Ɛ̀hvìrzìyà 2:2 - Mokpwe: Bakwery (New Testament)

² Ò eŋge hvonda è mà nɔ̀ŋgɔ̀ hweyà hwe wòhwe hwe hwatò hwa ene rze. È mà hwɛ lì hweyàna è mòkànèlì ema à kànèyà hwèlìŋgɛ̀ hwe wòhwe ema hwe hwèlì ò yululì. Nàtɛ̀ɛ nà yàwònò, eŋge èlìŋgɛ̀ è hwèlì è kànèyà hwatò ema hwa gbeyà mamɛ ema Lohwɛ̀ à ohwi nanù ema hwa rza gbeyà.

Ɛ̀hvìrzìyà 2:2 Referans Kwoze

Ɛ̀hvìrzìyà 6:12

È njuma ema jà ana è rza enje ndi yà hwatò hwa hwènàmà. Ndi irzɔ jà ànànà ndi lì teŋgɛ̀nɛ̀ iŋginyà ja wòhwe, hwàtìmbèlì hwa awu ema hwa kànèyà e rze ya jìtìtì na iŋginyà ja wòhwe ema i hwèlì o lìwòhwɛ̀ la ŋmanyu.

1 Yòwanìrzɛ̀ 5:19

Ì hwi nanù ema irzɔ ì hwèlì ndi hwàanà hwa ama Lohwɛ̀, tɔ̀ nɛ ì hwi nanù ema è Mɔ̀ wà Wòhwe ndi à kànèyà hwatò ò rze ema hwa rza hwiyɛ Lohwɛ̀.

Ɛ̀hvìrzìyà 2:3

Irzɔ hwa arzɛ hvɛ i mà hwɛ ndi nàa wɔ̀. I mà hwɛ hvɛ ndi lì gbeyà hweyà o lì òkìrzɛ̀ e nyàma nyo mɔ̀nyɛ̀ŋgì. I ma hwɛ lì gbeyà hweyà hwe wòhwe na oma inyo ja arzu i ma arze nà e hweyɔ hvɛ ema màlùtèyà ma arzu ma mà arze. Wono wòhwe ema i ma hwɛ lì gbeyà, wo ma hwɛnɛ lì gbeyà Lohwɛ̀ o lì jo kɔ̀kìrzɛ̀ molemilemi na oma a kɔ̀kìrzɛ̀ hwatò hwa arzɛ.

Yòwanìrzɛ̀ 12:31

O nàŋgɛ nanù e hvònda ene ema Lohwɛ̀ a kàyìrzɛ ene rze. Nàŋgɛ nanù e mòkànèlì wà ene rze a hweni lì kàyìrzɛ̀hwɛ.

Ɛ̀hvìrzìyà 5:6

Tɔ̀ mòtò a rzi keka lì e ɔ̀njɔ na mbɔrzi ya èèti. Lohwɛ̀ a o kɔ̀kìrzɛ̀ hwatò ema hwa rza gbèeyà na oma mɔ̀ à àrzeyà, ndi hwa gbeyà ndi hwene hweyà hwe wòhwe.

Yòwanìrzɛ̀ 8:44

È hwèlì ndi e hwa ama e rzàŋgò ya anyu, Mòkarzɛ̀, ɔ̀ndeŋgàtɛ̀ e arza ndi lì òndìrzɛ̀ e nyɔ̀ŋgi ya eni. Mɔ̀ à mà hwɛ ndi mòòŋwèlì natɛ̀ɛ na ò hwewòtelì. A rza alɛ̀mbɛnɛ ò jɔ̀kɛ̀, èhwanja a rza òhvi jɔ̀kɛ̀. Mɔ̀ a kɔ tɛ hweyà, a òhwa ndi e mbɔrzi ya eni ya mbòwà. Èhwanja mɔ̀ à hwèlì ndi mòtò wa mòlàŋgà, ndèŋgànɛ̀lɛ̀ a hwèlì ndi e rzàŋgò ya mòlàŋgà.

