Mataioo 23:8 - Anutuna Ufa

⁸ Faiqí anaasee inniara maasa uqannifiqara fasiqa fee qifaqa qaoo qimasee qiaqa. Innisaimbaqa amanamana kai maridee qiaqa ooreeqarausa nikaqaafasaa kai maridee qiaqa. Anutufa kai innisaimbaqa uqannifiqara fasiqa maridanoo fee qiaqa.

Mataioo 23:8 Referans Kwoze

Yameesa 3:1

Qini qikaqaafasaa Yisuna ufara suqimariasakiqari innikiqari sia moomoosa ufasaa rakisirausaikiqa mariaqa. Maasa ufasaa rakisirausa afeeka ufa Anutufa kasooqaqee qimiannoo, kaqiqeesa oorudupinoo nimiannoo. Maasa aiqama aaqeemariasa maridaqa. Faiqí anaasee moo fannoo narí ookiqari sia aaqainafa doo mifa anoona paqurimaseenoo doo narí afaaqa ainaina marirana faqa andeeqasee rakisida mariannoo.

1 Peetooroo 5:3

Innee amaana maqasaa rakisimaria fasiqausa sia inneeqara uriqararausee qimasee fuki faaki qiaqa, innee fidaqa quandafi ireeda kai faiqí anaasee nifiqee andeeqaramau kai fuaqa.

Ruka 22:32

Oo Simoona qinee aniara innaaru qimaseeqa anee qini saqarikirafa sia taikaani. Anee kaqirunna oonureenana oonu quandakinana aneenna akaqaafasaauqa pooduamannisaa, qufanoo Peetooroofa qinau.

Mataioo 23:10

Inni saimbaqaki sia moonara karaambaiqee qiaqa minara minnisaaqa. Inni karaambaiqa moodaa Anutuna asauku mundirafa mifa kai maridanoo.

Mataioo 17:5

Peetooroofa kaqi qimarufanoo kaaqa qarana asuru fannoo aiqama rafaaqa finau. Ufa moo, asurukiqari Yisunara qimanniminau. Maafa qini qimaaku qini kaaqa minara qimuqusidanoo. Qini didirafa minasaa maridanoo, mina ufa iriaqa.

Uqafiqoo Ufafa 1:9

Yoohaneefa narí qafoo ainainna maaqi qimasee akara rinau. Qinee Yoohaneesa inni nifasausa nauraiqi maridaqa. Qinee innisaimbaqa Yisuna anoonufa qimannimunaqa nári unna Anutufa marifaqa kuqaa qira Anutunara nikooqaifaqa aupurarana faqa narirana faqa innisaimbaqa qimimariafaqa maraidaqa. Qinee faqa innee faqa Yisuna ququsaki marunausa maridaqa, maasa mina teeroo quqaranaki maraidaqa sia minara aupureeqa mina minniseeqa kaqi minaki doori runusee maraqa fidaqa, qinee Yoohaneesa Anutuna ufa faqa Yisuna koorooira anoonufa faqa qimannimiafannanara Roomma maqannaasa qini karabusa rumbaranaki qisoofaqa maridaqa. Ooruku nammari qambaana Patamoosa afumaki Roomma maqannaa karabusaki mariafananoo Yisufa oosana oosana ainaina kambiqaaninnanara qimaqiminau.

Uqafiqoo Ufafa 22:9

Oo sia miqia Anutuna kai amooqia. Qinee ani faqa moodaa ainaini marunausa maridaqa ani afasausa tamummaqara fasiqauqa faqa moodaa ainaini marunausa maridaqa. Maa papiqanakinaa ufamau fimariasa misa faqa moodaa ainaini marunausa maridaqa. Sia qini qimooqia Anutuna kai amooqia.

