Zozye 7:24 - Labib An Kreol Seselwa

²⁴ Zozye ek tou bann Izraelit, ti pran Akan, garson Zera, larzan, manto ek lengo lor. Zot ti osi pran son bann garson, son bann fiy, tou son bef, bourik, son kabri, son latant avek tou sa ki i ti posede. Alor, bann Izraelit ek Zozye ti anmenn tousala dan vale Akor.

Zozye 7:24 Referans Kwoze

Proverb 15:27

Sa enn ki tay deryer larzan, i anmenn maler dan son fanmir. Me sa enn ki deteste pran gous ava viv lontan.

Oze 2:15

La, mon pou rann li son plantasyon rezen e fer vale Akor, sa vale maler, vin en laport lespwar. I pou swiv mwan parey dan letan son lazenes, parey lepok ki i ti sorti Lezip.

Ezai 65:10

Saronn pou vin en laplenn kot mouton ava vin manze. Vale Akor, en landrwa kot bef ava vin repoze, pour benefis mon pep ki'n rod mwan.

Zozye 15:7

Apre, i ti mont ziska Debir an pasan par vale Akor, e al pli dan Nor, lo kote Gilgal, anfas avek kolin Adoumim, Sid avek larivyer. Frontyer ti pas answit pre avek bann sours delo Enn-Semes e debous lo Enn-Rogel.

Zozye 7:26

Zot ti met en gro ta ros lo li, ki ankor la ozordi. Alor, gran lakoler SENYER ti kalme. Pour sa rezon, sa vale i apel: Vale Akor ziska ozordi.

Egzod 20:5

Ou pa pou azenou devan zot e ou pa pou ador zot. Annefe, mwan SENYER ou Bondye, mon en Bondye zalou. Mon pini bann zanfan pour pese zot papa ziska trwazyenm ek katriyenm zenerasyon bann ki ay mwan.

Eklezyas 5:13

Mon'n war en gran maler anba soley: Larises ki en zonm i akimile; sa i pour son maler.

Liv Zob 20:15

Larises ki i'n vole, i pou vomi. Bondye pou fer li vomi sa ki i'n anvale.

Zozye 7:1

Bann Izraelit ti komet en pese grav konsernan bann lobze ki SENYER ti'n defann pran: Akan, garson Karmi, garson Zabdi, garson Zera, ki sorti dan tribi Zida ti'n pran serten sa bann lobze ki ti devre ganny detri. Alor, SENYER ti ankoler kont pep Izrael.

Zozye 6:21

Zot ti detri tou sa ki ti annan dan lavil e masakre zonm, fanm, zenn ek vye, bef, mouton ek bourik.

Zozye 6:18

Selman, fer atansyon zot pa pran nanryen ki devre ganny detri pour SENYER. Si zot fer sa, maler ek destriksyon pou tonm lo kan Izrael.

Zenez 18:25

Ou pa kapab detri bann zis ansanm avek bann koupab. Sa enn ki zis pa kapab annan menm sor avek sa enn ki koupab! Eski menm bann ziz sa later antye pa pou azir dapre lazistis?”

Zozye 7:23

Zot ti pran tou sa ki ti dan latant e zot ti anmenn kot Zozye ek pep Izrael, e depoz tou devan SENYER.

Zozye 22:20

Ler Akan, garson Zera, ti komet en fot grav konsernan bann piyaz lager ki ti devre ganny detri, eski tou pep Izrael pa ti sibir lakoler SENYER? Pa zis li tousel ki ti mor pour son fot.”