Matiu 4:23 - Ka Lamana'a Monoꞌi Lu Mu Tifiꞌehina Ka Yabe

²³ Yesu Galili kegi'a minomofa'na huto mono noha'anigu tiloto boana'i mono ka lu epila to Hu'mamofihi Kapo'a kumu kaga lu epila nohuto to boana'i enebesi'ehinana li he'mi epolola to enigi enayahi sibina hula ya hula hu'ehina bona'i enele'mo bati hu'ehina yabe.

Matiu 4:23 Referans Kwoze

Matiu 9:35

To Yesu asaga hepatoga bego humofa'na hu'ehina. Ya huloto asaga boana'i mono noha'anigu lu enelepito Hu'mamofihi ka lamana'a lu noepito to enebesina boana'i enele'mo ye nokoto to enugufagu ketana nina li he'mi epolomofa'na hu'ehina yabe.

Maki 1:39

Ya luloto buto asaga Galili kapogu bego bego huto mono noha'anigu tito ka lu noepito, to foipa fele li he'mi epololata huto mino'ehina yabe.

Aposolo 10:38

Yesuhi Nasalete bomofitoga Hu'mamofihi Sikalafu'auba amuya emi'ehinamofihi lenali nekehelibe. Ai asaga kapoga bula ola huto hetofa suhi huto Satau naga'i epi'ehina bona'i enele'mo gulu ho'ehina. Hena'mugope Hu'mau ai hiti moneka nohigo yabe.

Luku 7:22

To Yonihi koko pana'amale'i ete loka hana kalo Yesu ma luto lu etimi'ehina: Letali he'mite bite Yonihi letali bu negago lolo nohunana to letekesatu keheli'aha'inana lu emiliyo. To enubu sibina hina bona'i i gili habe. To enigi enayahi foipa lana bona'i kapo malabe. To hehe bona'i enele'mo gololo tugo babe. To negi bona'i enekesa hokolo higo kaga kehelibe. To fili'ahana bona'i aku'i ya ho ti kosaba habe. To ana huto Hu'mamofihi hetofa ka'a enumuhi menina bona'magi nekehelibe.

Matiu 11:5

Enali enubu pisi lina bona'i aku'i enubu'ani i gili higo asaga'na bu negabe. To enigi enayahi sibina hu'ehina bona'i kapo malabe. To ililogo bona'i enele'mo gololo tugo babe. To enekesa hekini lana bona'i enekesa li hokolo hugo kaga kehelite babe. To fili'ahana bona'i aku'i ho ti kosaba habe. To fe'noha'ani menina boana'i ka lamana'a kehelibe.

Matiu 13:54

To ai hepa'aga i behe huto buloto asaga boana'magihi Hu'mamofihi mono ka'a enali mono noha'anigu lu epi'ehina yabe. Ya nohigo enali topa helete ma lite li'ahana: Ya'ma bouba kaga keheli bati huse'na'a hiti to topa hose'na li huto huse'namofihi ka hapa'aba hiya'agati li'ehibe?

Maki 1:21

To enali Kapaneami kapogu bite nehetigo yalo fuli yupapogu Yesu mono nonugu tito kaga enelepilube'mu nohuto mino'ehina.

Romu 10:15

To Hu'mau kaga'a lu yege hose bona'i ho melifinogo kaga tili tele mehinogo kiyi'afu ana kaga lu enelepilibe? Yana'mu mono bukugu fayahi ge'ahanamo ni'ibe: Enali kapo melete hekili hekili hite hetofa kaga'a lite neana bona'magihi enigigusalo soso hu epoloto gepohi lilune.

Luku 8:1

Aliha'a nesi'a minoto Yesu sipi hepa'ifi to lagaso hepa'i ninalo ninalo bula ola huto Hu'mamofihi kapo'amofihi hetofa kaga'a boana'i enalitoga lu epimofa'na hu'ehina yabe. To nayahi luga luga su hoto nigigusagati loemo heleko malago hite Yesuhi koko pana'a minana mege'i melete bi'ahana yabe.

