Dutɛrɔnome 28:1 - Yálá laawoo hɛɓɛ (dc)

¹ «Akɛ ka ka wəli tɔɔ kpɔ a nɛlɛɛ, Yai-Laa ka wɔ Yálái woo ɓa, kaa tɔɔ a ka nwanąi kaa nwɔ tɔ́nŋąą kəlee hon diɛi gáá di tɛɛi ka pɔ háákələi; ka gɛ tii, Yai-Laa ka wɔ Yálái kaa pai ka kɛnɛ̨i lɔi mɛ̨i nu huwuɠaa kəlee diɛ.

Yálá laawoo hɛɓɛ

¹ «Akɛ ka ka wəli tɔɔ kpɔ a nɛlɛɛ, Yai-Laa ka wɔ Yálái woo ɓa, kaa tɔɔ a ka nwąnąi kaa nwɔ tɔ́nŋąą kəlee hon diɛi gáá di tɛɛi ka pɔ háákələi; ka gɛ tii, Yai-Laa ka wɔ Yálái kaa pai ka kɛnɛ̨i lɔi mɛ̨i nu huwuɠaa kəlee diɛ.

Bible

¹ “À kɛ̀ ka káwoli tɔ̀ɔ dɔ̂ŋ-ŋai dîa ŋa dɛɛ̂i kápɔ sâai, ka sía a díwoo yɛ̂ɛ berei ŋa môi la kâai, Káɣâlai Yâwɛɛ a pâi kákɛ̂i ǹɔii kélee mɛi ŋ̀éniɛi su.

Dutɛrɔnome 28:1 Referans Kwoze

Azaya 1:19

Akɛ ka ka wəli tɔɔ nwóó ɓa, nɔi hihɛn nɛlɛɛɠaa ɓə a kɛ a ka kɔ̨nɔ̨n.

Lɛɛ gbɔwɔ ɓa 23:22

Kɛlaa, ka ka wəli tɔɔ nwoo ɓa, mɛ̨nįi gáá moi kaa ka gɛ, gáá pai kɛi a ka yowoɠaa di yowo, gɛ́ tɔɔ nuąi da tɔɔ ka la, di la.

Ɉaan 15:14

Yii ŋį́ ka tí la, ka gɛi, kɛ tii mɛ̨́laa ɓaa kaa.

Lukə 11:28

Kɛlaa, Jesus ə nwoo pulu pənə yɛ mą: «Nuąi mun di nwun na nɛ̨ɛ̨, diɛ ɓaa: nuąi da Yálá laawoo mɛ̨n, diɛ bɔ mɛ̨nį kɛ.»

Lɛɛ gbɔwɔ ɓa 15:26

Yɛ diɛ: «Akɛ ka ka wəli tɔɔ kpɔ a nɛlɛɛ, Yai-Laa ka wɔ Yálái woo ɓa; ka túwɔ́ a ɉaŋąą ɲɛ̨i ɓa, ka ka wəli tɔɔ nwɔ tiɓoɠaa diɛ, ka nwɔ tɔ́nŋąą kəlee pɔ mɛ̨nį kɛ, mɛ̨nį nwąnąąɠaa ti kpɔ ŋį́ naa Eziptə ɓa, vá da laa kaa. Mąąhɔlɔɓo, ɲą́ą́ Yai-Laa, ɲą́ą́ ɓə ŋą́ ka kɔ́lɔi pɔ̨nɔ̨.»

Mąątɛ̨nɛ̨ 91:14

Yii kpɔ aa kanąn mą́ą́, ŋą́ gulɔ ɲəi kɛ, ŋą́ mąąkɔ̨nwɔ̨, mąąhɔlɔɓo ə gɔ́lɔn.

Dutɛrɔnome 15:5

Ka ka wəli tɔɔ lɔ a nɛlɛɛ Yai-Laa ka wɔ Yálái woo ɓa. Díɓoi ŋɛ̨i gáá dɛɛi ka pɔ háákələi, kaa gəlee kɛ.

