Hwèwulùwèlì 12:4 - Mokpwe: Bakwery (New Testament)

⁴ A ma lùùtà lòŋgò lɔ̀kɔ la moŋgo màyàwo la irzombe ema i ma kɛ̀ɛ̀mɛ o ŋmanyu ya lìwòhwɛ la ŋmanyu na moondo mo eni, a ji undirzɛ o rze ya mɔ̀nyɛ̀. Èŋge dragɔ̀ni e ma tɛ̀mɛ̀ o worzo wo ama oŋgo molàna ema à mà arza lì ŋyàa, àŋga nanù a ŋyàa tɛ a mo laana e ŋmanà wa eni.

Hwèwulùwèlì 12:4 Referans Kwoze

Hwèwulùwèlì 12:9

Aŋga ndi hwa a hvimba eŋge dragɔ̀ni ndɛnɛ o rze ya mɔ̀nyɛ̀. Èŋge dragɔ̀ni e ma hwɛ ndi nàa gbàahwà wo e hvonda ya kòwàa ema wo ma hwɛ̀lɛ̀hwɛ̀ Dɛhvùlì tɔ̀ Mòkarzɛ̀, ema a eŋgìrzɛ̀ e rze ya mɔ̀nyɛ̀ ya arzɛ. Ndeŋgànɛ̀lɛ̀ hwà mà hvimba iŋgi aŋgèlì ja eni ja arzɛ na mɔ̀ o e rze ya mɔ̀nyɛ̀.

Yòwanìrzɛ̀ 8:44

È hwèlì ndi e hwa ama e rzàŋgò ya anyu, Mòkarzɛ̀, ɔ̀ndeŋgàtɛ̀ e arza ndi lì òndìrzɛ̀ e nyɔ̀ŋgi ya eni. Mɔ̀ à mà hwɛ ndi mòòŋwèlì natɛ̀ɛ na ò hwewòtelì. A rza alɛ̀mbɛnɛ ò jɔ̀kɛ̀, èhwanja a rza òhvi jɔ̀kɛ̀. Mɔ̀ a kɔ tɛ hweyà, a òhwa ndi e mbɔrzi ya eni ya mbòwà. Èhwanja mɔ̀ à hwèlì ndi mòtò wa mòlàŋgà, ndèŋgànɛ̀lɛ̀ a hwèlì ndi e rzàŋgò ya mòlàŋgà.

Hwèwulùwèlì 9:19

Màyìmbì ma iŋgi wɔ̀rzi ma mà hwɛ ndi o wàna na o mèeyòndo me awu. Mèeyòndo me awu ma mà hwɛ ndi nàa màahwa ema me ma ohva mèyòhvò ndèŋgànɛ̀lɛ̀ hwa me gbeyàna o lì hvàŋga hwatò.

Hwèwulùwèlì 9:10

Wɔ̀ hwà mà ohva mèèyondò na mèhvèndò nàa màwòhwɛ̀ ma mèhvèndò. Meŋge mèèyondò ndi me ohvi màyìmbì ma lì hvaŋga hwatò o hvonda ya ŋgbɛndɛ ita.

Hwèwulùwèlì 8:7

È aŋgèlì yà wòrzo e ma toŋga lìyɔ̀mi la eni. Aŋga ndi e mbuwà ya màŋyàyi na mùùnya emà ma mà hviyànɛlɛhwɛ na màyija mà ma wòteyà o lì komeya o rze yà mɔ̀nyɛ̀. Lòŋgo lɔ̀kɔ o tenì ya moŋgo mayàwò ma e rze ya mɔ̀nyɛ̀ lì ma rzeeya la arzɛ. Lòŋgo lɔ̀kɔ o tenì ya moŋgo mayàwo ma mayi na hweyàlì hwe arzɛ hwe ma rzèèya.

1 Pètrò 5:8

Ya aŋgowe, e wowe hvonda. Mòkarzɛ̀ e mɔ̀kɔ̀yèlì wa anyu a hwèlì a ahwa ndi nàa njila ema e rzìŋga o lì arza njɛnɛ ema a tàawa.

Hwèwulùwèlì 17:18

È molanà ema ò mà ɛnɛ à hwèlì ndi è mbowà ndɛ̀ɛ̀ndɛ̀ ema è kànèyà ikìŋgɛ jà è rze yà arzɛ.”

Hwèwulùwèlì 8:8

È aŋgèlì ema e ma ùkirzɛ̀ ihwakɛ e ma tòŋga e la eni lìyɔ̀mi. Rzìi yoma ema e ma àyɛ̀kɛ̀nɛ̀ hvàko ndɛnɛ ema e ma hwɛ lì rzèèya e ma unda o ŋmànja. Lòŋgo lɔ̀kɔ o tenì ya moŋgo mayàwo la ŋmànja lì ma àyiŋgòwɛ̀ màyija.

Hwèwulùwèlì 8:9

Lòŋgo lɔ̀kɔ o tenì ya moŋgo mayàwo ma hwèwèkelì hwe ŋmànja hwe ma ŋwa, ndèŋgànɛ̀lɛ̀ lòŋgo lɔ̀kɔ o tenì ya moŋgo mayàwo ma melì me ŋmànja ema me ma hwɛ o tenì ya moŋgo ŋmànja me ma hvaŋgeya.