Maki 6:2

To fuli yupapogu Yesu mono nonugu tito nominoto kaga hapi fito lu epito nohigo, enali kehelite otopa hete ma li'ahana: Akae. Ya'ma ka kiyi'afu lu emigo nolibe? To keheli fe luse'namo hiyagati kehelito nohibe? To ai mana hepato bo nohinaya ya'ma topa hose foya lise'namofihi amuya'a hiya'agati li'ehibe?

Matiu 24:14

To Hu'mamofihi kapo'amu luto ka lamana'a ya'ma asaga noto noto kapoga lu yege henogo asaga boana'i kehelilete fato fato hepalugu bai toto ana kana'a su halina'mu yabe.

Matiu 12:9

Yesu hepa'i he'miloto buto li gehesa hite minelata nehana noha'anigu ti'ehina.

Yoni 18:20

Loka hago Yesu lu emi'ehina: Yege yege yupahi nani kaga'ni asaga boana'magihi lu epilata nohuto ya nasanamofihi fala meki'ohuna. To Yuta bona'i asaga li gehesa mono nonugufi to sipi mono nonugufi analo kaga lu epito nohuto suguna kaga lu meepi'ohuna.

Luku 13:10

Mone fuli yupahi Yesu mono nonugu minoto bona'i mono ka lu enelepi'ehina.

Luku 9:11

Yege yege bona'i Yesu ya huto nobibe lana'a kehelilete mege'i lifite bi'ahana. Ai enebe tigito Hu'mamofihi kapo kumu'i kaga lu epito epesi'ehina bona'i enele'mo ye ko'ehina yabe.

Luku 5:17

Mone yupahi Yesu boana'i kaga lu epita minanalo keya ka tisa bo to Felosi bo mine'ahana. Enali asaga hepatoti Galili to Yutia kapoguti to Yelusale hepatoti e'ahana. To Hu'mamofihi amuya'auba Yesu hiti minago enebesise bona'i enele'mo bati hu'ehina yabe.

Maki 6:6

Enali aitoga keheli amuya memelese komopa'ani ule'ale higo, Yesu topa hoto enali kumu ipagu gabu'i gi'ehina yabe. To anagati he'mito buto lebato hepatoga asaga'i bego bego huto buto ka lu enelepimofa'na hu'ehina yabe.

Maki 3:10

Ai epesi'ehina bona'magihi babu lite enele'mo bati hu'ehigo, yalo epesi'ehina bona'magi yege yege'na aitoga aku'i li gehesa hite, aimo bako hilune lite'ani aitoga ikini ikini hite li gehesa hi'ahana yabe.

Maki 1:14

To alihi Yonihi naga nonugu le'me mele'ahago, Yesu Galili kapogu nehetito Hu'mamofihi kapo'mu ka lamana'a lu yege nohoto ma luto lu'ehibe:

Aposolo 20:25

To ka mone hiti lu lepilugi keheli'ehilo. Lenali okaba'ni aku'i be megalabe. Nani lenalitoga bula ola nohuto ya'ma Hu'mamofihi Kapo'a kumu'i lu hokolo hu letoto humofa'na hu'ohuna bomofita okaba'ni alihi be megalabe luto akeheli'ohube.

Aposolo 18:4

Ai asaga fuli kana'alo Yuta bona'i li nupa hite mono kaga lu keheli fa keheli hilata nehana noha'anigu tiloto Yuta bona'i hiti to Giliki bona'i hiti Yesu Hu'mamofihi lusi pana'a huto hu'ehibe, luto kaga lu epi'ehina.

Yoni 6:59

Kapaneami hepato bona'i li gehesa huto mono kaga lu kehelilata nehana nonugu Yesu asaga kaga ya'ma enelepi'ehina yabe.

Luku 10:9

Lenali yana hepato enebesi'ehilina bona'i enele'mo ye kelete ma lite lu epilo: Hu'mamofihi Kapo'a hokolo hilina kana'a anasi lenalitoga a'o leba notabe lite lu epilo.

