Roomma 5:1 - Anutuna Ufa

¹ Maasa qeeqa irirana Anutunasaa rusiseeqa marianara doo maqee sia Anutuna aranaqaranaki aanoo iranaki maridaqa Anutufa narí andeeqaranaki quqaqisoofaqa minara doo maqee mina asooaranaki amiqiranaki maridaqa. Anutuna asauku mundirana maasa karaambaiqa Yisufa minannai kai mi asooaranaki maridaqa.

Roomma 5:1 Referans Kwoze

Roomma 15:13

Anutufa maasa innaarunaira afeesirana oosanafaqaafa maridanoo, mifa kai innee mina saqarikiranannai aiqama asasirana faqa asooarana faqa innikina qumbiqannimaqaannoo, Anutuna naaquqara andeeqara maraquna afeeka fannoo inni dadaaqinanoo innaarunaira asasammasee afeesirafa mi asasirafa qumbiqeenoo teeqiannoo.

Yoohanee 16:33

Innee qinisaa atooaqa marifandinnanannai asooaranaki marifaranoo. Maa maqanasaaqaraa irirana mareemariasa aupurarana oosana oosana nimianinnanara maa ufana qimannimidaqa. Sia rufiaqa rufiaqiaqa doo qinee maa maqanasaaqarasa doo rafaaqafuseeqa, minara kaqi paasoosiaqa.

Kooroosee 1:20

Anutufa qufanoo narí amaaku fannoo aiqama ainaina maqasaa qaraana faqa innaarunaindaraana faqa maramareenoo narí akoona aaqa munu moodaaqoo quqasoofanoo aqoondikamma nimaqanau. Narí amaaku asauku mundirafa narí fidika adioonannai asooarana quqasoofaqa moodaanaki kiqa maridaqa. Miqunara asauku mundirafa aiqama ainaina uriqararafa maridanoo.

Roomma 6:23

Dinni manda oosana fannoo narí ainainimariasa naarama quqaseenoo narí ainainirana akiaqara feefauru nimidanoo mi feefaurufa kuqirafa kai maridanoo. Kafaa mina dinni Anutuna kaqi nimira ainaina innaarunai naaru marirafa sia ainainirana akiaqara maridanoo, mina asauku mundirafa maasa karaambaiqa Yisufa mina faqa moodaanaki kiqa maridaqa mina namufaqa innaarunai naaru marirana kaqi nimirafa mariannoo.

Roomma 14:17

Anutuna ququsaki mariasa maasa nirana marirana sia narana nammarisaafau mundinoo maridanoofau. Anutuna naaquqara maraquna nimimari ainainausa andeeqarana faqa asooarana faqa asasirana faqa minamusasaa maasa marirana nirana mundinoo maridanoo. Faiqí anaasee moo fannoo asauku mundirana ainainidanoo narí akaqaafasaauqara amuqusimarifanoo dadaaqinoo rakisinanoo Anutuna amooqirafa faqa faiqí faiqi eedoo qirana faqa maraannoo.

2 Teesaroonika 3:16

Karaambaiqa narí kai naundurai asooarana oosana marifa aiqama kari oosana oosana mariranaki inni faqa naundura asooarana nimiannoo. Karaambaiqa inni aiqamausa faqa mariani.

Yoohanee 14:27

Qinee naundura asooarana inni nimidaqa. Qinee qiniki mari naundura asooarana inni nimidaqa. Maa maqanasaa mariasa sia misa naanna ramasee inni nimidau. Amiqimandee qeeqa asooarana nimianaura. Sia inni naundura rapikiani sia rufiaqa rufiaqiaqa.

Kooroosee 3:15

Innee asauku mundiranaki mariasa moodaara foora marianara nariara nariara farafara qirana minnisee asauku mundirana asooarafa inni naundurai rakisimarinaqa moodaanaki kiqa mariaqa. Innee miqiaqee qimaseenoo Anutufa inni rusandeesamumasee mareeqee asauku mundiranaki quqanau. Doo Anutunara faqa maqee maqee dufi dufi qiaqa.

