Eefeesusa 2:8 - Anutuna Ufa

⁸ Sia moo ainainannai Anutufa narí afaariranannai kai inni innaarunai asumu mariranaki quqannisaidanoo, innee Yisuna saqarikiranannai afaaramma nimaqaidanoo. Inni asumu nimirafa sia innee andeeqasee fimarianasaafau mundidanoofau, sia innee amiqira oosana marasaida kadaapiridee qimarianasaafau mundidanoofau, Anutuna kaqi nimiranasaa kai innaarunai asumu marirana maasa qimirana uqeereenoo.

Eefeesusa 2:8 Referans Kwoze

Roomma 4:16

Qinee Pauroosa Abarahaamanara kafaa qidaqa. Anutufa nimianinna ainainara Kannaana maqa maaqa faqa asumu marirana faqa qima afeekaikirafa Abarahaamafa Anutuna ufasaa irirana rusisoona minasaa mundinoo maridanoo. Miqiunara Anutufa nimianinna ainaina maa maqana faqa asuma marifandinnana faqa Abarahaamana narí aiku asauku faqa misasaa oonu aruakinausa faqa kaqi nimira ainainara foora mariannoo. Sia Anutuna ufaki kadaapirumasee fimariasaindi kai mi ainainausa marifaranoo Abarahaamana aanna ree mariasa, Anutuna ufasaa kaqi irirana rusimariasa misaindi faqa mi ainainausa mariannoo. Maasa Anutuna ufasaa rusimariasa nikoofa Abarahaamafa maridanoo. Maasa mina aanna ree mariasa kai mina aiku asauku maridaqa.

Yoohanee 6:37

Qini qikoofa eedoo qira irirana niminausa misa qinee unnannai nári naundura ubeekama qimaqeefaranoo. Miqi mariasa qinee ianannai animariasa sia niqiqaanaqa fifaranoo.

Yoohanee 5:24

Yisufa Yuda maqannaa rakisirausa kaqi qimannimidanoo qinau. Qinee kuqaa anoona ufa inni qimannimidaqa faiqí moo fannoo qini ufa irisee qini diqiqamaqoona saqarikinafa mifa doo naaru mariranaki maridanoo. Miqinna fasiqafa sia Anutuna arirufaki mariannoo. Anutuna narirana doo maa maqee aiqaaqareenoo kaqi mariranaki doo keeqanoo maridanoo.

Yoohanee 4:10

Akasaa Yuda maqannaafammia. Sia Yuda maqannaasa Samaria maqannaasa kaafa piritaki naidammia. Qinee Samaria maqannaa maridaqammu. Anee naqi fee qidanee nammariara qiniara innaaru qidanee. Yisufa minara iriseenoo maaqi qimasee narí qimaminau. Anee Anutuna nimira ainainara faqa qiniara faqa irimarinafa maridanau qiniara irainaqau naaru marira nammari ani amini.

Ruka 7:50

Yisufa mi anaaseena kafaa qimaminoo qinau, oo maa anaasee anee aneenna aunduraindari qinisaa rusimarianafa mifa kai ani innaarunai marira asumu aminoo doo asooaranaki fua.

Mareekoo 16:16

Qinisaa irirana rusimariasa irirana rusidaqa nammari maree mariasa misa innaarunai naaru marira asumu mareefaranoo. Qinisaa sia irirana rusimariasa misa nariranaki fifaranoo.

Yoohanee 3:36

Anutuna amaaku ufa irisee mara mina saqarikinafa doo mifa Anutuna naaru marirana marasee minaki maridanoo. Anutuna amaaku ufa irisee rukiainafa Anutuna firaaqoo aanooqirafa minasaa naaru mariannoo.

Eefeesusa 2:10

Anutufa maasa auqufa maridanoo sia fifau maasa auqinau, maasa asauku mundirana Yisunasaa atooqaranasaaqari andeeqasee nirana marirana mariaqee qimasee maasa auqinau. Doo ooqai mi andeeqara nirana marirana maasara deedaqammaqoofa maridanoo.

Karatia 3:22

Ooqeenaa akara fannoo aiqama maqannaasara nári mandoosana afeeka ameemaanai kuridiranaki maridaqee qidanoo. Qinee Pauroosa minara maaqi qidaqa Yisunasaa irirana rusimariasa Anutufa narí qima afeekaikamandee maqee oosana arasee naaru marirana nimiannoo fee qidaqa, mi nimirafa asauku mundirana Yisunasaa rusimarianasaa mundinoo maridanoo. Aiqama ainaina nári mandoosana afeeka ameemaanai marianara Yisunasaa irirana rusimarianannoo kai aikaquannoo.

Karatia 3:14

Asauku mundirafa saqarisaa dirifi kuqinau. Anutufa ooqai Abarahaamanasaaqaraa amiqi amiqirana aanaamuru mariasa nimianifee qimasoofanoo asauku mundirafa saqarisaa dirifi kuqinau. Asauku mundirana Yisunannai aanaamuru mariasa Anutufa Abarahaamanasaa qima afeekaikira amiqi amiqirana misa faqa raina mareefaranoo. Maasa faqa qeeqa Yisuna saqarikiranannai Anutufa narí maraquna nimiraree quna faqa maraanaura.

