Hwèwulùwèlì 1:18 - Mokpwe: Bakwery (New Testament)

¹⁸ Imba ndi na hwèlì oŋgo ema a hwèlì lòŋgɛ. Nà ma ŋwa, ndi o naŋgɛ na hwèlì lòŋgɛ o gbìndèyà na o gbìndèyà. Ndeŋgànɛ̀lɛ̀ na kànèyà e mbowà ya e kpelì.

Hwèwulùwèlì 1:18 Referans Kwoze

Ròmànì 6:9

Irzɔ i lòkɛ̀ nanù èhwanja i hwi nanù ema Krirztò à mà hvùmùwà ndèŋgàna mɔ̀ à rza ò ŋwa hvɛ. Ndèŋgana e kpelì e rza hwɛni hvɛ tɔ̀ ŋginyà ò ŋmanyu ya eni hvɛ.

Hibrù 7:25

O eŋgànɛ̀lɛ̀ rzɔ, Yerzù a tanɛyi o lì rzùŋgà mòŋgɛ ma hwatò ema hwa jà o ma Lohwɛ̀ lì akeyà na mɔ̀. Mɔ̀ a tanɛyi o lì hwa rzùŋgà mòŋgɛ ma awu ehwànja mɔ̀ à hwèlì lòŋgɛ ihvonda ja arzɛ o lì hwa kànɛlɛlɛ.

Hwèwulùwèlì 3:7

À mà nò òhweyà hvɛ nanù ema, “Tìleyà è aŋgèlì ema è hwèlì ò ŋmèmba ema mò hwèlì ò Hvìladɛlhvìyà nanù ema, “Ŋmɛ̀ndì mono ema mò uwɛ̀lɛ̀lɛ̀yì nà è mɔ̀ ema à hwèlì wòtani nà jɔ̀kɛ̀. Mɔ̀ à hwɛni màyìmbì ò lì kànèyà nyayi hvɔ̀kɔ nà oma kìŋgɛ Dàhwitì à mà hwɛ lì kànèyà. Mɔ̀ à lìhvo tɛ lìyòhva tɔ̀ mòtò à rza tànɛ à lì umba, ndèŋgànɛlɛ à umbi tɛ lìyohva tɔ̀ mòtò à rza tànɛ à lì lìhvowa.

Hibrù 12:2

Ì rzòkɛ̀ ndi Yerzù mììrzɔ̀ mà arzu. Èhwanja mɔ̀ ndi à hwèlì è mɔ̀ ema à jò timba ò lì hwɛnɛ lìlòkɛ̀. À mà èmeyà ò lì ŋwa è kpèelì yà ìrzɔnì ò mbarza ndeŋgànɛ̀lɛ̀ à rzi wòwè iŋgi ìrzɔnì nàa tɔ̀ eyà aŋga nanù mɔ̀ à luwa mɔ̀nyɛ̀ŋgì ema Lohwɛ̀ à mò ùtelì. Ò èŋgànɛ̀lɛ̀ eŋge è mà gbeyà ema a lìyà ò lìya là mòmɛ̀ ò mbòkò yà lìkànèyà là ama Lohwɛ̀.

Matiyò 16:19

Nà ò ŋgbà hwèlìhvòwànì hwe lìkànèyà la ŋmanyu. Mamɛ ema e kakahwi ò rze, e kakahwi hvɛ ò ŋmanyu yà lohwà, mamɛ hvɛ ema e kanɛ̀lɛhwi ò rze, e kanɛ̀lɛhwɛ hvɛ ò ŋmanyu yà lohwà.”

Hwèwulùwèlì 20:14

È kpelì nà èkomè yà hwatò ema hwa mà ŋwɛ̀ɛ̀ hwa mà komàhwa ò tenì yà yùlu yà mùnya. Ène kpelì yà yùlu yà mùnya è hwèlì ndi kpelì yà hwèlìŋgɛ̀.

Hibrù 1:3

Oŋgo Ŋmanà ndi à hwèlì ŋmɛ̀ɛ̀nɛ̀nì mò ŋmàye mò ama Lohwɛ̀, ndèŋgànɛ̀lɛ̀ mɔ̀ ndi à jò uŋmɛ̀lɛ̀ njɛnɛ Lohwɛ̀ à hwèlì nà è jɔ̀kɛ̀, à hwèlì ndi nyàyi hvɔ̀kɔ nà oma Lohwɛ̀ mɔ̀ hvɛ à hwèlì. Màyimbì mà hweyà hwe ama oŋgo Ŋmanà, hwe mà gbeyà hweyà hwe arzɛ hwe ɛndɛ ndi ò worzo nà oma hwe àŋgàmɛ̀nɛ̀yi lì hwɛ. Nà oma mɔ̀ à jò hvɔ̀ɔ̀tì ò wòhwe, mɔ̀ à mà jò gbeyà nanù ema i hwɛ wòtani. Ò mburza nanù à mà lìya ò lìyà là momɛ̀ là ama Lòohwɛ̀ ema lì kàrzàmi ò ŋmanyu yà lohwà.