Roomma 15:33

Anutufa maasa asooara oosana fannoo inni aiqama Roomma maqannaa faqa mariani. Kuqaa.

1 Teesaroonika 5:23

Anutufa maasa naundurai asooarana nimimarifa inni mariranaki naaquqara andeeqara oosana firaaqoo nimiani. Mifa kai inni aiqama marirana nipatasaa faqa nimana faqa maraquna faqa aaqarafa sia mariani anukarafa kai mari mari inanoo asauku mundirafa karaambaiqa Yisufa miqiqa marinnanaki qumuani.

Roomma 5:18

Dinni moodaa fasiqa Adamana oosana maaqimminoo maridanoo, mi moodaa fasiqana aaqaranasaa faiqí anaasee aiqamausa kuqira ufa ameemaanai maridaqa. Mina dinni miqi kai masee moo fasiqa Yisuna moodaa kari andeeqaina akiaqara kuqira ufakinaana idukueeqeenoo kaqi mariranaki quqaidanoo.

Ruka 19:42

Misa kuridifandinnanara iriseenoo ikiraqeenoo qinau, Oo Yeerusaree anee maqee asooaranaki marinna oosanara iriaqaana, doo maqee anee sia amana qafeennaranoo.

Roomma 1:7

Anutufa inni Roomma maqannaasa faqa naarameeqeenoo qini qiku qisauku kiaqeera qimaqoosa mariafaqa. Qinee Pauroosa minara iriseeqa inni akara rumannimaqaunafa maridanoo. Anutufa maasa qikoofa faqa narí asauku mundirana Yisuna maasa karaambaiqa faqa narí amiqi amiqira oosana faqa narí aundura asooarana faqa inni nimiani.

Ruka 19:38

Karaambaiqa ufara animari uriqararana Anutufa amiqi amiqi iani. Innaarunai asooarafa mariani. Anutuna amooqirafa faqa mariani.

Karatia 2:16

Sia maasa Mooseena sandufasaaqari firanannai Anutuna innaarunai firana amanaikiranaki keeqaanaura, asauku mundirana Yisunasaa rusiranannai kai Anutuna innaarunai firana amanaikiranaki keeqaanaura. Sia faiqí moo fannoo Yuda maqannaasa sandufannai Anutuna innaarunai amanaikiranaki keeqaannoo.

Yoohanee 20:31

Maa ainainnausara akara rumaseeqa inneeqa Yisunara kuqaa asauku mundira fee qimasee Anutuna amaaku fee qimasee mi iriranannai mina auqunnai innee naaru naaru marirana maraaqeera akara rumannimaqeeqa.

Roomma 10:10

Maasa qeeqa qimuqusannai Anutuna andeeqaranaki fidaqa qeeqa qifaurunnai mina kooroo iranannai Anutuna asumu mariranaki fidaqa.

Roomma 3:30

Anutufa moodaa maridanoo, moodaamau fimarifa maridanoo. Yuda maqannaasa Yisuna saqarikiranannai Anutufa mareeqeenoo narí afusaa andeeqaranaki quqannisaannoo aanaamuru faqa narí afusaa andeeqaranaki quqannisaannoo anaamuru mariasa faqa miqi kai masee Yisuna saqarikinnanannai narí andeeqaranaki quqaannoo.

Roomma 1:17

Anutufa faiqí anaasee aaqeemariasa narí namuqaaki mariasa sia naruseenoo mareeqeenoo narí aqoondikidanoo narí amiqira fasaasa ufa minara kooroo idanoo. Maasa Yisuna saqarikirana mifa kai Anutunara aqoondikirana nimidanoo. Ooqeenaa tamummaqara fasiqauqa akara minara maaqi qinoo maridanoo. Faiqí anaasee Anutuna saqarikiranannai mina aqoondikinausa misa kai naaru naaru marirana mareefaranoo.

Heeburu 13:20

Naaru naaru moodaanaki kirana Yisufa asauku mundirafa kuqiranannai mina fidikannai doo mapukuseenoo maridanoo. Anutufa mina kuqiranakinaana uqeereeqeenoo faiqí anaasee rakisirana firaanaikamaqaifanoo maridanoo. Narí kuqiranannai faiqí aanaaseesaa rakisirafa maridanoo.

