Eefeesusa 2:10 - Anutuna Ufa

¹⁰ Anutufa maasa auqufa maridanoo sia fifau maasa auqinau, maasa asauku mundirana Yisunasaa atooqaranasaaqari andeeqasee nirana marirana mariaqee qimasee maasa auqinau. Doo ooqai mi andeeqara nirana marirana maasara deedaqammaqoofa maridanoo.

Eefeesusa 2:10 Referans Kwoze

Firipi 2:13

Anutufa minara irisee inni naunduraki mina ufara eedoo qira aidirana faqa mi mau fira afeeka faqa inni naunduraki kambiqaanifeera maqee maqee ainainidanoo.

Kooroosee 1:10

Innee miqi marifaqa Karaambaiqa undee kai imarifaranoo mifa maqee maqee inni marirafa amiqira marira maridaqa amiqisaa kambiqaaqeera Anutuna irirafa faqa firaaqoo inniki kambiqaannoo.

Heeburu 13:21

Anutufa asooarana faqaafa innee mina iriranamau fifandinna oosana akoofasaikirana inni niminaqa fuaqeera. Anutufa asauku mundiranannai maasa faqa mareeqeenoo narí aidira oosanaki narí iriranamau firanaki quqannisaani. Aiqama amooqirafa faqa kaaqa areenarafa faqa asauku mundiranaindi naaru naaru mariannoo. Kuqaa.

2 Koorinti 9:8

Inniqa nimana kai narana maraaqee munnimma Anutufa amana nimiannoo sia inni munnimma amana kaifau nimmiannoo aabaa faqa niminaqa minannai nana ainainaree dadaaqirafa kambiqaannoo fee innee faqa amana minannai dadaaqiaqa.

Eefeesusa 4:24

Inni innaarunaindaraa fuka marirafa Anutuna narí miqirafa maridanoo, mina anoona ufaki andeeqasee marirana faqa Anutuna ufa ameemaanai marirana faqa mina amooqirana faqa mi fuka marirafa anoona maridanoo, innee mi marirana kai qamunnara foora afisusee minaki maraqa nuaqa.

Firipi 1:6

Qinee maa ainainnara amiqimasee iridaqa Anutufa inniki amiqira saika uqeeroofa kaqi inniki mi saikana kai uqeeranoo fifi inoo taikara aukuana asauku mundirafa Yisufa quminna faasaanna miqoo kai taikaannoo.

Eefeesusa 4:1

Qinee Pauroosa karaambaiqa Yisuna ainaini marunnana akiaqara Roomma maqannaa karabusaki maridaqa. Qinee karabusaki maridaqa inniara afeekaikamandee qimannimidaqa. Anutufa inni naaramasoofaqa innee asauku mundirana saqariki maru kamuqooqari inneeqa nirana mariranara andeeqasee marianifee qimasee inni naarama minaki quqeenoo. Inneeqa marirafa mina amanakai marianifeera qinee qeeqa qimuqusa ookiqari afeekaikamandee qimannimidaqa.

2 Timooti 2:21

Faiqí moo fannoo madaapeenni mari difaanifara foora marifa narí anukamasainanoo ainaina saka neemaria difaanifara foora amiqirafa mariannoo. Miqinanoo mina akoofa mareeqee amiqira saikaki quqaannoo.

Idi Ufa 100:3

Innee sia Yaaweenara aunuaqa, mifa kai Anutufa maridanoo. Mifa kai maasa auqinau, maasa minaindi maridaqa. Maasa mina faiqí anaasee mina sipsipara foora maridaqa.

Titusa 2:14

Mifa maasa kuqirana nariara maraseenoo maasa sia maraaqeera maasa kuqiranaki mifa keeqanau. Sia fifaufau kuqinau. Maasa qeeqa mandainainakinaana mareeqeenoo maqee kamuqoo narí kaaqa qara andeeqara fasiqa anaasee kammannimaqaaneera kuqinau. Maasa minaindikuqanna iaqeera, maqee maria kamuqoo amiqira ainaina kai maasa aruqarara rimariasaikamma fuaqeera kuqinau.

Eefeesusa 1:4

Ooqai maa maqa maaqana sia auqu kamuqoo faiqí faqa sia maru kamuqoo Anutufa moomoosa kambiaqa marifandinausa kinaana maasa rusandeesamumandee marararee qimaqoosa maraqaisa maridaqa. Narí asauku mundirana Yisunannai maasa maraqoosa sia aaqarausa mariaqeera noori kandamasee andeeqarausa mariaqee qimasee maasa rusandeesamumasee maraqoosa maridaqa.

1 Timooti 6:18

Oo Timooti anee ainainafaqaasa mi ufana qimannimisee maa ufana faqa qimannimia. Sia moomoo munnimma ainaina mararara kai iriaqa. Innee faiqí anaasee dadaaqiqa amiqira dadaaqirana dadaaqiaqa mi dadaaqirana nimimariananaki aniki ainaina moomoora foora mariannoo. Innee afaariaqa inneeqa ainaina naida nimiaqa.

