Yeremi 3:12 - BII BILA

¹² Kɔ a ba luaŋ-ndo mà yonda sɔɔn mun aa: ‹Nɔm Israɛl lo o lediom coo loo muungu nanu! Ya Mɛlɛka co sɔɛi nuaa ni. I tofa lɛnin niaa tofa vɔɔn te, kani vana lo o lediom coo-o ya co ni. Ya Mɛlɛka co sɔɛi nuaa ni. I mandanin kɔl tambɛi nuu le lɔ́ɔ́-lɔ́ɔ̀ le.

Yeremi 3:12 Referans Kwoze

Esekiɛl 33:11

Lelan, dimul nda maa diom Maalii Hala dimi-o co hoo ni aa: «Le yoomu nuu, i hɛnan mì vana kɔlvesɛiyo vi le, kɛ mò mangala kela ndɔ vɔɔndo haliko mò va yoomu. Le hee, la mangalan! La mal kelala niaala vɔɔnndan! Le yɛɛ nɛ niaa yeema yɛ le vuo, niaa cuavaa Israɛlla?»

Condii lisai 86:15

Kɛɛ nɔm Maalii, Hala iɲííyo a Hala ikɛndɔɔ n co ni, a yala kɔl fula le, a nɔ kaolaa taw, vana lo o lediom coo-o n co ni.

Yeremi 33:26

La ca ko aa mì kɛɛ poaa Yakɔb-a a poaa David vana ni baala-a? Vɛ̀ɛ̀ i kɛɛnin le simlacia simnin cuavaa Abraham-nda, a Isaak-a a cuavaa Yakɔb-a laci-a hɛlio o poaa ndaa tɛɛn? Kɛì-kɛì bɛɛ! Kani ɲííye co ya a nda, i minginin vanaa ndaa nda kɔɛ o biyɔɔ nin-nda o nda lo.»

Yeremi 31:20

Efraim co po ni kaolaa ni, po ya handu kɔllo coo-o. Telen oo telen ya va pɛ ndu dɛnɛ palaa tuisio coo, kɔllo faŋan ya o ndu lo le. Yiyanndo tuŋ ya yiyan ndu coo ni. Kani kaolaa pila ya kaola ndu ni, ɲííye pila ya nɔ a ndu ni.» Sɔɛi fula Mɛlɛka o sondo-e co ken ni.

Yeremi 3:22

La muungu ya o ibuŋ, niaa cuavaa nila kalua ha, mì mal niaa haki le sɔɛi biyɛi lepɛŋii niɛi.› «Nuaa naa, n hin nɔm o ibuŋ, kani nɔm co Mɛlɛka Hala naa ni.

Yeremi 3:18

O palɛi ken nin, cɛi Yuda-o mɔsɔŋannin a cɛi Israɛl-lo, mà fula latulu o lɛŋnde co a ba luaŋ-ndo len nin, mà hin o lɛŋnde ya yɔngu fuɲaa niaa mamaa kɛ́ɔ len nin.»

Yeremi 30:11

Sɔɛi fula Mɛlɛka o sondo-e co hee ni aa: «Kani i co nɔm ikɛi le nɔm ciindiaa, i diwnin vanaa-mangalaa-isɔɔa niaa va a sɛŋiannda tɛɛn-nda, kɛ niaa niaa, i diwnin niaa le. I saangiaanin nɔm, kɛ le nɔm mingio o nɛi sandaa coo ni, kani i nɔla nɔm biyɔɔ maa vana tɛɛmbuu isɔɔ loo le.»

Yeremi 23:8

Kɛ a vanin mɛnanndo aa: «Le Mɛlɛka yoomaa, o soli Israɛlla o lɛŋnde maluaŋ-nden nin a o lɛŋii kɛ́-kɛ̀ ndóò tow nda nin, mó mingi nda o lɛŋnde ndalen nin-ndo!›»

Yeremi 4:1

Mí Mɛlɛka dimi aa: «Israɛl, taa muungu pɛ ya o ibuŋ, taa mal pɛ piɔmnda sooloo, mà ve lɛ laasian te, mɛɛ a nɔla ma muungu ya o ibuŋ.

Yeremi 3:5

Ko a kɔl tambɛiyo ho o lonin lɔ́ɔ́-lɔ́ɔ̀ ni? Ko mandanndo n vanin sɔɛi he o kɔl le fɛɛn a fɛɛn ni?› Lende n va dimio ni, kɛ a co dɛnɛ vɔɔndo malɔɔ le, hiyanndo tuŋ n co kɔlan a ndu tosaa ni.»

Condii lisai 145:8

Mɛlɛka nɔ kɛndɛi, o nɔ vɛlɛ ɲííye, o yala kɔl fula le, o nɔ kaolaa taw.

