Osia 7:7 - Yálá laawoo hɛɓɛ (dc)

⁷ Di kəlee di hu kələn ŋąąi yɛ nwɔ̨n dinįi, di kaa giti tee nuą mįi, di wɔ tɔɔɓɛlaai kəlee daa too; ɛlɛɛ, nu hvo hɔlɔɓoi di lɔwai, yɛ vɛ́li.

Yálá laawoo hɛɓɛ

⁷ Di kəlee di hu kələn ŋąąi yɛ nwɔ̨n dinįi, di kaa giti tee nuą mįi, di wɔ tɔɔɓɛlaai kəlee daa too; ɛlɛɛ, nu hvo hɔlɔɓoi di lɔwai, yɛ vɛ́li.

Bible

⁷ “Díkelee dífãai yɛ̂ɛ kɔli lêɣi. Da díŋuŋ túɛ-ƃelai pàa. Díkâloŋ-ŋai kélee da saa. Dí tɔnɔ kpîŋ fa ńdôli kpɔŋ-maa mɛni ma.”

Osia 7:7 Referans Kwoze

Tɔɔɓɛlaa veelɛ 15:30

Ela lon Ose ə nɔgilii kɛ Remaliahu lon Peka ɓa, ə baa, ə hee ɉeei dɔɔlaa hu. Oziasə lon Yotamə nwɔ tɔɔlaa gwɛlan bow hveelɛ lɔwai li kɛ.

Tɔɔɓɛlaa veelɛ 15:25

Nwɔ kɔ́ nwun nąmu Peka yai kɛ a Remaliahu lon, ə nɔgilii kɛ mą, ə ɓɔwa pu Pekahia ɓa, ə mą kɛ Argɔvə da Arie, di lɛɛ dɔɔ pɛlɛ́ ɲələi pələ Samari daai. Peka da Galaadə nuą ɓə li mɛ̨nįi tii kɛi. Peka ə Pekahia paa, ə hee dɔɔ kpəlin ɉu.

Tɔɔɓɛlaa veelɛ 15:14

Gadi lon Menahɛmə ə həɠə Tirsa, ə pa ə ɓɔwa pu Yavɛsə lon Salumə ɓa Samari daai, ə baa, ə hee dɔɔlaa hu.

Tɔɔɓɛlaa veelɛ 15:10

Yavɛsə lon Salumə ə lɔ Zakari kilii, ə ɓɔwa pu mą nuą ɲɛ̨i ɓa, ə baa ə hee ɉeei dɔɔlaa hu.

Osia 8:4

Di tɔɔɓɛlaa hee di hvo mą́ą́nin gɛ, di di ɲɛ̨itɔwɔ nuą hee, və́ kɛ hvaa li mą. Di haliɠaa pɛli di kpɔwɔ ɓa, a di yəi waliɠaa, da di yəi hɛniɠaa, diɛ kpinįi, di hu yɛ pɛli kalai la.

Osia 7:10

Israɛlə nwɔ kpɔwɔ ɲąąkɛnɛ̨ ɓə giti kala mą, Kɛlaa, di hvo pənəi di hvo pa Yai-Laa di wɔ Yálái pɔ pələ; mɛ̨nįɠaai tii di mą kɛ kɛi, di hvo di wɔ Yálái kwɛlii.

Azaya 64:7

Ɛlɛɛ yaan, yɛ́ lɔ ɓə ə́ kaa a ku Nąn, ləɠi pɔlɔ ɓaa a kuɔ, yɛ́ lɔ ɓə ku tɔɔi, ku kəlee, ku kaa a ə́ yee ŋą koló.

Azaya 43:22

Ɉakɔbə, yili kulɔ ə́ wɔ kiliŋąhiɛ hu kpɔ tɛ̨ɛ̨ tɛ̨ɛ̨, yɛ́ hvəi də́li, ɛlɛɛ, Israɛlə, hvo kpɛli kpaan nɔpee da paa li, mą́ą́ mɛ̨nį hu.

Azaya 9:13

Yili ɓə gɛ, Yai-Laa ə Israɛlə nwun dee da nwon, ə mɛ̨nį ɲąąnwąnąą laa diɛ a voló tɔ̨nɔ̨i tii.

Zôo 36:13

Nɛ̨ŋɛ̨n ɉəɠə nuąi da kanąn líiholi ɓa, di hva di woo laa, ɓɛlɔwai da kɛ la yɔwɔn ŋą.

Osia 7:14

Di hva vɛ́li di kwəi tɔ̨nɔ̨ mɛ̨i, Kɛlaa, da kɛ wɔlɔi di yee gbinŋaa ɲą, da kɛ di ɲąąkpɔn ɉii mɔ̨nun mɛ̨nį ɓa, da lɔɔ nįnɛ̨, ɲą́ą́ ka tii di kaa di kwɛli teei ɲə́i.

Osia 5:15

Gáá pai lií, gáá pənəi ŋį́ li bɔ́ɔ́li, ə lɛɛ ɉu, di hvaa di hɔn ma, ɛlɛɛ, diɛ ɲɛ̨ilai gwɛli. Mɔ̨nɔ̨ kaa pai wiɛi diɛ, di kaa pai hvilɛn ɉii, diɛ gwɛ́li.

Danîa 9:13

Yɛ pələ kpɔlɔ bɛ̨ɛ̨ la Moisə nwɔ tɔ́n ɉɛɓɛ́i hu, mɛ̨nį nwąnąąi tii kəlee ə həli kuɔ. Pələi mąn ə kɛ la tii, yɛi ŋɛ̨i a kuɔ Yálá, ku hvo kɛ wɔlɔ li yɛ́, ku hvo ə́ mąąnɛ̨ɛ̨, ku hvo nwɔ̨nɔ̨ kɛ həɠə li ku kɛ nɛ̨ŋɛ̨nŋaa pulu, ku hvo kɛ ku kili lɛɛ li ə́ wɔ tɛ̨ą mɛ̨nį hu.

