Yeremi 3:2 - BII BILA

² Heelu vɔ hɔlla o pembon coo mà tofa, kuɛɛ nɛ n kɛɛ yɛ nɔɔlian a piɔmnda sooloo? A co icali o nɛilan lekɔɔ nda cum maa Arabua kela o lɛŋnde veselɛilen nin-nda. A nɔɔliaa lɛŋnden a suunda nɔmndo a á kela nɔm vɔɔndo.

Yeremi 3:2 Referans Kwoze

Yeremi 2:20

Mí Mɛlɛka dimi aa: «Israɛl, o co lɛhau le n luɛi nila kalulan a ya le, má tɛɛmbuu nɔu naa ŋiɔn tɛɛn, o kon má dimi aa a yeema lɛ ma va o lecɛ nin te. Kani a co keiyo piɔmnda sooloo o pembon kpow coo a o yɔmii puiyɛi kpow bɛngu.

Yeremi 2:7

Nduyɛ, mí hun a niaa o lɛŋnde naŋ tɔlɔɔlan-nden nin, haliko mi niáà de kɔmnde ndɔle kɛndɛlen. Kɛ mɛɛ niaa hin, mí la nɔɔliaa lɛŋnde nilen, mí la siinguu kɛ́ nuu mààlan.›

O Kandɔɔ 38:14

O kon mí Tamar solin volɔɔla ivii pɔnɔlan lekɔɔ, mó kuumbun kola vaan-vaando o hɔl, vanáà sina lɛ ndu le. Mó kɔ cal o nɛi-lábándoo Enaim ciee-lekɔɔ, o nɛi Timna-o coo. Kani mó ca maa Sela sul le lanɔɔ cuaa, kɛ vana ke ndu ndu mò siŋnun pɔnɔ ndɔ le.

Yeremi 3:1

Mí Mɛlɛka dimi aa: «Te vanapɔnɔɔ kɛɛ pɛ laa ndɔ, mì laa ndɔ kalaa faŋan ndu, mò kɔ cal vanapɔnɔ celen o ba, vɛ̀ɛ̀ o kɔa lɛ vɛlɛ lanɔ kon kɔɔli? Vɛ̀ɛ̀ lɛŋnde len le nɔɔlian a kela vaa lende le? Nɔm Israɛl-lɛ, a nɔɔlian a vanaa sɛ́lɛ́ bɛndua co suundaa a nɔm-nda. Nduyɛ, a yeema vɛlɛ le muungoo o ya lo! Ya Mɛlɛka co sɔɛi nuaa ni.

Tɔŋ miingua 12:2

«La bɛnda mì la tɛɛmbuu sooluula vanaa niaa co lakɔ tovɔɔ-a. O va o pembun bɛndu coo, o va o pembun pɔmbɔ coo, o va o yɔm puiyaa bɛngu.

Luke 16:23

Mó sɔla sangaa taw ciee-piɔ́m. Mɛɛ o heelu hɔlla pɔɔli, mó ca Lasar icali Abraham ikɛi.

Esekiɛl 16:16

Mí nɔm pila cua volɔɔla nɔmnda cuɛinanndan, má ciiŋiaa lan sɔndɔɔ nɛɛ pilɛ, má toosiaa sooluulan a lan, má kɔ suunda lon. Kabi bɛɛ ɲɛ vaa lende tosan-ndɔ le, le fɛɛn bɛɛ o tosan ndɛnin vɛlɛ le.

Yeremi 7:29

Mɛlɛka dimi aa: «Kiolun yiinde, mà viow, hel o pembon coo mà cɛɛŋun! Niaa vannda paalen nden hau, niaa tuulu ya kɔllo ni, i yeema lɛ niaa le, i kɛɛ niaa.

Yeremi 3:21

Diomndo co tueinɔnndo o pembon coo: ‹cuavaa Israɛlla co caŋndo a tɛɛlɔnndo ni, kani a mal nɛi kɛndɔɔ, má pɔɛɛnun ya Mɛlɛka Hala ndaa.

