O Kandɔɔ 15:18 - BII BILA

¹⁸ Paale len Mɛlɛka yiilu Abram kpemaa ni, mó dimul ndu aa: «I yii kpemaa maa i yɔngunin cuavaa nɔmaa imamaa lɛŋnden nden. Kandɔnndo a pee pɔmbɔɔ Esipte, kɔ bii a pee bɛndoo Efrate,

O Kandɔɔ 15:18 Referans Kwoze

O Kandɔɔ 12:7

Mí Mɛlɛka cɔmnun Abram, mó dimul ndu aa: «I yɔngunin cuavaa nɔmaa imamaa lɛŋnden nden.» Mí Abram cɔaw fonda-loamaa-lasálàá o fonda Mɛlɛka cɔmnun ndu kon-ndo le ndu Mɛlɛka sálàá solullo lecoo.

O Kandɔɔ 24:7

Mɛlɛka Hala co o halataala-o, o faŋa ya yungu nuu ikɛi a o lɛŋnde nilen nin-ndo, o soo o ya lo mó cuel-la kpemaa, mó mɛnan maa o co cuavaa nia imamaa lɛŋnde ya co len nin-nden yɔngu-o, o co nɔm mɛlɛkanɔ ndɔɔ vomɔɔ laci, haliko ma nɔla le lanɔɔ yilɔɔ lon, mà hin a ndu le po nuu.

O Kandɔɔ 13:15

Lɛŋnde n co len cɔu len, i co nɔm nden yɔngu niaa cuavaa nɔmaa imamaa le fɛɛn a fɛɛn.

Esai 27:12

O palɛi ken nin, Mɛlɛka lɔaanin kullon mì n cɛɛlun, kandɔɔ o pee bɛndoo, kɔlan tiiya háá o pee pɔmbɔɔ Esipte, o kon niaa cuavaa Israɛlla, a cɔwviaanin niaa a pilɛn-pilɛnnda!

Nehemi 9:8

Má ca maa kɔl ndɔɔ sandu nɔm o hɔl, má yiilu ndu kpemaa, má yɔngu ndu lɛŋnde Kanannda, Hitiia, Amɔnnda, Perisiia, Yebusiia a Kirkasiia, mì cuavaa ndɔa va icali lenin. Nduyɛ, má lo o lediom coo, kani vana sandaa n co ni.

Tɔŋ miingua 11:24

Fonda oo fonda niaa pila pɛ pelei, niaa nɔnin fonda kon ni. Lɛŋnde niaalen le cannin a lɛŋnde veselɛilen, mì le kɔ tiiya háá Liban, le cannin vɛlɛ a pee bɛndoo Efrate, mì le kɔ tiiya háá o mɛmma ihɛllan Mediteranee.

Kundalan 34:5

Pɛɛngulan la kei pɛ a lon, la kɔɛ a ba pee pɔmbɔɔ Esipte le kɔlan delɔɔ o mɛmma ihɛllan coo.

Hebreea 13:20

Hala yɔngù naa kɔlɲuloo ni. Mó mingi Maalii Yeesu, vana mandaa n'saa bɛndoo, yoomu fulaa vanvílɛ́iya tɛɛn. Mí kooma sálà ndɔɔ ma siŋnun sabuo le kpema fɛɛn-fɛɛndo.

Yeremi 32:40

I yiinin kpema fɛɛn-fɛɛndo a nda. I mulul-lɛnin nda kɔɔ le. I tosalnin nda dɛnɛ kɛndɔɔ mì tosa ma vo ya o kɔlta ndalan nin, o kon a kue lɛnin ya levil te.

2Dɛnnda lemasalan 9:26

Mó tosa masalen masaa ha coo, a lɛŋii ndɛi va cɔnɔnndo o pee bɛndoo Efrate, keiyo a lɛŋnde Filistia, kɔlan tiiyaa dí o pɛɛngulan a lɛŋnde Esipte len-nda.