Hwèwulùwèlì 8:10

È aŋgèlì ema e ma ùkirzɛ̀ iyàwò e ma tòŋga lìyɔ̀mi la eni. Aŋga ndi rzombe ndɛnɛ ema e ma oŋwa nàa mòkàkò e ma uwɛ̀lɛ̀lɛ̀yi o ŋmanyu ya lìwòhwɛ là ŋmanyu rzìi e undeya lòŋgò lɔ̀kɔ o tenì ya moŋgo mayàwo ma meyorzo na hwètùŋgu hwe màlìhwa.

Hwèwulùwèlì 8:11

Lìinà la eŋge rzombe lì hwèlì ndi “Hvìyayi.” Lòŋgo lɔ̀kɔ o tenì ya moŋgo mayàwo la malìhwa lì ma ayèŋgowɛ̀ hvìyayi, ndèŋgànɛ̀lɛ̀ rzayi-rzayi ja hwatò hwà mà ŋwa na oma hwà mà nyɔ̀ɔ̀ maŋga malìhwa ema mà ma ayèŋgowɛ̀ hvìyayi.

Hwèwulùwèlì 8:12

È aŋgèlì ema e ma ùkirzɛ̀ inɛyi yɔ hvɛ rzìi e tòŋga e la eni lìyɔ̀mi. Aŋga ndi yoma ya àyɛ̀rzɛ̀ɛ lòŋgò lɔ̀kɔ o tenì ya moŋgo mayàwo la igbèyi, ya àyɛ̀rzɛ̀ lòŋgo lɔ̀kɔ o tenì ya moŋgo mayàwo la ŋmɛ̀ɛlì, ndèŋgànɛ̀lɛ̀ ya àyɛ̀rzɛ̀ lòŋgo lɔ̀kɔ o tenì ya moŋgo mayàwo la irzombe. Ène eyà e ma gbeyà lòŋgo lɔ̀kɔ o tenì ya moŋgo mayàwo lì ma ayèŋgowɛ̀ jìtìtì, o rzi hwɛ tɔ̀ ŋmàye o tenì ya lòŋgò lɔ̀kɔ o tenì ya moŋgo màyàwo ma wùnyà, ndèŋgànɛ̀lɛ̀ o rzi hwɛ tɔ ŋmàye o tenì ya lòŋgo lɔ̀kɔ o tenì ya moŋgo mayàwo la wuu.

Hwèwulùwèlì 12:7

Rzìi o hwɛ njuma o ŋmanyu yà lohwà. Màyìkɛ̀lì na i aŋgèlì ja eni hwà mà wòteya lì anana eŋge dragɔ̀ni. Èŋge dragɔ̀ni na i aŋgèlì ja eni wɔ̀ hvɛ hwa wòteyà lì hwa anana.

Hwèwulùwèlì 13:2

Èŋge èembe ema nà mà ɛnɛ̀ e ma àyɛkɛ̀nɛ ndi ikɔ̀ ja njɔ̀ɔ, ndi màtaŋgà mà eni ma mà àyɛkɛ̀nɛ matàŋgà mà mòòŋgì, ndèŋgànɛlɛ e wàna ya eni hvɛ e ma àyɛkɛ̀nɛ e wàna ya njila. È dragɔ̀ni e ma ŋgbàà eŋge èembe e konda na e wònja ya eni ya lìkànèyà.

Hwèwulùwèlì 13:4

Hwàto hwà mà hwɛ lì kanɛ̀ eŋge dragɔ̀ni ehwànja e ma ŋgbà èŋge èembe wònjà. Hwà mà hwɛ lì kanɛ̀ hvɛ eŋge èembe, rzìi hwa a ohwa nanù ema, “Njɛnɛ a hwèlì nàa ene èembe e? Njɛnɛ a tànɛyi lì mo teŋgɛ̀nɛ̀ e njuma e?”

Hwèwulùwèlì 16:13

Rzìi na ɛnɛ hwèlìŋgɛ̀ hweyàwò hwe wòhwe, ema hwe ma akɛnɛ hwètɔ̀lɔ̀lɔ̀ hwe ma hwɛ lì wurza. Hweŋge hwèlìŋgɛ̀, yɔ̀kɔ e ma wurza o e wàna ya e dragɔ̀ni, yɔ̀kɔ e ma wurza o e wàna ya eŋge èembè ema e ma uwɛlɛlɛ o ŋmànja, ndèŋgànɛ̀lɛ̀ inɛyi jɔ̀hvɛ i ma wurza o e wàna ya e mòòhwèlì wà èlìŋgɛ̀ wa mòlàŋgà.

Hwèwulùwèlì 20:2

Èŋge aŋgèlì è hvùma è dragɔ̀ni, wòŋgo gbahwà wò è hvonda yà kòwàà, ema wò hwèlì è Dɛhvùlì nà Mòkarzɛ̀. È aŋgèlì è mà mò kàka ò tenì yà ikolì jà meya.