Heeburu 8:10 - Anutuna Ufa

¹⁰ Doo maqee ooqeenaa moodaanaki kira ufa minnisee Isaraee maqanna faqa fuka moodaanaki kira ufa maaqi qimasee quqaidaqa. Qini fuka moodaanaki kira ufa maaqimminoo maridanoo. Qinee karaambaiqa qidaqa. Qinee qusasaa qeeqa sandufa misa nitikuraki quqaanaura, quqaseeqa misa nimuqusasaa akara rumaqaanaqa sia aunuaqeera. Qinee misa Anutusa marianaura misa qini faiqi namu marifaranoo.

Heeburu 8:10 Referans Kwoze

2 Koorinti 3:3

Asauku mundirafa narí uqanna mi pasana akara ruumbeeqee maasa qisaukuki quqasaifaqa inni nimiqa. Sia Mooseefa maru kamuqoo iundee kai idaqa sia kirifinnai oonisaa akara rinoo maridanoo. Kaqi marira Anutufa narí maraqunannai faiqí faiqi maasa qimuqusasaa akara rinoo maridanoo.

1 Peetooroo 2:9

Innee sia miqi mariasa mariafanoo. Innee Anutufa rusandeesamumasee maree marisa mariafanoo. Innee karaambaiqa Anutuna uriqararana aanaiqiki mariasa. Innee naaduma kaaqa andeeqara maqannaa mariafanoo. Innee Anutuna narí maqannaasa mariafanoo. Mifa inni asukunakinaana naaramasee mareeqee narí idaaqira kaaqa qara andeeqaranaki inni quqasaifaqa mariafanoo. Sia fifau minaki mara quqeenoo innee Anutuna idaaqira afeeka ainaina imarianara aiqamausa nifusaa koorooiaqee qimaseenoo inni mara narí kaaqa qara andeeqaranaki quqaidanoo.

Roomma 11:27

Mikari qinee Anutusa Yuda maqannaasa aaqarana akiaqara mara aqunniseeqa qinee Anutusa qeeqa moodaanakikirafa ufa Abarahaamana faqa Isakeena faqa Yakooboona faqa ufa qiafannana mikari mi ufana anoona doo anoonaikiannoo. Tamummaqarausa ufa miqinoo marinara qinee Pauroosa maaqi qidaqa.

Yameesa 1:21

Innee inneeqa aiqama manda kudimakira oosana faqa manda nira oosana faqa fatika aqusee mariaqa. Innee inneeqa afeeka minnisee Anutuna aramandunnai madoodoonaqa mariaqa, maridaqa Anutufa narí ufa inni nimuqusaki quqeemarina maraaqa. Mi ufananoo inni asumu maraannoo.

Titusa 2:14

Mifa maasa kuqirana nariara maraseenoo maasa sia maraaqeera maasa kuqiranaki mifa keeqanau. Sia fifaufau kuqinau. Maasa qeeqa mandainainakinaana mareeqeenoo maqee kamuqoo narí kaaqa qara andeeqara fasiqa anaasee kammannimaqaaneera kuqinau. Maasa minaindikuqanna iaqeera, maqee maria kamuqoo amiqira ainaina kai maasa aruqarara rimariasaikamma fuaqeera kuqinau.

1 Peetooroo 1:23

Anutuna akarakinaa ufa fannoo ooqai kaqi marufa maqee marifa naaru naaru kaqi marianinafa innee minannai kafaa oorudupi mafi kafaa fukasaa aanaaqi kammafi mariafanoo. Sia maaqoo kuqimaria nikoona faiqi namu mariafanoo, Anutuna kasimari akarakinaa ufannai naaru naaru marianinna nikoona faiqi kammafi fukasaa aanaaqi kammambi mariafanoo.

Yameesa 1:18

Anutufa narí iriranannai kai narí anoona ufannai kai maasa narí fukasaa aanaaqi aanaaqikiranaki quqaqiseenoo maasa narí ufini aandau aiqama ainaina uriqararausai kamafi mariaqeera auquqisanau.

Mataioo 22:32

Mifa kuqufusa findifi mina faqa marianara maaqi qinau. Qinee Abarahaana faqa Isakeena faqa Yakooboona faqa misa Anutusa qinee marunausa maridaqa. Anutufa sia ooqai misa maaqoo maru kamuqoo misa Anutusa mariafannaqee qinau. Ooqai kuqufusa doo findifiqa Anutuna faqa maqee marianara mi ufana misa Anutusa marunausa maridaqee qinau. Minara Abarahaana faqa Isakeena faqa Yakooboona faqa sia misara kuqiqa mariaafoo qiaqa. Kaqi Anutuna faqa innaarunai maridammiafoo qiaqa. Anutufa sia kuqirausa Anutufa maridanoo. Kaqi mariasa misa Anutufa maridanoo. Innee minara sia fee asaana rumasee irida fee.

Heeburu 11:16

Misa uriqarara maqara innaarunai maqara randaidaqa ani asaqiraafaira foora maridaqa. Miqi marunara maasa Anutu fee qimasoofanoo sia mifa asaurinau. Faasai innaaruna maqusa miqimariana akiaqara nimirara deedaqinoo maridanoo.

Rafudoo Akarafa 34:27

Yaaweefa mi ufanara Mooseena qimaminoo qinau. Anee aiqama maa ufausa akara rua. Maa ufausa qinee ani faqa Isaraee maqannaasa faqa moodaanaki qima afeekai kamma qaunna ufana oosana maridanoo.

Rafudoo Akarafa 24:4

Miqi qimasoofanoo Mooseefa Yaaweena sandaufa aiqama akara rinau. Akara rumaseenoo kananaana iaqoofanoo aaqana aikunni aandau tutufira qainda auqinau. Auquseenoo ooni qisaukuqara taikasee qikunni ooqu qaara marasee 12 ooni maraseenoo qainda fiqu fiqumma Isaraeena faiqi namu nimana kai rakiqanau.

Rafudoo Akarafa 24:7

Rurufa maseenoo Akiiseenoo Mooseefa Anutufa moodaanaki kira ufa qimaqoo bukana akara rumaqoona maree findifinoo aiqama minakinaa ufa asaana rumasee firaaqoo faiqí anaasee qimanniminau. Misa iriseeqa qiqau. Maasa Yaaweena mi sandaufana aiqama irisee afaqaanaura.

Rafudoo Akarafa 34:1

Yaaweefa Mooseena qimaminoo qinau. Moosee anee maa aaqannasaaqari ooquree ooni ausiqara ateekasee maree urua. Anee indaaruqaa qanda amana kai ateekasee maree urua. Murusainaqa indaaru rukamunnanasaa akara ruafannufana kafaa akara ruanaura.

1 Koorinti 6:16

Faiqí moo fannoo narí afaaqa mareenoo dapi maraqa nua anaasee finnai finanoo mi fasiqana afaaqa fannoo mi anaaseena afaaqandiri moodaanaki atooqafuannoo. Oo innee sia minara irimariafanoo. Ooqeenaa akara minara maaqi qimasee akooqoo qidanoo Miqanda moodaa nifaaqaikamambi maruqanda marifaranoo.