Condii lisai 86:5

Kani nɔm Maalii mal vana haki ni, a naŋ, a nɔ kɛndɛi taw le vanaa co nɔm piɛiyo-a.

2Masaa 18:1

O vɔsi Osee po Ela-o suili vɔsilan layàá o masalen coo Israɛl-lo, mí Esekia po Ahas-o siŋnun masaa Yuda.

2Masaa 17:23

háá mí Mɛlɛka toaw nda, má faŋan ndu o hɔl, mɛɛ ndóò dimi ndi a sondo vanaa ndɔa baalaa yɛ, vanaa-tɛɛngaa-diom Hala-a pɛɛn. Má kɔa a Israɛlla levil polon o cɛlen nin, o lɛŋnde Asiri len nin. Má kɔ va lon háá paalen nden.

Tɔŋ miingua 30:2

te la muungu pɛ Mɛlɛka Hala niaa o ibuŋ, te niaa pila a cuavaa niaa bii pɛ diom ndɔɔ a kɔlta niaalan a yoomu niaa kpow mɛɛ ya co niaa silaa hau yɛ,

Osee 6:1

«La hun mì n muungun Mɛlɛka o ibuŋ! Kani ndu lɔɔ naa ni, kɛ o co naa cɛw. Ndu booluu naa ni, kɛ o co pavii nɛi holiholi.

Esekiɛl 39:25

Le hee, nuaa Maalii Hala dimi ni aa: «O laan nin, i minginin cuavaa-imamaa Yakɔk-a co o biyɔɔ nin-nda o nda lo. I tuinunnin cuavaa Israɛl-la kpow iɲíí, kani paŋalaa biinin ya le diola nila diandaalan.

Yeremi 31:8

I co nda cua o lɛŋnde maluaŋnden mì mingi nda, mì cuungiaa nda fulaa o lɛŋii levil-ville nin. Vana-vana vanin ndon: vanaa sumɛiya a namtaa, komsaa a vanaa lafolia, sɛ́lɛ́ bɛndoo pila nda cuungiannin ndon ni.

Yeremi 3:14

Niaa cuavaa nila kalua, la muungu nanu. Ya Mɛlɛka co sɔɛi nuaa ni, kani ya co vana niaa pɛɛkaa ni. I cuanin niaa, vana pilɛ o kobio pum nin, vanaa ŋiɔn o yungoo pum nin. O kon, mì mingi niaa Siɔn.

Yeremi 3:7

Mí dimi aa: «O cii pɛ balɔɔ ndɔ kon, o co muungu o ya lo, kɛ lepilɛ bɛɛ, o hin te. Nduyɛ mí puapilɛ ndɔɔ Yuda lo o lediom coo loo ca ndu.

Yeremi 3:1

Mí Mɛlɛka dimi aa: «Te vanapɔnɔɔ kɛɛ pɛ laa ndɔ, mì laa ndɔ kalaa faŋan ndu, mò kɔ cal vanapɔnɔ celen o ba, vɛ̀ɛ̀ o kɔa lɛ vɛlɛ lanɔ kon kɔɔli? Vɛ̀ɛ̀ lɛŋnde len le nɔɔlian a kela vaa lende le? Nɔm Israɛl-lɛ, a nɔɔlian a vanaa sɛ́lɛ́ bɛndua co suundaa a nɔm-nda. Nduyɛ, a yeema vɛlɛ le muungoo o ya lo! Ya Mɛlɛka co sɔɛi nuaa ni.

Esai 44:22

I vɔɔsuu hakila niaalan maa mɔ́m. I ɲumi yɔŋnda vɔɔnnda niaalan maa yumbuyumbu. Lelan la muungu ya o ibuŋ, kani ya baŋa niaa ni.

Talelan 28:13

Vana co tɛɛmbuula ndɔlan vionɔɔ-o, tìw dɛnɛ ba le, kɛ vana sɔlɔlan pɛ tɛɛmbuula ndɔlan mò mal tan, ndu sɔla ɲííye tuinɔnndo.

Condii lisai 103:17

Nduyɛ kabi sindɛ, háá le fɛɛn a fɛɛn vɛlɛ, Mɛlɛka vanin vanaa nɔ siòòŋii ndɔɛi-ya kaolaa. Taa bii pɛ kpema ndɔɔ, mà yiyan, mà bii silala ndɔlan. O tosalnin vɛlɛ cuavaa ndaa mamaa dɛnɛ sandaa.

Condii lisai 103:8

Mɛlɛka nɔ ɲííye a kɛndɛi taw, o yala kɔl fula le, kaola ndɔɔ co o bɔɔ.

Condii lisai 79:5

Mɛlɛka, háá lɔ́ɔ́ kuɛɛ n lo yɛnin a kɔltuwvo ho? Háá tuma kuɛɛ paŋala nɔmndo ho lo yɛnin sandei he maa leyin?

