1Tesalonikea 4:6 - BII BILA

⁶ Vana-vana pílàn puapilɛ ndɔɔ tana le, vana-vana tɛɛmbuu puapilɛ ndɔɔ labɛɛ o sɔɛi he nin te. Maa mɛɛ naa n dimul niaa sɔɛi ken kpéŋ-kpéŋ yɛ, Mɛlɛka tuisinin vannda sangaa coo le hakila vaa lende.

1Tesalonikea 4:6 Referans Kwoze

Hebreea 13:4

Vannda kpede bɛnda mà ke nɔu bɛɛlen, mì vanaa co o nɔ̀u nin-nda, vana-vana lo o lediom coo a vanndo pilɔɔ vellaa-velle. Kani Hala kialunin yamɛi vanaa laasiannda a vanaa suundaa.

Rɔmnda 12:19

Niaa vanaa hɛnan ya-a, niaa pila mingi màá dɛnɛ vɔɔndo le, kɛ la mel kɔltuw Hala-o fondaa, kani o co o sɛvaa aa: «Ya co vana mingia maa ni, ya salanin vana-vana ni.» Mɛlɛka dimi lende ni.

Fulaa 20:17

La fúla cɛi pilaa lehɔl te. La fúla lanɔ pilaa lehɔl te, la fúla cɛ piaandu pilaa, cɛ laandu pilaa, naw pilaa, sofɛlɛ pilaa lehɔl te. La fúla ɲɛ-ɲɛ co ɲɛ pilaa lehɔl te.»

Rɔmnda 1:18

Kɔltuw Hala-o cɔmnun ceen fulaa o halataala le dɛnnda vɔɔnndan kpow a le dɛnɛ sandaa lepɛŋ vanndacieea co tosaa-o. A co toɲaa vionɔɔ a dɛnnda vɔɔnnda nda co tosaa lan.

Talelan 28:24

Vanndo ciimbuu pɛ fuɲa ndɔ a kala ndɔ mó dimi aa ken co sɔɛi vɔɔn te, mɛɛ caaŋoo vana del vannda coo-o o co ni.

Fulaa 20:15

La yɔŋ levui le.

Nsaki 5:4

La tofa vɔ, sala vanvalaa kow ciɛɔn niaan-nda, o niaa kungulan coo-o, co yondaa. Nduyɛ cɛɛŋɔnnda vanaa koavaa kan la tiiyaa háá Mɛlɛka nɔ Kpaayaa-Kpow-vo o lani.

Nsaki 2:6

Niaa yɛ, la co vanaa bala fondoa bɛ̀ɛ̀lan tɛɛmbuuo. Vɛ̀ɛ̀ o co vanaa bolofaa le a co niaa mɔnɛi lueiyo le? Vɛ̀ɛ̀ nda le a co niaa yɔɔ o fondala kialaa n'yamalan te?

Kalatea 5:21

yeemɛi bɛnduei, mɔiyan yɔngɔnndo, pululen a dɛnnda vaa lende. Vanaa co dɛnndan ndan tosaa-a, i co niaa ndi pɔɔ dimul maa mɛɛ ya dimúl nin niaa ndi yɛ, nda sɔlanin kɛ o masale Hala len nin te few.

Rɔmnda 13:4

kani baala Hala-o simlacia co tosaa ni, le dɛnɛ kɛndɛ nɔmndo. Kɛ taa tosa pɛ dɛnɛ vɔɔndo, mɛɛ yɔŋ siòònde, kani o co fondo le nda tuisi vana sangaa coo le, le baala Hala nda co tosaa-o ni, le maa ndɔɔ mingio a le kɔl ndɔ fulaa tuisio vanaa tosaa dɛnnda vɔɔnda coo.

Luke 12:5

Kɛ i cɔmnin niaa vana niaa bɛnda le vou-vo. La vo Hala, o nɔ kpaayaa-o, te o cii pɛ vana diyɔɔ, o viow o ɲánndávàà. Maa lekɛ́ndɛi, mì dimul niaa, ndu niaa bɛnda mì la vo ni.

