JEREMI 50:6 - Bible sar

⁶ Gír deē yāḿ gə̄ télən̄ batə̄ gə̄ kə́ tadə́ tḭ̄ḭ̄. Ngé kul̄də́ gə̄ rāān̄də́ adə̄ ndómə̄n̄, rāān̄də́ adə̄ dáyə̄n̄ kə̄ dɔ mbal̄ gə̄ tə́. Nin̄ ḭḭn̄ dɔ mbal̄ kə́ bo gə̄ tə́ aw̄n̄ dɔ ngán mbal̄ gə̄ tə́, kanjə̄ kadə̄ əga kemdə́ dɔ gong yādə́ gə̄ tə́.

Bibəl ta Sar̄

⁶ Gír deē yāḿ gə̄ télən̄ batə̄ gə̄ kə́ tadə́ tḭ̄ḭ̄. Ngé kul̄də́ gə̄ rāān̄də́ adə̄ ndómə̄n̄, rāān̄də́ adə̄ dáyə̄n̄ kə̄ dɔ mbal̄ gə̄ tə́. Nin̄ ḭḭn̄ dɔ mbal̄ kə́ bo gə̄ tə́ aw̄n̄ dɔ ngán mbal̄ gə̄ tə́, kanjə̄ kadə̄ əga kemdə́ dɔ gong yādə́ gə̄ tə́.

JEREMI 50:6 Referans Kwoze

IJAI 53:6

Kété ní jḭḭ̄ malang jə-toī i tītə̄ batə̄ gə̄ kə́ tadə́ tḭ̄ḭ̄ kɔ̄ɔ́ beē, náā nəkɔ́ ɓáa un i róbə yān nəkɔ́. Ba Kɔ́ɔ̄ɓē tél kə yá̰a̰ rāājí jḭḭ̄ malang kə́ gōtə́ aĺ gə̄ əndā i dɔn ni tə́.

MATIYE 9:36

Dan ń Jeju a̰a̰ kósə de gə̄ anī kumən o̰o̰n tām̄ yādə́ tə́, tɔdɔ̄ de gə̄ ní ɔrən̄ ō, tɔ́gə́də́ ur̄ wak kɔ̄ɔ́ ō, tītə̄ batə̄ gə̄ kə́ nge kul̄də́ gətóo beé.

MATIYE 10:6

Banī āwī rɔ̄ ngán *Israel gə̄ ń nin̄ i tītə̄ batə̄ kə́ tadə́ tḭ̄ḭ̄ kɔ̄ɔ́ gə̄ ní tə́.

EJEKIEL 34:14

M-ā m-āw̄ sedə́ dɔ mu kə́ majə tə́ ō, nin̄ a əngen̄ loo kəsa mu yādə́ dɔ mbal̄ bo gə̄ kə́ dɔ nang kə́ *Israel tə́ tə́ ō. Batə̄ yāḿ gə̄ a asən̄ kɔr̄ koō loo ngeé ń noō tə́, loo kə́ majə kə́ mu i tū tə́ tə́. Nin̄ a əsan̄ yá̰a̰ dɔ nang kə́ teē yá̰a̰ gə̄ tə́ tə́, dɔ mbal̄ bo gə̄ kə́ Israel tə́ tə́.

JEREMI 50:17

Kété ní *Israel i batə̄ kə́ ra kə keŕneé adə̄ ɓɔl gə̄ ngɔ̄də̄nən̄. I mban̄g kə́ Asiri tə́ n ənī ta kəsan ta kəga dɔ ní. Gō tə́ anī, i Nabukodonosor, mban̄g kə́ *Babilon tə́ n əsan bátə́ ngor kə̄ngān dɔ tə́ ní.

PĀ GƏ̄ 119:176

m̄-dáȳ tītə̄ batə̄ kə́ ta tḭ̄ḭ̄ beé, ī-sāā nja nge kəla yāí, tɔdɔ̄ dɔḿ ndígə̄nal gō míndí gə̄ alé.

JEREMI 50:19

M-ā m̄-tél yā reē kə Israel dɔ mu kə́ mból̄ yān tə́. Ni a əsa mu kə́ Karmel ō, kə́ Basan ō, kə́ dɔ mbal̄ gə̄ kə́ *Epəraim tə́ ō, kə́ Galaad tə́ ō, kadə̄ tɔ̄l̄ ɓōn.

JEREMI 3:6

Ɓāl̄ ko̰o̰ ɓē yā mban̄g Josias tə́ ní Kɔ́ɔ̄ɓē ədam̄ na: Yá̰á̰ ń *Israel nge túy taā kem rāā ní á̰a̰ā̰ a? Ni al̄ aw̄ rāā ájə́ba dɔ mbal̄ malang kə́ ngāl̄ gə̄ tə́ ō, gír kāgə̄ malang kə́ to mbōl̄ gə̄ tə́ ō.