Tɔŋ miingua 34:4

O kon mí Mɛlɛka dimul ndu aa: «Tofa vɔ lɛŋnde ya yiilu Abraham, Isaak a Yakɔb kpemaa, mí mɛnalan nda le nda len yɔngoo len. Mí dimul nda aa: ‹Lɛŋnden nden ya yɔngunin cuavaa niaa imamaa ni.› I cɔm nɔm Moise lɛŋnde kalalen, má ca len a lehɔl, kɛ a lueinin lenin te.»

Fulaa 23:23

Kani mɛlɛkanɔ nuu vanin kɔlan niaa laci háá mo kɔ tiiya niaa o lɛŋnde Amoriia, Hitiia, Perisiia, Kanannda, Heviia a Yebusiia nin. Vanaa kan yɛ, i ciinin nda kpede.

O Kandɔɔ 26:4

I co cuavaa nɔmaa imamaa kui maa loeon o halataala, mì yɔngu nda lɛŋnden nden kpow. Nduyɛ, vanaa-mangalaa-isɔɔa o ceendo coo kpow a sɔlanin duaa cuavaa nɔmaa imamaa o ba bɛngu.

Condii lisai 105:11

Mó dimi aa: «I yɔngu nɔm lɛŋnde Kanaan-nden, kɛ́ nɔmndo vanin kon ni, nɔm a polale nɔmnden.»

Yosue 15:4

O kon kɔɔli, mí pɛɛngula lan la kei Asmɔn, mí la hiaw a ba pee pɔmbɔɔ Esipte, le kɔlan tiiyaa o mɛmma ihɛllan. Pɛɛngula lan la va le Yuda a ba too ni.

Tɔŋ miingua 7:1

«Lɔ́ɔ́ Mɛlɛka Hala niaa lueinin niaa o lɛŋnde niaa co kɔlan luɛyɔɔ nin le len hiɔlɔɔ len nin-ndo, te o tow pɛ Hitiia, Kirkasiia, Amoriia, Kanannda, Perisiia, Heviia a Yebusiia niaa laci, vanaa-mangalaa-isɔɔa kundala ŋɔmmɛvaa hiow niaa kan sɛ́lɔ́ɔ́ a kpaayaa-a,

O Kandɔɔ 50:24

Mɛɛ piɔ́m ndɔɔ va le tiiyaa, mó dimul yungu ndɔɔ aa: «I co hunɔɔ vu, kɛ Hala melnin niaa le. O co niaa hunɔɔ soli o lɛŋnden nden nin, mò yɛɛ niaa o lɛŋnde o yiilu sindɛ Abraham, Isaak a Yakɔb kpemaa le nda yɔngoo len nin.»

O Kandɔɔ 35:12

Lɛŋnde ya yɔngu Abraham nda Isaak len, i co nɔm nden yɔngu niaa cuavaa-imamaa nɔmnda nɔm kɔɔli.»

O Kandɔɔ 28:4

Màá o tuisi nɔm duaa o dɔw Pua Abraham-ndo coo niaa cuavaa nɔmaa imamaa, haliko mi lɛŋnde n co len icali nin o sumialle len le siŋnun lɛŋnde nɔm! Kani Abraham fuɲa nɔm mama Hala yɔngu len ni.»

Fulaa 34:11

Lelan, bii sɔɔn ya co nɔm hau dimullo-on kpáŋ. I co Kanannda, Amoriia, Hitiia, Perisiia, Heviia a Yebusiia tovɔɔ niaa laci.

Fulaa 6:4

O kon kɔɔli, mí yiilu nda kpemaa le nda lɛŋnde Kanaan-nden yɔngoo, lɛŋnde nda va icali nin o sumialle len pɛɛn.

Fulaa 3:8

Le hee, i tol le nda solio o sanga kon nin Esiptea o ba, a le nda yɔ̀ɔ́ o lɛŋnde bɛndule kɛndɛ-kɛndɛlen nin, o lɛŋnde cɔlua a tɔlɔɔlan la naŋ nin taw-taw len nin, o lɛŋnde Kanannda, Hitiia, Amoriia, Perisiia, Heviia a Yebusiia co icali nin-nden nin.