Yeremi 3:9

A kela ndɔ vɔɔndo, mí Israɛl nɔɔliaa lɛŋnden o piɔmnda sooloo nin, piɔmaa lapowva a piɔmaa iyɔmnda.

Yeremi 2:23

Vɛ má dimi aa: ‹I nɔɔlian te, i del Baal kɔɔli le ndu sooluu le?› Tofa vɔ foofola bɛngula nɔmndan o bóllo nin! O bɛnda ma sina dɛnɛ n tosa-o, nɔm ɲɔɔmɛɛ téndé co kelanndo ba-ba ka-o.

Talelan 23:28

Mɛɛ vanaa del vannda coo-a cumul nuaa yɛ koni vanalanɔ vaa lende bɛɛ cal mɛngɛlaa ni. Vanpiaandua nda faŋá kɔltan laandaa ndaa coo-a co nin sɛ́lɛ́.

Talelan 7:11

Vanalanɔ poopoo bɛndoo a vanalanɔ maloo-maloo o va ni. Ndóò kɛsi pelei o ndu lo cɛinin te.

2Masaa 23:13

Mó tɛɛmbuu vɛlɛ tombun va Yerusalɛm ciee-lekɔɔ o Pembii oliviei a ba too-on. Salomɔn masaa Israɛl ndóò tangul mun ni le Astartee piɔm nɔɔlɛi Sidɔnnda, le Kɛmɔs piɔm nɔɔlɛi Moabua a le Milkɔm piɔm bɛɛtambɛi Amɔnnda.

1Masaa 11:3

Faw-faw, laandua kɛmɛ leŋɔmmɛw a sámáá kɛmɛ leyáá Salomɔn ndóò nɔ ni. Mí vanlaandua kan a mangala ndu kɔllo.

Esekiɛl 20:28

Kani mí luei nda o lɛŋnde yáà heelu baa coocoo mí yáà mɛnan le nda yɔngoo len nin. Kɛ nɛɛ-nɛɛ nda ce pembii vilɛiye a yɔm puiyaa lenin, má kɔ soli sálàlan ndon, má cucu kpeyannda lan ndon, má soli sálàlan a lasikɔlɔ cun kɛndɔɔ lon, má taaliaa sálàla mamɔilan ndon le ya kɔllo tuuloo.

Condii lisai 106:38

Má soli kooma vanaa tɛɛmbuu isɔɔ le-a sálà, koma poaa ndaa a ma cuavaa ndaa laandua pɛɛn, a nda solul piɔmaa va o lɛŋnde Kanaan-nden nin-nda sálàlan-nda. Mí lɛŋnde len le luɛi o màálan bɛngu a kooma ndan.

Yeremi 3:13

Sina tɛɛmbuu nɔmndo daama. Kani ya Mɛlɛka Hala nɔmndo n simul ni, má laasian kɔlan nɛɛ-nɛɛ ka halaa celen kɔɔli o yɔmii puiyɛi kpow bɛngu. A yeŋ ya nilan te few.› Ya Mɛlɛka soo lende ni.

Yeremi 12:12

Vanaa poondiaa vannda ɲɔɔn o laba-a tiw o pembun bil vil te-on coo kpede o lɛŋnde veselɛilen nin, kani mɔɛi cɔvii Mɛlɛka-e co tɛɛmbuuo a labɛɛla, kandɔɔ o lɛŋnden kpengei kɔlan fulaa o kpengei pilɛi faŋ! I co vana-vana kpakpala le.

Osee 2:5

yɔŋii ya yunga ndu, mì mɛi ndu fondo fúú, mɛɛ o va o paale nda velu ndu len coo yɛ. I minginin lɛŋnde ndɔlen lɛŋnde veselɛilen, mì mingi len lɛŋnde mɛmma sɔlan nin te len. O kon mò vi a bolola vesɛilan.