Izikiɛ 22:30

Ŋą́ ɲɛ̨́i laa a nu di lɔwai, yii a pɛli bɛlɛ́ nwąną muhəɠəi; yɛ tɔɔ nííla nwolo kɛɛnąą nɔi ɓalo mɛ̨nį ɓa, və́ pa lee ɉukala; kɛlaa, və́ mąą nu kaa li.

Tɔɔɓɛlaa veelɛ 10:14

Ɉehu yɛ bɔ nuą diɛ: «'Ka di hon a di hvulú.» Di di hon a di hvulú, di di paa, Bɛtə-Ekɛdə ɲálɔwa kwɛlɛ. Nuąi tii di kɛ a nu pow nąąn kɔ́w hveelɛ, dɔ̨nɔ̨ kpɛli hvo kulɔ ɉu.

Tɔɔɓɛlaa veelɛ 10:7

Yii lɔ ɉɛɓɛ́ ə həli diɛ, di nɛɛ mą di tɔɔmun lon ɉinąą pow mɛ̨ihveelɛ tii hon, di di nwun dee di ŋą, di di nwun ganinŋaa pu kpɔlɔɠaa hu, diɛ li la Ɉehu pɔ Izreɛlə daai.

Tɔɔɓɛlaa veelɛ 9:33

Ɉehu yɛ nuą tii diɛ: «Ka nɛ̨ɛ̨nui tii kulɔ ka doo nɔi ɓa!» Di Ɉezabɛlə kulɔ di doo, ɲąmą ta ə taɠa ɉį́i nwąną ɓa, da ə taɠa ɉooɠaa diɛ. Ɉehu ə ɓɔlɔɔn Ɉezabɛlə mɛ̨i.

Tɔɔɓɛlaa veelɛ 9:24

Ɉehu ə nwɔ kilɛn ɉəɠə, ə Yoramə ɓon na monwon nɔwai, mɛ̨ɛ̨kɔw ə ɓɔ Yoramə hu, ə ɓo níi hu. Yoramə ə too a bowa nwɔ wotoloi hu.

Tɔɔɓɛlaa dɔlɔɔ 16:18

Ɓɛlɔwai Zimri ə gaa la, yɛ daa daa mąątinɛ̨n, ə li tɔɔmun nwɔ lɔi mu pɛ́lɛ́i mu pələ, ə nwɔ̨n doo bɛlɛ́ hu, yaai tii ə lɛɛ ɉu.

Tɔɔɓɛlaa dɔlɔɔ 16:22

Nuąi tɔɔ Omri pulu, di yee ə tɛɛ Ginatə lon Tivni pulu nuą diɛ. Tivni ə haa. Omri ə lɛɛ a dɔɔmun.

Tɔɔɓɛlaa dɔlɔɔ 15:28

Baesa ə Nadabə paa, Ɉuda tɔɔmun Asa nwɔ tɔɔlaa gwɛlan ɉaaɓa lɔwai. Ə hee yili heei dɔɔlaa hu.

Osia 13:10

Ə́ wɔ tɔɔmun gaa mį, ə ə́ ɓalo ə́ wɔ taaɠaai kəlee hu, ə́ nwun mąąɓo nuą, a diɛi ə́ kɛli kɛ diɛ: «Tɔɔmun dɛɛ bɔ́ da ɲɛ̨itɔwɔ nuą»?

Mise 2:1

Nuąi da mɛ̨nį ɲɔ̨nwɔ̨ɔ̨ mąą kiliŋąhiɛ kɛ, Di nwun na ɲɔ̨nwɔ̨ɔ̨i; di ɓo di yəi gbin ŋą, diɛ mɛ̨nį ɲɔ̨nwɔ̨ɔ̨ pənə di kwəi diɛ doo. Yələ a lɛɛ kpɔlɔɔ ɓɔi, diɛ di yee pɛlɛ mɛ̨nį ɲɔ̨n gɛɛ ɓa, mąąhɔlɔɓo, mąą laa kaa di yəi.

Mąątɛ̨nɛ̨ 14:4

Mɛ̨nį ɲɔ̨n gɛ nuąi tii, di hvo mɔ̨ɔ̨ mɛ̨nį kɔ́lɔn? Diɛi nwɔ́ nu kanŋaai kɛi a di kɔ̨nɔ̨n, da kɛli kɔ̨nɔ̨n mįi! Ɛlɛɛ, di hva Yálá hvɛli!

Azaya 64:4

Nui gwəinɛ̨ɛ̨ mɛ̨nį ɓaa a təlimo yii ɓoɔ, da nuąi ə́ wɔ pələɠaai mɛ̨i, diɛ di kilitɔɔ yɛ́, da ka diɛni ka kwiɛn a Yɛ́. Ɓɛ kaa, Yáá ə́ líiholi, mąąhɔlɔɓo, kwaa həɠə bələ mɛ̨i, tɔwɔ tɔwɔ pələɠaai tii mɛ̨i ɓə, ku kaa pai ɓalo hɔlɔɓoi laa.

Azaya 64:6

Nu ta hvo tómąi a Ə́ laa, nu ta hvo mun kpɛli nwun ɉi, yɛ mɛ̨nįi tii too Yɛ́, mąąhɔlɔɓo, Yáá ə́ ɲɛ̨ilai now kuɔ, Yáá ku wɔ túwɔ́ pələ ɲɔ̨n lɛɛ laa ɲee aa tɛɛ kuɔ, yɛ ku kala kpɔ tɛ̨ɛ̨ tɛ̨ɛ̨.