Heeburu 9:15 - Anutuna Ufa

¹⁵ Miqimandaifanoo asauku mundirafa Anutufa faqa faiqí faqa moodaanaki kira ufa fuka ufa qima andeeqeeqeenoo quqaidanoo. Anutufa nuqu rainausa misa aniree maraaqeera. Naaru naaru afeedimari amiqira qumiasana saqama ainainara kasooqaqee innaarunai maraaqeera qidanoo. Indaaruqaa moodaanaki kira aukuana sia amana mi amiqira afeedira qumiasana saqamana maree mariqau. Misa mi aukuanna kaqi nári mandainaina fannoo faiqí nifaaqa rumbanoo marinau. Maqee asauku mundirana kuqirafa doo mi rumbarana nimirara idukinau.

Heeburu 9:15 Referans Kwoze

Roomma 8:30

Anutufa narí maraqoosa naaramasoofaqa aniroofanoo mareeqeenoo narí mariranaki quqanau. Anutufa sia fifau naarama quqanau, naaramasee narí afusaa andeeqaranaki quqanau, minaki quqaseenoo innaarunai kaaqa areenarana faqa naida niminau.

Roomma 8:28

Maasa maa iriranna iridaqa faiqí faiqikinaana narí asumu mariaqeera qimasee narí rusandeesamumandee maroosa Anutunara nidimarisara Anutufa misasaa rakisidanoo oosana oosana ummaara mandainainna misasaa quqeemarina misa dadaaqida fee qidanoo misasaa quqaidanoo.

Heeburu 9:12

Asauku mundirafa innaruna kooqi maqaki ooru keeqakufanoo firaaqoo naaquqaranaki ooru keeqafinoo sia mimmi fidikafau burimakau aanaaqi fidikafau mandainaina akiaqara Anutuna amisee keeqanau. Narí kai narí fidika qumareenoo miqoo Anutufa maruqoo maasara aranaqarafa taikaanifeera amiseenoo minannai kai naaru asumu marirana maasa qimiannee qimasee maranau.

1 Timooti 2:5

Moodaa Anutufa kai maridanoo moodaa fannoo kai narí Anutuna faqa faiqí anaasee faqa mara moodaanakikamma nimaqaidanoo. Mi fasiqafa Anutuna asauku mundirafa Yisufa maridanoo faiqí anaasee oonu kafaa marasee nariki quqaanifeera narí afaaqa kuqiranaki quqanau. Maasa mina qafamaseeqa maaqi qidaqa. Oo Anutuna narí aukuana maridanoo. Oo mifa kuqaa aiqama fasiqa aanaaseera asumu mariranaki mariaqeera miqidanoo.

Heeburu 12:24

Ooqai Kainafa narí akaqa Abeerana arufanoo mina fidika teeqinau. Abeerana fidika fannoo Anutunara qini fidika akiaqara anee qiannee qidanoo. Maqee innee Yisuna fidika Abeerana ooriqararana teeqiraqoo ani mariafanoo. Yisuna fidika fannoo Anutunara maasa numoo akiaqara minniqisaannee qidanoo uriqaranoo maridanoo. Innee maqee fuka moodaanaki kira ufa quqee marianaki Yisunaki ani mariafanoo.

Heeburu 7:22

Mi qima afeekaikira ufafa Yisuna mareeqeenoo sia ooqeenaa Anutuna faqa faiqí faqa moodaanaki qima afeekaikiranaki quqanau, aaduma uriqarara moodaanakikira ufa rakisirafaikamambi marinau.

1 Peetooroo 3:18

Asauku mundirafa narí uqanna inniara kuqinau. Moodaa suanisaa moodaa kari kai aiqamausa mandoosanara kuqinau. Inni nisauku qumareeqeenoo Anutufinnai quqaaneera amiqirafa maasa manda fasiqa anaaseera kuqunnimaqanau.

Heeburu 13:20

Naaru naaru moodaanaki kirana Yisufa asauku mundirafa kuqiranannai mina fidikannai doo mapukuseenoo maridanoo. Anutufa mina kuqiranakinaana uqeereeqeenoo faiqí anaasee rakisirana firaanaikamaqaifanoo maridanoo. Narí kuqiranannai faiqí aanaaseesaa rakisirafa maridanoo.

