Romu 12:6 - Ka Lamana'a Monoꞌi Lu Mu Tifiꞌehina Ka Yabe

⁶ Ya hu'ehina'mu Hu'mau lehe'moto fato fato lili'na limi'ehina. Ya huto limi'ehina'mu kehelise'natilo lili'na liluta bati hilibe. To folaganuguti kene'i moneuba mono ka lu yege hose lili'nalo minoto'a Hu'mau emi'ehina keheli ule'ale huse'nalo yamofihi mono kaga lu yege hoto minalibe.

Romu 12:6 Referans Kwoze

1 Koliti 7:7

Nani komopa'niuba ma luto nolibe: Nani nohuna suhi hite kofuta minalanamoya. Ya hu'ehina'mu Hu'mamofihi amuya'auba fato fato suhi huto lele'mo huto hu'ehina yamofihi kapo'a fato fato suhi huto ya suhi ma suhi huto ni'ibe.

Romu 12:3

To Hu'mau nele'mo hetofa hu'ehina bo noho lifi'ehigo nani ma kaga mone lu nolepube. Hu'mau keheli ule'ale huse'i fato fato'i guna ito lepi'ehina. Ya'mu lenali lenugufatini limo titi mehilo. Lenalitini be ligite kehelinogo mone'a hiti metilo. Hu'mau mono ka limi'ehinamofihi keheliya ite minete hapatini le'mo eto eto hite minalabe.

Romu 1:11

Nani ya'ma huto bu lenagaluna sipi laga'ni nonebesibe. Nani mono ka mone'a hiti lepilenogo amuya melete minalabe luto bilube'mu nokehelube.

1 Koliti 13:2

To nani Hu'mamofihi ka lu huto huto hulata bo lolo huto huto'ni Hu'mamofihi suguna ka'a yamofihi keheli su ho'ohuto'ni to Hu'mamofihi kamofihi nekisa mokisa'a hiti keheli su hoto nohuto'ni to nani linogo kosa mone li sibi hu he'milibe luto keheli ule'ale hu'ohuto'ni niginaga mefise fa'mene minotita fa'menena lolo hutine.

Efeso 4:11

To hetofana limi'ehinamofihi hapa'a ma ni'ibe. Kilisitou lehe'mose'na'a fato fato'na limi'ehina ni'ibe. Lali luga'a aposolo lele'mo molo'ehinamo ni'ibe. To luga'a ai ka'a lu yege holata bo, to luga'a ya'ma ai'a ka leli'ali bo, to luga'a babafi minete ya'ma ka lamana'a lu ha'i fise bo, to luga'a mono kaba bo, lele'mo molo'ehinamo ni'ibe. Ana fato fato lili'nalo lehe'mose'na'a limi'ehina ni'ibe. To hena'mube? Lali Hu'mamofihi bona'a nohutamagita lili'natilo lele'mo amuya nohutamagita lele'mo hofa to su halibe luto yabe.

1 Koliti 14:1

Ya hu'ehina'mu lenali bona'i leniginaga fi epelete enehe'malune lite nelitemo amuya malalo. To analo'i Hu'mamofihi Sikalafu'a nolepina amuya luga'a lilune lite nelitemo amuya malalo. Ya hite nehite Hu'mamofihi bagaguti ka'a lu huto hilata nasana'muko kehelinogo tino.

2 Koliti 8:12

Komopatinigu keheli bati hite kefa malalana ya'ma Hu'mau kehelinogo bati hilube'mu hibe. Lali memolo'ehiluta legegeto ni'igopa ana'ina molo'ohuta babeyafalo melenogoti Hu'mau bu gago bati hulata nohibe.

1 Tesalonika 5:20

Hu'mamofihi bagaguti ka lu'ehina kehelinogo ya'ma melimino.

1 Koliti 14:29

To Hu'mamofihi bagaguti kaga ya'ma bona'i loemofi, loebe monebefi enali lu huto hite lilune'mu nehinogomo, luga'amagi enali nekehelite kaga'ani loko hite kehelilana'a legeso hite minalabe.

Aposolo 15:32

Yutasiugo Silasiugo etali kaga lu yege holatamale'i kaga yatamalo lu epite enalalu'anigihi koli mehilo lite enele'mo amuya mele'aha'ina.

