь али внучоккез, нія ась велӧтчӧны тӧждісьны гортіссес понда, отсавны ай-мамныслӧ. Сідз керӧмыс Еныслӧ сьӧлӧмви.
Тіянлісь ыстӧмнытӧ Епафродитыс меным быдӧс вайис. Ӧні менам быдӧс эм коланаысся унажык. Эта керӧмныт Еныс сьӧрті, кыдз бур езъялан козин, чӧскыт руа тшынӧтӧм.
Сія миянӧс мездіс, корис овны вежа олӧмӧн. Эз кор миянӧс бурсӧ керӧмным понда, корис Аслас шуӧм сьӧрті да бурсетӧмнас, кӧда вӧлі козьналӧм миянлӧ Кристос Исус пыр эшӧ быдӧс аркмӧтӧмӧдз.
Мийӧ эд сы понда и уджалам, миян вылӧ усьӧм видӧмсӧ нуӧтам. Мийӧ эд ловья Еныс вылӧ надейтчам. Сія ─ быдӧннысӧ Мездӧтісь, ӧддьӧнжык мездӧ веритіссесӧ.
