Yeremi 32:23 - BII BILA

²³ Má hun cal o lɛŋnde len nin. Kɛ a tui nɔm diom te, a kela o tɔŋnda nɔmndan coo le, a tosa dɛnnda nɔm óò dimul nda le tosaa kpow lan te. Le hee n cuu dɛnnda palaalan ndan kpow ni!

Yeremi 32:23 Referans Kwoze

Ɛsdras 9:7

Kandɔɔ o paale fuɲaa naa imamaa, háá hau, pɔwla naalan la co bɔɔ sɛ́lɛ́. Le hakila naa n tosa lan, mí naa pila, masaa naa a vanaa-solia-lasálàà naa n luɛi masaa co o lɛŋnden coo-a o ba bɛngu, mí n del o mɔɛi cɔwve bɛngu, má kɔa a naa o biyɔɔ nin, mí vannda punga ɲɛm naan, mí siɛmbulan la bii naa mɛɛ la co hau naa biyɔ̀ɔ́ nuaa yɛ.

Cɛɛŋɔnnda Yeremi lan 1:18

Mɛlɛka nɔ dí le ɲɛ o tosa hoo-o, kani nila kalulan ya tosa a silala ndɔlan ni. Niaa vanndacieea kpow la yaŋnun-ndɔ, la tofa vɔ dɛnɛ palaa del-la coo-o. Cuaambɔa lemboa nia a langbaa felengia nia kɔɛ o biyɔɔ nin.

Nsaki 2:10

Kani vanndo bii bɛɛ tɔŋndan kpow, kɛ o tɛɛmbuu pɛ silaa o pilɛ, mɛɛ tɔŋndan kpow o tɛɛmbuu lende ni.

Kalatea 3:10

Kani vanaa-vanaa tiindan tɔŋndan biyɔɔ, nda co o dangaa bɛngu, kani o co o sɛvaa aa: «Dangaa co le vana biinin sɔɔn co n sɛvaa o tɔŋndo nin kpede mò kɛɛ le kelaa lecoo-o.»

Nsaŋ 15:14

Te la tosa pɛ o ya co niaa dimul-lo, mɛɛ caaŋaa nia niaa co ni.

Luke 17:10

Lende koni, niaa bɛɛ, telen niaa ciinin o nda vem niaa tosa-o tosa kpow-vo, la dimi aa: ‹Buɛiya daama naa n co ni, n nɔ dí le nuvali sɔla le. O náà n bɛnda le tosaa-o naa n tosa ni.›»

Esekiɛl 20:21

Kɛ mí poaa ndaa kan bɛɛ a luɛi seesiɛi a ya. A bii silala nilan te, a bii tɔŋnda nila vanacieo bɛnda mò kela coo, mì la tosa mò tuei yoomoo yeela lan te, a kela lecoo le few. Má del kasi a palɛi nii pɛngiɛi. Mí dimi le kɔl ni tuwvo cuiŋio nda coo, le nda ciiyo a kɔl ni fulaa o lɛŋnde veselɛilen nin ndon.

Esekiɛl 20:18

Mí dimul poaa ndaa o lɛŋnde veselɛilen nin aa: ‹La del silala fuɲaa niaa kɔɔli le, la bii sɔɔn nda co niaa pɛɛkoo-on te, la nɔɔlian a piɔmaa ndaa le!

Esekiɛl 20:8

Kɛ má luɛi seesiɛi a ya, a cɛl le nilan yaŋɔɔ o diom nuu le. Vana-vana viw ɲɛ nɔɔlɛi ndóò mulul hɔlla-o le, a faŋan piɔmaa Esiptea kɔɔli le. Le hee, mí dimi le kɔl ni tuwvo cuiŋio nda coo, le kɔltuw nuu kpow tuisio nda coo o lɛŋnde Esipte len nin.

Cɛɛŋɔnnda Yeremi lan 1:8

Yerusalɛm vangala hakila ndɔlan taw, lelan o siŋnun ɲɛ nɔɔlɛiyo ni. Vanaa va ndu bɛɛlen keo-va kpow a kelun ndu yii le tùú nda ce ndu tum fondo-o. Ndu pila co ŋɔɔcanndo mó va hɔlla vionɔɔ.

Nehemi 9:15

Má ke nda ɲɛdiaa fula o halataala-o le yima va nda nɛiyo-an, má soli mɛnndan o pow kpovaa nin le bolola vesɛila va nda lan. Má viam nda le nda lɛŋnde nɔm óò yiilu nda kpemaa le nda yɔngoo len hiɔlɔɔ.

Yosue 23:16

Te la tɛɛmbuu pɛ kpema Mɛlɛka Hala niaa yiilu niaa-o, mì la beŋ halaa celennda vulan le nda sooloo, mɛɛ kɔltuw Mɛlɛka-o tamalanin le tolɔɔ niaa coo le, o kon la cuunin o lɛŋnde kɛndɛle o ke niaa len coo kpow.»

Condii lisai 78:10

A bii kpema Hala ndóò yiilu nda-o le, má kɛɛ le kelaa o tɔŋ ndɔɔ coo.

Yeremi 2:7

Nduyɛ, mí hun a niaa o lɛŋnde naŋ tɔlɔɔlan-nden nin, haliko mi niáà de kɔmnde ndɔle kɛndɛlen. Kɛ mɛɛ niaa hin, mí la nɔɔliaa lɛŋnde nilen, mí la siinguu kɛ́ nuu mààlan.›

Yeremi 26:4

Má dimul nda aa: Nuaa Mɛlɛka dimi ni aa: ‹La tuei ya diom, la kela o sɔɔn ya pɛɛku niaa-on coo,

Yeremi 44:10

Háá hau, mɔnɛi bii niaa le, la ke ya lebɛɛ le, vana-vana bii silala nilan a tɔŋnda ya yɔngu fuɲaa niaa mamaa a niaa pila lan te.»

Yosue 21:43

Nuaa Mɛlɛka ke Israɛlla lɛŋnde ndóò yiilu fuɲaa ndaa mamaa kpemaa le nda len yɔngoo len ni. Má sɔla len, má cal lenin.

Yeremi 7:26

Kɛ la tui ya diom te, la yeŋ lani le. Mí la tosa bolle kalalen, mí la tosa dɛnɛ vɔɔndo hiovɔɔ fuɲaa niaa mamaa coo.»