Biblia Todo Logo
Bib sou entènèt

- Piblisite -




1 Timooti 4:6 - Anutuna Ufa

6 Oo Timooti anee asauku mundirafa Yisuna amiqira ainainira faiqi maridana mina ufa irimariasa ani akaqaafasaauqa qini maa ufausa qimannimia. Yisunasaa mundira ufa faqa mina anoona ufa faqa ani ooqai mi ufanasaa fidana innooqana marianafa mariananoo. Miqidana qini maa ufausa aneenna akaqaafasaauqa qimannimia.

Gade chapit la Kopi




1 Timooti 4:6
39 Referans Kwoze  

Asauku mundirafa nimu ufana innee iriseeqa maqee maqee eedoo qidaqa mi mau kai fimarifanoo inni naunduraki mi adiafaairafa qumbiqaani. Innee mi mariranasaa fidaqa iriranannai kai narí andeeqee narí andeeqee iaqa. Firaa iriranannai aiqamausa narí aaquqimamaqaina narí aaquqimamaqaina iaqa. Anutuna maraquna fannoo amaana idi nimuna mi idina maqee maqee raqa nuaqa. Idi roona auqu Dafidifa mina idi faqa ooqeenaasa amaana idi faqa mi idisa maqee maqee raqa nuaqa. Raqa nidaqa Anutunara asasidaqa dufi dufi qidaqa mi idi namusa raqa nuaqa.


Titusa doo misara qiqa maqee aniara qianaura. Anee Anutuna ufa amana kai qimannimidana mina marirana amana kai Kareetee maqannaa fasiqa anaasee qimannimia.


Qini Pauroosa Tikikusafa qini daufakiana inni qimannimiannoo Tikikusanara qini dididanoo mifa karaambaiqaindi maridanoo mina ainainira faiqi maridanoo amiqimaseenoo maasa dadaaqidanoo.


Yisufa iriseenoo kaifaa maaqi qimasee qimanniminau. Mooseena sandufa irimari fasiqafa moo fannoo Anutuna ququsaki mariranara irimarifa maridanoo mifa faiqí firaafara foora maridanoo narí maaqakiqari ooqeenaa amiqira irirana faqa fuka amiqira irirana faqa marasee ani uqafiqaannoo.


Inni moo ainainara naaqoo auqaidaqa. Ooqai Anutufa Isaraee maqannaa Isipa maqusaindaraana rafiamareenoo aadana maqa maaqaki quqanau. Quqasoofaqa akaqausa quandaki Anutuna ufa rukiasee kaqirunna ubeekaqau. Miqiufanoo Anutufa sia nifauanau kaqi narinau.


Faiqí moo fannoo asauku mundirana ufamau sia fimarifa fiaikatee fimarifa mifa sia Anutuna faiqi mariannoo. Asauku mundirana ufamau kai fimarianafa sia asauku mundirafa kai minaki maridanoo, mina akoofa faqa minaki maridanoo.


Fuka faiqi anaaqiara foora naamma anoona kai naidanoo innee faqa miqikai iqa fuka faiqi aanaaqiara foora Anutuna andeeqara ufa naamma anoonara fooqaana minara kai kaaqa ruaqa. Mina naqa fifi iqa innooqeera foora iqa asumu mariranaki oonuree marifaranoo.


Qusasaa sia anoona ufa naamuaqirana irifaranoo misa nári manda nidimari ainainna kai afaqee fidaqa nári naaqookinaa manda irirana naamuaqimariasa misauqa kai moomoo nifiqasee innee mi manda irirausa kai qimaqimiaqee qifaranoo.


Oo Timooti anee sia miqi marianafa anee qini naamuaqira ufamau kai fimarianafa qini oosana maree marianafa qinee fimarunnaqoo kai anee fimariananoo qinee Yisuna anoona ufamau fimariafannana anee qiqafoonafa mariananoo Anutuna saikasaara daruafaqa sia rakeemasee minniseeqa reendeenamandee kaqi miqoo marunana anee qiqafaananoo. Qinee faiqí aanaaseera qimuqusi mariafannana anee mina faqa qiqafoonafa mariananoo. Qinee kisaaqasaa Anutuna aanara afeekaikirana anee qafaananoo.


Minara qinee maana qimamidaqa ooqai qinee sindimeera foora ani quqamaqaafananoo Anutufa ani amu afaaqooqana anee amiqimasee rakisiinana kuqua.


Faiqí moo fannoo maa qinee qunna ufana moo mau kaqirunna fidanoo karaambaiqa asauku mundirana Yisuna anoona ufara qaoo qidanoo Anutuna mapukira ufa siaifa maridanoo kaqirunna ubeekaidanoo, miqi qimari fasiqafa sia moo ainaina qafaidanoo kaqi narí afaaqa kai amooqidanoo miqidanoo.


