Eefeesusa 3:16 - Anutuna Ufa

^16-18 Mi Anutunara inniara innaaru qidaqa, asauku mundirana innee saqarikiranannai mifa anireenoo inni naunduraki maaqakiara foora ani keeqaanifeera. Mifa narí maraqunannai narí areenarana firaanakiqari inni naunduraki afeeka niminaqa mapukusee mariaqa. Qinee inniara maaqi qidaqa innaaru qidaqa, innee inneeqa atukara foora faqa faakanara foora faqa nariara nariara nimuqusiranaki mapukusaaqa, innee Eefeesusa maqannaasa faqa Anutuna aiku asauku moo maqannaa mariasa saimbaqa afeeka marinaqa minannai asauku mundirana inniara amuqusinoo aidirana firaana iriaqeera innaaru qidaqa. Mifa inniara amuqusinoo aidirana mina kisaaqasaa aidirana faqa mina qusa kamu faqa mina meerai sandaaqaira faqa mina meemai farumara foora marirana faqa mina firaatiara iriaqeera qinee innaaru qidaqa.

Eefeesusa 3:16 Referans Kwoze

Kooroosee 1:11

Anutuna idaaqira eeraarirafa minasaaqari aninna afeekafa aiqama inni faqa afeeka niminaqa innee oosana oosana mandainaina ummaara fannoo innisaa kambiqainaqa ubiqafi reendeenidaqa asasammasee maraaqeera.

Firipi 4:13

Asauku mundirafa narí afeeka qimufaqa minannai amiqiranee mandaikiranee kaqi maraidaqa.

2 Timooti 4:17

Misa fufanoo Karaambaiqa kai qumee qini pooduqee marufaqa qinee kootaki kikiqamafi Yisuna ufa aiqama amiqimasee aanaamuru aiqama qimannimiafanaqa iriqau. Miqimasaafananoo Anutufa kaasau aandau ookinaanara foora qini rafieenoora foora inau.

2 Koorinti 4:16

Maasa minara iriseeqa sia kudoosaapaidaqa minnisaidaqa. Maasa faiqí qifaaqa kuqaa qumidaqa doo kuqirannai ubeekaidaqa daundurakinaafa faasaambaasaana fukaikakai iqa maridaqa.

Eefeesusa 6:10

Maa ufana taikara ufa maaqimminoo maridanoo, innee karaambaiqa faqa maridaqa moodaanaki nimarifaqa mina firaa afeekannai inni faqa moodaanakikirana firaaqoo afeekaikamma mapukuaqa.

2 Koorinti 12:9

Qinee Pauroosa mina iriseeqa maaqi qidaqa qinee qeeqa kudoosaapee marunnanara asasammasee amooqidaqa. Asauku mundirana afeeka fannoo qini rafaaqa fuanifeera qeeqa ummooqukiannanara amooqidaqa.

Firipi 4:19

Sia meerai kai inni afeedamma nimaqaannoo maaqoo faqa innee sarauqi maria ainainna inni nimana kai nimiannoo, narí innaarunai mari qumiasana moomoo marina narí asauku mundirana Yisunaki marina innee sarauqi maria narana ainainna inni nimana kai nimiannoo.

Idi Ufa 28:8

Yaaweefa narí faiqí anaasee itita nimaqaidanoo. Mifa narí utaaqamaqai karaambaiqana itita amaqaseenoo mina manda ainainakinaana mara kaqinni quqaisaidanoo.

Roomma 7:22

Qini qimuqusa ookina Anutuna sandufara asasidanoo qiqa qifaaqaki mari manda ainaina mifa kai qini raineeqeenoo narí rumbaranaki quqaidanoo.

1 Koorinti 16:13

Inni Koorinti maqusanaasa maqee maa ufana qimannimianaura. Innee maqee maqee aufarida mariaqa, innee Yisuna saqarikiranaki minaki mapukufina kikiqammambuaqa innee maqee maqee paasoosida mariaqa, afeekaikiqa mariaqa.

Idi Ufa 138:3

Oo Yaawee qinee aaraunana iriseenana anee qimaqimiananoo. Aneenna afeekannai qini afeekaikamma qimaqaananoo.

Roomma 9:23

Kafaa mina dinni amiqira qafeera foora kasooqaqee maasa mina kaaqa areenarana mareefandinausa akaqausa auquqisanau, mina amuqusa maasa ubeekanoo marisa maasasaa kai mina idaaqira moomoo areenarafa kooroo ianifeera maasasaa nammariara foora narí areenarana adiannimaqanau.