2Dɛnnda lemasalan 30:9

Te la muungu pɛ Mɛlɛka o ibuŋ, vanaa kɔɛ a puapilɛa niaa a á poaa niaa o biyɔɔ nin-nda tuinunnin nda iɲíí, mà mal nda, mà muungu o lɛŋnden nden nin. Kani Mɛlɛka Hala niaa nɔ kɛndɛi, o nɔ vɛlɛ ɲííye. Te la muungu pɛ ndu o ibuŋ, o faŋanin hɔlla niaa coo le.»

2Masaa 17:6

O vɔsi ŋɔmahiɔɔlundɔɔ nin o masale Osee len bɛngu, mí masaa Asiri bii Samari, mó kɔa a Israɛlaa va lon-nda o biyɔɔ nin o lɛŋnde ndɔlen nin. Mó kɔ kɛsi nda o tàndá nɔ diolan aa Halah-o nin, o peo Habɔr kɔngɔ, o lɛŋnde Kosan-nden nin a o kobila Mɛdea nin.

2Masaa 15:29

Telen Peka va o masalen coo Israɛl-lo, mí Tiklat-Pilesɛr, masaa Asiri hun bii Iyon, Abɛl-Bɛt-Maaka, Yanoa, Kedɛs a Hatsɔr. Mó bii tàndá Kalaad-o a tàndàá Kalile kpow, kɔ bii niko a tàndá Nɛftali-o kpow, mó bii vanaa va o kobila lan a o tàndàla lan nin-nda kpow, mó kɔa a nda o biyɔɔ nin o lɛŋnde Asiri len nin.

O Kandɔɔ 4:7

Taa caa pɛ kelaa, a cuanin bollen, kɛ taa cee kelaa le, hakio co nɔm o dio maa ɲɛ-vueinan, o yeema mò tiw nɔm ba, kɛ nɔm, a bɛnda ma nɔla haki kalaa.»

Tɔŋ lasálàá 26:40

«O kon, a sɔlɔlannin tɛɛmbuula ndalan a tɛɛmbuula fuɲaa ndaa mamaa, mà sɔlɔlan kasila nda del a ya lan a nila kalula nda tosa a ya lan.

Condii lisai 103:9

O suu naa lɔ́ɔ́-lɔ́ɔ̀ le, o mandan yiyan vɔɔn o kɔl le fɛɛn a fɛɛn te.

Yeremi 11:6

Mí Mɛlɛka dimul-la vɛlɛ aa: «Yonda sɔɔn mun o kobila Yuda lan nin a o nɛilan Yerusalɛm coo aa: ‹La yaŋnun sɔɔn kpemaa ho, mì la kela lecoo.

Yeremi 12:15

O kon kɔɔli, ɲííye biinin ya vɛlɛ a nda, mì mingi nda, vana-vana o kɛ́ ndɔ coo, vana-vana o lɛŋnde ndɔ nin.

Cɛɛŋɔnnda Yeremi lan 3:22

Vanakɛndɛyɛi Mɛlɛka-e cuu le, ɲíí ndɔɛi nɔ lamɛɛlu le.

Esekiɛl 11:17

Le hee, dimul nda aa nuaa Maalii Hala dimi ni aa: ‹I faŋanin niaa nɛɛ nia co vanaa súúla celen nda tɛɛn-nda, mì cuungiaa niaa. I solinin niaa o lɛŋii niaa co a saŋnannda nin-nde nin, mì mɔɔsiaa niaa, mì yɔngu niaa lɛŋnde Israɛl-ten.

2Dɛnnda lemasalan 29:10

Ya ya, i co yiyanndo le kpemaa yiiyo a Mɛlɛka Hala Israɛlla, haliko mi kɔl ndɔ tuwvo faŋan naa coo.

Esai 31:6

Lelan niaa cuavaa Israɛlla, la muungu vana niaa mulul paandu kɔɔ mi niáà kɛɛ ndu few-few-vo o ibuŋ!

Yeremi 31:21

Baŋ tɔɔmaselelan o nɛi nɔmndo demullo, caa kɔlan o nɛiyo coo, o nɛi n co kɔlan coo-o pɛɛn. Mbɔ̀ muungu nanu, Israɛl ya kaola-o, muungu o kobila nɔmndan nin.

Sakari 1:4

La vial fuɲaa niaa mamaa a káà, mì la tosa maa nda le. Kani nda nda, vanaa-tɛɛngaa-diom Hala-a va sindɛ yondaa nda o lani, má va nda dimullo aa Mɛlɛka-Nɔ-Kpaayaa-Kpow-vo dimi aa: La mal kelala niaala vɔɔnndan a dɛnnda niaala vɔɔnndan. Kɛ a yeŋ nilan te, a bii sɔɛi ken te. Sɔɛi fula Mɛlɛka o sondo-e co hee ni.