Aneenna nirana mariranasaa faqa aneenna faiqí anaasee ufa qimannimiranasaa faqa rakisia. Qinee qimamunna ufamau andeeqasee finana ani nirafa marirafa andeeqasee marinana anee aneenna faqa ani ufa irimariasa faqa asumu mareennaranoo.


Misa asauku mundirana minniseeqa nári aatata nifiqee firaree qidaqa mi ufanannai inni rafaaqafifaranoo. Asauku mundirafa maasa qikiaqa maridanoo mina adaka maasa maridaqa. Mifa maasa rakisinara amiqimasee moodaanaki maridaqa narí dadaaqi narí dadaaqidaqa Anutuna ufasaa innooqafi afeekaikidaqa. Mi fasiqausa nári qummaarannai inni rafaaqafimariasa maasa qikiaqa Yisuna minniseeqa nári aatata fidaqa mi ufanannai inni rafaaqafidaqa.


Saina miqinoo mariani innisaimbaqa sia moo ufa irisee mi mau fuanaura maasa ooqai fuafannamau kai fuanaura.


Qinee Tikikusana aqiqaananoo qini daufakiana inni qimannimiannoo. Mifa maasa qimuqusi mari qikaqaafasaafa maridanoo, karaambaiqa saikaki amiqi amiqira ainainimarifa maridanoo. Mifa qini fasaasa ufa inni qimanniminaqa innee qini mariranara iriaqeera.


Maasa qeeqa aiqama ainainaki maasa Anutuna ainainira faiqi namu marunnanara kooroo iaqeera qimasee firaaqoo reendeenamandee ummaara faqa kadaapirirana faqa tooqaamu darirana faqa aupurarana oosana oosana maraidaqa.


Mifa mi ainainirana amanaikirana qimifaqa kai narí fuka moodaanaki kira ufa mi saikanaki maridaqa. Mina fuka moodaanaki kira ufa sia nimaarusira ufa akara riranasaa mundinoo maridanoo. Anutuna naaquqara andeeqara maraquna faiqí naunduraki marina minasaa mundinoo maridanoo. Mooseena sandufa akararufa mifa kuqirana kai nimidanoo, Anutuna maraquna fannoo kaqi marirana nimidanoo.


Innee qini daanna raanee qimasee Timootina aqiqaananoo innee iannai fuannoo. Maaqanda karaambaiqa ainainiranaki maridaqa mifa qini qimuqusa andeeqara qimaakuara foora maridanoo. Mifa innee iannai oonuree qini fuka marirana asauku mundirana Yisunaki marira oosana qimannimiannoo. Aiqama maqusa maqusa nidaqa Yisuna ufa irimariasa suqusaida naamuaqimaqaafannana Timootifa mi ufana inni naaqoo auqaannoo.


Innee miqi marifaqa qinee maa pasanakina sia reendeenamandee inni naaqoo auqeeqa oosana oosana ainainara inni naaqoo firaaqoo auqeeqa.


Qinee qimannimianna ufafa amiqira ufa maridanoo. Minara aiqama aiqamara iria.


Yaaweena sanda ufa andeeqarafa uqanna maridanoo. Mifa fuka afeeka nimidanoo. Yaaweena naakaparufa minasaa mundi mariafa maridanoo. Mifa irirana siaisa irirana nimidanoo.


Oo Tioofirusa qinee Rukaasa Yisufa kambiqooqooqari mifa niniunara randoorandaamasee amiqimasee iriseeqa qinee faqa padimasee akara ruanauree qimaseeqa akara rummamaqaidaqa.


Misa náriara asauku mundirana aiku asauku maridee qiafaqa qinee faqa furufarira fasiqara foora qidaqa qinee misaki misa uriqararausa maridaqa. Qini asauku mundirana mi ainainnara irunnana misaindi ooraaqaranoo maridanoo. Qinee Yisuna ufa saara karabusaki misa urinnaaqarammasee moomoo kari rumbeeqa. Raitasamunnai qifaaqa ateekeeufa moomoo kari misa narirana urinnaaqaramasee qini qifaaqa ateekaqau. Qinee kuqirara madikakiqari moomoo kari misa narirana urinnaaqaramasee findi fiqa.


Timootifa kai qini daanna reenoo moodaa irirana inniara iridanoo amiqimasee inniara amuqusidanoo.


Timootifa narí ainainiranara narí amiqira oosana kooroo ifaqa innee minara irimariafanoo mifa faqa qinee faqa nariqa qisakoosara foora maridaqa moodaanaki Yisuna amiqira fasaasa ufa saikaki marunausa maridaqa.


Swiv nou:

Piblisite


Piblisite