Malasi 3:5

I sɔɔnguunin niaa ikɛi le yamɛi kiolɔɔ, i keleŋanin mì kɔ tɛndal vanaa viamaa yavaa a vanaa suundɛiya seilen. I tɛndalnin vanaa mɛɛnian mɛɛniannda fondolan-nda seilen, mì tɛndal vɛlɛ vanaa kɛɛ le sala vanaa baalaa yɔngoo-a seilen. Nda koni kuunan ɲɛm vííya a ɲɛm vanlaandua piandaa ndaa vi-a coo ni. Nda kan koni yii mialla dúmbú le nda palaa ni. A nɔ isiòòn a ya le. Ya Mɛlɛka-Nɔ-Kpaayaa-Kpow-vo dimi lende ni.»

Esekiɛl 22:13

Tofa vɔ, i lɔɔ balan a kpingaa le delɔɔ coo n co tosa-o a le vanaa nda co diwvo nanu-a.

2Tesalonikea 1:8

O tuisinin vanaa sínà ndu Hala le-a a vanaa kɛɛ Yoongu kɛndɛ Maalii naa Yeesu-o biyɔɔ-a sangaa coo.

Efɛsea 5:6

La cɛl mì vana-vana hui niaa a sɔɔn fondon te, kani le tɛɛmbuula vaa lende kɔltuw Hala-o toalnin vanaa co ndu simullo-a coo ni.

Efɛsea 4:17

Lelan, ɲɛ ya co niaa dimul mì tiiyal niaa o Maalii nin-ndo co hoo ni: la va lɛ kelaa maa vanaa sínà Hala le-a le, a del yiyannda yɔngu nda ɲɛ-ɲɛ le lan kɔɔli-a pɛɛn,

Marke 10:19

A sina tɔŋndan aa: ‹Dii vana le, suunda le, yɔŋ levui le, timbul vana seile lakafa le, del vana coo le, biilu fuɲa nɔm a kala nɔm.›»

Sofoni 3:5

Nduyɛ, Mɛlɛka co nda tɛɛn o kobi ndɔɔ nin, Mɛlɛka yɛ, o sandaa o co ni, O co dɛnɛ oo dɛnɛ tundan tosa le. Idii oo idii, o co yaman ndɔn kiolɔɔ, a paale siaalen bɛɛ, o co lon. Vana kɔlvesɛiyo ndu sina masinaa lasiɛmbu le.

Sofoni 3:1

«Ndu kobi delɔɔ coo pɛ hoo nin-ndo, dɛnɛ palaa co ndu cum, kobi vanaa nila kalua a vanaa lakafaa co hoo nin-ndo pɛɛn.

Yeremi 9:4

Vana-vana co caan ndɔ kafalan tosallo, vana-vana dimi toɲa le. Caa pila nda caa còòlan dimio ni, o kon nda co kɛɔ le muungoo ya o ibuŋ ni.

Yeremi 7:6

te la saangiaa miallo le, mì la saangiaa vííyo a vanalanɔ pɔnɔ ndɔ vi-o le, te la dii vana tɛɛmbuu isɔɔ loo le, te la mulin halaa celen kɔɔli le niaa pila dɛnɛ palaa tuisinndo coo le,

Esai 5:7

Nduyɛ, nakɔɔ n'rɛsɛn Mɛlɛka-Nɔ-Kpaayaa-Kpow-vo, ndu co cuavaa Israɛlla ni. Vanpiaandua Yuda, nda co tɔlɔɔ kɛndɛ ndóò kaola taw-vo ni. Mɛlɛka va tiindanndo maa ndáà vanin sakpo, kɛ tofa vɔ, sandii lepɛŋnde i tiw ba-ba fee. O va yiyanndo maa a tosanin dɛnɛ sandaa, kɛ a cua kafalan ma bii o lebol!»

Vana Kɔlkaloo 5:8

Le vanndacieea kpow tɔnɔ lelɛŋndo co ni. Masaa bɛɛ, yondoo tɔnɔ ndɔɔ fula ni.

Talelan 20:23

Panila nda bɔɔfiaa lan la nɛinun bɔɔ Mɛlɛka. O hinì kɔl a ɲɛla tuvaala n'ɲɛla lakafalan te.

Talelan 20:14

Vana piandaa lavɔngoo cɛn pɛ o dimi aa: «Ɲɛlan ndan la kendu bɔɔ baa.» Kɛ o kɔɛnnun pɛ, o kɔ sangalan.

Talelan 11:1

Ɲɛla tuvaala n'ɲɛla nda yɛlɛmiaa lan la nɛinun bɔɔ Mɛlɛka, kɛ o nàŋ kɔl a ɲɛla tuvaala nda sakpolan.

