John 3:19 - Annaahk John Manistsitsinikatahpi Jesus Manistsipaitapiihpiai 1979

¹⁹ Mata̱piiwa iihtoka̱kihtsimatawa o̱tsstsimimmahsaawa anniska o̱tohkokkoaawayiska ma̱a̱hkitaʼpawaawahkaahsi ksistsiko̱i̱nattsii. Osto̱yi itsito̱ʼtoowa anno̱o ksa̱a̱hkomma. Ki mata̱piwa a̱yaahsitsskia̱aʼpaissiwa. Ma̱tayaahsiʼtsimaiksaawa ksistsiko̱i̱nattsi takaa ota̱waanisttsiihpoaawaistsi iiko̱kaʼpiiyaawa. Ki a̱nnihkayi iihtoka̱kihtsimatayaawa.

John 3:19 Referans Kwoze

John 8:12

O̱ki. Ki a̱nnika oma̱a Jesus, ki ma̱tta̱isitsipssatsiiwa omi̱i o̱tapiiʼsini. A̱a̱niiwa, “Niisto̱wa a̱nnahkaoʼka iihkotsi̱i̱wa mata̱piiyi ma̱a̱hkitaʼpawaawahkaaniaiks ksistsiko̱i̱nattsi. Oma̱a mata̱piwa ikka̱mohtaisapoosi niisto̱yi a̱kitsaitaʼpawaawahkaawa isski̱inattsi. A̱kaissksitsipaitapiiwa ksisstiko̱inattsi. A̱nni iihto̱ʼtsstsiiwa niipa̱i̱tapiʼssini.”

John 12:43

Ami̱i̱ksi mata̱piiksi ma̱takitotosttowaiksi ota̱omaiʼtakssoayi, takaa iiko̱maohtaʼpitsiihtaayaawa o̱tapiʼssini ma̱a̱hksokimmi̱yissaawa. Ma̱tohtaʼpitsiihtaawaiksi A̱ʼpistotookiiyi ma̱a̱hksokimmi̱yissoaayi.

John 5:44

Kika̱a̱ksstaahpoaawa ka̱a̱hksokimmi̱yissoaayi mata̱piiwa. Ki a̱nnihkayi ko̱mohtsaohkottomaiʼtakihpoaawa. Kita̱kohkottaʼpaisskiihpoaawa ka̱a̱hksokimmi̱yissoaayi annaahka A̱ʼpistotookiwahka ka̱kiʼtsitsstsiiwahka.

John 1:4

Iihtsi̱stapitsstsiiwa a̱i̱ssksipaitapiʼssini osto̱yi. Ki ami̱i̱ksiska iihkota̱i̱ksi amohka niipa̱i̱tapiʼssinihka a̱kohkottohtsistapohtaʼpawaawahkaayaawa ksistsiko̱i̱nattsii.

John 7:7

O̱tapiiʼssina kima̱takohkottsi̱kaimmokoaawa kiisto̱aawa. Ki niisto̱wa nitsi̱naoʼka̱i̱kaimmokiaawa takaa nita̱i̱sksawaanistayaawa iiko̱kaʼpiiwa manista̱ʼpaisspiaawa.

John 7:17

Oma̱a mata̱piiwa ikka̱msskskaʼtsimaasi ma̱a̱hkanisttotsissi A̱ʼpistotookiyi otsitsi̱i̱htaani a̱nnahkayii a̱kohtohkoissksinima nitssksini̱maatstohkssini. A̱kitssksinima ikka̱mohtoʼtsstsisi A̱ʼpistotookiwa kia̱ya niisto̱wa niksi̱mstaani.

John 1:5

Ki amohka ksistsiko̱i̱nattsiiyihka ita̱psstsiiwa ami̱i̱ksiska ita̱ʼpawaawahkaaiksi isski̱i̱ʼnattsi. Ki amohka isski̱i̱ʼnattsiyihka ma̱ta̱o̱noaoʼtsitsksskonataʼpssatoomaatsi ksistsiko̱i̱nattsi. Ki a̱nnihkayii ma̱tako̱noawa̱a̱htsaakaʼsiwa amiia ksistsiko̱i̱nattsiiyi.

John 9:5

Niisto̱wa a̱nnohka tsi̱tsaakiipaitapiiʼyihpihka anno̱o ksa̱a̱hkommi niisto̱wa nita̱o̱hkotayi o̱tapiʼssini ma̱a̱hkitaʼpawaawahkaahsaawa ksistsiko̱i̱nattsi.”

John 12:31

A̱nnohka a̱kokakihtsimatayi anno̱ksi istsitapi̱i̱ksi anno̱o ksa̱a̱hkommi. Ki a̱nnohka annaahka istsi̱nawahka ksa̱a̱hkommi, Maka̱ʼpatoʼsiwahka, a̱yaakomo̱oʼtsaawa.

John 12:46

Niisto̱wa anno̱o ksa̱a̱hkommi no̱mohtsitoʼto̱o na̱a̱hkohkotahsi mata̱piiksi ma̱a̱hkitaʼpawaawahkaahsaa ksiistsiko̱i̱nattsi. Ni̱tohkanaomaiʼtookiiksi ma̱takattsitaʼpawaawahka̱a̱waiksi isski̱inattsi.