Ɛ̀hvìrzìyà 4:22

Hwa mà è okolɛ̀ ò lì hwɛ̀mɛ̀ ɛ̀ɛ̀mɛ̀ yà worzo ema è mà lomè lì hwɛ̀nɛ̀. Ò eŋge hvonda mòŋgɛ mà anyu ma mà hwɛ wòhwe ehwànja è mà ohva ndi mèèmà mè lì gbèeyà hweyà hwe wòhwe mɛnɛ. Meŋge mèèmà ema è mà hwɛ̀nɛ̀ ò lì gbèeyà hweyà hwe wòhwe mè mà è eŋgìrzɛ̀.

1 Kɔ̀rintìyà 6:11

Nànù ndi lòŋgo là hwa inyɔ è mà hwɛ. Ndi inyɔ è mà rzàŋgìrzɛ̀hwɛ̀ ò wòhwe wò anyu, è emànɛ̀lɛ̀hwɛ̀yì nà Lohwɛ̀, è tɛmìrzɛ̀hwɛ̀yi ehve-ehve nà Lohwɛ̀ lì akeyà nà Rzàŋgo Yerzù Krirztò nà Èlìŋgɛ̀ yà Lohwà là arzu.

2 Kɔ̀rintìyà 4:4

Mòkarzɛ̀, e mòkànèlì wa ene rze mɔ̀ ndi à kànèyà màlùtèyà ma hwatò ema hwa rza lòkɛ̀yì Krirztò. Wɔ̀ hwa rza tànɛyi lì rzɔ̀ŋgìtɛ̀nɛ̀ nanù ema ŋmɛ̀ndì mò gbamù e uŋmɛ̀lɛ̀ nɛ Krirztò a hwɛni wòlìto. Krirztò mɔ̀ ŋmìti a hwèlì ndi nàa Lohwɛ̀.

1 Yòwanìrzɛ̀ 5:4

Èhwanja tɔ̀ njɛnɛ ema à hwèlì è ŋmanà wà ama Lohwɛ̀ à mà màa lì rzuwànà è rze. Lìtiŋga ema mɔ̀ à mà màà lì rzuwànà è rze lì hwèlì ndi nanù ema, irzɔ ì lòkɛ̀ nanù ema Yerzù ndi à hwèlì è Mɔ̀ ema à Ɔ̀kirzɛ̀hwɛ̀yi nà Lohwɛ̀.

1 Yòwanìrzɛ̀ 3:10

Nànù ndi irzɔ ì hwɛni lì hwiya njɛnɛ hwàànà hwa ama Lohwɛ̀ hwa hwèlì, nà njɛnɛ hwàànà hwa ama Mòkarzɛ̀ hvɛ hwa hwèlì, tɔ̀ njɛnɛ ema à rza gbèyɛ mamɛ ema è hvomɛ̀nɛ̀yi à rza enje è ŋmanà wà ama Lohwɛ̀. Ŋgànà hvɔ̀kɔ hvɛ nà tɔ̀ njɛnɛ ema à rza lìŋgànɛ̀ ŋmanyàŋgò tɔ̀ è ndomɛ̀ yà eni.

1 Pètrò 1:14

Nà oma e hwèlì ndi hwatò ema hwa gbeyà mamɛ ema Lohwɛ̀ arza, e rzi keka lì emeyà nanù ema hweyà hwe wòhwe ema e ma hwɛ lì gbeyà o e hvonda ema e ma aka hwe e kànèyà mòŋgɛ ma anyu hvɛ.

Hwèwulùwèlì 20:2

Èŋge aŋgèlì è hvùma è dragɔ̀ni, wòŋgo gbahwà wò è hvonda yà kòwàà, ema wò hwèlì è Dɛhvùlì nà Mòkarzɛ̀. È aŋgèlì è mà mò kàka ò tenì yà ikolì jà meya.

