1 Timotì 5:10 - Ŋwàʼlè ə̀ Fèzhə̀ Mkâyn Mə̂ Fèm

¹⁰ ghɨghe ke nə è kyi ndô ndam echûŋzè, mə è və tɔ̀ʼnè kɔʼ pəyn è ghɔ vəynghe, fɨnə fiə ə̀ghɨ ə motə pə kè nâʼà àchûŋ. Ə̀ kyi sə̂ nyi wùə mə è nyiə tsâmtə̀ ə̀ghɨ ə poməghe ə mndômnə̀ mndômnə̀ se tyə̀yn engɨmnê, fɨnə tsâmtə̀ əghɨ ghɛ ə ghe kyi tsôstè. Ə̀ kyi sə̂ nyi wùə mə è və fo ngɨŋə̂ vəyn sə̂ nə̂ chùŋ.

1 Timotì 5:10 Referans Kwoze

1 Timotì 6:18

Pì nə ghənə ə nə̂ ə̀ghɛ chûŋə̀ fɨyn nyi ə̀ghɨ ghaʼâghè tɔynə̂ əghɛ ghɛ ə ghənə nə̂, mɔ̂msə̀ sə fo fɨsə̂, fɨnə chyâtə̀ èfɨa vɛ ə ghənə kyi yî ghɨ mɔ̀ʼɔghe.

Taytùs 3:8

Ghɛ zɨnə m nyi mə mə wàmnè nyì səmɔʼ. M kyiŋə nə ò tɛ faŋ ke famə ezaʼlê, kə nâʼà ə̀ghɨ ə̀kɨ̂m ghɛ ə ghe nyi mə ə pomə sè Zhə̀fè, fo ngɨŋ sə ghənə̂sè sə̂ nə̀ chùŋ. Zaʼlê nə tɨ̂nə̀ nyi achûŋ tsâmtə̀ nâʼàpî ndè.

Ətefɨ̂aʼ 9:36

Ə̀ tè nyi ə Njopà, wùzhɔyn e pomə vîvè e nyi fu, zə vəynze e nyi Tàpità. (Tàpità ewàmnè ə Nglêkzè nyi nə Ndokàs mə ze za tyə̀nə̀ nə fechwi) È tè ndamə nə̂ kə ə̀ghɛ əchûŋə̀ shîŋə̀ tekɨ̂m fɨnə fo ètsâmtè sê ghɨ afɨfə.

Taytùs 3:1

Ò pɨ̂əytə̀ ə̀ghɨ poməghe nə ghənə tsose ngɨŋsə ghənə̂sè əchi ə zɨə sê ngômnàyn, è ghɨə ngômnàynghe. Ghənə kyi va sə̂ tɛ è tuve, nyi è pɨaʼtêzè shîŋə̀ tekɨ̂m se nə̀yn eghɛ zɛ ə ze nyi achûŋ.

Taytùs 2:7

Nâʼàpî eghɛ èkè zɛ ə ò nə̀, ò kyi sə̂ nə̂ endom echûŋvè kə ghɨ əmɔ̀ʼɔghe kaʼa ə ghe səyne sê ghò. Ə nâʼàpî èghɛ èkè zɛ ə ò nə̀, ə ze ə tyə̂nə̀ nə ghɛ zɛ ə ò zaʼlə nyîə kyi èkɔʼnê, ə̀ nyi èghɛ mə ə̀ vachi èshî.

2 Timotì 3:17

Ghɛ nə ghɨnə nyi se nə̀yn nə wùə èfɨ̀aʼa ə̀ Fèzhə̀ ə kwəynə mɨ̂sə̀ sə̂ nə̂ nâʼà tèkyì tə tefɨ̀aʼ techûŋ tekɨ̂m.

Ŋwàʼlè ə̀ Pɔ̂l sê ghɨə Lûmghè 12:13

Nâʼàpî ndè e chyâtə̀ èfɨa vəynve, fo ə̀ghɨ pomə ghɛ ə ghe kiva. Nâʼàpî ndè e fiə ə̀ghɨ motə pə ə və ndɛ.