Eefeesusa 3:8

Qinee Anutuna aiku asauku maqasaa fasiqaki oorudupirausa marunanoo Anutufa sia minara irinoo kaqi mi naakaparana qiminoo diqiqamaqimaqeenoo asauku mundirana, innaarunai nimira amiqi amiqira ainaina moomoo ainaina sia amana asaana rirana amana mi ufanara aanaamuru qimannimiranaki qini quqaqisaifaqa maridaqa.

Eefeesusa 1:18

Anutufa inni naaramasee narí areenaranara afeesiaqee qimarianara innee iriaqee qimasee inniara innaaru qimasaanaqa inni nifu nitikura quandasainaqa areenarana nimianinnanara afeesiaqeera innaaru qidaqa. Naaquqara amiqi amiqirafa idaaqirafa moomoo uqanna narí maqasaa fasiqa anaasee innaarunai nimirara qima afeekaikidanoo nimiannoo minauqara faqa inniara iriaqeera innaaru qidaqa.

Mataioo 6:13

Sia anee maasa rarisameeqeenana afeeka nimaniraqoo quqaqisaa. Manda fasiqa asaukuki marunnana anee Anutufa uqeereeqee kaqinni amiqiraqoo quqaqisaa.

Eefeesusa 1:7

Anutufa narí asauku mundirana kuqiranannai maasa mandainainakinaana idukuqiseenoo maasa mandoosana akiaqara minniqisainaqa marianaura. Maasa minara irisee Anutuna firaa afaariranara akooqoo uqanna marifaqa qafamasee irisee naqimasee maraanauree minara rufiaida furufaridaqa.

Heeburu 11:34

Faiqí akaqausa Anutuna ufa iri mariasa namuqaa nisaukuki soofaqa misa mareeqee ida firaana arasee minaki aqunnisoofaqa misa Anutuna saqarikiranannoo mi idana imbasee sia kuqiqau. Namuqaa fannoo aseemannai akaqausa naruaneerufaqa Anutuna saqarikiranannai quqasee sandaqau. Faiqí akaqausa sia afeekaikusa Anutuna saqarikiranannai afeekaikamasee moomoo maqannaa rakira fasiqauqa aiqama naru taikasee náriaraa kaqi mariqau.

1 Peetooroo 3:4

Inni nifaaqa amiqi amiqirafa inniqa nimuqusa ookiqari amiqira marira marirafa minannoo kai nifaaqa amiqi amiqiani. Inni nifaaqa mari inanoo asooqaqaaninafa maridanoo, fisoo fisoomasee kasooqaqee aqumurira oosana fannoo mifa sia asooqaqee mariafa maridanoo minannai kai mara nifaaqa auquaqa. Mi oosannafa Anutuna afusaa amiqira oonda uqanna maridanoo.

Eefeesusa 2:7

Sia Anutufa fifau miqinau, narí firaa afaarirana faqa, maasa asauku mundirana Yisunaki keeqarana qafamaseenoo narí firaa aidirana amuqusirana faqa naaru kambiqainausa uqannifiqarara miqinau.

Roomma 2:29

Sia apatasaafau anoona maridanoo naundura nimuqusakiqari Anutuna ufamau fimariasa misa anoona maridanoo fainanduqirausara foora maridaqa. Sia Mooseena sandufa irirana irirafa mifau Anutuna aiku asauku kamannimaqaidanoofau. Anutuna maraquna naundurai saikisa misa kai Yuda maqannaa uqannara foora Anutuna aiku asauku maridaqa. Miqifandinna fasiqausa sia faiqí nimooqiranafau maraidau, Anutuna amooqiranara ridaqa randasee maraidaqa.

Eefeesusa 3:15

Innaarunai mariasa faqa maqasaa mariasa faqa aiqamatia Anutunasaaqaraana nariqa nuqu uqanna maraidaqa.

Kooroosee 2:2

Minara inni nimuqusa sia iani paasoosammasee mariaqeera innee moodaanaki kammafi nariara nariara ridaqa innee Anutuna ufa amiqimasee iriseeqa innee nifaaqa quqasee Anutunaki mapukuaqeera inniara kadaapi ridaqa. Innee amiqimasee Anutuna afeeka kukeeqara ufa uqeerasee iriaqeera. Mi kukeeqara afeeka ufafa asauku mundirafa narí uqanna maridanoo.