Firipi 1:10 - Anutuna Ufa

^10-11 Anutufa miqinoo inni dadaaqinaqa asauku mundirafa qumira faasaanasaa innee ikairi siaisa, ufa siaisa maridaqa asauku mundirafa nimira amiqira anoonaikira marirafa inniki marifanoo aiqamausa mina qafammasee Anutunara dufi dufi qimasee amooqifaranoo.

Firipi 1:10 Referans Kwoze

Roomma 12:2

Minara irisee maaqimmiaqa sia maa maqa maaqanasaa mariasa naanna raaqa. Innee eedoo qifanoo Anutufa inni nitikura amiqimmasee firaaqoo quandanniseenoo naunduraki nirana faqa quandannisaannoo. Innee miqimmaseeqa Anutuna irirana faqa Anutuna aidirana faqa amiqiranee qimariana faqa idaaqiranee qimariana faqa amiqimandee irifaranoo.

1 Teesaroonika 3:13

Miqifanoo Anutufa inni nimuqusa mapukusee afeekaikamma nimiannoo. Innisaimbaqa karaambaiqa Yisufa narí aiku asauku faqa kafaa qumureenoo inni mareeqeenoo andeeqarausa naaquqarausaikama nisainaqa maasa qikoona Anutuna afusaa kikiqifaranoo.

1 Teesaroonika 5:23

Anutufa maasa naundurai asooarana nimimarifa inni mariranaki naaquqara andeeqara oosana firaaqoo nimiani. Mifa kai inni aiqama marirana nipatasaa faqa nimana faqa maraquna faqa aaqarafa sia mariani anukarafa kai mari mari inanoo asauku mundirafa karaambaiqa Yisufa miqiqa marinnanaki qumuani.

Eefeesusa 5:10

Innee karaambaiqa aidi mari mariranara randasee maraaqa.

1 Yoohanee 4:1

Qini qifaaqasaa qiqoondiuqa. Moomoosa náriara Anutuna maraquna maasaki marisee qimariana sia mina irisee aiqamausara kuqaammifoo qiaqa. Innee misa nimanamasee qafaaqa kuqaa Anutuna maraquna fee moona maraquna fee misaki maridanoo fee. Unna qimaria tamummaqarausa aiqamai daraanammiqa marianara qimannimidaqa.

Firipi 1:6

Qinee maa ainainnara amiqimasee iridaqa Anutufa inniki amiqira saika uqeeroofa kaqi inniki mi saikana kai uqeeranoo fifi inoo taikara aukuana asauku mundirafa Yisufa quminna faasaanna miqoo kai taikaannoo.

1 Teesaroonika 5:21

Innee aiqama amaana ufa sia kaqi iriaqa aiqama ufa aiquqummasee iriseeqa anoona ufa kai iriaqa.

1 Koorinti 1:8

Anutufa maa mariaqooqari amiqimmandee rakisinoo fifi inaqa sia kasaaqai kuridifaranoo taikara aukuana andeeqasee paqurifaranoo. Miqunara mikari maasa karaambaiqa asauku mundirana Yisufa qumira faasaana Anutufa maasa niuqummasee moo aaqarana sia paquriannoo.

Uqafiqoo Ufafa 2:2

Oo Eefeesusa maqannaa Paatoo dinni taikasee dinni ani qaara marasee fasau narí asaukuki uqirafa ni fasiqafa ani qimamidanoo. Qisauku dinni taikasee dinni ani qaara marasee rambi kuradee mari ainainna qambaanai nimari fasiqafa Eefeesusa amaana maqasaa rakisimari paatoo maaqi qimasee qimamidanoo. Qinee anee auqee marianna saikana iridaqa anee kadaapiri mariannanara iridaqa anee sia feefauruara irisaidana maqee maqee kadaapiri marianaqa iridaqa. Anee mandoosana maree mariasara akooqee mariannanara qinee minara faqa iridaqa eedoo qidaqa. Akaqausa náriara unna qimasee Yisufa diqiqoo fasiqausee qufana anee misa faqa amanamasee qafoonanoo misa unna qirana anee paqurunafa mariananoo.

