3 Yoohanee 1:7 - Anutuna Ufa

⁷ Yisuna ufa qimannimiqanuasa innee sia misa niqafoosa moo maqannaasa mariafanoo sia aamina maqannaa maqusa maqusa fidaqa misa munnimmaina marasaida naqa fimariqau. Yisuna auqusaa mina ufa kai maree fimariqau, misa maasa Yisuna ufa irimariasa faiqara maaqaina kai maraseeqa Anutuna ainainirausaika mafiqa nidaqa misaikana maraidaqa.

3 Yoohanee 1:7 Referans Kwoze

Uqafiqoo Ufafa 2:3

Anee reendeenamasee miqoo kai fimarianafa mariananoo. Anee qiniara oosana oosana kadaapirirana marasee sia minnisaananoo kaqi marana fimariananoo.

Kooroosee 1:24

Qinee Yisuna aufakiana qimannimunnanara minara qinee Roomma maqannaa rumbaranaki maridaqa, innisaara faqa rumbaqa maridaqa. Qinee sia minara doori runidaqa, doori quqasee asasida maridaqa. Yisufa narí aiku oosana mariasara aunirira saqarisaa aupurarana maranau. Mina aupuraranaki qinee faqa keeqeeqa ookaamambiqa rumbaqa maridaqa aupuraidaqa Yisunaindi fee qimasee kaqi asasidaqa.

2 Koorinti 12:13

Qinee maqusa maqusa Yisuna ufara suqimarusa faqa inni saimbaqa faqa amana amana kai inniki maridaqa qimannimiafannana. Sia misa amiqimannimaqasee inni mandaikamma nimaqasee qimariqiafana. Moodaa ainaina kai inniki moo kiqiafanafa mifa kai qeeqa narana munnimma sia amanaikufaqa qinee sia inni narana munnimma irammirisee mareeqa. Mi moodaa ainainnara kai iridaqa qinee aaqeefee miqi fee qidaqa. Innee moo ainaina akiaqara minni qisaaqa.

2 Koorinti 4:5

Maasa namu sia qeeqara qidaqa faiqí anaasee qimannimidaqa, maasa asauku mundirana karaambaiqa Yisuna minara kai kooroomannimidaqa. Maasa namu Yisuna auqu uqeeraidaqa Yisunara inni qimannimidaqa inniki rumbara fasiqara foora ainaina mannisaidaqa.

1 Koorinti 9:18

Qeeqa saika akiaqara nana feefauru fee maraidee, Anutufa amana kadaapi akiaqara narana marasee naannee qifaqa qinee sia miqidaqa amiqira fasaasa ufa sia feefauruara irisee kaqi didifaqa qimannimunafa mifa qini feefaurirafa maridanoo. Kaqi qimamidaqa qeeqa andeeqara kadaapirirana akiaqara sia maraida kaqi qimannimira asasirafa mifa qini amiqira feefauru maridanoo.

Yoohanee 15:21

Innee qinindi marianara oosana oosana mandainaina maa maqanasaaqaraasa inni nimifaranoo. Misa sia qini diqiqoonara Anutunara iridaqa miqifaranoo.

Firipi 2:9

Anutufa mina qafoofanoo afaaqa asasinoo aidufanoo mina akiaqara kuqiranakinaana uqeereeqeenoo innaaruna maarinni uriqararanaki quqaseenoo aiqama nuqu uriqarara auqu faqaana quqanau.

3 Yoohanee 1:8

Maasa Yisuna ufa irimarunausa misa kadaapiriranara iriseeqa misa miqimasee anoona ufa saikimariasa moodaanaki dadaaqiqa maasa saika faqee qimasee maraaqeera ani qimamidaqa.