Eefeesusa 2:7

Sia Anutufa fifau miqinau, narí firaa afaarirana faqa, maasa asauku mundirana Yisunaki keeqarana qafamaseenoo narí firaa aidirana amuqusirana faqa naaru kambiqainausa uqannifiqarara miqinau.

Karatia 3:25

Doo maqee Yisunasaa rusirafa ani maridanoo ooqai uqaqifiqee marufa Mooseena sandufa sia maqee rakisi nimaqaidanoo.

Roomma 10:15

Naqi fee maseenoo fee moo fannoo oonu qimannimiannoo fee moo afeeqaseeqa mina ati uaqeeifanoo amana oonu maridanoo qimannimiannoo. Tamummaqara fasiqa minara maaqi qimasee akara rumaqoofa maridanoo. Amiqira fasaasa ufa maree animariasa anirafa amiqirafa maridanoo. Tamummaqara fasiqa miqi qimaqoofa maridanoo.

Roomma 9:30

Doo minara maasa naqi fee qianauree. Maana kai qianaura. Anaamuru mariasa sia Anutuna afusaa andeeqaranaki keeqararee qidaqa sia amani mariasa doo misa narí irirana Yisunasaa rusisee minannai mina andeeqaranaki keeqafi maridaqa.

Ruka 2:14

Innaarunai sandaaqaindaraa Anutuna amooqirana amia, maqasaaqaraasakiqari Anutufa aidimarisaki naundura asooarafa misaki mariani.

Roomma 3:22

Faiqí anaasee narí Anutuna asauku mundirana saqarikiranannai Anutufa mareeqee narí afusaa andeeqaranaki quqaidanoo. Aiqamausa asauku mundirana Yisuna ufa irisee minasaa rusimariasa miqi qimariasa aiqama maqannaasa Anutufa mareeqee narí afusaa andeeqaranaki quqaidanoo sia raina rainiannoo.

Yoohanee 5:24

Yisufa Yuda maqannaa rakisirausa kaqi qimannimidanoo qinau. Qinee kuqaa anoona ufa inni qimannimidaqa faiqí moo fannoo qini ufa irisee qini diqiqamaqoona saqarikinafa mifa doo naaru mariranaki maridanoo. Miqinna fasiqafa sia Anutuna arirufaki mariannoo. Anutuna narirana doo maa maqee aiqaaqareenoo kaqi mariranaki doo keeqanoo maridanoo.

Idi Ufa 122:6

Yeerusaree maqusa asooaranaki marianifeera innaaruqiaqa. Yeerusaree maqusara rimariasa aiqama ainaina rairaa iani

Roomma 5:11

Sia mina kai, Anutufa maasa aqoondi kamma qimaqoonara irisee Anutunara dufi dufi qidaqa asasidaqa. Anutuna asauku mundirafa Yisufa maasa karaambaiqa minannai maasa Anutuna aqoondi kiqa asasidaqa.

Karatia 5:22

Anutuna maraquna fannoo sia miqi maria mandoosanakina uqannifiqaidanoo. Innee mina ufamau fifanoo inni mareeqee amiqira saqari qaqammara foora ireefaranoo. Maa amiqira oosanausa ireefaranoo, nariara nariara uriqarara ainaina maridee qimasee nariara nariara rirana faqa Anutunara asasirana faqa naunduraki asooarana faqa faiqí aanaaseera reendeenira irirana faqa amiqimandee dadaaqi mariana faqa afaarirana faqa amiqira ainaina afaarirana faqa sia minnisee firafa miqookai marida auqainna ainaina auqaida marirana faqa fisoofisoommasee ufa qirana faqa narí mandoosanara akooqamasee andeeqasee fimarina faqa Anutuna maraquna fannoo mi ainainausa kai uqannifiqaidanoo, sia moo sandufa fannoo mi amiqira ainainausara qaoo qiannoo.