Gàletìyà 2:20

Nà oma Yerzù à mà ŋwèeyà o mbarza, e hwèlì ndi ema imbahvɛ nà mà ŋwa. Nà rza enje lòŋgɛ hvɛ. Krirztò ndi à hwèlì o tenì ya ami. O eŋgànɛ̀lɛ̀ rzɔ tɔ̀ ima lìtumba la eyà ema na gbèeyà o rze ya mɔ̀nyɛ̀ nàŋgɛ, na e gbèeyà ndi èhwanja o lìlòkɛ̀ ema na ohvani è Ŋmanà wà ama Lohwɛ̀ ema a no lìŋgàni rzii a ŋwa o nyòla ami.

Hwèwulùwèlì 4:9

Hweŋge hwèembe hwe aaniyɛ hwe ma hwɛ lì embeya ò è mɔ̀ ema à lìyayi ò è konda yà lìkànèyà, mɔ̀ ema à hwèlì lòŋgɛ ò gbìndèyà nà ò gbìndèyà. Hwe mà hwɛ lì mò embeya mɛ̀rzɔ̀kɔ̀ ema mè mò ŋgba wònyaki, èluhwe, nà jèka.

Hibrù 7:16

Rzeketɛ imbenda ema i tɛ̀yirzɛhwɛ na hwatò jɔ ndi i ma mo gbeyà ema a hwɛ pìlìrzì. Ndi a hwèlì e pìlìrzì ehwànja mɔ̀ à ohvi màyìmbi ma lì hwɛ o lòŋgɛ natɛ̀ɛ na o gbìndèyà na o gbìndèyà.

2 Kɔ̀rintìyà 13:4

È hwèlì ndi e jɔ̀kɛ̀ nanù ema Krirztò nàa mòtò wa hwènàmà a rzi hwɛnɛ ŋginyà e hvonda ema hwà mà no wòmeyà o mbarza. Ndi tɔ̀ nanù a hwèlì lòŋgɛ o nàŋgɛ, ndi tɔ̀ na oma a hwèlì lòŋgɛ nanù, èhwanja Lohwɛ̀ à mà gbeyàna e ŋginyà ya eni o lì mo timbirzɛhwɛ o lòŋgɛ. Nà oma i hwèlì ndi mɔ̀kɔ na Krirztò, irzɔ hvɛ nàa hwatò hwa hwènàmà i rza imbami. Ndi irzɔ hvɛ jo ò hwɛ o lòŋgɛ na Krirztò o ŋginyà ya ama Lohwɛ̀, ndèŋgànɛlɛ jo ò e gbeyà hweyà hwe arzɛ ema i hwɛni lì e gbèeyà.

Hwèwulùwèlì 9:1

È aŋgèlì ema e ma ùkirzɛ̀ ita e ma tòŋga lìyɔ̀mi la eni. Rzìi na ɛnɛ rzombe ema e ma akakowɛ o lìwòhwɛ la ŋmanyu rzìi e unda o rze ya mɔ̀nyɛ̀. Ène rzombe e ma ŋgbààhwà ilìhvowàni ja ehvɔ̀ndi ema e rza ohvɛ lìrzùkù.

Yòwanìrzɛ̀ 14:19

O rza wòwa hvònda hvɛ, e rze e rza ò nò ɛnɛ hvɛ. Ndi inyɔ e nò ɛnɛ. Èhwanja na hwèlì lòŋgɛ, inyɔ hvɛ e ò hwɛ lòŋgɛ.

Kòlòrzìyà 3:3

Inyɔ è hwiye nanù ema nà oma Krirztò à ŋwelì è gbèyi ndi nàa inyɔ hvɛ è mà ŋwa.

Hwèwulùwèlì 5:14

Hweŋge hwèembè hwe aniyɛ hwe ma hwɛ lì ohwa nanù ema, “Inyɛ̀ wo lìya nanù.” Èŋge mbàŋgɛ ya hwàmbaki na hwànìi rzìi e kpa o rze rzìi e kànɛ e Ŋguma ya Mɔ̀lɛ̀ŋgù.

Matiyò 11:23

Inyɔ hvɛ hwatò hwa Kàpɛ̀nàwɔ̀mì, è ɔ̀ŋgɛ̀lɛ̀ nanù ema, e ma uka ò ŋmanyu ya Lohwɛ̀, ndi è hwɛnì lì rzìhwirzɛhwɛ ò tenì yà mùnya. È ma hwɛ tɛ ema hweyà hwe mànyakà ema Lohwà à mà gbèye ò mbòwa ya anyu hwe mà gbeyàhwa tɛ ndi ò mbòwa ya Rzòdòmi òma eŋge mbòwà e hwèlì natɛ̀ɛ na yàwònò.