Condii lisai 140:12

Màá vanaa hɛɛnduu caanda sɔɔn vɔɔnndon coo-a cuu o lɛŋnden coo, mì dɛnɛ palaa tol vanaa yɔŋ vɔɔnda coo!

Condii lisai 94:1

Kpòkóó Mɛlɛka, Hala vana mingiaa màá, Hala vana mingi màálan-ndo, cɔm diondɔɔ nɔmndo!

Tɔŋ miingua 32:35

Ya co vana mingiaa màá ni, ya sala vanndo le ɲɛ o tosa-o ni. Tuma nda boŋnin-ndo, ya saalanin nda ni. Kani paale dɛnɛ palaalen le co nin le tiiyaa nda coo. Dɛnɛ palaa kelun le nda-o tamalanin le tolɔɔ nda coo le.

Tɔŋ miingua 24:7

Te Israɛlnɔɔ ciimbuu pɛ vanaciee yoomaa o pilacieaa ndɔa Israɛlla tɛɛn, mò siinguu vanaciee o ciimbuu kon-ndo cɛ ndɔɔ, te kon te mò pisi ndu, vana ciimbuu ndu kon-ndo bɛnda mò sɔla piɔ́mndo kangalan. Lende niaa bɛnda ni mi la faŋa dɛnɛ vɔɔndo niaa tɛɛn.»

Tɔŋ lasálàá 25:17

La hiŋ pilacieaa niaa hɔlla le, la nɔ́ siòòŋii Hala niaa. Ya co Mɛlɛka ni, Hala niaa pɛɛn.

Tɔŋ lasálàá 25:14

Te la pendu pɛ, te kon te la pisi pɛ pilaciee niaa lɛŋnden o ba, la bɛnda mi la hiŋ ndu hɔlla le.

Tɔŋ lasálàá 19:13

La sáángiàà caaŋaa niaa le tɔnɔɔ sɔlaa o sanga nda kon nin te, la púú ɲɛ vana a sondo yeelaa le, la mándan sala vana baalaa bɛnda le sɔlaa hau-vo o ba háá siɔdii le.

Tɔŋ lasálàá 19:11

La yɔ́ŋ levui le, la dímùl caanda lacòò mì la tosal nda lakafa le.

Efɛsea 4:28

Vana co vuilenndo, ndu mal vuilen. Ndu pila tosa baalaa, haliko mo sɔla ɲɛ o piɔvan nda vanaa co o bahavɛiyo nin-nda-o.

Misee 2:2

Yondolan lapum bɛɛ la hɛnan nda ni, a poonda. Cɛilan lapum bɛɛ nda fula hɔlten ni, a hɛlu. Delɔɔ nda del vanacieo coo a cɛi ndɔɔ kpow ni, ma de ndu a kɛ́ ndɔɔ kpede.

Talelan 16:11

Le Mɛlɛka ɲɛla tuvaala n'ɲɛla sandaalan la co ni, ndu toosiaa ɲɛla vana tuu ɲɔɔn-ndan ni.

Luke 16:28

puapilɛa nia co lon nda ŋuɛɛnu. Mò kɔ kanalan nda, yɔŋii nda bɛɛ a hun o sangaa ho nin nanu.›

2Korɛntea 7:11

Kɔl tambɛi Hala cɛl hoo mó komal niaa-o, la tofa vɔ sɔɔn kɛndɛn o tosa o ceennda niaalan nin-ndon: la cɔm yiyan kɛndɛ niaa nɔ-o, mí la keleŋa cɛvɔn! Mɔnɛi bii niaa taw, mí siòòŋii bɛnduei bii niaa, mí yeemɛi bii niaa vɛlɛ le ya cɔu, mí la dɔawnun ɲaale ɲɛkɛndɛi, mí la sɔla sangaa le dɛnɛ sandaa. O nɛi oo nɛi coo, mí la cɔm maa la tosa ɲɛ-ɲɛ vɔɔn o dɛnɔɔ ho nin te.

1Tesalonikea 2:11

La sínà vɛlɛ maa mɛɛ fuɲaa tosa a cuavaa ndɔa kpeekpei yɛ naa n tosa a niaa ni.

Hebreea 2:6

Kani maa mɛɛ vanndo pum dimi yɛ aa: «Éé Hala, yɛɛ vanacieo co yɛ, mà loonun a ndu, yɛɛ o co yɛ, mà handu ndu hɔlten coo?