Titusa 3:14

Maasa niqoondi Kareetee maqannaauqa sia nisauku raqandaamasee mariaqeera naamuaqiaqa. Misa maqee maqee maqasaa anoona ainainirana kasi kasida niqoonausa faqa dadaaqi marinanaki maridaqa nári anoona ainaina auqee marianaki faqa maridaqa akaqausa niqoonausa naida nimiaqeera qimannimia. Miqimasainaqa misa saika sia fifau irairaaiani anoona kai kambiqaani.

Heeburu 10:24

Maasa nariara nariara uriqarara ainainee qimasee nimuqusirafa marianinnanara fuki faaki qimase nisaukukoo dadaaqira dadaaqirafa kambiqaani. Narí amiqi amiqirana faqa fuki faaki qimasee narí dadaaqi narí dadaaqiaqa.

Titusa 3:8

Mi ufana anoona ufa kai qimamidana aninna irirafa minasaa rusimari ufafa maridanoo. Titusa qinee Pauroosa maa ufana faqa ani qimamianana anee Anutuna ufa irimariasa qimannimia. Misa sia fifau faafau ufa kai ida mariaqa. Misa aiqama kari andeeqara ainainiranaki maridaqa auqaaqeera qimanniminaqa maqee maqee minaki kai mariaqa. Mi ainainirafa aiqama fasiqa anaasee dadaaqi marifa maridanoo, anee mina uqeerasee afeekaikia.

Kooroosee 3:10

Mi manda irirausa ooqeenaa irirana marirana afaimma quqasee fuka andeeqara marirana marasee qammunnara foora afisuaqa. Mi fuka marirana Anutufa auqusee nimuna Anutufa kaifaa aiqama kari fukara foora kai mannimidanoo. Miqinanoo maasa marirafa mina amanaikinaqa maasa minara amiqimasee iriaqeera miqidanoo.

Titusa 2:7

Anee aneennara faqa aiqama ainaina amiqimmandee marinaqa misa ani qafeeqa miqimandee mariaqa. Anee kuqaa uqanna oori runusee maridana misa naakapamasee qimannimia.

1 Peetooroo 2:12

Innee aamina maqannaaki nidaqa maridaqa inneeqa nirana marirana amiqimasee nifaqa misa inniara mandoosana mareemariasee qimasee inni nindafeeqa oo amiqimasee mariasa qimasee misa faqa quandafi Anutuna amooqiqa Yisufa innaarunaindari qumurainaqa amooqifaranoo.

Titusa 3:1

Titusa anee maa ainainnara faqa maqee maqee Kareetee maqannaasa naaqoo auqaina iriaqa. Misa kaamanna rakisirausara maasa uriqararausee qimasee eedoo kai qiaqa. Aiqama misa amiqira ainainiranara qifaqa kasi kasi kai iaqa.

1 Yoohanee 2:6

Faiqí faqa anaasee faqa moo fannoo qinee kuqaa Anutunaki maridee qimasee mifa asauku mundirana aanna ranoo marinaqa kuqaa Anutunaki marifa maridanoo, sia asauku mundirana aanna rainafa unna qimarifa maridanoo.

Idi Ufa 138:8

Anee aiqama ainaina qima afeekaikamma qoonnandee innaranoo. Oo Yaawee ani amuqusirafa naaru naaru marifa maridanoo. Anee maasa Isaraee maqanaasara dadaaqiraree qunnana sia qaunusee minnisaa.

Mataioo 5:16

Innee miqi kai iqa rambi fooqaana niqoonausaki kaaqa qamannimaqaifaqa misa inni andeeqaranara qafamasee quandafinaqa inneeqa innaarunnai nikoonara susuiaqeera.

Yoohanee 3:21

Yafa yafee moo fannoo anoona oosana marainafa mifa suanisaa qooma mariqoo aninafa narí Anutuna ufamau fimari oosanna akooqoo kooroo ianifeera akoosaqa anidanoo.

Idi Ufa 51:10

Oo Anutu qini qimuqusa fuka amiqira qimuqusa auqu qisaa. Qini daunduraki naaruara ani ufamau fira maraquna quqaqisaa.

Roomma 8:29

Anutufa faiqí faiqikinaana rusandeesamumandee maroosa sia fifaufau maranau. Misa narí amaaku Yisunaikamambi mifara foora mariaqeera misa rusandeesamumasee mareeqeenoo utaaqama nimaqasoofaqa mariqau. Miqimasainanoo Anutuna amaaku fannoo moomoosa maqasaaqaraasa mina akaqaafasaara foora maridaqa mifa misa ooqu faiqí nifasaafara foora mafinoo marianifeera utaaqamma amaqanau.