Roomma 5:6

Ooqai maasa Anutuna andeeqaranara sia amanaikiqa oorudupiqa mariafananoo Anutuna andeeqara aukuanasaa Yisufa maasa mandoosana maree mariafanausara maasara kuqunnimaqanau.

Heeburu 9:28

Yisufa mi mau kai finoo moomoosa numoo maraqunnisaanifeera narí afaaqa tatufirafara foora moodaannai Anutuna aru aminau. Mifa kafaa koorooiannoo. Sia kafaa numoo undarau qumuannoofau. Narí afeesara mariasara qumuree mareeqee asumu mariranaki quqannisarara qumuannoo.

Heeburu 6:13

Ooqai Anutufa Abarahaamanasaa qima afeekaikammaqoona asauku uqeeraseenoo kuqaa miqianauree qimaqoona. Sia mina uriqararafa marunara narí asauku uqeeraseenoo yana auqu fee raanauree qusia narí auqu kai ramafeekaikinau.

Heeburu 3:1

Qini qikaqaafasaa innisaimbaqa Karaambaiqa aiku oosana marunausa maridaqa innee faqa qinee faqa Anutufa daarama quqasaifaqa ani mariasa maridaqa. Innee Yisuna qafaaqa qafaidaqa oonumafi iriaqa Anutufa aqiqamaqoofa maridanoo. Maasa qimarunna amaana ufana aanaiqikira uriqararafa marianifeera aqiqamaqoofa maridanoo.

Heeburu 2:14

Yisufa maqasaa fasiqa anaaseera narí faiqi aanaaqi fee qidanoo. Mi faiqi anaaqisa nimaqi faqaasa fidika faqaasa maa maqanasaaqaraasara Yisufa qidanoo. Yisufa narí uqanna qumureenoo faiqi aanaaqi Mariana aranandaki maasa faiqí faiqi fidika qimaqi mareenoo innooqanau. Mifa sia fifaufau miqinau. Narí kuqiranannai kuqirana rakisirana Sadannana rafaaqafuanifeera maasa qimaqi faqa fidika faqa maranau.

Uqafiqoo Ufafa 5:9

Misa fuka idi maaqi qimasee raqau. Oo Yisufa sia moo fannoo amanaikiannoo anee aneenna andeeqaranannai kai aneenna akoona asaukukinaana papiqa marasee idukinnaranoo. Misa ani arusoofana aneenna kuqiranannai faiqí feefaurummeeqeenana Anutuna asaukuki quqanau.

Heeburu 8:13

Anutufa mi fuka moodaanaki kiranara qidanoo indaaruqaanara ooqeenaa fee qidanoo. Ooqeenaa ainaina minnisaifa doo afauqaqeenoo qusasaa taikafuannoo.

Titusa 3:7

Miqunara Yisuna afaariranannai kai maasa Anutuna afusaa andeeqarausaikiqa maridaqa naaru naaru marirana maraidaqa, asasidaqa afeesidaqa maridaqa.

Titusa 1:2

Mi kuqaa irirafa naaru naaru mariranaki fifandinnanasaa mundinoo mari irirafa maridanoo. Anutufa sia unna qimarifa anoona ufa qimarifa naaru marirana maasa qimiraree qinau. Ooqai maa maqa maaqafa sia maru kamuqoo mi kamuqoo kasooqaqee maasa qimiraree qima afeekaikinau.

2 Timooti 2:10

Qinee minara iriseeqa, Anutufa rusandeesamumasee mareefandinna fasiqa anaaseesara irisee misa Yisunara iriaqeera oosana oosana mandainaina aiqama ainaina maraidaqa. Misa faqa asumu mariaqeera faqa naaru areenarana maraaqeera faqa mandainaina kaqi qeeqa qipatasaa maraidaqa. Mi asumu marirana faqa naaru areenarana faqa asauku mundirana Yisunaki kai maridanoo.

Yoohanee 10:28

Qinee naaru naaru marirana nimidaqa sia kuqifaranoo. Sia amana moo fannoo qini qisaukukinaana rafieefaranoo.

Mataioo 19:29

Yafee moo fannoo qini duquara iriseenoo narí maaqa faqa narí akaqaafasaauqa faqa narí asooqmaaka faqa narí anoona akoona faqa narí faiqi faqa narí saqamainaina faqa aiqama minnisainaqa sia mina akiaqara kai amianaura. Fifau faqa amianaura innaarunai naaruara marirana faqa amianaura.