Tom èchùŋ kè kə Lûk tè nyaʼ 7:44

È və fɨnə pə̀ynsə̀ ewiyn ə naynə̂ wùzhɔyn ətəyn ə piə sê Shimùyn nə, “Ò fe wùzhɔyn vɨnə? M pə ə ghò ndɛ, ò vɛ ò tàʼa fo mmo nə m shù ghol ghɨmghe ətəyn, pîza è və shù ghol ghɨmə è shîəm ə zə̂sə̀ è nyuŋ sə vəyn sə atuse.

Matyò 5:16

Kèpî endom nə vɨ̂nə̀ mə, payn zaynze kyi sə̂ panə ə ghɨə ghə shi, kə ghənə fe ə̀ghɛ echûŋ ghɛ ə ghàyn nə̀, tsîtə̀ Pɨ̀a vâyn vɛ ə è nyi ekwùtwəyn.

1 Pità 2:12

Ghàyn e ndamə tèndam techûŋtè kə ghɨ ghɛ ə ghàyn ndamə ə ghənə fètəyn, ghənə e ke va Zhə̀fè nə kaŋa ghâmə̀ pî ghàyn, ə ghənə tə fe kê ə̀ghɛ ghayn ghe chûŋghè ə fetuʼ fɛ ə Zhə̀fè tə kɛsə pə̂ se saʼ, ə ghənə ə tsîtə̀ Fèzhə̀.

Ipilù 13:21

m tsə̂mə̀ nə Zhə̀fè fo nâʼàpî àfɨa echûŋ àke kɛ ə ghàyn nə̀ njîə se nə̀yn eghɛ zɛ ə è kɔ̀ŋə̀ ətəyn, m tsə̀mə̀ nə tɔynə̂ ə Njisə̀s Klâys, è nə̀ nə̂ tɔynə̂ ə ghâsènì ghɛ zɛ ə ze tsɔ̂fə̀ sê vəyn. Ə pomsêzè ə nyi sê Njisə̀s Klâys sə teshìŋə̀ tèkɨ̂m. Ə ze ə nyi ke zamə.

Ipilù 13:2

Kə ghàyn tə lɛ̂sè sə̂ fiə ndzɨsə̂ ə̀ghɨ ə motə pə ə ghàyn ə sendɛ. Ghɨə mɔ̀ʼɔghe ə fi ndzɨse ghɨghe, ke va nə ghənə fiə sètsì.

Ipilù 10:24

Ə ghâsènì ə tsâmtə̀ sèngɨŋ sə ghasènìse se tyə̀n ekɔ̂ŋ, nə̂ chùŋ.

Taytùs 3:14

Ghɨ ə ghasènìghe kyi se zaʼlê sə̂ nə̂ ə̀ghɛ əchûŋə̀, mə ghənə tsâmtə̀ ə̀ghɨ fo èfɨa vɛ ə ghənə ndɨŋə lâʼà. Ə ghənə nə̂ nyî, ə ghənə kyi ndam zɛ ə ze muə twɔmve.

Taytùs 2:14

È və tə fo ngɨŋ ə vəyn se sɔ̀sè ghâsènì ə sepi sekɨ̂m, se fɨnə nə̀yn nə ghâsènì zo kwəyne sə̂ nyi ə̀ghɨ vəyn ghə ngɨŋghe, mə ə fo ngɨŋ sə ghənə̂sè sə̂ nə̂ èfɨaʼ echûŋzè.

Tom èchùŋ kè kə Lûk tè nyaʼ 7:38

Kə è ndù zâ, ə tyəmə ə Njisə̀s ə ngwùŋ sè chîə, shîmè e tàyntə̀ ə Njisə̀s əghòl, è və ngɨmtə̂ zə̂sə̀ è nyuŋ sə vəyn sə atuse, pɔynə̂ ə̀ghol ə vəynghe fɨnə kɨmnə è ngwɨl mə èlɨ̀mtə̂ mɛ.