1 Yòwanìrzɛ̀ 4:4

Inyɔ ema è hwèlì nàa hwàanà hwa ami, è hwèlì ndi hwatò hwa ama Lohwɛ̀, ndèŋgànɛlɛ è mà màà lì kpìrzɛ hwà-òhwèlì hwa hwèlìŋgɛ̀ hwa mòlàŋgà. Èhwànja Èlìŋgɛ̀ yà ama Lohwɛ̀ ema è hwèlì ò tenì yà anyu, è imbami lì aka Mòkarzɛ̀ ema à kànèyà hwatò hwa ene rze.

1 Pètrò 4:3

Inyɔ e ma hvaŋga hvonda rzayi-rzayi o hvonda ema e ma aka, o lì gbeyà mamɛ ema hwatò ema hwa rza lòkɛ̀ Lohwɛ̀ hwa hvɔ̀rzì o lì gbeyà. Èŋge hvonda e ma aka. È mà lìya mòŋgɛ ma anyu o mòrzònje, e ma hwɛnɛ nyɔ̀ŋgi o mèèmà o lì gbeyà hweyà hwe wòhwe, e ma hwɛ lì nyɔ mììmbà o lì woma, e ma hwɛ lì aŋga indèma ema hwatò hwà mà hwɛ lì nyɔ mììmbà na lì woma rzìi hwa a gbeyà hweyà hwe wòhwe, ndèŋgànɛ̀lɛ̀ e ma hwɛ hvɛ lì kànɛlɛ̀lɛ̀ mahvɛhvɛ màlohwà.

Kòlòrzìyà 1:21

Ò lìrzàkò lɔ̀kɔ, inyɔ è mà rzɔ̀lɛ̀nɛ̀ Lohwɛ̀ ndèŋgànɛ̀lɛ̀ è mà hwɛ ndi hwàkɔ̀ɔ̀yèlì hwa eni ò nyòla hweyà hwe wòhwe ema è mà hwɛ lì gbeyà nà lì lùteyà.

Gàletìyà 1:4

Ò lì arza nanù ema i rzolowahwa ò lì gbeyà wòhwe ò ene rze yà yawono, Yerzù Krirztò à mà aŋgbɛ mɔ̀ ŋmìti ò lì jò ŋwèeyà ò wòhwe wò arzu. À mà gbeyà ndi nanù èhwanja nanù ndi Lohwɛ̀ è Tatɛ̀ yà arzu è mà tɛ̀yirzɛ.

Ròmànì 12:2

È rzi keka lì òŋgama hwɛ̀ɛ̀mɛ̀ hwe hwatò hwa ene rze ya mɔ̀nyɛ̀, ndi e hwɛmɛ Lohwɛ̀ a tikòwe mèèmà me anyu, aŋga nanù e luwa mèèmà me hvènya. Èŋge ye e gbeyà e rzɔ̀ŋgìtɛ̀nɛ̀ na ò lì òŋgama hweyà na òma Lohwɛ̀ a àrzeyà. Inyɔ e hwi gbamù hweyà ema Lohwɛ̀ a lìŋgàni ndèŋgànà e òŋgama hweyà ema hwe hvòmɛ̀nɛ̀yi.

Jèmìrzì 4:4

Inyɔ e hwèlì ndi nàa hwatò ema hwa hwèlì o ndawò ja màahwa ndi hwa gbeyà mòrzònje. È rza hwi nanù ema e ikayi tɛ mèèmà me anyu o hwema hwe rze, hwe e gbeyà inyɔ e jà ndi hwàkɔ̀ɔ̀yèlì hwa ama Lohwɛ̀ e? O eŋgànɛlɛ rzɔ tɔ̀ ima mòtò ema a lìŋgàni o lì ika ŋmèma mo eni o hwema hwe ene rze, à mà agbeyɛ mɔ̀ ŋmìti mɔ̀kɔ̀yèlì wa ama Lohwɛ̀.

1 Kɔ̀rintìyà 5:10

Nà rza ohwa ndi lì teŋgɛ̀nɛ̀ hwatò ema hwa rza lòkɛ̀yi Lohwɛ̀, tɔ̀ nɛ lòŋgo hwa hwèlì mɔ̀lɔ̀kɔ̀rzɔ̀ mo mòrzònje, e wɔ̀ hwa hwèlì wɔ̀, hwayihwɛ lòŋgo hvɛ ema hwa kanɛ̀lɛ̀lɛ̀ hwèrzùmbu. È rza tànɛyi lì hwaŋga ini nyayi ja hwatò natɛ̀ɛ na lìrzako ema e lìyà e rze.