Yoohanee 1:47

Firipifa mina afiqeenoo oonu roofanoo Yisufa Natanaeerana qafamaseenoo qimaminoo qinau. Oo maafa Isaraee maqannaa faiqí uqanna anidanoo. Sia qunna ufa minaki marifa andeeqarafa kai marifa maridanoo.

Mataioo 16:23

Yisufa iriseenoo quandaseenoo Peetooroona qimaminau. Sadanna see maree fua, qinaaqiannai aiqaree fua anisaa qikuamaki aqufuanoora. Anee sia Anutuna irirana maree marianafa, fifau faiqí irirana maree marianafa.

2 Koorinti 1:12

Oo Koorinti maqannaasa maasa maqusa maqusa nidaqa inni faqa mariafananoo qini daakirafa irirafa maaqimandee qimaqimidanoo. Maasa inni faqa mariafananoo sia faiqí irirafa maasa uqaqifiqanau. Anutufa dadaaqufaqa narikinaana akooqoo anoona ufa faqa noori runusee auqarafa faqa, Anutuna afaarira amiqi amiqira afeeka faqa mifauqa kai rakisiqimaqee marifaqa inni faqa maridaqa minara maasa irisee nasuridaqa.

Roomma 12:9

Inniki nariara nariara nimuqusirafa inniqa nimuqusannai kai nariara nariara nimuqusiaqa. Innee aiqama manda mariranara fidiaqaamasee amiqira marirana kai rakisisimma qumaraaqa.

Roomma 8:7

Faiqí faiqi manda nidirafa nitikuraki rakisimarisa Anutuna namuqaakammiqa maridaqa, sia Anutuna sandufamau fidaqa, fidaqau sia amanaikiaqini.

Mataioo 26:33

Yisufa innee quqasee furufarifandia maqi qimaqoona Peetooroofa minara iriseenoo qinau. Qinee sia sandaanaura. Misa aiqama quqasee sandaifaqa qinee sia sandaanaura, ani faqa apamma fuanaura.

Oosana 20:5

Abaraqaammafa narí kai Saraqa nammarinara qini dauna fee qifaqa qinee iriqa. Kafaa maa anaaseefa faqa narí afaaqiara qinoo qini qifasaa fee qinoo. Miqi qifaqa qinee mina irunanoo qini daakirafa qimaqiminoo sia aaqarafa aniki mariannoo fee qifaqa maraunanoo sia aaqarafa qiniki maridanoo.

Firipi 1:16

Miqi mariasa nimuqusa ookiqari qini Pauroosara ridaqa Yisunara amiqimaseeqa faiqí anaasee qimannimidaqa. Akaqausa Yisuna ufara kaukaata qidaqa mareeqee kaqirunna ubeekaidaqa, Anutufa qiniara anee minasaa ititaannee qifaqa ititaidaqa, qini dadaaqi mariasa miqi marunausa marunnanara irisee amiqimmandee qiniara ridaqa dadaaqidaqa.

Eefeesusa 6:24

Innee aiqamausa maasa karaambaiqa asauku mundirana Yisunara sia taikee maria rirana rimariasa, Anutuna afaarirafa inni faqa mariani.

Eefeesusa 4:15

Maasa sia miqiaqa, maaqiaqa, nariara nariara qimudaoo qimasee ridaqa minaki maridaqa nariara nariara sia unnufa qiaqa, anoona ufa kai qidaqa maasa miqianannai faiqi aanaaqiara foora asauku mundirana maasa qikiaqa amanakai innooqamaree ooru mundufuanaura.

