Roomma 3:4 - Anutuna Ufa

⁴ Qinee Pauroosa minara maaqi qidaqa. Oo sia uqanna Anutufa mi mandoosanna maraannoo anoona ufa kai qimarifa maridanoo. Faiqí anaasee unnufa kai qimariasa kai mariafanoo sia Anutufa miqiannoo andeeqasee anoona kai qiannoo. Ooqeenaa akara Anutunara maaqi qinoo maridanoo. Ani ookinaa ufara aiqamausa anoona ufa fee qifaranoo. Misa ani ufara amanamandee irifanoo anoonaikammiannoo. Dafidina akarakinaa ufa Anutunara miqimminoo maridanoo.

Roomma 3:4 Referans Kwoze

Idi Ufa 51:4

Oo Anutu qini aaqarafa ani kai mandaikamma amaqeeqa. Ani afusaa kai maa manda oosanna auqeeqa. Oo Anutu akooqoo ani qimamidaqa. Anee qini ufa qimiannana anee kuqaa andeeqarafa mariananoo. Anee ufa qimiannanannai qini aaqarana akiiqara iananoo.

Idi Ufa 116:11

Qinee qeeqa rufiaranakiqari maridaqa maaqi qiqa. Sia faiqí faiqi moo saqariki mariafa maridanoo.

Karatia 2:17

Maasa Yuda maqannaasa Anutuna innaarunai amanaikiranaki keeqararee qimasee asauku mundiranasaa atooqafiqa quandakiqa boo aanaamuru mariasa naanna ramafiqa mandoosana maree marunausee qianauranoo. Maasa miqidaqa asauku mundira fee maasa mareeqee mandainainaki quqeenoo fee qianauree.

Heeburu 6:18

Doo minara iriseeqa qaara ainaina, afeeka ainaina innikina kaqi mariannoo sia taikaannoo. Mi ainaina qanda moo ainaina Anutuna qima afeekaikirafa maridanoo. Moo ainaina Anutuna asauku uqeerarafa maridanoo. Mi ainaina qandara Anutufa sia amana unna qirafa mariannoo. Maasa Anutuna saqarikidaqa mina asumu mariranaki mariasa Anutufa maasa aranaiqi fuki faaki qidanoo maasa daikisaa marianinna innaarunai mariranara asasidaqa afeesidaqa mariaqeera qidanoo.

Titusa 1:2

Mi kuqaa irirafa naaru naaru mariranaki fifandinnanasaa mundinoo mari irirafa maridanoo. Anutufa sia unna qimarifa anoona ufa qimarifa naaru marirana maasa qimiraree qinau. Ooqai maa maqa maaqafa sia maru kamuqoo mi kamuqoo kasooqaqee maasa qimiraree qima afeekaikinau.

Yoohanee 3:33

Mi ainainna qimannimina irisee kuqaa anoonee qimasee marainna fasiqa aanaaseesa Anutunara kuqaa fee qimariasa maridaqa.

Idi Ufa 119:160

Ani sanda ufa oosana anoona maridanoo. Marifanoo ani aiqama andeeqara rainannimaqara ufafa naaru naaru marirafa maridanoo.

Uqafiqoo Ufafa 3:7

Yisufa miqi qimasee Saradisa amaana maqa Paatoona qimamiseenoo quandaki Firadeerafia amaana maqasaa rakisimarunara Yoohaneena qimaminoo qinau. Yoohanee anee maa ufana akara rumeeqeenana Firadeerafia amaana maqasaa rakisira Paatoona maaqi qimasee amaqaa. Ooqai Dafidifa kooqi kiqa uaqeeuna qinee Yisusa maqee mina uaqeeidaqa ani qimamidaqa. Qinee naaquqara andeeqarausa kuqaa anoona oosana oosana mareemarunausa maa ufana inni qimannimidaqa. Qinee kiqannai kooqi ititasaana sia amana moo fannoo atuarana amana maridanoo, kaifaa qinee kooqi atuasaananoo moo fannoo sia amana ititaannoo.