Luku 6:17

To Yesu enali hiti limito me'i kuguma hinalo koko pana'a luga'a hiti ho ti'ahana. To babu boana'i Yutia kegi'ati to Yelusale hepatoti yagi to Taiya nagami beletoga bona'i yagi to Saitoni hepato bona'i ete mine'ahana yabe.

Matiu 14:14

Alihi Yesu nagami beletoga keheto buloto babu boana'i nehago bu enogo'ehina yabe. Ya hago ai ginaga fi epiloto enebesi'ehina bona'ani enele'mo bati hu'ehina yabe.

Matiu 13:19

Asaga bona'i enali hetofa kaga kehelilete enali enekesa yigi bati menehana Satau hololu luto enalitoga nehetiloto enalilugu Hu'ma hetofa kaga nohekalana komopa'aniguti li he'milata nohibe. Ya'mamofihiya ai nose'na legeya'a kapogu limo koko nohinamofihi hapa'a yabe.

Matiu 3:2

Komopatini i gelehe hite foipanatini he'mi su halo lu'ehina. Hu'mamofihi kokulumalugu kapo'a hokolo hilina kana'a epi'ehina.

Yoni 7:1

Ana kaga su holago Yesu Galili kegi'a kapo moloto bu'ehina. To Yuta bona'i Yutia melugu nehanamagi kofohi legete ho fililune li'ahana'mu luto ana kegi'a mebu'ehina yabe.

Luku 20:1

Mone yupahi Yesu boana'i sipi mono nonugu enele'mo nupa huloto kaga lu epito to ka lamana'a lu epito nohigo enali sipi mono noto kaba hi'ahana bo yagi enali keya kaga keheli bati hulata bo yagi to asaga boana'magi kaba bo'ani yagi enali asaga'i Yesutoga ete ma lite loka he'ahana:

Luku 4:14

Yesu Galili hepatoga i gelehe huto nobigo Hetofa Sikalafu'mofihi amuyana'auba ai hiti bu'ehina yabe. To ai hu'ehinanamofihi kaga'a asaga hepatoga bu baga i'ehina.

Luku 6:6

Mone fuli kanagu Yesu mono nonugu buto tito mono ka boana'i lu epi'ehina. Ya nohigo bo mone yahi lamaga'aga sibina hu'ehina bo mino'ehina.

Luku 7:21

To ya'mana yupahi Yesu babu boana'i fato'na epesi'ehina enele'mo bati hu'ehina. To foipa fele babu lito komopa'anigu mino'ehinana li he'mi epolo su ho'ehina. To enubu mone kegi'a sipina hu'ehina bona'i babu lito enubu'ani aku'i li gili hu epolo'ehina yabe.

Luku 9:60

Yesu ma luto lu'ehina: Kai he'mitogo filise bona'i suhi hite komopa'ani menimise'namagi fili'ehina bona'i keli halabe. Kai buto Hu'mamofihi kapo'a kumu lu yege homofa'na hubo, luto Yesu ana bo lu emi'ehina yabe.

Luku 16:16

Mosehi keya kaga'a hiti to lu huto huto bona'magi kaga keye'ahanana hiti Yonihi kanalo mino bati hu'ehina yabe. Ya hu'ehina Yoniu minana kana'aloti oto oto yatai ya'ma yupahi Hu'mamofihi ka lamana'amofihi kapo'a asaga hepatoga huto nohibe. Ya nohigo asaga bona'i amuya melete peninite Hu'mamofihi ana kapo'alo li hokolo hite bilune'mu nehabe.

Aposolo 28:31

Ai Hu'mamofihi kapo'amofihi kaga'a lu yege ho epito Sipi Bo Yesu Kilisitohi kaga'a enelepito amuya kaga lu epilata higo bo moneuba kaga'a mone i laga mehu'ehigo Polu anaga mino'ehina yabe.