Karatia 5:11

Oo qini qikaqaafasaauqa qeeqara qimannimianauranoo qinee Yuda maqannaasa fainanduqira ufa asauku mundiranasaa ookaammasee minannai innaarunai firaree qimariana mi ufana maqusa maqusa qinee qimannimi marianaqau misa sia maqee maqee qini darimariaqini. Fainanduqira ufa Yisunasaa ookaairafa anoona marinoofau qinee asauku mundirana aunirira saqarisaa arunara qimannimianaqau sia daruqini. Yisunasaa mundirunara kai qimannimimarunaqa iridaqa darimariafanoo. (Misa mi aukuanna faina kafaqianda uqidee qimasaida Yuda maqannaasa maasa Anutuna faiqi namu fee qimariqau. Nifaandama itirausara inni nianasaa naadumasaa mariaqee qimariqau. Pauroofa minara irisee maa ufana qimanniminau.)

2 Koorinti 8:8

Qinee Pauroosa sia naamuaqira ufa inni qimannimidaqa naakapara ufa inni qimannimidaqa. Anaamuru dadaaqiranara naakapaidaqa minannai inniqa nikaqaafassara nimuqusirana nimanamandee qafaidaqa inni Koorinti maqannaasa nimuqusirafa Maseedoonia maqannaasa nimuqusirana amanafee maridanoo fee qimaseeqa nimanammandee qafaidaqa.

2 Koorinti 6:3

Akaqausa maasa inniki saikiranara aaqeeaafoo qifoora maasa qeeqa rakisidaqa inni niku nimaarusirafa mariandoo qimasee eerairidaqa.

2 Koorinti 2:17

Maasa amana mi saikana maraanaura. Akaqausa Anutuna ufara fifau oorudupira ainainee qimasee minasaaqaraana manda munnimma maraidaqa. Miqi qimariasa sia mi saikana amana mareefaranoo. Maasa sia misa naanna raidaqa. Anutufa maasa mi saikanaki diqiqoosa marunnanara mina afusaara foora maridaqa asauku mundirana ainainira faiqi maridaqa noori runusee faiqí anaasee qimannimidaqa.

1 Koorinti 10:32

Inni marirafa kaqi mana manifaqa nindafamaseeqa Yuda maqannaasee aanaamuru fee Yisuna ufa iri mariasee inni niqafamasee noori runifaara. Innee minara irisee mi oosannara eerairiaqa.

1 Koorinti 8:13

Qinee Pauroosa minara maaqi qidaqa qinee afaannara dufi dufi qira narana aandau namasaananoo qini qikaqaafasaa qini qiqafeenoo minasaaqaraana mandainainaki aqufinaqa qinee naaru naaru sia uqanna afaanna aandau naanaura qini qikaqaafasaa sia aqufuanifee qimasee sia naanaura.

Roomma 16:17

Oo qini qikaqaafasaauqa qeeqa qimuqusa ookiqara afeekaikamandee inni qimannimidaqa. Akaqausa rainara ufa oosana areemarisara eerairiaqa. Misa Yisuna saqariki mariasa akaqausa kuridi nimaqaidaqa innee maroo andeeqara ufana ateekaidaqa, misara rufiasee nianai mariaqa.

Roomma 7:22

Qini qimuqusa ookina Anutuna sandufara asasidanoo qiqa qifaaqaki mari manda ainaina mifa kai qini raineeqeenoo narí rumbaranaki quqaidanoo.

Roomma 7:16

Qini irirafa qikooqeemari mandoosanna maraidaqa Mooseena sandufa fannoo qiniara aaqee mariifoo qimasaifanoo qini irirafa faqa mina irirafa faqa moodaaqoo apinoo marifaqa. Oo Mooseena sandufara anoona mariifoo qidaqa.

Yoohanee 3:20

Faiqí moo fannoo mandainaina maree marifa mifa kaaqa qaranara fidiaqaa imarifa sia faasaana kooroo iannoo. Narí manda oosana kooroo qianoo qimasee asukunaki kaqi maridanoo.