Hibrù 12:2 - Mokpwe: Bakwery (New Testament)

² Ì rzòkɛ̀ ndi Yerzù mììrzɔ̀ mà arzu. Èhwanja mɔ̀ ndi à hwèlì è mɔ̀ ema à jò timba ò lì hwɛnɛ lìlòkɛ̀. À mà èmeyà ò lì ŋwa è kpèelì yà ìrzɔnì ò mbarza ndeŋgànɛ̀lɛ̀ à rzi wòwè iŋgi ìrzɔnì nàa tɔ̀ eyà aŋga nanù mɔ̀ à luwa mɔ̀nyɛ̀ŋgì ema Lohwɛ̀ à mò ùtelì. Ò èŋgànɛ̀lɛ̀ eŋge è mà gbeyà ema a lìyà ò lìya là mòmɛ̀ ò mbòkò yà lìkànèyà là ama Lohwɛ̀.

Hibrù 12:2 Referans Kwoze

1 Pètrò 3:18

Nà ohwi ene eyà nanù ehwànja Krirztò mɔ̀ hvɛ à mà taka na lì ŋwa o nyòla wòhwe wo arzu o ŋgèlì hvɔ̀kɔ o iŋgèlì ja arzɛ. A ma hwɛ ndi mòtò ema à mà hwɛ lì gbeyà hweyà ema Lohwɛ̀ a arza, ndi à mà ŋwa o nyòla hwatò hwa wòhwe. A ma gbeyà ndi nanù aŋga nanù irzɔ i uka o ma Lohwɛ̀. Hwàto hwà mà mo òŋwa ndi e nyàma nyo ya eni ya e mòtò wa hwènàmà ndi e ma ŋwa. Lohwɛ̀ à mà gbeyà èlìŋgɛ̀ ya eni o lì hwɛ lòŋgɛ.

Hibrù 1:3

Oŋgo Ŋmanà ndi à hwèlì ŋmɛ̀ɛ̀nɛ̀nì mò ŋmàye mò ama Lohwɛ̀, ndèŋgànɛ̀lɛ̀ mɔ̀ ndi à jò uŋmɛ̀lɛ̀ njɛnɛ Lohwɛ̀ à hwèlì nà è jɔ̀kɛ̀, à hwèlì ndi nyàyi hvɔ̀kɔ nà oma Lohwɛ̀ mɔ̀ hvɛ à hwèlì. Màyimbì mà hweyà hwe ama oŋgo Ŋmanà, hwe mà gbeyà hweyà hwe arzɛ hwe ɛndɛ ndi ò worzo nà oma hwe àŋgàmɛ̀nɛ̀yi lì hwɛ. Nà oma mɔ̀ à jò hvɔ̀ɔ̀tì ò wòhwe, mɔ̀ à mà jò gbeyà nanù ema i hwɛ wòtani. Ò mburza nanù à mà lìya ò lìyà là momɛ̀ là ama Lòohwɛ̀ ema lì kàrzàmi ò ŋmanyu yà lohwà.

Ɛ̀hvìrzìyà 5:2

Inyɔ e lìŋgàne hwahvɛhvɛ hwatò, ŋgànà hvɔ̀kɔ nàa oma Krirztò a me e lìŋgàne rzìi a jo ŋwèeyà. A ma aŋgbɛ̀ɛ mɔ̀ ŋmìti o ma Lohwɛ̀ nàa làhweyà na jàhwèyà ema i ma lìŋgìrzɛ Lohwɛ̀ rzayi-rzayi.

Hvìlipìyà 1:6

Nà lòkɛ̀yi nanù ema Lohwɛ̀ ema à mà wòteyà ò lì gbeyà hwene hwèwòlò hwe gbamù ò ìtììtènì ja anyu, à hwɛ ndi ò lì hwe gbeyà natɛ̀ɛ à hwe kulɛ̀ Wùùnyà ema Yerzù Krirztò à ò tìmbɛ̀ ò lì jà.