1 Yoohanee 2:25

Marifanoo asauku mundirafa narí uqanna moo ainaina maa ainainna naaru marirana qimiraree qinau.

1 Peetooroo 5:10

Innee maaqoo maqasaa maridaqa kaqikaaqoo nidafirafa mariannoo. Marifanoo kaqi afaarirana akoofa Anutufa inni naaraidanoo narí naaru naaru kaaqa areenarana asauku mundirana namufaqa narí namufaqa inni nimiannoo. Innee maaqoo marifanoo mifa kai inni anoonaikama nimaqaannoo mifa kai naunduraki mapukirana nimiseenoo afeeka faqa afeeka maaqa atuna fooqaana nimiannoo.

Yameesa 1:12

Faiqí akaqausa nimanamasee qafee mari ainainafa kisaaqasaa narimarifaqa Anutuna faqa kaqikai fidaqa miqimaria fasiqa anaaseesa amiqiranaki mariasa mariadaqa. Miqinna fasiqa anaaseesa mi nimanirana taikasaifanoo Anutufa ooqai qima afeekaikira feefauru naaru marirana nimiannoo narí Anutunara rimariasa kai nimiannoo.

Heeburu 11:13

Abarahaamafa narí faiqi namu moomoosa faqa Anutuna mandaaqaranaki mariufaqa kuqiqau. Misa sia Anutuna qima afeekaikirana anoona qafaqau. Nianaindariara foora naaqoo kai irisee asasammasee kasooqaqee kuqiqau. Nariaraa oo maasa maa maqanasaa aanaamuruara foora iqa mariafaqa asaqiraafaikiqa maridaqee qiqau.

2 Teesaroonika 2:14

Sia fifau inni mareenoo maasa amiqira fasaasa ufa inni qimannimiafannana minannai innee Anutuna asauku mundirana karaambaiqa Yisuna areenarana raina nimiraree qimaseenoo inni maranau.

Roomma 6:23

Dinni manda oosana fannoo narí ainainimariasa naarama quqaseenoo narí ainainirana akiaqara feefauru nimidanoo mi feefaurufa kuqirafa kai maridanoo. Kafaa mina dinni Anutuna kaqi nimira ainaina innaarunai naaru marirafa sia ainainirana akiaqara maridanoo, mina asauku mundirafa maasa karaambaiqa Yisufa mina faqa moodaanaki kiqa maridaqa mina namufaqa innaarunai naaru marirana kaqi nimirafa mariannoo.

Heeburu 9:16

Faiqí moo fannoo afaaqooqa qinafa faiqí mifa kuqinanoo mina afaaqooqa qirafa anoona kooroo iannoo.

2 Koorinti 3:6

Mifa mi ainainirana amanaikirana qimifaqa kai narí fuka moodaanaki kira ufa mi saikanaki maridaqa. Mina fuka moodaanaki kira ufa sia nimaarusira ufa akara riranasaa mundinoo maridanoo. Anutuna naaquqara andeeqara maraquna faiqí naunduraki marina minasaa mundinoo maridanoo. Mooseena sandufa akararufa mifa kuqirana kai nimidanoo, Anutuna maraquna fannoo kaqi marirana nimidanoo.

Roomma 9:24

Doo maasa daaree mariasa doo misa kai doo maa maridaqa sia Yuda maqannaasakiqari kaifau, aanaamurukiqari faqa Anutufa daaree marisa maridaqa.

Roomma 5:10

Maasa Anutuna namuqaa marufanoo mifa narí amaaku maasa mandainaina arirana maroonara iriseenoo mina kuqiranannai aqoondi kamma quqaqisaifaqa maridaqa. Asauku mundirafa kuqunannai Anutuna aqoondi kamambi maridaqa kafaa Yisuna kaqi mariranannai mifa taikara aukuana Anutuna aranaqaranakinaana kuqaa uqanna maasa mina aqoondiuqa mareeqee asumu mariranaki quqaqisaannoo.

Roomma 5:8

Yisufa sia maasara amiqirausee qimaseenoo maasa qimaaqa maqaseenoo kuqinau. Maasa qeeqa mandainainaki kaqi mariafananoo asauku mundirafa maasara kuqunnimaqanau. Miqunannai Anutufa narí kaaqa maasara amuqisirana aidirana kooroomaseenoo maasa uqaqifiqanau.

