Yoohanee 6:63 - Anutuna Ufa

⁶³ Amaqiara qunnana amaqi fifau ainaina maridanoo sia mina naaqee qiqa maraquna fannoo kai anoona maridanoo mifa kaqi marirana nimidanoo. Qinee qeeqa dookinaa ufa qimannimimarunafa mifa maraquna maridanoo kaqi marirana anoona maridanoo.

Yoohanee 6:63 Referans Kwoze

Heeburu 4:12

Anutuna ufa sia fifau ainaina maridanoo, afu maqee marifa kasimarifa maridanoo. Aseema miqirafa kaaqa dinni dinni firaaqoo raiqarafa naundurai ateekeemarifa maridanoo. Faiqí nimana faqa maraquna faqa moodaanaki marinaki miqoo faqa fimarifa. Nimudaani aqumu faqa akikimana faqa ruqiasee miqoo faqa fimarifa maridanoo. Faiqí naunduraki faqa nimuqusaki faqa nidimarina faqa oonumafi irimariana faqa minauqa faqa qafeenoo rainee marifa maridanoo.

Karatia 5:25

Anutuna maraquna fannoo maqee oosana arasee naaru marirana qimimarifa marinara mifa kai maasa marirana nirana rakisiani.

Idi Ufa 119:93

Qinee sia ani naakapara ufa qaunuanaura. Mi ufafa marinara minannai qini kaqi marirana maa maqanasaa qimiananoo.

Yoohanee 6:68

Simoona moo auqu Peetooroofa mina iriseenoo Yisuna qimaminoo qinau. Oo karaambaiqa ani minnisee yanasaa fee atooqaanauree. Naaru marirana nimira ufa anee kai marananuananoo.

Idi Ufa 119:50

Ani qima afeekaikira ufa fannoo qini kaqimarirana qimi marinara qeeqa aupuraranaki maridaqa qifaaqa asooarana mareeqa.

1 Peetooroo 1:23

Anutuna akarakinaa ufa fannoo ooqai kaqi marufa maqee marifa naaru naaru kaqi marianinafa innee minannai kafaa oorudupi mafi kafaa fukasaa aanaaqi kammafi mariafanoo. Sia maaqoo kuqimaria nikoona faiqi namu mariafanoo, Anutuna kasimari akarakinaa ufannai naaru naaru marianinna nikoona faiqi kammafi fukasaa aanaaqi kammambi mariafanoo.

Idi Ufa 119:130

Ani naakapara ufa oosana qimannimirafa kaaqa qarana nimidanoo. Mi ufafa sia iri mariasa irirana nimidanoo.

1 Koorinti 15:45

Tamummaqara fasiqauqa akara minara maaqimminoo maridanoo. Indaaruqaa fasiqa Adamafa kasimaruna auquqoofa marinau. Qinee Pauroosa minara maaqi qidaqa. Adamana aanaaqiannaa fasiqa Yisufa maqee marirana faqa naaru marirana faqa nimimari maraqunafa maridanoo.

1 Peetooroo 3:18

Asauku mundirafa narí uqanna inniara kuqinau. Moodaa suanisaa moodaa kari kai aiqamausa mandoosanara kuqinau. Inni nisauku qumareeqeenoo Anutufinnai quqaaneera amiqirafa maasa manda fasiqa anaaseera kuqunnimaqanau.

1 Teesaroonika 2:13

Anutuna aufakiana maasasaa quqasoona inni qimannimiafaqa innee irisee umaraqau. Innee minara sia faiqí ufafee qimariqau. Anutuna ufafee qimasee umaraqau. Miquna qafamasee maasa Anutunara dufi dufi qidaqa. Kuqaa Anutuna ufa maridanoo innee mina ufa irimariasakina saikidanoo.

Yameesa 1:18

Anutufa narí iriranannai kai narí anoona ufannai kai maasa narí fukasaa aanaaqi aanaaqikiranaki quqaqiseenoo maasa narí ufini aandau aiqama ainaina uriqararausai kamafi mariaqeera auquqisanau.

Oosana 2:7

Mikari karaambaiqa Anutufa maqa qumareenoo faiqí minannoo auqinau. Auquseenoo marirana nimi maru aidoona aikaamarai fuaqasoofanoo mi fasiqafa kasirana maranau.

1 Peetooroo 3:21

Nooafa sipaki asumu mariunara maasa faqa maqee kamuqoo mina amana kai amaana nammari marasee asumu mariaqee qidaqa. Sia fifau nammari maraanannai nifaaqaindaraa qikairi rukarafa anoona maridanoo. Nammari maree mariana anoona maaqimminoo maridanoo. Aneenna aakirana amuqusa ookiqari Anutunara kuqaa qima afeekaikirafa kamasee nimirafa mifa anoona maridanoo. Mifa kai kuqaa nammari maree mariafa maridanoo. Mifa kai Yisuna kuqiranakinaana findifunannai inni asumu marirana nimidanoo.

1 Timooti 4:8

Maa maqanasaaqaraa amudaani maqee maqee afeekaikamasee amanamasee qafarana kaqikaaqoo maa maaqanasaa kai amana maridanoo aneenna aundurakinaana maqee maqee afeekaikamasee amanamasee qafarana firaaqoo amiqirafa maridanoo, mifa maqee marirana faqa naaru marirana faqa amidanoo.

Heeburu 13:9

Akaqausa Anutuna ufara oosana oosana irirana uqeeraidaqa. Innee sia misa naanna reeqa oonuree anireeaiqa. Anutuna afaariranara mi irirafa kai inni nimana mapuku nimaqainaqa mariaqa, mifa andeeqarafa amiqirafa maridanoo. Oosana oosana sandufa moo narana neeqa moo narana sia neeqa mi ufana qimaqoonannai sia inneeqa nimana mapukusee marifaranoo, mi ufana maroosa sia mi ufafa misa nimana mapuku nimaqanau, sia misa dadaaqinau minara innee Anutuna afaariranara iriaqa.

Karatia 6:15

Fainanduqira fee, sia fainanduqira fee, sia mifa anoona ainaina maridanoo. Anoona ainaina faiqí anaasee kuqaa naundurakinaafa fukaikamambinaqa andeeqasee marirafa mifamma anoona maridanoo.

Roomma 2:25

Innee Yuda maqannaasa inneeqara fainanduqirausee qidaqa miqianara Anutuna faiqi namufee qimariafanoo. Qinee Pauroosa minara maa ufana qidaqa. Innee miqi mariasa Mooseena sandufamau amiqimandee fidaqa inni fainanduqirafa amiqira ainaina mariannoo, mina ufa rukiaseeqa fifau nipata aukirafa, sia Anutuna faiqi namu mariafanoo aamina aanaamuara foora marifaranoo.

Karatia 5:6

Maasa asauku mundirana Yisuna faqa moodaanaki maridaqa Yuda maqannaasa fainanduqirana faqa sia fainanduqirana faqa miqanda fifau ainaina maridaqa. Anoona ainaina maaqimminoo maridanoo. Nariara nariara uriqarara ainainee qimasee nariara nariara amuqusirafa inni Yisunasaa rusirana akooroo imarifa mi ainainafa anoona uqanna maridanoo.

Aaquqira Ufa 4:13

Anee aamuaqira ufa rakisi qumaraa. Sia uqaa. Aneenna ufa minasaa atukarama qaina mariani ani marirafa maridanoo.

Yoohanee 5:21

Qini qikoofa kuqira fasiqauqa findifumannisaidanoo. Qinee faqa miqikai iqa qeeqa didiranannoo kai kaqi marirana akaqausa nimianaura.