3 Njɔyn 1:12

Ə̀ pə̀ pîndè wàmnə̀ kə achûŋ kûmə̀ Ndèmitiyùs. È nə̀ ə̀ghɛ ghɛ ə ghe nyi səmɔʼ, zɨnə mə echwîtə̀ nə è nyi wùə èchùŋ. Pî ghàs wàmnə̀ kə àchûŋ kûmə̀ vəyn. Ò nyi ə ke nə ghɛ zɛ ə ghàs pìə kûmə̀ vəyn nyi səmɔʼ.

1 Pità 4:9

Ghàyn e fɛtə fiə ə̀ ghɔnyì ghaynghe ə ghàyn ə sendɛ, fiə kə nâʼà è təmze emɔ̀ʼ, shwinə̂ va.

2 Timotì 3:15

Ò pɨ̂əytə̀ kəpi kə ò tè pa nyi wâ, mə o ə kàynè kê ghɛghe ə ŋwàʼlè ə̀ Fèzhə̀, mə ə̀ nyi əghɛ nə ghɨyn ə ghe kaʼa ə ghe fo ghô ètɔf eghaʼâ zɛ ə ze pə̂ è sɔzaze tɔynə̂ ekyî epomə̂zè ə Klâys Njisə̀s.

2 Timotì 2:21

Ə̂ nə̀yn nâʼàpî ndè ngɨŋə̂ vəyn sə̂ zo endom kə ghɛ əpi nə ghɨ̂nə̀ ə va ə vəyn ewìyn, ə Zhə̀fè nji vəyn sə nə̂ kàyntè ə̀ghɛ kûmə̀ nə è nyi èŋwaʼze, kyi m̀kɔʼnè se pɛ̀ èfɨ̀aʼ ə vəyn kûmə̀ nə è və màʼà ngɨŋə̂ vəyn sə̂ nyi wufɨ̀aʼa sê Vəyn, nyi èpɨaʼtêzè sə̂ nə̂ nâʼà tèkyì te fɨ̂aʼ techûŋ tekɨ̂m.

2 Timotì 1:5

M pa kwâʼtə̀ ndò kàyntè èkyî èpomə̂ zɛ ə ò kyi sê Klâys, ə̀ nyì ke èkyî èpomə zɛ ə Luîs, nyìə nɛ̂, yî Yunìs nɛ̂ tè kyi. M lote ke ndò səmɔʼ nə ò kyi kepî ndò kyî epomə̂ nə zɛ.

1 Timotì 5:25

E za nyi kepî èghɨ kə ghɨ nə̂ chùŋ, è zâŋsə̀ panə ə ndayn, mə è tàʼa payn nâʼàpî ashìŋə̀ nə kɛ, ə ze ə tɛ kə ə ndəte chùŋ ə̀təyn.

1 Timotì 2:10

Ə ghənə pɨlə fɛtə̂ sengɨŋ sə ghənə̂sè è ghɛ ə chûŋ ghɛ ə ghənə nə̂, kûmə̀ nə ə̀ nyi eghɛ echûŋzè se zəyn ghɛ ə nyi mə ə pomə Zhə̀fè sə̂ nə̂.

Kòlosè 1:10

Zɨnə mə tə nə̂ ə ndam zaynze ə nyi kə ndam ə ghɨ̀ ə Fezhə̀zè kyi sə̂ nyi. Ghàyn tə nə̂ ə nə̂ ə̀ghɛ ghɛ ə ghe nə nə̂ vəyn è ve saŋnə̂. Ghàyn tə nə̂ ə nə̂ kə ə̀ghɛ ə chûŋghè. Ndom vɛ ə ghàyn tə ke Zhə̀fè ətəyn tə nə̂ ə ve ə ndəmə̂ nduə kə èshike.

Ɛfesùs 2:10

Ghâsènì nyi efɨaʼ ə Fezhə̀ zə ghoze. Fe fɛtə̂ ghâsènì tɔynə̂ ə Klâys Njisə̀s nə ghâsènì nə ndamə èndam echûŋ zɛ ə è tè se nyi mə è və tè pɨaʼtê ndəm nə ghâsènì ə ndamə.