1Dɛnnda lemasalan 5:9

A ba paalen le can-ndo, a va icali kandɔɔ o peo Efrate háá o pɛɛngulan a lɛŋnde veselɛilen. Kani cɔlua ndaa va bɔɔ sɛ́lɛ́ o tàndá Kalaad-o nin.

2Samiɛl 23:5

Lende Hala co tosaa a yungu nuu ni: kani o yiilu ya kpema fɛɛn-fɛɛndo, o co o bɛɛndiaa ɲɛkɛndɛi, o co vɛlɛ o mandaa ɲɛkɛndɛi. O co cinda nuu a ɲɛ hɛnan ya-o solio mɛɛ ɲɛ và vulɔɔ.

O Kandɔɔ 2:14

Tɛyii yàándɔɛi va Tikre ni, ndi kei o lɛŋnde Asiri len a ba paalen le can-ndo ni. Tɛyii hiɔɔlundɔɛi pee kon va Efrate ni.

Esai 55:3

La yaŋ nilan, la hun o ya lo, la yaŋnun ya mì la va yoomu. I yiinin kpema fɛɛn-fɛɛndo a niaa, mì tosal niaa dɛnnda kɛndɛla kɛ́-kɛ̀ yáà tuu le David tosallo.

2Samiɛl 8:3

Tuma Hadadesɛr, po Rehɔb va masaa Soba-o, ndóò yeema le kɔlan tàndà va o peo Efrate leeloo-o hiɔlɔɔ-o, mí David nɔla vɛlɛ kon.

Dɛnnda kiilaa 7:5

Hala ke ndu lɛŋnde len mì le va ɲɛ ndɔ le, hali nɛɛ kɛsiaa ipelu bɛɛ o ke ndu le. Kɛ mó dimul ndu maa o hun kenin ndu lɛŋnde len kɛ́ɔ, ndu a cuavaa ndɔa imamaa. Nduyɛ o telen kon, Abraham ndóò nɔ vɔ hɔ́ɔ́ le.

Dɛnnda cɔɔmuanndan 9:14

mó dimul mɛlɛkanɔ ŋɔmpundɔ bulu hɔŋaa va o ba-o aa: «Tiimbuu mɛlɛkaa hiɔɔlua co haa a yiyaa a yɔlɔn o pee bɛndoo Efrate kɔngɔ-a.»

Fulaa 6:8

I co niaa yɔɔ o lɛŋnde ya mɛnalan Abraham, Isaak a Yakɔb le nda len yɔngoo len nin. I co niaa len yɔngu ɲɛ niaa pɛ́-pɛ́. Ya Mɛlɛka soo nuaa ni.›»

Fulaa 13:11

Tuma Mɛlɛka lueinin niaa o lɛŋnde Kanaan-nden nin-ndo, mɛɛ o mɛnalan niaa a fuɲaa niaa mamaa yɛ, telen o yɔngunin niaa lɛŋnde kalalen-ndo,

Fulaa 32:13

Loonun a vanaa nɔmaa baalaa: Abraham, Isaak a Yakɔb, a n yiilu kpemaa má mɛnalan nda o diola nɔmndan-nda. Kani má dimul nda sindɛ aa: ‹I co cuavaa niaa imamaa kui maa loeon o halataala, i yɔngunin niaa lɛŋnde ya dimi le niaa yɔngoo len mì la loo len kɛ́ɔ le fɛɛn a fɛɛn.›»

Tɔŋ miingua 12:20

Te Mɛlɛka Hala niaa cɔɔlu pɛ lɛŋnde niaalen kuundiaa mɛɛ o yiilu niaa kpemaa yɛ, te hiluan ma bii pɛ niaa le vision dioo mì la dimi aa: ‹N yeema mi n de vision›, la nɔla mì la de mun mɛɛ ɲɔɔ hɛnannin niaa yɛ.