Hibrù 9:28

Nànù hvɛ mɛnɛ ndi Krirztò à mà aŋgbɛ mɔ̀ ŋmìti o ŋgelì hvɔ̀kɔ o iŋgèlì ja arzɛ nàa jàhwèyà o lì ulɛ wòhwe ema wo koki o hwatò. Ndeŋgànɛ̀lɛ̀ mɔ̀ à o jà hvɛ e ŋgelì ema e ùkirzɛ̀ ihwàkɛ, rzeketɛ o lì ulɛ wòhwe o hwatò, ndi mɔ̀ à o jà o lì rzùŋgà mòŋgɛ ma hwatò ema hwa mo ambɛ̀lɛ.

Yòwanìrzɛ̀ 6:40

Tatɛ̀ wa ami arza nanù ema, tɔ̀ ima mòtò ema a ɛni e Ŋmanà rzìi a mò lòkɛ̀ a ò luwa lòŋgɛ la gbìndèyà. Ndeŋgana imba na ò hwa hvùmùlɛ̀ ò wùnyà wò lìrzukù.

1 Pètrò 3:22

Krirztò ema mɔ̀ à mà ɛndɛ ò ŋmanyu yà lohwà ndèŋganɛlɛ à lìyàyi ò ehvàrzu yà lìya là momɛ̀ là ama Lohwɛ̀, à kànèyà i aŋgèlì jà arzɛ, hwàkànèlì hwa arzɛ nà iŋginyà ja arzɛ ja ŋmanyu.

Hwègbèèlì 5:31

Lohwɛ̀ à mà mò kàrzɛ, rzìi à mò ika ò lìya là eni là mòmɛ̀ nàa Mòtìmbèlì nà è Mòrzùŋgèlì. À mà gbeyà ndi nanù èhwanja, à uŋmɛ̀lɛ̀ hwatò hwa Irzàyɛ̀lì è njiya yà lì hwɛ̀mɛ̀ hwɛ̀ɛ̀mɛ̀ hwe awu hwe wòhwe aŋga nanù, Lohwɛ̀ à ò hwa làkìrzɛ̀ wòhwe wò awu.

Lukàrzɛ̀ 24:26

Rzeke e mà hwɛ ndi nanù ema, è Mɔ̀ ema à Ɔ̀kirzɛ̀hwɛ̀yi à ò lùwa mene mètàkà me arzɛ, ndèŋgàna à ò lùwa èluhwe ya eni.”

Judɛ 1:21

È ɛ̀ndɛ̀nɛ̀ ndi lòŋgɛ là anyu ò worzo nyayi ema inyɔ e ayèmbɛ nanù ema Lohwɛ̀ a e lìŋgàni. È hwɛ ndi o lì ambɛ̀lɛ̀, ndeŋgànɛlɛ e àhvìtɛ̀ nanù ema e Rzàŋgo ya arzu Yerzù Krirztò e o jà, ndèŋgànɛlɛ mɔ̀ à o gbeyàna ŋmèma mo eni mo ììlì, inyɔ e o luwa lòŋgɛ la gbìndèyà. Mɔ̀ a o gbeyà ndi nanù ehwànja a e lìŋgàni.

Hibrù 8:1

jànda jà mamɛ ema jò òhwa i hwèlì ndi nanù ema, jo òhvi ene tumba ya Pìlìrzì e Karzami ema, e lìyayi o èhvarzù ya lìya la mòmɛ̀ la e konda ya Lohwà lì karzami, o ŋmanyu yà lohwà.