Ətefɨ̂aʼ 22:12

Wùə vîvè tè nyîə nyi fumə endaʼ zə vəynze nyi Ànàniyàs, ə̀ nyi wùə Fèzhə̀ ndəmə̀ àlâŋ, nâʼà ə̀ghɨ ə Njûs ghɛ ə tè ndamə fumə e kɔʼsə̂ vəyn àchûŋ.

Ətefɨ̂aʼ 10:22

Ghɨ ə təynghe ə pìə nə, “Ghàs nyi mə ə̀ tom Kɔ̀nilùs, àtuə sesokə̀ʼa. È nyì ke nâʼà wùə chichi, fɨaʼà se Zhə̀fè, ghɨ Njûsghè əkɨ̂m nyîə ngɨmnə̂ vəyn. Tsì ə̀ Fèzhə̀ zhîzè pì sê vəyn nə, è tom tɔŋɔ ghò ə ò pəyn ə və ə ndɛ kə è zɨ ghɛ zɛ ə ò kyi se tsàyn se vəyn.”

Ətefɨ̂aʼ 9:39

Pità ə pɨaʼtə̂ ə ndùə yighə̀ ghənə, ə pə̀ kə è ndù tâyn fumə, ghənə ə njìə kɔʼɔ è vəyn ə lûm ə̀ ndɛ èkwùtwəyn. Zhwiə kwuə nâʼà ə̀kɨ̂m fu ə zùŋtə̀ ka ə və ngwùŋ, chîə tyə̂yntə̀ sendzɨs sə ghənə̂sè, è laf əmɔ̀ʼɔ vɛ ə Ndokàs tè tàsə sê ghənə kə è tè pa nyi ètwɔ.

Ətefɨ̂aʼ 6:3

Ghàs piə sê ghàyn ə ghɔnyìə ghasə nə, ghàyn chɔʼ ghɨghe əsɛ̀mbɛ̂ ə ghayn əfètəyn, ghɛ ə ghe kyi ndam èchùŋ, è tɔf eghaʼâzè è Zuʼse Ŋwaʼase e fɨnə chisə̂ ghənə kə ghàs fo fɨ̂aʼ zɨ̂nə̀ sê ghənə.

1 Timotì 5:16

Ə̂ se nyi nâʼàpî wùzhɔyn è pomə èkwə̀, kyi ə̀ zhwiə kwughe ə vəyn esas ə ndɛ, è və tɔ̂ʼnə̀ è ghənə. Kə è zɔʼ chîə təyn zə ghɨə poməghe ətu. Ə ze nyi nyî ə ndɛ̂ Fèzhə̀ ə tɔ̂ʼnə̀ kɔʼɔ kə è zhwiə kwu ghɛ ə ghe kyi va ghɨə kə ghə tɔ̂ʼnə̀ è ghənə.

1 Timotì 3:7

Ə̀ kyi sə̂ nyi wùə, mə nâʼà ghɨə mɔʼɔ ghɛ ə ghe pa tsɨs ndɔʼɔ pomə naynə̂ vəyn, è ve kɔʼnə̂ kə ghɨə tə tàʼa ghomsə vəyn, ə è pfɨ ə ndə̂plè atam.

1 Timotì 3:2

Wùə è chisə ə ndɛ ə̀ Fèzhə̀ kyi sə̂ nyi wùə mə ə chîə ngaynə̂ va vəyn, è kyi sə̂ kyi ke wùzhɔyn emɔ̀ʼ, nə̂ va ghɛghe tsɨ̂ə tsɛ àndiŋ, nyi kàʼa è kyi ngɨŋə̂ vəyn, ngɨmnə̂ ngɨŋ ə vəyn, tɔ̂ʼnə̀ è ghɨ ə motə pə, fɨyn ke sə zaʼlə̂ nâʼà àchûŋ,

Matyò 25:17

Kèpî famə endom, vɛ ə è tè fi kamse pɛ̀ ə kyîə kwəynsə̂ sèkam səmɔ̀ʼɔ sepɛ̀.