PĀ GƏ̄ 116:7

Kemḿ, majə kadə̄ ī-tetə kə̄ nang tə́, tɔdɔ̄ Kɔ́ɔ̄ɓē rāā majə seí.

PĀ GƏ̄ 91:1

Deē ń ndi loo ń Nə́ɓā kə́ dɔɔ́ a ɓɔ̄ɔ̄ rɔ̄n tū tə́ tə́ ní to i ndíĺ Nə́ɓā kə́ bo kə́ tɔ́gən i ngá̰ý tə́.

1 PIYER 2:25

Tām̄ kété ní ī-toī i tītə̄ batə̄ kə́ ta tḭ̄ḭ̄ gə̄ beé. Ba ngɔlaā ní, sḭḭ̄ ī-tūrī rɔ̄sí kə̄ rɔ̄ nge kul̄sí tə́ ō, nge ngɔ̄m̄sí tə́ ō.

MATIYE 15:24

Jeju tūr̄ ədadə́ na əlamə̄n̄ i rɔ̄ ngán *Israel gə̄ ń i batə̄ kə́ ta tḭ̄ḭ̄ kɔ̄ɔ́ gə̄ ní tə́ ngóy.

JEREMI 10:21

Ngé ngɔ̄m̄ yá̰a̰ kul̄ gə̄ i mbóo de gə̄, nin̄ sāān̄ Kɔ́ɔ̄ɓē alé. I tām̄ ń toō tə́ n gerə̄n̄ rāā kəla kə gōó aĺ ō, usədə́ dɔ yá̰a̰ kul̄ gə̄ tə́ aĺ ō ní.

JEREMI 3:23

Kə́ rɔ̄kum gə̄ tə́ ní, yá̰á̰ kə́ ḭḭ dɔ ngán mbal̄ gə̄ tə́ i yá̰á̰ kə́ rɔ̄kum alé. De gə̄ rāān̄ adə̄ i kōōdə́ ngóy n ɓār̄ dɔ mbal̄ gə̄ tə́ ní. Kə́ rɔ̄kum gə̄ tə́ ní, *Israel ənge kajə i kem Kɔ́ɔ̄ɓē Nə́ɓā yājí tə́ ngóy.

JEREMI 2:32

Dɔ ngōmandə a ndígə̄nal yá̰á̰ súū rɔ̄ yān? Dəyá̰ ń a aw̄ kə̄ ngaawaá ní, dɔn a ndígə̄nal dɔ kəlā do̰ō̰ ɓōdə̄n tə́ a? Banī ngé kə́ dan gír deē yāḿ gə̄ tə́ mbātə́mə̄n̄ dan i ngá̰ý kɔ̄ɔ́.

JEREMI 2:20

Nəkɔ́ ń jóo toó ḭ̄ ā ī-tétə̄ njúkə kɔ̄ɔ́ ō, ī-gān̄g kəlā kə́ tṵ́ṵ̄īn̄neé gə̄ kɔ̄ɔ́ ō, ba ə́da na: m̄-ndigə rāā ɓəlo to̰ alé. Kə dɔ ngán mbal̄ gə̄ tə́ malang ō, kə gír kāgə̄ gə̄ kə́ to mbōl̄ gə̄ tə́ malang ō ní, ḭ̄ ī-rāā ájə́ba yā rāań ɓesə̄.

IJAI 32:2

Nin̄ kógə̄ḿ kógə̄ḿ a ton̄ i tītə̄ loo kə́ deē a ɓɔ̄ɔ̄ rɔ̄n tū tə́ tām̄ yā néĺ tə́ beē, a ton̄ i tītə̄ loo kə́ deē a ɓɔ̄ɔ̄ rɔ̄n tū tə́ tām̄ yā man̄ kə́ a edə tə́ beē, a ton̄ i tītə̄ man̄ kə́ a nūgə́ dəla loo tə́ beē, a ton̄ i tītə̄ ndíl mbal̄ kə́ bo kə́ kem ɓē kə́ loo təngā tū tə́ beē.

IJAI 30:15

Najə̄ ń Kɔ́ɔ̄ɓē, ni ń i Nə́ɓā kə́ *táĺ yā *Israel Najə̄ ń əda ní n toó: Ā ájiī i loo ń ī-tūrī rɔ̄sí kə̄ rɔ̄ḿ tə́ ō, ī-raī jəke ngóy ō ní. Tɔ́gə́sí kə́ kal kógə̄ḿ beē i kadə̄ ī-raī jəke ō, kadə̄ ə̄ndāī kemsí dɔḿ tə́ ō, i kadə̄ ə̄nī kemsí ādə̄mī ō. Banī sḭḭ̄ ɔ́diī alé.