2 Tìmotì 4:8

O nàŋgɛ nanù, mòrzahwèlì mo hwèlì mo no ambɛ̀lɛ̀, èhwanja nà mà gbèeyà èwòlò na oma Lohwɛ̀ a arza nanù ema e gbeyàhwe. Moŋgo mòrzahwèlì ndi e Rzàŋgo ema e kàyìrzɛ̀ hwatò ò jɔ̀kɛ̀ e no ŋgba o wùnyà wo hwèkàyìrzèlì. Rzeketɛ imba mbiti mɛnɛ ndi à ò ŋgbɛ, à ò ŋgba hwatò hwa arzɛ ema hwa àhvitɛ hwèjèelì hwe eni.

Hvìlipìyà 3:20

Ndi o irzɔ, i hwèlì ndi hwatò ema e mbowà ya awu e hwe ndi o ŋmanyu yà lohwà. Ndeŋgànɛ̀lɛ̀ ja ambɛlɛlɛ e Mòrzùŋgèlì hwa arzu, Rzàŋgo Yerzù Krirztò nanù ema mɔ̀ à anjiye o ŋmanyu yà lohwà a timbe o rze ya mɔ̀nyɛ̀.

Makòrzì 14:36

Yerzù rzìi à òhwa nanù ema, “Ìi Tàà, Tatà ò tànɛyi lì gbeyà tɔ̀ mamɛ ema ò arza lì gbeyà. Ò nò wòwanè menè mètàkà. Ndi rzeketɛ nà òmà nà àrza ndi nà òma ò arza.”

Hwèwulùwèlì 2:8

À mà nò ohweyà hvɛ nanù ema, “Tìleyà è aŋgèlì ema è hwèlì ò ŋmèmba ema mò hwèlì ò Rzàmàyinà nanù ema, “È mòtò ema à hwèlì è wà worzo ndèŋgànɛ̀lɛ̀ à hwèlì è mòtò ema à hwèlì è wà lìrzùkù, mɔ̀ ema à mà ŋwa ndèŋgànɛ̀lɛ̀ à hwèlì ò lòŋgɛ hvɛ, mɔ̀ ndi à omi mono ŋmɛ̀ndì.

Hibrù 13:13

Irzɔ hvɛ rzɔ i hwɛnì lì mò ɛndeya o èwoka ya hwèlìyelì aŋga nanù irzɔ i hwɛnɛ erzambo ema à mà luwe.

Hibrù 5:9

Lohwɛ̀ à mà mo gbeyà o lì hwɛ e Pìlìrzì e Kàrzàmi ema e hvomɛ̀nɛ̀, aŋga nanù, hwatò ema hwa mo hweyàna, hwa o luwa lìrzùŋgàhwa ema lì o hwɛ natɛ̀ɛ na o gbìndèyà.

Yòwanìrzɛ̀ 13:3

Yerzù à mà hwiya nanù ema Tatɛ̀ wa eni à mà màa lì mò ika hweyà hwe arzɛ ò màa me eni. A ma hwiya ama à mà uwɛ̀lɛ̀lɛ̀yi ndi ò ma Lohwɛ̀ ndèŋgàna à mà hwɛnɛ ndi lì tìmba òma Lohwɛ̀.

Lukàrzɛ̀ 17:5

I àpɔ̀rzìtòlò rzi jò òhweyà è Rzàŋgò nanù ema, “O jò ètirzɛ màlòkɛ̀ ma arzu.”

Makòrzì 9:24

Lìwòkìmɛnɛ e rzàŋgò ya ama òŋgò ŋmanà wa mùnyanà e mà òhwa na lìlò lì kàrzàmi nanù ema, “Nà lòkɛ̀yì, ò nò òŋgòwane lìlòkɛ̀ la ami ema lì rza òndɛ.”

Hibrù 12:3

È lùtèyà nɛ Yerzù à mà emeyà lì taka o màà mà hwatò hwa wòhwe ema hwà mà mo kɔwu. È ɔ̀ŋgɛ̀lɛ̀ lìŋgi lìtake aŋga nanù inyɔ e rza ɔ̀tɔ̀ na lì kpa ŋmèma.