Hwègbèèlì 5:3

Aŋga ndi Pètrò à mà mò ijòwa nanù ema, “Ìi Ànàniyarzì mamɛ ndèŋgàtɛ ò imanɛlɛ nanù ema mòkarzɛ̀ a ò kànèyà. Nàŋgɛ rzɔ mòkarzɛ̀ à mà ò gbeyà ò ma kɔ̀yeyà Èlìŋgɛ̀ yà Wòtani eyà na òma ò wa ò ma utɛ lòŋgò la wòŋgò wòlì ema ò ma àhwirzɛ̀ eŋge etò.

Yòwanìrzɛ̀ 15:19

È mà hwɛ tɛ nàa hwatò hwa ene rze, òma e rze ye e wòwi nàa e hwe eni hwatò. Ndi na e hvɔ̀rzì ò ìtììtènì ja hwatò hwa ene rze. O èŋgànɛ̀lɛ̀ e rza enje hwatò hwa ene rze. Ɔ̀ndeŋgàtɛ̀ e rze ye e kɔwu.

Yòwanìrzɛ̀ 14:30

Nà rza òhwa hvɛ na inyɔ hvònda ema e wawi, èhwanja e mòkànèlì wà ene rze a hwèlì a ja. Mɔ̀ a rza nò hwɛnelì tɔ̀ ŋginyà.

2 Pètrò 2:14

Èwòlò ya awu ya arzɛ e hwèlì ndi o lì gbeyà mòrzònje na tɔ̀ ima mòlana ema hwa ɛni. È nyɔ̀ŋgi ya awu ya lì gbeyà wòhwe e rza tànɛ lì kuwa. Wɔ̀ hwa lukɛlɛ hwatò ema lìlòkɛ̀ la awu lì rza imbamɛ rzìi hwa hwà gbeyà hwa unda o wòhwe. È nyɔ̀ŋgi e hwèlì o mèèmà me awu. Hwa hwèlì ndi o rze ya mòjèmà mo ama Lohwɛ̀.

Yòwanìrzɛ̀ 16:11

Ndèŋgànɛ̀lɛ̀ hwa tòni hvɛ o lì o hwàanà hwèkàyìrzèlèlì, hwe ama Lohwɛ̀ èhwanja mɔ̀ à mà màa lì kàyìrzɛ̀ e mòkànèlì wà ene rze.”

Yòwanìrzɛ̀ 13:27

Nà òma Jùdàrzì à mà wòwe èŋge èhvòòtò, mòkarzɛ̀ rzìi à mò kpèeyà. Yerzù rzìi à mò òhweyà nanù ema, “Mamɛ ema ò kimi ò lì gbeyà, ò è gbèye karzi-karzi.”

Yòwanìrzɛ̀ 13:2

Yerzù na hwà-òkòwèlì hwa eni hwà mà hwɛ lì laa Mòlèlì mò ŋgòmbe. Mòkarzɛ̀ à mà hwɛ à mà màa lì ika màlùtèyà ma wòhwe ò ŋmèma mo ama Jùdàrzì Ìrzìkalìyɔ̀tɛ̀ ò lì àhwirzɛ̀ Yerzù. Jùdàrzì Ìrzìkalìyɔ̀tɛ̀ à mà hwɛ ndi e ŋmanà wa mùnyanà wa ama Rzìmɔni.

Yòwanìrzɛ̀ 8:23

Ndi Yerzù à mà ɛ̀ndɛnɛ e mbɔrzi ya eni ò wòrzò ò lì òhwa nanù ema, “Inyɔ e uwɛ̀lɛ̀lɛ̀yi ndi ò rze. Imba na uwɛ̀lɛ̀lɛ̀yi ò ŋmanyu. Inyɔ e hwèlì ndi hwatò hwa ene rze. Imba na rza enje wa ene rze.

