Yeremi 4:31 - BII BILA

³¹ Kani i co caŋndan tueyɔɔ maa caŋnda vanalanɔ co n'vanlaandu o ba, caŋnda imɔnɔlan maa caŋnda vanalanɔ co violɔɔ ivuɛɛn. Vannda Siɔn niaa tuɛi diom lende nuaa ni: a co kuŋndan, a co balan siaandiaa má va dimio aa: «Àá ya, i kɔndu dɛnɛ fɔ́! Mbɔ̀ ya, i nii cuu vanaa diuvaa n'vannda o ba.»

Yeremi 4:31 Referans Kwoze

Cɛɛŋɔnnda Yeremi lan 1:17

Siɔn sanga balan sɛndio, o sɔla vana ɲɔlaa kɛ́-kɛ̀ le. Mɛlɛka cii vannda dimul le Yakɔb delɔɔ coo, o cii yaamɔaa ndɔa balu ndu-a dimul. Yerusalɛm siŋnun ɲɛ nɔɔlɛiyo nda tɛɛn.

Esai 1:15

La siɛndi nin bɛɛ balan o ya lo, i faŋalnin niaa hɔlla. Hali la vangala bɛɛ piɛilen taw-taw, i yeŋnin niaa lani le. Kani bala niaalan la co lalɔngɔlɛilan a koovan.

Yeremi 13:21

Yɛɛ n dimi yɛnin telen vanaa niaa dɛli-a cannin mà simul nɔm le nɔm kpaayaa sɔlaa coo-o? A sanganin mɛɛ vanalanɔɔ sanga o violɔɔ nuaa yɛ.

1Tesalonikea 5:3

Telen vannda vanin dimio aa: «Kɔlɲuloo tiw, n co nila ɲulo-o», o telen kon kpeekpei dɛnɛ palaa voolunin nda maa mɛɛ telen vialaa voolu vanalanɔɔ nuaa yɛ ni, a helunnin te.

1Korɛntea 9:16

Nduyɛ, vannda Yoongu Kɛndɔɔ tiiyallo, kon co dɛnɛ kuundian le ya le, kani lelan ya sɔla veeloo ni. Dɛnɛ palaa co le ya, te i tiiyal vannda Yoongu kɛndɔɔ le.

Matie 21:5

«La dimul vannda Siɔn aa: ‹La tofa vɔ masa niaa hunɔɔ o niaa lo. O co vana kɛndɛ bɛndu. O co icali o sofɛlɔɔ coo, sofɛlɛ téndóó pɛɛn, o sofɛlɛ laandoo kom-ndo.›»

Misee 7:1

«Kpòkóó, má cè dɛnɛ palaa le ya sii! I siŋnun maa vana fula a tuma kiandaa kɔmnde levɔɔ, maa vana kɔɛ rɛsɛnndon nuwviaa tuma caanda cìì nin mun kiɔndɔɔ-o. Hali kpɔ̀nyɔ̀ɔ́ pilɛ ve lɛ le dioo le, hali voosun sɛnɛin ya yeema taw-von i pilɛ bɛɛ ve lɛ le.

Osee 13:13

Sangaa toalnin nda coo mɛɛ dembe vialaa nɛi vanalanɔɔ nuaa yɛ. O co cɛlɛkpɛa nɔ kɔlkalu le nda co le. Telenndo tiiya bɛɛ le violɔɔ kala nda-o, a cɛl le keleŋaa fulaa ndu o dembe le.

Cɛɛŋɔnnda Yeremi lan 2:21

Cuaambɔa a kaasoŋaa yuuvɛiya co ihini lɛŋ lɛtɛu o nɛilan lekɔɔ. Cuaambɔa lemboa a felengia piaandua nia cuu o mɔɛi cɔwve bɛngu. Paale n fula kɔllo len n diw nda ni, a yɔŋ iɲíí le, má kili nda bololan.