Ɛ̀hvìrzìyà 2:16

Ò èŋgànɛ̀lɛ̀, nà oma à mà ŋwèeyà ò mbarza, è mà jò gbeyà irzɔ ò lì hwɛ mòtò mɔ̀kɔ nà Lohwɛ̀, ò èŋgànɛ̀lɛ̀ rzɔ à mà jò tìmbìrzɛ̀ nà Lohwɛ̀.

Hwègbèèlì 5:41

Nà òma iŋgi àpɔ̀rzìtòlò ima wurze ò wòŋgò wòlìya, hwà mà hwɛ ò mɔ̀nyɛ̀ŋgì èhwanja, Lohwɛ̀ à mà hwa wòwa nàa hwatò ema hwa kanɛ̀yi ò lì lùwa erzambò ò nyòla lìinà la ama Yerzù.

Yòwanìrzɛ̀ 12:32

Nà mà kàrzɛhwɛ tɛ ò ene rze, na rzìima hwatò hwa arzɛ ò nyò ya ami.”

1 Pètrò 1:11

Wɔ hwà mà keka o lì arzirzɛ e hvonda ema ene eyà yo ò hwɛ ndèŋgànà nɛ e o jèeya. È hvonda yɔ ene ema Èlìŋgɛ̀ ya ama Krirztò ema e ma hwa hwɛ o tenì e ma hwɛ o lì hwa ohweyà nɛ o e hvonda ema e o jɛ̀ɛ̀, Krirztò a o tàkɛ na èluhwe ema a o luwɛ o mburza meŋge mètàkà.

Hibrù 10:14

Èhwanja o màhwèyà mɔ̀kɔ ema mɔ̀ à ŋgbelì à mà gbeyà hwatò ema mɔ̀ à mà ulɛ wòhwe wo awu wòtani wo awu wo ma ondìrzɛ̀hwɛ.

Yòwanìrzɛ̀ 12:24

Nà e òhweyà e jɔ̀kɛ̀ nanù ema, hvɔ̀ŋgɔ̀ ya mbarzi e lìiya ndi èŋge hvɔ̀ŋgɔ̀ ya ahvɔ̀kɛ mɛnɛ natɛ̀ɛ e ònahwa ò mɔ̀nyɛ̀ rzìi e ŋwa. È ŋwelì tɛ èŋge hvònda ndi e ŋya i hvɔ̀ŋgɔ̀ ja mbarzi jɔ̀ɔjɔ̀ɔ.

Yòwanìrzɛ̀ 8:56

È rzàŋgò ya anyu Abràhamù à mà òka mɔ̀nyɛ̀ŋgì ò lì hwiya màlùtèyà ma lì ɛnɛ wònò wùnyà wò ami. Mɔ̀ à mà wò ɛnɛ, ndèŋgàna à mà lìŋga.”

Yòwanìrzɛ̀ 1:29

Ò wònɛ̀yi wùnyà Yòwanìrzɛ̀ rzìi à ɛnɛ Yerzù nà òma à mò jèeyà. Rzìi Yòwanìrzɛ̀ à òhwa nanù ema, “È ɔŋgɔ̀ tɛ, è Ŋgumà Mɔ̀lɛ̀ŋgù wà ama Lohwɛ̀ mɔ̀ òŋgò. Mɔ̀ ndi à wòwi wòhwe wò hwatò hwa è rze yà mɔ̀nyɛ̀ yà arzɛ.

Lukàrzɛ̀ 23:11

Hɛ̀rɔ̀dì nà hwaànèlì hwa eni hwa njùma hwa mà kìkòwa Yerzù. Hwa mà mò umbɛlɛlɛ mènìtò, rzìi hwa mò wɔ̀tìrzɛ mòŋgòmbè mò gbamù, rzìi hwa mò tìmbìrzɛlɛlɛ Pìlatò.