Uqafiqoo Ufafa 19:10

Miqi qimasoofaqa qini daaquqoofaqa mi qangiroona aikuki doorindari aqufumafi amooqianeeriafananoo mifa qaoo qimaseenoo qinau. Oo anee sia miqia. Aiqama Yisufa kooroo ira anoona ufa qumaree mariasa ani faqa ani akaqaafasaauqa faqa moodaa ainainimarunausa maridaqara anee sia qini qimooqia Anutuna kai amooqia. Yisufa narí maru aukuana narí anoona ufa koorooinau. Mi ufafa kai Yisufa sia kambiqoo aukuana tamummaqara fasiqauqa naakufufaqa qimannimufaqa akara riqau.

Eefeesusa 3:15

Innaarunai mariasa faqa maqasaa mariasa faqa aiqamatia Anutunasaaqaraana nariqa nuqu uqanna maraidaqa.

2 Koorinti 4:5

Maasa namu sia qeeqara qidaqa faiqí anaasee qimannimidaqa, maasa asauku mundirana karaambaiqa Yisuna minara kai kooroomannimidaqa. Maasa namu Yisuna auqu uqeeraidaqa Yisunara inni qimannimidaqa inniki rumbara fasiqara foora ainaina mannisaidaqa.

2 Koorinti 1:24

Maasa sia inniara miqimmasee maaqimmasee qiaqee qidaqa doo innee mapukusee Yisuna saqarikiranaki mariafanoo, innee sia nisaurirana maraaqeera asasiranaki mariaqeera dadaaqidaqa.

Mataioo 26:49

Doo maqeeufanoo Yisufuqoo oonu reenoo oo qini qafee faqaafee qimaseenoo Yudasifa Yisuna amooqanau.

Mataioo 10:25

Faiqí qinee uriqararausa ufa qimannimi marunausa daruseeqa miqi kaimmiqa qini faiqi namu qini ureeqarausa inni narifaranoo. Faiqí misa rakisirana arusee mina faiqi namufaqa miqi kai iqa narifara. Misa nikoonara afaannee qimasee faiqi namuara faqa miqi kai iqa afaannee qifaranoo. Misa mi manda ainainna oosana oosana qini qimifara, miqi kai iqa inni faqa nimifaranoo.

Mataioo 23:7

Faiqí anaasee suqidaqa makeeti marunakina narí anufaqa uqeera qafeeqa, Oo maasa faiqí firaafa anee fee anidanee miqi qufanoo narí fifau sumoo summidanoo. Misa aatata fidaqa maqusa maqusa nimarufaqa faiqí misa nindafeeqa, oo maasa ufasaa rakisirafa misa miqi qunara kaaqa nidufaqa asasammidaqa. Misa iandee innee sia miqi iaqa.

Mataioo 26:25

Miqi qimasoofanoo Yudasifa Yisunara irammirinoo qinau. Oo qini qafee faqaafa qiniaree ueeqee maqi qidanee qimasoofanoo Yisufa qinau. Aneenna kai qiananoo.

Mareekoo 9:5

Nindafaidaqa firaaqoo maparaaida rufiaidaqa ufa qiranara randee marufanoo Peetooroofa Yisuna aaramaseenoo qinau Oo ufasaa rakisira maasa maaqoo marunanoo amiqimminoo amanee maasa maaqoo uqiqaana maqa qaaramoo auquanauree, aniara moo Mooseenara moo Eerianara moo usakaanauree. Rufiaqa rufiaqidanoo ufa qiranara randoosia miqi qinau. Miqi qimasoofanoo asuru fannoo anireenoo aiqama misa dukunimaqasoofanoo asurukiqari ufa moo kambiqeenoo maaqi qinau. Maafa qini qimuqusira qimaaku marifa, innee mina ufa kai iriaqa.

Mareekoo 10:51

Oonuroofanoo Yisufa irammirinoo qinau. Anee qiniara naqimaqisaanifee fee q inanee qufanoo afu qimbarafa qinau. Oo ufasaa rakisirafa anee kaifaa qifu maqa qisaanneera qidaqa qufanoo Yisufa qimaminoo qinau. Doo fua ani aundura qinisaa rusirafa doo ani andeeqamaqanoo maridanoo. Miqi qufanoo doo aaqee uqanna mi fasiqana afu qimbarafa maqafufanoo doo Yisuna faqa aanai finau.