Dutɛrɔnome 11:13

A tɛ̨ąą! A kɛ ka ka wəli tɔɔ kpɔ a nɛlɛɛ nwɔ tɔ́nŋąą diɛ, yaai gáá háákələi naa həlii kaa, kaa Yai-Laa ka wɔ Yálái wɛli la kɛ, kaa tí mą a ka kwəi tɔ̨nɔ̨, a ka nwąnąąi kpɔ-kpɔɔ,

Lomaŋ 2:7

Nuąi di kanąn ŋąą mɛ̨nį lɛlɛɛ kɛɛ ɓa, diɛ mąąwiɛ kwɛli, diɛ ɓə Yálá kaa pai yɛnɛ̨ɛ̨ tɛɛi di pɔ kpɛɛ hvo mą.

Azaya 3:10

Ka mo kaa diɛ: tələnmomun nwun na nɛ̨ɛ̨i, hvó gaai kaa pai gɛ tíi dɔlɔ mįi.

Mąątɛ̨nɛ̨ 111:10

Kili kɛ ɲəi kpalatɔɔi ɓaa, nu ə ɲɔw Yai-Laa ɓa, nuąi da yili kɛ, yɛnɛ̨ɛ̨ hon bələ mąą gbąnąlaa kaa di yəi; di kaa pai kɛi dɛ̨nɛ̨i a yələ kəlee.

Galatə 3:10

Gbala ə tɔɔ, dɔn bɔ yíiɓo nuą kəlee, di kaa dɔn ŋą nąŋɛ̨n naa yee mu, hvo gaai, ɉɛɓɛ́ yɛ diɛ: Nui hvo pai Yálá nwɔ tɔ́nŋąą ŋɛ̨i bɛ̨ɛ̨, bɔ yíiɓoi, nɛ̨ŋɛ̨n naai!

Lukə 9:48

Yili pulu, ə mo diɛ, yɛ diɛ: «Nui a ɲee hee nokoloi ŋɛ̨i mu ɲą́ą́ mąą mɛ̨nį ɓa, a kɛ tii, ɲą́ą́ ka tii aa ɲee hee mú, nui a ɲee hee múi, a kɛ tii, nui dɛ́ɛ́, yaa ka tii aa ɲee hee mu. Mąąhɔlɔɓo, nui gaa a lokolo ka lɔwai, yaa ɓə gaa a nu kɛnɛ̨.»

Ɉeremi 17:24

Yai-Laa yɛ: Káá ŋɛ̨i, ka ka wəli tɔɔ a nɛlɛɛ, ka wala tɛɛ a tiɛ̨ daa ŋɛ̨i gbonŋaa laaləi, ka wala kóló huwui lɔpee da kɛ a mąą yələi, kaa vįitɔɔ yələ mąąhəɠə,

Dutɛrɔnome 26:19

Nu huwui kpɔ ə bɛli yɛnɛ̨ɛ̨, aa ka həɠə ɉu, gəlee lɔwai, yɛ ka laa tɛ, yɛ ɓaalɔ kaa, yɛ ka kɛnɛ̨, kaa kɛ la a nu huwu mąąhəɠɛɛ, a Yai-Laa ka wɔ Yálá nwɔ nu huwu yɛ bələi ə nwoo kwɛlɛ la.

Ɉeremi 11:4

Mįnɛ̨i tii ɓaa, yii ŋɛ̨i ŋį́ dɛɛ ka nąnni pɔ, diɛi ŋį́ di kulɔ Eziptə lɔi hu, huluun nwɔ̨n ɉu. Yili ɓa, ka ka wəli tɔɔ nwóó ɓa, kaa bɔ mɛ̨nį kɛ; yili pɔ pələ ɓə ka kɛ la a nwɔ́ nu huwu, ɲą́ą́n gɛ́ ɓo a ka wɔ Yálá.