Tɔŋ miingua 19:8

Te Mɛlɛka Hala niaa cɔɔlu yɛ pɛ lɛŋnde niaalen kuundiaa mɛɛ o yiilu fuɲaa niaa mamaa kpemaa yɛ, te o yɔngu pɛ niaa lɛŋnde o yii kpemaa le nda keo len kpow,

2Dɛnnda lemasalan 7:8

O telen pilɛ kon, mí Salomɔn tosa kafoo le palɛi ndii ŋɔmmɛw, Israɛlla kpow a va ndu ikɛi, mí vannda hun sɛ́lɛ́ bɛndoo fulaa o kobila yɛ́-yɛ́lan nin, cɔnɔnndo Hamat kɔlan tiiyaa háá o pee pɔmbɔɔ Esipte.

2Dɛnnda lemasalan 8:7

Vanaa pum ndáà lo o lɛŋnde len nin, nda ve cuavaa Israɛl te. Nda yɔŋnun haa ni: Hitiia, Amoriia, Perisiia, Heviia a Yebusiia.

Ɛsdras 4:20

Masaa nɔ kpaayaa taw-va kei Yerusalɛm, mí masale ndalen le pɛngɛlan o lɛŋii va Efrate leeloo a ba paalen le del-lo-e kpow coo, vannda va nda muloo malɔɔ o ba, a va ɲɛ kelun-ndo yɔngoo, a va sala hiavaa yɔngoo.

Fulaa 2:24

Mɛɛ o tuei nda cɛɛŋɔnndo, mó loonun a kpema o yiilu Abraham, Isaak a Yakɔb-o.

Fulaa 34:24

Kani i toawnin vanaa-mangalaa-isɔɔa niaa laci mì cɔɔlu niaa lɛŋnden. Vana-vana yiyannin le lɛŋnde niaalen hiɔlɔɔ niaa kɔɔli telen niaa vanin luɛyɔɔ bɛmbɛ leyáá o vɔsio nin o cɛi-kola-toandaa ni diandaa nin-ndo le.

Tɔŋ lasálàá 26:42

I loonunnin a kpema co naa tɛɛn naa Yakɔb-o, i loonunnin a kpema co naa tɛɛn naa Isaak-o, i loonunnin vɛlɛ a kpema co naa tɛɛn naa Abraham-o. O kon, i loonunnin a ciɛ́ɔn ya cua a lɛŋnde ndalen o kɔɔ-on.

Tɔŋ lasálàá 26:45

Le cinda ndaa, i loonunnin a kpema co naa tɛɛn naa fuɲaa ndaa mamaa-o o kɔɔ, fuɲaa ndaa mamaa ya soli o lɛŋnde Esipte len nin vanaa-mangalaa-isɔaa celennda o hɔl-la pɛɛn. I soli nda haliko mi va Hala ndaa. Ya co Mɛlɛka ni.»

Yosue 13:3

kandɔɔ o pee pɔmbɔɔ Sihɔr, Esipte a ba paalen le can-ndo, kɔlan háá a lɛŋnde Ekrɔn-nden a maluaŋ. Tàndà kon kpow, vannda ndáà ce ndu maa o lɛŋnde Kanaan-nden coo o va ni. Lon masaa ŋuɛɛnua Filistia va masalen tosaa ni: masaa Kaasa, hoo Asdɔd, hoo Askelɔn, hoo Kat a hoo Ekrɔn, mí lɛŋnde Aviia le va vɛlɛ nda o ba bɛngu.

1Masaa 5:1

Salomɔn va vɛlɛ masalen tosaa o masɛi yɛ́-yɛ́i va kandɔɔ o pee bɛndoo Efrate-e coo, keiyo a lɛŋnde Filistia, kɔlan tiiyaa háá o pɛɛngulan a lɛŋnde Esipte len. Háá mó vu, vanaa kan va muloo malɔɔ ndu o ba, a va vɛlɛ ndu baalaa tosallo.

1Dɛnnda lemasalan 16:16

Kpema o yiilu Abraham-ndo co kon ni, mɛnalan o mɛnalan Isaak-o pɛɛn.

Yeremi 32:22

Má ke nda lɛŋnde nɔm óò mɛnalan fuɲaa ndaa mamaa le nda yɔngoo len, lɛŋnde cɔlua a tɔlɔɔlan la naŋ nin taw-taw len pɛɛn.