Yòwanìrzɛ̀ 7:7

È rze e rza tànɛyi lì e kɔ̀u ndi è nò kɔwu imba èhwanja nà è rzàmbà nanù ema è gbeyà wòhwe.

Matiyò 13:38

e hvaya e hwèlì ndi e rze ya arzɛ, i hvɔ̀ŋgɔ̀ ja gbamù i hwèlì ndi hwatò ema hwa hwèlì ò rze ya lìkànèyà la ama Lohwɛ̀, hwèwùlè hvɛ hwe hwèlì ndi hwaŋga hwatò ema hwa hwèlì na mòkarzɛ̀.

Hwèwulùwèlì 13:8

Hwatò hwa arzɛ hwa è rze yà mɔ̀nyɛ̀ hwa ò kanɛ̀ eŋge èembe. Hwàto ema hwa rza ò è kanɛ̀, hwa hwèlì ndi hwaŋga hwatò ema mìinà mà awu mà tìlahwe ò tenì yà è kààtì yà lòŋgɛ ndèŋgànà Lohwɛ̀ à è wèka è rze yà mɔ̀nyɛ̀. È Ŋguma yà Mɔ̀lɛ̀ŋgù ema hwa mà oŋwe, mɔ̀ ndi à hwɛni ene kààtì.

1 Yòwanìrzɛ̀ 3:8

Tɔ̀ njɛnɛ ema a lìmelì o lì gbeyà wòhwe a hwèlì ndi e wa ama Mòkarzɛ̀, ehwànja Mòkarzɛ̀ à mà gbeyà wòhwe lì wòteyà o hwewotelì. Lìtiŋga ema è Ŋmanà wà ama Lohwɛ̀ à mà jèe o e rze ya mɔ̀nyɛ̀ lì hwèlì ndi o lì hvàŋga èwòlò ya ama Mòkarzɛ̀.

Jèmìrzì 1:7

Inyɛ̀ ene tumba mòtò a rzi lùtèyà nanù ema a o luwàna e Rzàŋgo tɔ̀ yoma.

2 Tìmotì 4:10

Nà ohwa nanù èhwanja Dɛ̀màrzì à mà no kìnyɛ̀lɛ̀ èhwanja, mɔ̀ à mà ɛndɛ o mbowà yà Tɛ̀rzàlònìkà èhwanja a lìŋgàni lòŋgɛ la ene rze. Klɛrzɛnrzi à mà ɛndɛ o erzòokà ya Gàlerzìyà, Tàyìtùrzì mɔ̀hvɛ à mà ɛndɛ o mbowà ya Dàlmàtìyà.

Hwègbèèlì 19:35

O lìrzùkù e mòtilelì wa e mbòwa ndɛnɛ à mà lɔ̀kɔ mòŋgò mɔtɔwu. Rzìi à òhwa nanù ema, “Wònyàmòwe kòkò hwa Ɛ̀hvɛ̀rzɔ̀rzì, ò jɔ̀kɛ̀ njɛnɛ a hwèlì anu rze, ema a rza hwiyɛ nanù ema, Ɛ̀hvɛ̀rzɔ̀rzì ndi à hwèlì e mbòwa ndɛnɛ ema e ɔŋgeya mòòka mò ama lòòhwà la arzu lì ndɛnɛ Atɛmirzi. Ndeŋgànɛ̀lɛ̀ tɔ̀ ima mòtò a hwi nanù ema ene mbòwa ndɛnɛ ndi e ɔŋgeya lìŋyàyi la wòrzaŋgi ema lì ma uwɛ̀lɛ̀lɛ̀yi ò ŋmanyu yà lohwà.

Lukàrzɛ̀ 22:31

“Rzìmɔ̀nì e, ìi Rzìmɔ̀nì e, òkànèyà tɛ! Mòkarzɛ̀ à lu wònjà ò lì e kèkirzɛ nà ò lì e kakòwa. À ikà e hwa gbamù nà è hwa wòhwe. Nà òmà mòtò a rzɛ̀ŋgbɛ ì mbàrzi ò lì ulɛ hweyarza.

