Egzod 15:20 - Labib An Kreol Seselwa

²⁰ Mirianm, en profetes, ser Aaron, ti pran en tanbouren. Tou bann fanm ti sorti e swiv li. Zot ti zwe tanbouren e zot ti danse.

Egzod 15:20 Referans Kwoze

Psonm 150:4

Loue li avek lanmizik tanbouren ek ladans! Loue li lo bann sitar ek laflit!

1 Samyel 18:6

Ler zot ti pe retourn dan lakour apre ki David ti'n touy sa Filisten, bann fanm ki ti sorti dan tou bann lavil Izrael pour rankontre lerwa Sail, ti sante, danse avek lakonpannyman tanbouren, avek tapaz lazwa ek triyang.

Psonm 68:25

Bann santer i mars devan, bann mizisyen deryer. Dan milye, bann zenn fiy pe zwe lo tanbouren.

Ziz 11:34

Ler Zefte ti pe retourn kot li Mispa, son fiy ti sorti pour rankontre li avek bann tanbouren ek ladans. Sa fiy ti son sel zanfan. Apard li, Zefte ti napa okenn garson ni fiy.

Nonm 26:59

Fanm Anmranm ti apel Yokebed. I ti fiy Levi ki ti ne Lezip. I ti ganny de garson ek en fiy: Aaron, Moiz e zot ser Mirianm.

Mise 6:4

Mon'n fer ou monte sorti Lezip. Mon'n delivre ou dan lesklavaz. Mon'n donn ou koman sef Moiz, Aaron ek Mirianm.

Psonm 149:3

Loue son non avek ladans, avek tanbour, avek laarp; zwe bann lenstriman lanmizik pour loue son non.

Ziz 4:4

Dan sa lepok, profetes Debora, fanm Lapidot ki ti ziz dan Izrael.

Levanzil dapre Lik 2:36

Ti annan osi en profetes ki ti apel Ann, fiy Fanyel, sorti dan tribi Aser. I ti tre vye. I ti'n viv avek son mari zis pour 7 an.

Psonm 81:2

Zwe lanmizik! Fer tanbouren rezonnen! Zwe lalir avek laarp!

2 Rwa 22:14

Alor, Gran-Pret Hilkiya, Ahikanm, Akbor, Safann ek Asaya ti al kot profetes Houlda, fanm Saloum, garson Tikva, garson Arhas, responsab lenz tanp. Houlda ti pe reste Zerizalenm dan nouvo lavil.

Egzod 2:4

Ser sa pti baba ti debout en pe pli lwen. I ti veye sa ki pou arive avek li.

Akt de Zapot 21:9

I ti annan kat zenn fiy ki ti profet.

Psonm 68:11

SENYER i donn lord; en gran lafoul fanm i anons sa bon nouvel:

Psonm 30:11

Ou'n sanz mon lamantasyon an ladans. Ou'n ranplas mon lenz dey par en lenz lafet.

2 Samyel 6:14

David ti danse avek tou son lafors devan SENYER avek en lefod linenn otour li.

1 Samyel 10:5

Apre, ou ava ariv kot montanny Bondye, Gibea, kot i annan en kan Filisten. Koman ou ava ariv dan lavil, ou ava zwenn en group profet pe desann sorti ofer sakrifis dan landrwa sakre, devan zot bann zwer laarp, tanbouren, laflit ek sitar.

Ziz 21:21

Zot ava obzerve, ler bann fiy Silo ava sorti pour dans zot laronn, zot ava sorti dan bann plantasyon. Sakenn zot ava sezi en fanm parmi bann fiy ki sorti Silo; apre, zot ava retourn dan pei bann Benzamit.

Nonm 20:1

Pep Izrael, kominote antye, ti ariv dan dezer Sin dan premye mwan e zot ti reste Kades, kot Mirianm ti mor e kot i ti ganny antere.

1 Korentyen 11:5

Me en fanm ki pa kouver son latet kan i pe priye, oubyen kan i pe koz lo non Bondye, i dezonor son mari. Sa i konmsi i'n raz son latet.

2 Samyel 6:16

Letan Kof SENYER ti pe rantre dan lavil David, Mikal, fiy Sail, ti pe get par lafnet. I ti war lerwa David pe sote e danse devan SENYER. I ti ganny degout pour li dan son leker.

2 Samyel 6:5

David ek pep Izrael ti zwe devan SENYER avek toudsort lenstriman lanmizik an bwa sapen: Lir, laarp, tanbour, sitar ek senbal.

1 Korentyen 14:34

fodre ki bann fanm i gard silans dan Legliz: Zot pa ganny drwa koze, me zot devre soumet parey Lalwa i demande.

Nonm 12:1

Mirianm ek Aaron ti kritik Moiz akoz son fanm Kousit. Annefe, Moiz ti'n marye avek en fanm sorti Letyopi.

Zenez 31:27

Akoz ou'n sov an kasyet, e tronp mwan san dir mwan? Mon ti ava les ou ale dan lazwa ek sanson, e avek lakonpannyman lenstriman lanmizik.

2 Samyel 1:20

Pa anons sa dan pei Gat; pa pibliy sa nouvel dan bann semen Askelonn pour ki bann fiy Filisten, pa rezouir, e ki fiy bann non sirkonsi pa fet laviktwar.

1 Kronik 6:3

Bann zanfan Anmranm: Aaron, Moiz ek Mirianm. Bann zanfan Aaron: Nadab, Abihou, Eleazar ek Itamar

1 Kronik 15:16

David ti donn lord bann sef Levit pour swazir bann santer parmi zot bann frer pour fer rezonnen bann lenstriman lanmizik tel ki, laarp, lir ek senbal koman siny rezouisans.

Eklezyas 3:4

I annan en letan pour plere e en letan pour riye; en letan pour plennyen e en letan pour danse.

Zeremi 31:4

Izrael ki zoli! Mon pou rekonstri ou! Ou pou ganny remet lo ou de lipye. De nouvo, ou pou fer sorti ou bann tanbouren, e selebre dan lazwa avek bann danser.

Nonm 12:2

Zot ti dir: Eski SENYER i koz zis par lentermedyer Moiz? Pa i koz osi atraver nou? SENYER ti antann zot.

Nehemi 6:14

Mon ti priye: Mon Bondye! Rapel byen Tobiya, Sanbalat, ek tou sa ki zot in fer, ansanm avek profetes Noadya ek tou leres bann profet ki ti oule fer mwan per.

Psonm 68:26

Bann sours Izrael! Loue SENYER Bondye. Remersye Bondye dan bann lasanble.