Ruka 18:18

Moo kari Yuda maqannaasa uriqararausakiqari moo fannoo Yisuna irammirinoo qinau, Oo ufasaa rakisirafa andeeqarafa nana saikee auqamamaqaananoo fee Anutufa naaru naaru marirana qimiannoo fee qufanoo Yisufa qinau, anee nanaree qiniara andeeqara fee qidanee sia moo fannoo andeeqarafa maridanoo Anutufa kai andeeqarafa maridanoo.

Mareekoo 10:17

Yisufa moosaa fidanoo aanai fimarufanoo faiqí moo fannoo afaqanoo fifiufanoo aanai oonu Yisuna paqurimandeenoo mina oorinni oonu aqoori saunara fufanoo qimaminau Oo amiqira andeeqara ufasaa rakisirafa nana kadaapi fee Anutuna rumamaqaananoo fee naaru marirana qimiannoo fee.

Mataioo 25:36

Qinee kaqisamu mariafana innee qamunna qimusa mariafanoo. Qinee aurimariafana innee aniree qini qiqafee sukudaakutiqa, qimudaoo qimaqimaqeeusa mariafanoo. Qinee karafusaki mariafana innee qini undara anireeqa aiaaee qimaqimaqoosa mariafanoo. Qinee minara iriseeqa inniara Anutuna amiqira ququsaki fuaqee qidaqa.

Mataioo 25:34

Rainannimaqaseeqa qinee firaa karaambaiqa quandafinaqa qisauku uqannaindaraasa maaqi qimasee qimannimianaura. Qini qikoona amaakummara mariasa aniaqa anireeqa aiqaree mina amiqira ququsaki keeqafi mariaqa. Ooqai maa maqa maaqafa sia marufanoo mi ququsana inniara quqaqoofa maridanoo.

Idi Ufa 37:18

Yaaweena ufa mau fimariasa Yaaweefa misa marirana niranasaa rakisidanoo. Maa maqa maaqafa misaindikinoo naaruara mariannoo.

Eefeesusa 1:7

Anutufa narí asauku mundirana kuqiranannai maasa mandainainakinaana idukuqiseenoo maasa mandoosana akiaqara minniqisainaqa marianaura. Maasa minara irisee Anutuna firaa afaariranara akooqoo uqanna marifaqa qafamasee irisee naqimasee maraanauree minara rufiaida furufaridaqa.

Mataioo 22:3

Suqaseenoo narí faiqi namu niqiqeenoo qinau. Maqusa maqusa fifainiqa eenda qimannimunausa nifiqee minisaifaqa narana naaqa. Qimasoofaqa fifainiqau. Faiqí oonu naaramasoofaqa misa qaoo qimasee minnisaqau.

Ruka 22:20

Namasoofanoo Yisufa miqi kai inoo uainna adiara nafisa maraseenoo narí faiqi namu nimiseenoo qinau. Maa nafisanakinaa nammari qini fidika maridanoo. Anutufa inniara noori runiranaki marunara narí fuka moodaanaki kira ufa quqaidanoo, qini fidika inni adiannimaqaranaki maridanoo.

Karatia 3:20

Anutufa sandufa quqeemarufa faqa faiqí anaasee mi ufamau fimariasa faqa marianara aanaiqikirafa Mooseefa mina qambaana maridanoo. Abarahaamana qima afeekaikirana amuaukuanafa sia miqinoo maridanoo. Abarahaamafa sandufamau firafa sia marunara aanaiqikirafa faqa sia marinau. Anutufa naríara qima afeekaikira ufannoo Abarahaamana qimaminau. Maasa minara uriqarara oosanee qidaqa.

Heeburu 6:15

Anutufa miqi qimasoofanoo Abarahaamafa mi ufana anoonara kisaaqasaa reendeenamasee afeesida marufanoo kasooqaqee uqanna Anutufa qimamu ainainafa koorooinau.

Heeburu 10:34

Innee karabusaki mariasa dadaaqidaqa narana munu nimiranannai misa aupurarana inne faqa maree mariafanoo. Faiqí anaasee aniree aanoomasee inni maaqakinaa ainaina aiqama animaree fifuafaqa sia innee minara noori runuafanoo, innee asasa kai mandee mariafanoo. Innee inneeqa maa maqanasaaqaraa qumiasanara fifau oorudupira ainainee qimasee innaarunai uriqarara naaru marira ainainara maridanoo fee qimasee sia ikiraqaafanoo, innee asasimariafanoo.