Lukàrzɛ̀ 16:8

Èŋge èhwàŋgì ya mòtò e mà hweye nanù, rzìi a eka òŋgò mògbèèlì wà èni wà wòhwe a òhwa nanù ema, ‘À gbeyànì lìhwiyè la gbamù.’” Yerzù rzìi a òhwa hvɛ nanù ema, “Nànù ndi hwatò ema hwa òŋgama hweyà hwe ène rze, hwa gbeyànà mahwiye ma awu, ò lì ɔ̀njɔ hwanɛ̀yi hwatò, ò lì gbeyà hweyà hwe awu lì akà è wɔ̀ ema hwa òŋgama ŋmàye mò ama Lohwɛ̀.”

Matiyò 11:19

È Ŋmanà wà è Mòtò wà Hwènàmà à mà jèe, mɔ̀ à mà làa mòlelì, a nyɔ hvɛ mììmba, e òhwa nanù ema, ‘È mò ɔ̀ŋgɔ aŋga a lìŋgàni mòlelì rzayi-rzayi. A hwèlì hvɛ ndì mòtò wa mbòma, a hwèlì hvɛ ndì e mbunda ya hwarzàŋgelì hwa e njàŋge ya lìkànèyà na hwatò hwa wòhwe.’ Ndi ò lìrzukù hweyà ema hwe ò gbèyɛ̀nɛ hwe ò uŋmɛ̀lɛ̀ nanù ema lìhwiyè la ama Lohwɛ̀ lì hvòmɛ̀nɛ̀yi.”

Hwèwulùwèlì 16:17

È aŋgèlì ema è mà ùkirzɛ̀ lìrzàmba è mà koma hwètàtò hwe ndɛnɛ hwe ama Lohwɛ̀ ema è mà hwɛ ò tenì yà ewoki yà eni ò yùlulì. Lìlo lì ndɛnɛ lì mà uwɛlɛlɛ ò è konda yà lìkànèyà ò tenì yà è Ndawò yà Lohwà lì mà ohwa nanù ema, “È mà gbèyɛ̀nɛ.”

Hwèwulùwèlì 13:14

Ò nyòla yà hweyà hwe mànyaka ema à mà ŋgbààhwe è wònjà ò lì gbeyà, eŋge èembe yà worzo, yɔ̀ à mà lùkɛ̀lɛ̀ hwatò hwa è rze yà mɔ̀nyɛ̀. Ndeŋgànɛ̀lɛ̀ mɔ̀ à ma hwɛ ndi lì gbeyà nanù ò worzo wò eŋge èembe ema è mà ohva èhwènà ndɛnɛ. À mà òhweyà hwatò nanù ema hwa wondɛ èrzìrzà ema wɔ̀ hwa ò kanɛ̀, ema è àyɛ̀kɛ̀nɛ̀ eŋge èembe ema è mà ohva èhwènà yà rzɔ̀lɔ̀ ndi tɔ̀ nanù è e hwèlì lòŋgɛ.

Hwèwulùwèlì 12:9

Aŋga ndi hwa a hvimba eŋge dragɔ̀ni ndɛnɛ o rze ya mɔ̀nyɛ̀. Èŋge dragɔ̀ni e ma hwɛ ndi nàa gbàahwà wo e hvonda ya kòwàa ema wo ma hwɛ̀lɛ̀hwɛ̀ Dɛhvùlì tɔ̀ Mòkarzɛ̀, ema a eŋgìrzɛ̀ e rze ya mɔ̀nyɛ̀ ya arzɛ. Ndeŋgànɛ̀lɛ̀ hwà mà hvimba iŋgi aŋgèlì ja eni ja arzɛ na mɔ̀ o e rze ya mɔ̀nyɛ̀.