1 Yoohanee 5:20

Maasa maanara iridaqa asauku mundirafa Anutuna amaaku uqanna maasa Anutunara iriaqeera mina irirana qiminau. Doo maqee maasa Anutuna amaaku asauku mundirana Yisunaki marianara moodaanaki kuqaa anoona Anutunaki maridee qidaqa. Miqiqa maasa anoona Anutunaki faqa anoona asumu mariranaki faqa maridaqee qidaqa.

Roomma 9:14

Miqandara irisee Anutunara naqi fee qianauree Anutunara sia andeeqee maqi qianauree. Oo sia uqanna miqi qianaura andeeqanoo marifa Anutufa maaqi qimasee Mooseena qimaminau. Qinee qeeqa iriranannai kai faiqí anaasee akaqausa narusee akaqausa nifauaanaura, qeeqa iriranannai kai akaqausara qimuqusianaqa marasee amiqi amiqianaura.

Idi Ufa 138:2

Qinee ani naaquqara amaana maqa maritinai ubeekamafi qiqoori saunu arafi ani auqu amooqianaura. Ani sia taikaaninna amuqusiranara faqa ani mapukusee marira oosana faqa marinara ani amooqianaura. Anee aneenna auqu faqa aneenna naamuaqira ufa faqa aiqama ainaina urinnaaqararana uqannifiqoonnanara ani auqu amooqianaura.

Idi Ufa 100:5

Yaaweefa andeeqarafa maridanoo, mina faiqí aanaaseera amuqusirafa naaru naaru marifa maridanoo. Mina mapukusee marira oosana naaru naaru marifa maridanoo.

1 Yoohanee 5:10

Yafa yafee Yisunara Anutuna amaaku fee qinafa narí aundurakinaafa faqa dadaaqinanoo kuqaa anoonee qiannoo. Yafa yafee Yisunara sia Anutuna faiqi fee qinafa mifa Anutunara unna qimari fasiqafee qidanoo Anutufa narí amaakuara qu ufanara unna fee qidanoo miqi qidanoo.

Karatia 2:21

Qinee Anutuna idaaqira kaqi nimirana qimifaqa sia qaoo qimasee minnisaanaura, faiqí moo fannoo Mooseena sandufasaaqari Anutuna innaarunai amanaikiranaki keeqainanara asauku mundirafa fifau kuqinau maqi qidaqa.

Roomma 6:15

Maasa sia Mooseena sandufa nimaarusira ufa ameemaanai maridaqa Anutuna mandainaina minnisara afaarirana ameemaanai maridaqara qiqa manda oosanaki kaqi qifaaqa quqasee maraanauree. Oo sia uqanna.

Roomma 3:31

Miqunannai maasa Yisuna saqarikidaqa sia minannai Mooseena sandufa mareeqee aqidaqa, sia miqidaqa maasa minannai Mooseena sandufa uqeeraidaqa mi mau fidaqa, minara mi sandufana anoona paquridaqa.

Mataioo 11:19

Qinee faiqí nimaaku anireeqa narana faqa nammari faqa naunaqa innee qiniara manda fasiqa marida, kaaqa neemarifa, kaaqa nammari neemarifa, kaaqa ummuarimaria takisa munnimma mareemariasa niqiqeemariasa aqoondiki marifa, mandoosana mareemariasa aqoondiki marifa. Innee qiniara miqi qimariafaqa qinee minara maaqi qidaqa. Yoohaneefa nammari nimimarifa faqa qinee faqa maaqanda Anutuna iriramau andeeqasee fimarunanoo mina anoona koorooidanoo. Innee maqee mariasakiqari sia inni ufa fannoo anoonaikidanoo, qaaraikammida miqimariafanoo.

Karatia 6:14

Qinee qeeqara qidaqa qinee maasa karaambaiqa, asauku mundirafa, Yisufa aunirira saqarisaa kuqunara minara kai qinee uqeerasee amooqianauranoo. Mi auniriranasaa kuqunannai maa maqa maaqanasaaqaraa ainaina kuqinoo mari ifoo qidaqa sia kasidanoo minannai faqa qinee faqa kuqiara foora qimarunausa marunanoo maa maqa maaqanakinaa mandainaina sia qini qumaraidanoo.