Matiyò 20:28

nyàyi hvɔ̀kɔ hvɛ mɛnɛ nàa è Ŋmanà wà è Mòtò wà Hwènàmà a rzìi jɛ̀ɛ̀ ema hwatò hwa mò gbèeyà, ndi mɔ̀ à jelì ò lì gbèeyà hwatò, na ò lì ŋgba lòŋgɛ la eni nàa tùŋge ò lì kɔ̀tɔ̀ rzayì-rzayì ja hwatò.”

Matiyò 16:21

Lìwòteyà eŋge hvònda Yerzù à mà wòteyà lì nɔŋgeya Hwà-òkòwèlì hwa eni, lì hwa telɛlɛ ema a hwɛnì lì ɛ̀ndɛ ò Jèrurzalɛ̀mù. Aŋga a hwɛnì lì akeyà mètàkà jɔɔ-jɔɔ ò màà mà hwàmbaki hwa mbòwà, na Ipìlìrzì ndɛnɛ na Hwà-òkòlèlì hwa mbenda. A ma hwa òhweyà hvɛ ama a hwɛnì lì òŋwahwa rzìi ò menya meyàwò, à ò hvùmùlɛ̀hwɛ.

Hwèwulùwèlì 1:17

Nà oma nà mà mo ɛnɛ, nà mà kpa o matàŋgà mà eni rzìi na hwɛ ndi nàa mòtò ema à mà ŋwɛɛ. Rzìi à no hwàkɛ lìya la eni la mome rzìi a ohwa nanù ema, “O rza oka wɔ̀ŋgɔ̀, imba ndi na hwèlì e Mòtò wa Hwèwòteli ndèŋgànɛ̀lɛ̀ na hwèlì e Mòto wa Lìrzukù.

Hwèwulùwèlì 1:11

Lì ma ohwa nanù ema, “Tila o kààti hwèèmà ema o ɛni, rzìi hwe e omeya lìni lìrzàmba la mìitelì. Ò è omeya o lìni lìrzàmba la mìtelì ema me hwèlì o Ɛ̀hvɛ̀rzɔ̀rzì, o Rzɛ̀màyìnà, o Pɛ̀gàmùmì, o Tìyatìrà, o Rzàdìrzì, o Hvìladɛlhvìyà na o Làwòdèrzìyà.”

Hibrù 7:19

Ì hwi nanù ema è mbenda è rza è gbeyà ema eyà è hwɛ nà oma è àŋgàmɛ̀nɛ̀yi lì hwɛ. Jò ɔ̀ŋgɔ tɛ ò ɛnɛyi ehvàrzu, eyà yà gbamù è mà jà ema è jò gbèyi jò ohvi màhvìta. Ndeŋgànɛ̀lɛ̀ yɔ̀ ndi è mà jò jànà ò lì kombɛ̀nɛ̀ Lohwɛ̀.

Hibrù 1:13

Lohwɛ̀ a rzi ohweyà tɔ̀ aŋgèlì tɔ̀ hvɔ̀kɔ nanù ema, “Liya anù o mɔ̀ɔ mo ami mo mome natɛ̀ɛ na e hvonda ema na gbeyà rzìi o yàaya hwàkɔ̀yèlì hwa aŋgɔ na matàŋgà mà aŋgɔ.”

Hwègbèèlì 2:36

Petrò rzìi a hwatɛ hvɛ ò lì òhwa nanù ema, “O eŋgànɛlɛ rzɔ inyɔ hwa arzɛ hwatò hwa Irzàyɛ̀lì e hwɛni lì hwiye na e jɔ̀kɛ̀ nanù ema, ò nò Yerzù ema inyɔ e ma wòmeyà ò mbarza mɔ̀ ndi à hwèlì e mɔ̀ ema Lohwɛ̀ à mà gbeyɛ, e Rzàŋgò ndèŋgànɛ̀lɛ̀ mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi.”