Cɛɛŋɔnnda Yeremi lan 1:20

Éé Mɛlɛka! Tofa vɔ dɛnɛ palaa ya co nin-ndo! Niŋndo co ya ŋolɔɔ. Kɔllo laasian ya nin laasi-laasi, kani lekɛ́ndɛi vana nila kaloo ya yɔŋnun ni. Mɔɛi cɔwve ciilu ya cuavaa nia o bɛ́ɛ̀, n co cɛinin vana ca ko aa ciee-piɔ́m ni.

Yeremi 50:43

Masaa Babilɔn tueyɔɔ sɔɛi ken, mó vu diallon, mó buulan maa vanalanɔ demboo co nɛiyo le violɔɔ-o.

Yeremi 49:24

Vannda Damas a vi diallon má mulin le kiltan. Siòòŋii bɛnduei bii nda. A luɛi o buulanndo a o dɛnɛ palaa nin, mɛɛ vanalanɔɔ sanga o violɔɔ nuaa yɛ.

Yeremi 49:22

Mɛɛ kovɔ́ɔ̀ hel coocoo pɔ́, mò pɛɛnga kumbanndan, mò hiŋnun yɛ yaamɔɔa co Bɔsra mɛngɛlaa ni. Paale len, kɔlta kuubaa cɔwva Edɔm la vanin maa kɔl vanalanɔ co le violɔɔ-o.»

Yeremi 48:41

Kobilan la biinun, kpakilan la del yaamɔɔa o ba. O kon mì vanaa cɔvaa hiow cɔwvo caa-a va sangaa mɛɛ vanalanɔɔ sanga o violɔɔ nuaa yɛ.

Yeremi 45:2

«Diom Mɛlɛka, Hala Israɛlla dimi a nɔm Baruk-o co hoo ni aa:

Yeremi 30:6

La ɲuuniaa vɔ hau sɔɛi ken mì la sina, te la ce nin vanapɔnɔɔ violɔɔ. Le yɛɛ nɛ ya co yɛ niko vanpiaandua kpow cɔu a balan nda o demboo coo mɛɛ dembe can vanalanɔ nɛi le violɔɔ? Le yɛɛ nɛ nda suuma yɛ má yii hɔlla nuaa?

Yeremi 22:23

A connun icali yili o ba nɔmndo coo Liban, má tangul vɛɛnnde nɔmnden o yɔmii sɛɛdrei tullo. Kɛ a ŋɔnganin telen ɲɛ nɛyaa voolunin nɔm-ndo, telen n vanin sangaa maa vanalanɔ co violɔɔ-o.»

Yeremi 18:21

Lelan tuisi poaa ndaa yima fofolan coo, mà cii nda pila o mɔɛi cɔwve bɛngu. Màá hɔ́aa ndaa laandua hiɔlun nda, mì piaandaa ndaa cuu vu! Màá nàà n'kɔnyaa cii piandaa ndaa, mì poaa ndaa piaandua cuu o cɔwvo!

Yeremi 15:18

Le yɛɛ nɛ sanga nuu nɔ yɛ lamɛɛlu le? Le yɛɛ nɛ bolin nuu co yɛ danda dɔwnɔn mò sengu le? Vɛ̀ɛ̀ ma siŋnun le ya maa pee pɔmbɔ hui vana-o, ɲin pum a komal mɛnndan ma piaa cá, paale celen a komal ma velan, vana nɔla ndu tiindan te?

Yeremi 14:18

Te i kɔɛ pɛ yondoo nin, vanvílɛ́iya tuŋ ya saalun ni, a cɔwvo co diwvo-a. Te i kɔɛ pɛ ciee, vanvílɛ́iya tuŋ ya ca ni, vanaa-tɛɛngaa-diom Hala-a a vanaa-solia-lasálàá co kelanndo o lɛŋnden nin, ɲɛ-ɲɛ bɛɛ a co bila biyɔɔ le.»

Yeremi 10:19

«Mbɔ̀ ya i kɔndu dɛnɛ fɔ́! Bolin nuu singu le. I va dimio aa: sanga co le ya-o, i bɛnda mì biwnun ndu.