Lukàrzɛ̀ 24:5

Hwanù hwalanà hwa mà lɛ̀mbeya mòkambiya rzìi hwa rzùma màrzò ma awu ò rze. Hwàŋga hwatò hwa mà hwa ijòwa nanù ema, “Mamɛ ya àrzeyà è mɔ̀ ema a hwèlì lòŋgɛ ò tenì yà mèlìmà e?

Yòwanìrzɛ̀ 11:25

Yerzù rzìi a mò òhweyà nanù ema, “Imba ndi na hwèlì hwèhvùmùwèlì nà lòŋgɛ, tɔ̀ ima mɔ̀ ema à nò lòkɛ̀ tɔ̀ nɛ à ŋwa, à ò tɛ̀mɛ̀ hvɛ ò lòŋgɛ.

Hwèwulùwèlì 2:8

À mà nò ohweyà hvɛ nanù ema, “Tìleyà è aŋgèlì ema è hwèlì ò ŋmèmba ema mò hwèlì ò Rzàmàyinà nanù ema, “È mòtò ema à hwèlì è wà worzo ndèŋgànɛ̀lɛ̀ à hwèlì è mòtò ema à hwèlì è wà lìrzùkù, mɔ̀ ema à mà ŋwa ndèŋgànɛ̀lɛ̀ à hwèlì ò lòŋgɛ hvɛ, mɔ̀ ndi à omi mono ŋmɛ̀ndì.

Hwèwulùwèlì 6:8

Nà ma ɔ̀ŋgɔ, rzìi na ɛnɛ wɔ̀rzi ema e ma ɛneya mɔ̀rzɔ̀nɔ̀ nàa hwèwùlè ema hwe rzɔ̀ɔnji. Lìina la ama e mòtò ema à mà e lìya o ŋmanyu lì ma hwɛ̀lɛ̀hwɛ̀ ndi Kpelì, ndèŋgànɛ̀lɛ̀ èkomè yà hwatò ema hwa mà ŋwɛɛ e ma mo oŋgàma o mburzà. Hwà mà ŋgbahwa è wònjà o lì kànèyà lìkayi lɔ̀kɔ la e rze ya mɔ̀nyɛ̀ o ìtììtènì ja màkayi manii ja e rze ya mɔ̀nyɛ̀. Hwà mà ohwa nanù ema inyɛ a gbeyàne e rzɔ̀lɔ̀, e njawu, inyàmbɛ, na inyàmà ja wòhwe o lì oŋwa hwatò o e rze ya mɔ̀nyɛ̀.

Hwèwulùwèlì 10:6

rzìi aàtɛ o lìna la ama Lohwɛ̀ ema a hwèlì lòŋgɛ natɛ̀ɛ na o gbìndèyà. Mɔ̀ ndi à hwèlì e mɔ̀ ema a weki e ŋmanyu yà lohwà, e rze ya mɔ̀nyɛ̀, ŋmàànja na hwèèmà hwe arzɛ ema hwe hwèlì o tenì. Ène aŋgèlì e ma ohwa nanù ema, “O rza hwɛ hvɛ tɔ̀ lì hvaŋga la hvonda hvɛ.

Hwèwulùwèlì 15:7

Rzìi mɔ̀kɔ hwa hwèŋge hwèembè hwe aniyɛ ema hwe ma hwɛ lòŋgɛ, e ma ŋgba lìŋgi lìrzamba la aŋgèlì hwewoki lìrzàmba hwe gòòlù ema hwe ma ondìrzɛ̀hwɛ na hwètàtò hwe ndɛnɛ hwe ama Lohwɛ̀, mɔ̀ ema a hwèlì natɛ̀ɛ na o gbìndèyà.

Hwèwulùwèlì 20:13

Hwàto ema hwa mà ŋwèeyà ò tenì yà ŋmànja, hwa mà ɛndɛ ò mà Lohwɛ̀ aŋga nanù à hwa kàyìrzɛ̀. Ndeŋgànɛlɛ hwanɛyi hwatò ema hwa mà ŋwɛ̀ɛ̀ ema hwa hwèlì ò èkomè yà hwatò ema hwa mà ŋwɛ̀ɛ̀, wɔ̀ hvɛ hwa ò tɛ̀mɛ̀ ò worzo wò ama Lohwɛ̀ aŋga nanù mɔ̀ à ò hwa kàyìrzɛ̀ lì wowàna hwɛ̀ɛ̀mɛ̀ hwe awu.