2 Koorinti 5:5

Anutufa kai maasa deedaqamaqiseenoo mi ainainna kambiqainaqa maasa deedaqamaseenoo innaarunai oosana oosana aiqama ainaina qimianinnana mina ati maqee maria kamuqoo narí maraquna qimidanoo.

1 Timooti 5:25

Miqi kai inoo amiqira oosana fannoo aiqamausa faiqí nifusaa akooqoo maridanoo. Kukeeqara amiqira oosana faqa sia kisaaqasaa kukeeqanoo mariannoo kasooqaqee mifa faqa akooqoo mariannoo.

1 Timooti 2:10

Niqoonausa dadaaqirafa mifa inni nifaaqa auqirafara foora mariani. Anutuna ufa irimaria anaaseesa andeeqara oosana miqiminoo maridanoo.

1 Timooti 5:10

Mi anaaseefa ooqai afaari marufa marinnana mifa kai minaki mariani narí faiqi namu amiqimasee firimaru aanaaseefa marufa mifa kai mariani, aanaamuru dapi aanaamuru amiqimmandee rakisimarufa faqa Anutuna ufa maqusa maqusa nida qimannimimarusa faqa narana maaqa nimimarufa oosana oosana mandainainaki aqufimarusa dadaaqimarufa, oosana oosana amiqira ainaina eedoo qimasaida auqee marufa miqi maru anaasee asooqausa kai rakisirausaikiaqa. (Mi asooqa adeedaanausa saika Timootina aukuana maaqimminoo marinau. Misa fuka anaasee nári nifaaqmaaka faiqi namu rakisiaqeera qimannimidaqa naakapee mariqau. Aaqamaki kaqirunna fusa andeeqeeqeenoo Anutuna aanai ubeekee mariqau. Mandainainaki aqufusa andeeqasee Anutuna ufa naakapee mariqau.)

1 Yoohanee 1:7

Maasa Anutuna aanna reeqa suanisaa rakeeiraqoo nunausa moodaanaki marunausa maridaqa nariara nariara aqoondi kammiqa maridaqa. Maasa Anutuna aanna reeqa kaaqa qara qoo fimarunanoo narí amaaku Yisuna fidika fannoo maasa aaqarana numoo aiqama findaukaidanoo.

Idi Ufa 119:3

Miqi marinausa sia moo aaqara oosana maraidammia. Misa Yaaweena aatata fimariasa maridammia.

Idi Ufa 81:13

Oo qini maqannaasa naqaa qini ufa iriaqaana. Isaraee maqannaasa qini aatata fuaqaana.

Karatia 6:15

Fainanduqira fee, sia fainanduqira fee, sia mifa anoona ainaina maridanoo. Anoona ainaina faiqí anaasee kuqaa naundurakinaafa fukaikamambinaqa andeeqasee marirafa mifamma anoona maridanoo.

Roomma 8:1

Maasa Anutuna asauku mundirana Yisuna faqa moodaanaki marifanoo Anutuna maraquna fannoo kaqi marirana niminoo kuqirana manda sanda faqa manda oosana faqa minaki marunnana idukuqisaifaqa maridaqa. Minara maqee asauku mundirana Yisuna faqa moodaanaki mariasa sia Anutuna kuqira ufa ameemaanai maridaqa.

Eefeesusa 1:1

Qinee Pauroosa Anutuna iriranannai asauku mundirana Yisunaindi maridaqa, mifa diqiqoo fasiqausa maridaqa. Anutuna maqasaa fasiqa anaasee Eefeesusa maqusai mariasa asauku mundirana Yisuna ufamau andeeqasee maqee maqee fimariasa inni maa akarana rumannimaqaidaqa.

Eefeesusa 2:6

Anutufa maasa asauku mundirana Yisunasaa atooarana qafamaseenoo mina namufaqa kuqiranakinaana uqeeraqiseenoo Yisuna namufaqa Anutuna innaaruna mariasasaa rakisi nimaqaaqee qifaqa miqoo rakisirausaikiqa marianaura.

Eefeesusa 2:13

Doo maqee innee asauku mundirana Yisunasaa atooqaana akiaqara inni ooqaindari nianai mariusa maqee Anutufa inni rarisameeqeenoo adeedi quqeenoo, asauku mundirafa aunirira saqarisaa kuqunannai kai miqinoo.

Eefeesusa 2:15

Mooseena sandufakina oosanoosana ainainara nimaarusirana mifa faandaamurara foora Yuda maqannaasa faqa aanaamuru faqa aiqamaqara rakeemaqoofaqa mariqau. Asauku mundirafa doo mina ruka taikasoofaqa mi atiqanda oonu maree ani maree asauku mundirana faqa moodaanaki kiqa asooaranaki maridaqa.