Lamantasyon 1:15 - Labib An Kreol Seselwa

¹⁵ SENYER in rezet tou bann vayan gerye ki ti pe defann mwan. I'n anvoy en larme pour detri mwan. I'n detri tou mon bann zennzan. Parey rezen i ganny kraze pour fer diven, SENYER in kraz Zida, sa zoli zenn fiy.

Lamantasyon 1:15 Referans Kwoze

Malasi 4:3

Zot pou kraz bann ki pratik lemal, akoz sa zour ki mon pou pran aksyon, zot pou vin lasann anba plak lipye.

Ezai 63:3

Mon ti tousel pour kraz rezen dan preswar, personn parmi lepep pa'n vin avek mwan. Dan mon lakoler, mon'n pil lo zot; mon'n kraz zot avek lakoler. Zot disan in fann partou lo mwan; tou mon lenz in tase.

Ezai 28:18

Alor ou lalyans avek lanmor pou ganny annile e ou lakor avek bann ki dan lemonn lanmor pa pou tenir debout. Ler gran katastrof ava pase, i pou kraz ou.

Revelasyon 19:15

Dan son labous ti sorti en lepe byen koupe pour li detri bann nasyon. I pou renny lo zot avek en baton an fer. Avek son lipye, i pou pil diven gran lakoler Bondye Toupwisan dan preswar.

Ebre 10:29

Alor, mazinen ki pou arive, avek sa enn ki mepriz Garson Bondye, ki konsider disan lalyans Bondye ki'n pirifye li, koman en keksoz san valer, e ki ensilte Lespri ki donn lagras! Pinisyon ki i merite pou sertennman pli sever.

Levanzil dapre Lik 21:24

Zot pou ganny masakre, e ganny anmennen koman prizonnyen parmi tou bann nasyon. Zerizalenm pou ganny kraze anba lipye bann etranze, ziska letan ki'n ganny determinen ava'n akonpli.”

Mise 7:10

Mon lennmi pou war sa e i pou ganny kouver avek laont. Sa enn ki ti abitye demande: Oli SENYER, ou Bondye, pou vin en spektak. I pou ganny kraze anba lipye, parey labou dan semen.

Danyel 3:13

Dan en gran lakoler, Naboukodonozor ti ordonnen pour anmenn devan li Sadrak, Mesak ek Abed-Nego. Alor, sa bann zonm ti ganny anmennen devan lerwa.

Lamantasyon 3:34

Ler prizonnyen i ganny maltrete partou dan pei;

Zeremi 51:34

Naboukodonozor, lerwa Babilonn, in devor mwan e in anval mwan. In les mwan parey en resipyan vid. Parey en mons, in anval mwan. In ranpli son vant avek sa ki i ti anvi e in zet sa ki ti reste.

Zeremi 50:26

Vin kot li, zot tou ki sorti lwen! Ouver son bann grennyen. Fer bann ta avek bann legren e detri zot konpletman. Ki nanryen pa reste!

Zeremi 37:10

Akoz, menm si ou bat tou bann gerye Babilonyen ki pe lager kont ou; menm si i reste zis gerye blese dan zot latant, zot pou sorti e met dife dan sa lavil.

Zeremi 18:21

Alor, les zot bann zanfan mor lafen; fer zot ganny touye dan lager. Pa les zot bann fanm ganny ankor zanfan e ki zot vin vev. Fer ki zot mari i mor avek en lepidemi; e bann zennzan i ganny touye dan lager.

Zeremi 14:17

La sa ki ou ava dir lepep: Mon lizye i ranpli avek larm nwit e zour; mon pa aret plere, akoz mon pep ki mon kontan parey mon fiy in soufer en kantite. Son blesir i vreman grav.

Ezai 41:2

Lekel ki'n fer vini en konkeran sorti dan Les e donn li laviktwar partou kot i ale? Lekel ki'n donn li laviktwar lo bann nasyon e met bann lerwa anba son dominasyon? Son lepe, i fer zot vin lapousyer. Son fles i fer zot fannen parey lapay dan divan.

Ezai 5:5

Aprezan, les mwan dir zot ki mon pou fer avek mon plantasyon rezen: Mon pou tir bann klotir e les li ganny devore. Mon pou kas son bann miray e les li ganny kraze anba lipye.

Psonm 119:118

Ou rezet tou sa bann ki abandonn ou regleman. Tou sa ki zot fer pour tronpe pa servi.

2 Rwa 9:33

I ti dir, “Zet li anba.” Zot ti zet li anba; son disan ti fannen lo miray e lo seval. Zehou ti pil lo li.

Ziz 10:8

ki ti maltret e kraz bann Izraelit. Bann Izraelit ki ti reste Les avek larivyer Zourden, dan pei bann Amonit, dan Galaad ti ganny maltrete pandan 18 an.

Deterononm 28:33

En pep ki ou pa konnen ava manz prodwi ou later e tou prodwi ou travay; ou pou kontinyelman ganny eksplwate, kraze.

Zeremi 6:11

Mon ranpli avek lakoler SENYER, ki bril dan mwan; mon nepli kapab tenir. Tir ou lakoler lo bann zanfan dan lari, lo tou bann zennzan. Tou dimoun pou ganny deporte, mari ek fanm; menm bann vyeyar. Personn pa pou ganny eparnyen.

Zeremi 13:24

SENYER pou dispers ou parey bren lapay ki divan sorti dan dezer i fer anvole.

Zoel 3:13

Lans zot fosi, rekolt in mir. Vini, vin pile, akoz moulen rezen in plen; bann basen pe deborde. Zot mesanste in depas limit.

Lamantasyon 2:21

Zenn koman vye in tale dan lapousyer lo semen. Zenn fiy ek zenn garson in ganny masakre. Zour ou lakoler ti leve, ou'n touy zot, ou'n masakre zot san pitye.