Mąątɛ̨nɛ̨ 106:3

Nuąi da tɛ̨ą mɛ̨nį kɛ, di nwun na nɛ̨ɛ̨i, a diɛi ti da tələnmo yíi ɓo a yələ kəlee!

Lukə 1:6

Zakari da nɛ̨ą Elisabɛtə di kɛ a nu haŋąaɠaa Yálá ɲɛ̨i ɓa, diɛ Yálá nwɔ liɛwooɠaa hon gbɔ kpaan.

Mąątɛ̨nɛ̨ 148:14

Aa nwɔ nu huwui hvaŋą tɛ, aa ɲɛ̨i pɔ̨nɔ̨, ɲee pɔnuą kəlee nwun muhəɠə mɛ̨nį li, diɛi ɓaa a Israɛlə lonnii, a nu huwui tii nɛɠɛɛ mą. 'Kánikookwəi!

Mąątɛ̨nɛ̨ 119:128

Yili mąą mɛ̨nį ɓa, ŋą́ ə́ wɔ tɔn nwooɠaai kəlee kaa a ɉaŋąą. Lɛɛ pələɠaa kəlee wɛli kpɛɛi mą́ą́ kpɔ tɛ-tɛ.

Mąątɛ̨nɛ̨ 119:6

akɛtii, nwumɛ̨ hva nee tɛ a ɲą́ą́; ɲɛ̨́i ə ɓo lɔ a ɉəɛ ə́ wɔ tiɓoɠaai diɛ.

Ɉeremi 12:16

Akɛ da tɔɔ a di nwąnąąi, diɛ di túwɔ́ a nɛlɛɛ yɛ nwɔ́ nuą, diɛ di mąą kwɛli a di woo kwɛlɛɛ a náá, yɛ́ bələi lɔ di nwɔ́ nuą mąą kwɛli la a di woo kwɛlɛɛ Baalə ɓa, diɛ kɛ mą: «A tɛ̨ą Yai-Laa kaa a vulú» da gɛ tii, da di heei hɔlɔɓo nwɔ́ nuą lɔwai.

Lɛɛ gbɔwɔ ɓa 23:25

Yai-Laa ka wɔ Yálái ɓə ka káá pai kɛi kwɛli hvilɛn ɉii mą, ka gɛ tii, gáá pai lúwɔ́ tooi ka kɔ̨nɔ̨n ma, da ka wɔ yáɠaai diɛ, gɛ́ ɲɔ̨n mąą kwɛa kaa.

Dutɛrɔnome 11:27

Akɛ ka Yai-Laa ka wɔ Yálá nwɔ tɔ́nŋąąi gáá naai ka nwuɔ̨ háákələi ka di hon, lúwɔ́ a kɛ kaa.

Dutɛrɔnome 28:13

Yai-Laa kaa pai ka tɔɔi nu huwu kəlee ɲɛ̨i tɔwɔ, ka hva yɛɛ nui lɔpee ta mu pələ; akɛ Yai-Laa ka wɔ Yálái nwɔ tɔ́nŋąąi gáá dɛɛi ka pɔ háákələi, ka ka wəli tɔɔ mą, kaa bɔ mɛ̨nį kɛ;

Kɔlɔnikɔ Maa-ŋuŋ 14:2

Nąąlɔwai, Davidə ə gɔlɔn yɛ kɛ, Yai-Laa aa nwɔ heeɓo laai hee kpɔ a neelee Israɛlə lonnii mɛ̨i, ɛlɛɛ, mɛ̨lɛ kpɔɔkpɔ ə kɛ mą Israɛlə nu huwu mąą mɛ̨nį ɓa.

Dutɛrɔnome 26:18

Yai-Laa aa háákələi ka həɠə ɉu yɛ ka kɛ a nwɔ nu huwu; yɛ bələi ə mo la kaa. Kaa pɛli lɛɛi nwɔ tíɓoɠaa kəlee pulu.