Mareekoo 11:21

Peetooroofa mina qafamasee tautumasee Yisufa mi saqarina aqunara iriseenoo Yisuna aaramaseenoo qimaminoo qinau. Oo ufasaa rakisirafa anee qafaa anee aqisaananoo doo kuqinoo marinoo qufanoo Yisufa narí faiqi namu qimanniminoo qinau.

Mareekoo 14:45

Yudasifa anireenoo Yisufinnai oonureenoo oo ufasaa rakisira fee qimasee amooqanau.

Yoohanee 1:38

Afaqee fimarufanoo Yisufa quandafi nindafeenoo qinau. Inneeqara nanaree qini qifaqee anidee qufaqa miqanda qiqau. Ufasaa rakisira anee yai fee maridanee.

Yoohanee 1:49

Natanaeerafa iriseenoo tautumakufanoo qinau. Ufasaa rakisirafa anee Anutuna amaaku marianafa. Anee Isaraee maqannaa karaambaiqa marianafa mariananoo.

Yoohanee 3:2

Mi fasiqafa moo eenda asukunaki kukeeqakufanoo Yisufa maruqoo anireenoo qimaminoo qinau. Oo ufasaa rakisirafa anee Anutufinaindari anianafa ufasaa rakisirafa marianaqa maasa minara iridaqa. Sia fifau fasiqa narikai qinanoo faiqí teeroo ainaina aaqee taikaannoo, anee ianandee qiananoo taikaannoo. Anutufinaindari anianafa mariannanara mi afeeka ainaina auqimarianaqa maasa iridaqa. Anee nanufa fee maasa qimaqiminnaree.

Yoohanee 3:26

Miqidaqa Yoohanee funnai oonuree qimamiqa qiqau. Oo ufasaa rakisirafa. Ooqai anee Yooradanna nammari dinni afainni qimannimuna fasiqafa Yisufa doo Yeerusareendari qumureenoo faiqí anaasee nammari auqamannimaqee marifaqa minni faiqí anaasee moomoo fidaqa.

Yoohanee 4:31

Mi anaaseefa maqusai oorufufaqa Yisuna faiqi namu Yisuna qimamiqau ufasaa rakisira doo narana naa qufanoo mifa nariqa qimanniminau. Qini narana moo maridanoo innee minara sia irimariafanoo.

Yoohanee 6:25

Misa Kariree nammari fitaqee muqu afainai oonureeqa Yisuna paqurimasee maaqi qiqau. Oo ufasaa rakisirafa anee yairee fee mai anireenee.

Yoohanee 9:2

Yisuna faiqinamu mi afu qimbarana qafamasee Yisuna irammiriqa qiqau. Oo ufasaa rakisirafa maa fasiqafa yana mandainainasaa fee maaqinoo afu dimbanoo maridanoo fee. Narí akoona anoona mandainainasaa fee narindisaa fee miqinoo maridanoo fee.

Yoohanee 11:8

Miqi qufaqa misa tautumandee maaqi qiqau, Oo ufasaa rakisirafa innau kai Yuda maqannaa uriqararausa oonisamu ani arirara qufana kafaa fee miqoo fidanee.

Yoohanee 20:16

Yisufa mina iriseenoo mina auqu ramaseenoo qinau, Maria, qufanoo Mariana amarafa tautumma quandaki qafeenoo Oo ufasaa rakisirafee qinau. Eeburu maqannaasa ufakiqari qinau, Rabooni, maasa ufakiqari ufasaa rakisira fee qinau.

Firemoona 1:16

Sia maaqooqari fifau ainainiranaki marifa mariannoo maasa qifaaqasaa qikaqa qimuqusimarifa asauku mundiranaki marifa mariannoo. Qinee minara uriqarara ainaina firaafee qidaqa. Doo maqee ani ainainirana faqa ani karaambaiqaki mari akaqaafasaafa faqa marinara ani uriqarara ainaina firaa ainaina mariannoo.