Roomma 11:1

Qinee Pauroosa kafaa Isaraee maqannaara iraidaqa, kuqaa fee Anutufa Isaraee maqannaasara qaoo qimasee mininnisanau. Oo sia uqanna minnisanau. Qinee Pauroosa Isaraee maqannaa faqa maridaqa qinee Abarahaamana aiku asauku marunausa maridaqa, qinee Yakooboona amaaku Beesaminna ati maridaqa marunnanara Anutufa sia narí Isaraee maqannaara qaoo qimasee minnisanau. Ooqai oosanaraseenoo maa maqa maaqanakina rusandeesamumandee maroosa mariafanoo. Ooqeenaa tamummaqarausa akarakinaana Eeriaafa Isaraee maqannaasara nifairidanoo niqidanoo afeekaikamandee Anutunara innaaru qinoo qinau.

Idi Ufa 62:9

Aiqama faiqí faiqi fifau naidoora foora maridaqa. Nuqu faqaasa faqa ooreeqarausa faqa moodaakarirausa fifau ainainara foora maridaqa. Anee misa uqaki rumaseenana sikeerasaa dirisee qafa, siara foorammiqa maridaqa. Naidoo ummaara fannoo misa ummaara uraaqaranoo maridanoo.

2 Koorinti 1:18

Anutuna afusaa marida innee iannai firara sia qaara irirafa qiniki maridanoo.

Roomma 11:11

Qinee Pauroosa Isaraee maqannaara maaqi qimasee iraidaqa, Yuda maqannaasa Yisunasaa farindamaki saamuriqa kuridiranaki taikaranaki aqufiqee iqau. Sia uqanna miqiqau. Isaraee maqannaa aaqoonara Anutuna asumu marirafa aanaamurusaa aqufinau, Yuda maqannaasa aanaamuruara rairaiqiaqeera miqinau.

Roomma 7:7

Minara maasa Mooseena sandufara mandainainafee qianauree. Oo sia miqinoo maridanoo. Mooseena sandufa innee moosa ainainara sia nimuqusianifee qidanoo sia miqinoo marinaqa qinee moosa ainainara qimuqusimarina mina aaqee unoo qunara sia irini mana mana kaimmunaiqini. Minara Mooseena sandufakinaafa doo kooroomandee mandainainara qimaqimifaqa qisauriqa.

Roomma 6:2

Oo sia uqanna maasa miqi qianaura Yisufa aunirira saqarisaa kuqinau, maasa mina faqa kuqiira foora iqa marunnanara maqee maria mandainainakiqari kuqiira foora iqa maridaqa. Naqimasee maqee mari mandainainaki fuanauree doo kuqiara foora iqa maridaqa.

Ruka 20:16

Mifa sia kaqi mariannoo oonu reenoo mi fasiqausa kuqa naruseenoo amiqira fasiqauqaindi mi ququsana nimiannoo. Faiqí anaasee mi ufana irufanoo naaquqoofaqa qiqau, oo mi mandoosannafa sia kambiqaani.

Roomma 7:13

Amiqira ainaina fannoo fee misa kuqa narinoo fee qianauree. Oo sia miqinoo maridanoo. Misa naundurakinaa mandainaina fannoo kai amiqira ainaina mara mareenoo minannai misa narinoo. Miqi mandainanoo misa naundurakinaa anoona mandainaina akooqoo kooroo ianifeera miqinoo. Doo mi mandainainafa Mooseena sandufa saaqari innooqeenoo firaanaikinoo maridanoo.

1 Koorinti 6:15

Inniqa nifaaqa asauku mundirana afaaqa atiuqa maridanoo. Amanee asauku mundirana afaaqa ati mareeqee dapi maraqa nua aanaaseena afaaqasaa quqaanauree oo sia uqanna amana miqianaura.

1 Timooti 3:16

Maasa Yisuna ufa irirana anoona ooqaindari kukeeqara ufa marifa Yisufa idaaqirafa firaafa maridanoo, sia amana moo fannoo minara qaoo qirafa. Yisufa maqasaa fasiqa nifiri kammafinoo koorooinau. Anutuna maraquna fannoo minara andeeqarafa maridanoo fee qinau. Qangiroouqa mina qafaqau. Faiqí moomoosa maaqanna maaqanna minara qimannimiqau. Maa maqa maaqanaki marusa minara kuqaammifoo qiqau. Anutufa mina mareeqeenoo innaarunai quqaqoofanoo maridanoo.