PĀ GƏ̄ 90:1

Ndɔ̄ȳ yā Moijə, deē yā Nə́ɓā. Kɔ́ɔ̄ɓē, i ḭ̄ n i loo ɓɔ̄ɔ̄ rɔ̄ yājí kə dɔ ɓāl̄ gə̄ kə dɔ ɓāl̄ gə̄ ní.

PĀ GƏ̄ 32:7

Ḭ̄ i loo ɓɔ̄ɔ̄ rɔ̄ yāḿ, ādə̄ yá̰á̰ kə́ to wur kɔl əngem̄ alé. Ḭ̄ ī-gān̄g dɔḿ adə̄ m-ə̄nī pā rɔ̄nel̄ m-ɔ́səń gɔnií.

PĀ GƏ̄ 23:2

Ni-aw̄ seḿ dɔ mu kə́ mbōl̄ tə́. Njə̄rā seḿ kə gō kadə man̄ kə́ to lɔmɔɔ́.

JEREMI 13:16

Ɔ́siī gɔn Kɔ́ɔ̄ɓē Nə́ɓā yāsí kété tá kadə̄ ni-əla kə tilií dɔsí tə́ ō, kété tá kadə̄ ī-bḭ́ḭ̄ dɔ mbal̄ gə̄ kə́ til taā dɔdə́ tə́ ō. Ī-ngóōī i loo kə́ unjə̄ kow, ba ni-tūrə̄n adə̄ téĺ ndíl yo ō, kil̄ man̄ kə́ ndul ndí ndí ō.

JEREMI 23:1

Yá̰á̰ kə́ to kum kaȳ aĺ a teē dɔ ngé kul̄ yá̰a̰ gə̄ ń əya̰n̄ yá̰a̰ kul̄ yāḿ gə̄ adə̄ ongə̄n̄ ō, tadə́ tḭ̄ḭ̄ ō ní. Najə̄ ń Kɔ́ɔ̄ɓē əda ní n noó.

JEREMI 33:12

Kɔ́ɔ̄ɓē kə́ bo kə́ tɔ́gən i ngá̰ý ɔr̄ najə̄ i tītə̄ ń toō beé: Loo ń toō i ndəbā ɓē ō, i loo kə́ kanjə̄ de gə̄ ō, kə́ kanjə̄ dā̰ gə̄ ō, kə gō ɓē kə́ tū tə́ gə̄ malang ō ní, nge kul̄ yá̰a̰ gə̄ a rāān̄ gong kə́ rang gə̄ tū tə́ yā kadə̄ batə̄ yādə́ gə̄ a taān̄neé koō.

EJEKIEL 13:10

*Ngé koō ta gə̄ gólə̄n̄ gír deē yāḿ gə̄ ədan̄ na: Yá̰a̰ malang i kə́ njə̄rā majə, tá yá̰a̰ malang i kə́ a̰a̰ gō naā alé. Gír deē yāḿ gə̄ əndān̄ ndogə̄ mbal̄, banī nin̄ ɓáa nel̄də́ i rāā hō̰rō̰ dɔ tə́.

EJEKIEL 34:15

Ndɔ̄ ń tə́ i mā n i nge ngɔ̄m̄ ɓūtə̄ yá̰a̰ kul̄ yāḿ gə̄ ní. I mā n m-ā m̄-rāā ɓūtə̄ yá̰a̰ kul̄ yāḿ gə̄ kadə̄ ɔrə̄n̄ koō ní. I mā Kɔ́ɔ̄ɓē Nə́ɓā n m-ə́da najə̄ ń noō ní.

EJEKIEL 34:16

Batə̄ ń tan tḭ̄ḭ̄ ní, m-ā m-āw̄ yā ndəlen ō, nge ń əya̰ madə̄n gə̄ ba aw̄ sa̰y ní, m-ā m̄-tél yā reē seneé gogə́ ō. Nge ń njan kógə̄ḿ tetə ní, m-ā m-ɔ́rən nam̄ ō, nge ń i mo̰y ní, m-ā m̄-rāā kadə̄ ni-tél a ənge tɔ́gə gogə́ ō. Ba nge kə́ bo ō, ngan̄g ō ní, m-ā m̄-rāān kadə̄ ni a gətóo kɔ̄ɔ́. Mā i nge ngɔ̄m̄ yá̰a̰ kul̄ gə̄ ndɔ̄ń tə́ kə́ nge rāā yá̰á̰ kə́ gōtə́.

IJAI 1:3

Man̄g ger̄ kɔ́ɔ̄n ō, kərō ger̄ loo ń kɔ́ɔn a adə̄n yá̰a̰ kəsa tū tə́ ní ō. Banī *Israel ger̄ yá̰á̰ kógə̄ḿ alé, gír deē yāḿ gə̄ gerə̄n̄ najə̄ alé.