Yeremi 6:2

Tofa vɔ, i tɛɛmbuunin Yerusalɛm, kobi naŋ kon hɔlla-o, ndu cua salama kon pɛɛn.

Esai 42:14

Ya Mɛlɛka, o co nin lɔ́ɔ́ levil, i co o meiyo nin. I va o meiyaa, mí bii sondo nuu. Kɛ sunsun, i kuŋnin maa vanalanɔ pulei biŋin le volɔɔ-o. I hilulnin mì va yoomoo saaliaa lepilɛn-pilɛn.

Esai 21:3

Lelan, caŋnda co ya nɛiyo mì va ɲiiya nákà-nàkà, ɲɔɔ co ya nɛiyo taw mɛɛ demboo nɛi vanalanɔ o volɔɔ nuaa yɛ. Ɲɛsuan ma kindun ya ten-ten a ɲɛ ya tueyɔɔ-o. I co ɲiiyaa nákà-nàkà a ɲɛ ya cɔu-vo.

Esai 13:8

Siòònde bii nda taw, ɲɛsuan ma kindun nda mì ɲɔɔ va nda nɛiyo mɛɛ demboo nɛi vanalanɔɔ telen vialaa nuaa yɛ. A co tofanndo vellaa-velle a kɔndɔfillo, hɔlaa ndaa diw vaŋ maa leyin.

Esai 6:5

O kon, mí dimi aa: «Kpòkóó, i kɔndu dɛnɛ fɔ́! Mbɔ̀ ya i laasian! Kani vanaciee cɔcɔn co n nɔɔlɛiyon-ndo ya co ni, vanaa ya co icali tɛɛn-nda bɛɛ cɔcɔn ndan co n nɔɔlɛiyon. Nduyɛ i ce Masaa a lehɔl cikin, Mɛlɛka-Nɔ-Kpaayaa-Kpow-vo pɛɛn!»

Condii lisai 120:5

Dɛnɛ palaa co le ya, le calii ya cal vanaa laasiannda ha tɛɛn, mí kila caltan o cɛila-kolala-toandaala vanaa diuvaa n'vannda ha tɛɛn-nde!

SƐBƐ YƆB-O 10:1

«Yoomu nuu cunulun ya. Le hee, cɛɛŋɔnndo tuŋ ya co nin va ni. Mɛɛ kɔl nuu co o mɔnɛi nin yɛ, i vanin sɔɛi tuŋ.

O Kandɔɔ 27:46

Mí Rebeka kɔ dimul Isaak pɔnɔ ndɔ aa: «I co a mɔnɛi a dɛnɛ cuavaa Hitiia ha. Te Yakɔb bɛɛ yil pɛ lanɔɔ o lɛŋnden nden nin, mɛɛ piɔ́m nuu bendu lɛ le.»

Esai 26:17

Maa mɛɛ vanalanɔ pulei biŋin le violɔɔ-o ɲumbuɲumbun a caŋndo telen o va hɔ́ɔ́ violɔɔ-o nuaa yɛ, lende naa n va nɔm o hɔl ni, nɔm Mɛlɛka pɛɛn.

Misee 4:9

«Le yɛɛ nɛ niaa co yɛ niko yondaa? Masa co macoaa o niaa lo le? Mò va maa lou vana nɔm silaa lo ni? Ŋɔnga yɛɛ n co yɛ niko hoo a ɲɛ nɛyaa maa vanalanɔ nda sɔɔnguu lekɔɔ le volɔɔ?

Misee 4:10

La somisomin a ɲɛ nɛyaa, mì la ŋɔnga maa vanalanɔ nda sɔɔnguu lekɔɔ le volɔɔ. Kani la bɛnda mi la mal kobio sisa, mì la kɔ kila calta niaalan yondoo nin, mì la kɔɛ bɛɛ háá Babilɔn. Lon niaa co lakɔ baŋaa sɔla ni, lon Mɛlɛka hialunin niaa yaamɔaa niaa o ba ni.