Makòrzì 9:12

Yerzù rzìi a hwa tìmbìrzɛ̀lɛ̀lɛ̀ nanù ema, “Nà è jɔ̀kɛ̀, Èlàyijà a hwɛnì lì lòma lì jà ò lì rzɛ̀ŋgɛ̀nɛ̀ hweyà hwe àrzɛ. Mamɛ ndèŋgàtɛ̀ e tìlahwì ò Kaàti ya ama Lohwɛ̀ nanù ema è Ŋmanà wà è Mòtò wà Hwènàmà à hwɛnì lì taka rzayì-rzayì, rzìi hwa mò ndinda e?

Hwèwulùwèlì 1:8

Rzàŋgo Lohwɛ̀ lì karzamì à ohwi nanù ema, “Imbà ndi nà hwèlì è Àlhvà nà è Omèga,” mɔ̀ ndi à hwèlì Lòohwà ema lì hwèlì, ema lì mà hwɛ, ndèŋgànɛ̀lɛ̀ ema lì ò hwɛ̀ɛ̀.

Hibrù 11:36

Lòŋgò hwà mà tàkìrzɛ̀hwɛ, hwà mà lorzowahwa, ndèŋgàna hwà mà gbiyɛhwɛ. Hwanɛyi hvɛ, hwà mà rzòŋgɛ̀hwɛ̀ iŋgɔ̀kɔ̀hwì na lì ikahwa o hwèwòwà.

Hibrù 10:33

O ma hwɛ hvonda ema hwatò hwà mà hwɛ lì e enyìrzɛ̀ na lì e tàkirzɛ o marzo ma hwatò. O manɛyi marzako hvɛ inyɔ e ma hwɛ na hwatò ema wɔ̀ hvɛ hwà mà hwɛ lì luwa iŋgi nyayi ja mètàkà.

Makòrzì 16:19

Ò mburzà hvònda ema Rzàŋgò Yerzù à mà hwa òhweyà hwenè hweyà, rzìi Lohwɛ̀ à mò gbeyà à kòòhwà ò ŋmanyu yà Lohwà. À mà lìyà ò lìya là mòmɛ̀ là ama Lohwɛ̀.

Hwègbèèlì 3:15

O eŋgànɛ̀lɛ̀ rzɔ inyɔ e ma gbeyà e mòtò ema a jànà hwatò lòŋgɛ la jɔ̀kɛ̀ à mà òŋwahwa ndi Lohwɛ̀ à mà mò hvùmùlɛ̀ ò kpelì. Irzɔ hwiti i ma ɛnɛnɛ hweŋge hweyà na mìirzɔ̀ ma arzu.

1 Kɔ̀rintìyà 1:18

Ŋmɛ̀ndì mò è kpelì yà ama Krirztò ò mbarza, mò hwèlì ndi èètì nà hwàŋgà hwatò ema hwa hwɛnì lì hvàŋgahwà. Ndì irzɔ̀ ema i hwèlì ò lì rzùŋgàhwà, ì hwi nanù ema mòŋgò ŋmɛ̀ndì mò hwèlì ndi è ŋginyà yà ama Lohwɛ̀.

1 Kɔ̀rintìyà 1:23

Ndi irzɔ ì ohwa ndi nanù ema Yerzù à mà wòmàhwɛlɛ ò mbarza. Wonyà Yudà hwa rza arza lì hweyà monò ŋmɛ̀ndì, hwaŋga hvɛ ema hwa rza enje wònyà Yudà, monò ŋmɛ̀ndì mò hwèlì ndi èèti nà wɔ̀.

Jèmìrzì 2:1

Wònyànyàŋgo wa ami kòkò. Inyɔ nàa hwàlòkèlì hwa ama Rzàŋgo wa arzu Yerzù Krirztò, e Rzàŋgo ema èluhwe ya eni e kàrzàmi, inyɔ e rza àŋgàmɛ̀nɛ̀yi lì ɛnɛ tɔ̀ ima mòtò rzìi e mo wowa o a ɛnɛ oma a ohvi wòlìto tɔ̀ a rza ohvi wòlìto.