Aposolo 2:17

Ya'ma suhi kokuluma hiti me'i hiti su halina yupahi li huto hiluna'mu yabe luto Hu'ma lu'ehina: Nani Sikalafu'nimofihi amuya'a asaga boanatoga molo baga iluna'mu yabe. Lenali panatinimagi to patinimagi hiti enali lu huto huto bona suhi lite kaga lu yege halana'mu yabe. To nani fato fato'na neheya kola botinimagihi enali enubulo li huto hiluna'mu yabe, to oyafatinimagi bamu'i nani hu enubulo malaluna'mu yabe.

Filipai 3:15

To lali asaga'i, Hu'mamofitoga mino ule'ale hulata nohuta bona'magita ana suhi luto minomo buto minalune. Kaga nolunamofihi kehelinogo kapo'a fato suhi nohinogomo Hu'mau ai li fana telenogo yamofihi keheli bebe salune'mu habe.

Efeso 3:5

Suguna kamofihi hapa'a ya'ma koyapa'i mine lite bi'ahana bona'i enalitoga huto mehu'ehinamo ni'ibe. To yatai ka lamana'a lu yege hose bo to hetofa aposolo bona'i enalitoga Sikalafu'uba ana suguna kamofihi lu hokolo huto lu epilata nohibe.

Aposolo 13:1

Atioki hepalugu Hu'mamofihi kaga'a mege'i melete neminana boana'magi folagaha'anigu kaga lu yege holata bo luga'a hiti to kaga enelepise bo hiti mine'ahanamagi enigi'ani Banabasi yagi Simioni fato gi'a Nupa Bo yabe lilata hana bo yagi to Lusiu, Sailini hepato bo yagi Manaeni ai Helotihi gamanilo hofa to'ehina bo yagi to Soliu yagi hite mine'ahana yabe.

Luku 11:49

Ya hu'ehigo koyapa'i Hu'mamofitoga kaga kehelise'na'a bati huto ni'igo ai ma luto lu'ehina yabe: Nani lu huto huto bona'i hiti kaga lu yege hose bona'i hiti enalitoga enoho lifinogo nehetilenogo bona'magi enegene mane inogo luga koli nefelenogo luga'a enahalabe.

Matiu 23:34

Ya hu'ehinagi lenali kehelilo. Nani kaga lu yege hose bo luga'a hiti, to lataha'anigu kaga bati huto ni'ilina bo hiti to mono ka keheli bati hi'ahana bona'i hiti lenalitoga enoho lifinogo'ni bilana'mu yabe. Enali folagaha'aniguti luga'a enoho fililabe, to luga'a malipu yafalo enahalabe, to luga'a mono nohatinigu nehinogo naga osatu'i enibi yigilana'mu yabe. To lenali mone hepatoti enele'mo he'minogo fato hepalugu netinogo enegene mane ite enele'mo fato hepato malalana'mu yabe.

1 Koliti 14:24

To Hu'mamofihi bagaguti ka'a bati huto lu huto huto nehinogo, Hu'mamofihi mekeheli'ehina bofi, fegutoga nehana bo moneuba lenalitoga tito ka kehelilube'mu hibe. Ya hilinauba ya'ma asagato foipana'amofihi hapa'a lu huto hi etete ka foyagu le'mo malalana'mu yabe.

Aposolo 21:9

Ai pa'a yafana'i loebe loebe ana hite Hu'mamofihi kaga'a lu yege hose nehana enali anaga mine'ahabe.

1 Koliti 3:5

Lenali lali'i henabe lite loko hilata nehabe. Apolosi hiti Polu hiti le'ali fa'mene Hu'mamofihi koko pana'amale'ita Sipi Bouba lilina ka lu le'eto'ehina'a huto ka lu lepito nohu'igo ai kumu agoya hu emi'ahanamo ni'ibe. Hu'mau le'emi'ehina lili'na lilu'ina ni'ibe.

1 Koliti 12:18

Yamofihi ya huto meni'ibe. Hu'mau ya'ma ai'a ekesa keheli fe luto lugufamofihi kele kele'a asaga'i ya'ma foyaga fato fato'mofihi enele'mo tulu hu'ehina.

2 Pita 1:20

To kana'a mone ya lite kehelite keheliya ilo. Lu huto hu'ehina ka mone mono bukugu fayahi keye mele'ahana yamofihi hapa'aya bona'i luga'amagihi enali komopa'aniguti kehelilete nelanamofihi meni'ibe.

Matiu 25:22

To 2,000 kina sipi bo'auba emi'ehina bo ana huto o'ehina. Ai ma luto lu'ehina: Sipi bo, kai 2,000 kina nimi'ahane. Bu gobo, nani bisinisi moloto'ni 2,000 kina mone'a hiti molo emito li'ohube.