Yoohanee 6:40

Qini qikoofa maanara ridanoo. Mina amaaku qiqafee mariasa minasaa irirana rusimariasa mi kamuqoo kai naaru marirana mareefaranoo. Taikara faasaana qinee misa uqeereeqee naaru mariranaki quqannisaanaura.

Yoohanee 6:35

Yisufa kaifaa qimanniminau. Qinee kaqi marira nimira narana marunausa maridaqa. Faiqí moo fannoo qinee marunannai anireenoo qini saqarikinafa mifa sia kafaa naranara foora aararaannoo sia kafaa nammariara foora aidiannoo.

Eefeesusa 1:19

Maasaki mina ufasaa irirana rusimariaqooqari Anutuna afeeka fannoo maasaki ainaini marinara faqa innee iriaqeera qinee Pauroosa inniara innaaru qidaqa. Anutufa asauku mundirana kuqiranakinaana uqeerasee innaarunai narí aaqa narí asauku uqannai ooqumaruqoo firaa afeeka faqa maasaki ainainimarifa faqa amana amana kai moodaa firaa afeeka maridanoo.

Yoohanee 6:65

Yisufa minara maa ufana atiki kafaa qimanniminau. Qinee minara faasai qunnana sia amana moo fannoo narí kai qinee ianannai aniannoo. Qini qikoofa dadaaqinanoo kai qinee ianannai aniannoo.

Kooroosee 2:12

Qinee Pauroosa minara inni Kooroosee maqannaasara maaqi qidaqa Yisufa aunirira saqarisaa kuqufufaqa inneeqa nifaaqa namufaqa kuqirana ameeraameeriqa Yisufa kuqiranakiqari findifufaqa innee faqa kuqirana ameeraa meeriranaki qari findifiqa fuka marirana mara maree findifi mariafanoo. Inni irirafa Yisunasaa mundunara mi ainainna kambiqafi maridanoo.

Yoohanee 6:44

Sia faiqí moo fannoo kaqi qinee ianannai anifaranoo. Qini qikoofa rarisameeqee quqainna fasiqa aanaaseesa misa kai qini naundura ubeekama qimaqeefaranoo. Misa miqifaqa taikara faasaana misa uqeereeqee naaru mariranaki quqannisaanaura.

1 Peetooroo 1:5

Mi ainainausa innindi maridanoo Anutuna afeeka fannoo inneeqa Yisuna mandaaqaranannai inni faqa mara afeedamma nimaqee mariasa mi ainainausa innindi maridanoo. Innee taikainna aukuana innaarunai findifi ooru firanara afeesara mariafanoo Anutuna afeeka fannoo innisaa rakisidanoo.

Firipi 1:29

Anutufa inni firaaqoo adiafaairanaki quqanniseenoo asauku mundirana ainainiranaki quqannisaifaqa innee minaki maridaqa sia inni irirana minasaa rusiranara kaifau inni niminoofau mina ufasaara nidafirana maree fandinnanara faqa inni niminoo.

Roomma 10:14

Naqimasee faiqí anaasee karaambaiqara sia irirana minasaa rusimarinausa aareefaree sia amana aareefaranoo. Sia karaambaiqara irimariasa naqimandee fee irirana minasaa rusifaree. Moo fannoo oonu qimanniminaqa irifaranoo sia oonuree qimannimifaqa sia irifaranoo.

Mataioo 16:17

Yisufa iriseenoo narí qimaminau. Oo Simoona Yoonaana amarana amaaku, maqasaa fasiqa sia miqi qimasee ani qimamiaqini. Innaarunai qini qikoofa mifa kai ani aaqoosaa rinoo. Minara anee asasimarianafa mariananoo ani qimaminoo.

2 Teesaroonika 1:9

Yisufa naaru naaru taikarana misa niminaqa naaru naaru karaambaiqa mariqooqari nianai naadumasaa maridaqa sia mina areenara afeeka qafeefaranoo.

Roomma 9:16

Minara aiqama ainaina sia faiqí nidiranasaa mundinoo maridanoo Anutuna amuqusiranasaa mundinoo maridanoo.

Heeburu 6:4

Anutuna ufamau fimariasa quandaki kaqinni aqufiqa naqi fee mandee aupuramasee quandakinaqa kafaa fifaree. Sia amana miqifara. Misa ooqai Anutuna qoomasaa fimariasa, misa innaarunaindaraa narana naidara foora imariasa maridaqa Anutuna naaquqara andeeqara maraquna mareemariasa.

Mataioo 20:9

Eeneemaru inaaqianna fuasa misa aniroofanoo deenariasa munnimma moodaa moodaa niminau. Miqi kai masee aiqamausa niminau.