Matiyò 13:22

Ìhvɔ̀ŋgɔ̀ hvɛ ema ì undi ò tenì ya wàŋga ya hwènyɛ̀ŋgɛnyɛ̀ŋgɛ̀, ì hwèlì ndi nàa hwatò ema hwa hweyi ŋmɛ̀ndì mò ama Lohwɛ̀, ndi mètàkà me lòŋgɛ na jɔ̀ɔ̀njì ja mònàmɛ̀ mò ene rze hwe lìŋga mèèmà me awu. Ema me ma hwa gbeyɛ ema naŋgɛ rzɔ hwa rza tànɛyi lì ŋya hwèhvùma hwe gbamù.

Makòrzì 4:19

ndi hweyà hwe rze na è nyìrzɛ̀ ya lì hwɛnɛ̀ hwèèmà, nà è nyìrzɛ̀ ya lì arza hvɛ hwehvɛhvɛ hweyà, hwe hwa lìŋgɛ̀lɛ̀ mèèmà me awu nyàyi ema hwa rza tanɛ lì ŋya hwèhvùma.

Ɛ̀hvìrzìyà 1:21

Krirztò à hwèlì aŋga, à kànèyà iŋginyà ja arzɛ nà hwàkànèlì hwa arzɛ. Lìinà là eni lì hwɛni ŋginyà lì aka mìinà mà hwàkànèlì hwa arzɛ ema hwa hwèlì ò naŋgɛ nà ò è hvonda ema è ò jɛ̀ɛ̀.

Ɛ̀hvìrzìyà 2:11

Inyɔ ema e rza enje hwatò hwa wònyà Yudà e ɔ̀ŋgɛ̀lɛ na oma o marzalɛ wònyà Yuda ema hwa ahwɛlɛ wɔ̀ hwiti nanù ema, “hwatò ema hwa endahwi,” hwà mà hwɛ lì e hwɛlɛ nanù ema, “hwatò ema hwa rza endàhwɛ̀.” (Ndi lì endàhwà la anyu la nyo lì hwèlì ndi mamɛ ema e mòtò hwa hwènàmà a gbeyàna lìya la eni).

Ɛ̀hvìrzìyà 2:13

Ndi o naŋgɛ ema e ma hwɛ mòtò mɔ̀kɔ na Yerzù Krirztò, inyɔ ema e ma rzɔlɛnɛ Lohwɛ̀ e ma jà naŋgɛ lì kombɛnɛ Lohwɛ̀ èhwanja màyija ema Yerzù à mà kome o nyòla anyu.

Ɛ̀hvìrzìyà 4:17

O lìinà la ama Rzàŋgo, na e kòkòwɛ̀lɛ̀ kɔ̀yi-kɔ̀yi nanù ema e rzi lìya lòŋgɛ nàa hwatò ema hwa rza hwiyɛ̀ɛ Lohwɛ̀. Hweya ema hwa lùtèyà hwe hwèlì ndi hweyà ema hwe rza hwɛnɛ wòlìto ndeŋgànɛ̀lɛ̀ hwene hweyà hwe rza tànɛyi lì hwa oŋgowàna.

Ɛ̀hvìrzìyà 5:8

Èhwanja o ma hwɛ hvonda hvɔ̀kɔ ema inyɔ e ma hwɛ ndi o jìtìtì, ndi nàŋgɛ ema e hwèlì na e Rzàŋgo mɔ̀ à mà e gbèeyà ema e hwɛ o ŋmàye. O èŋgànɛ̀lɛ̀ rzɔ ɛ̀ɛ̀mɛ̀ ya anyu e hwɛ ndi nàa hwaŋga hwatò ema hwa hwèlì o ŋmàye.

Jèmìrzì 1:27

O lì gbèeyà Lohwɛ̀ o ŋgànà ema e hwèlì Wòrzàŋgì ndèŋgànà o jɔ̀kɛ̀ ya ama Tatɛ̀ Lohwɛ̀, e hwèlì ndi o lì ɔŋgeya i nyuhwe ja hwàna na mekurze me hwalana ema me tàka, na lì àwòhvɛ̀ la eni la gbamù e rzi hwɛ nanù ema hweyà hwe mbindo hwe e rze ya mɔ̀nyɛ̀ hwe mo atukɛ o nyo.