Matiu 13:23 - Ka Lamana'a Monoꞌi Lu Mu Tifiꞌehina Ka Yabe

²³ To nose'na legeya'a me'i bati huto giliba'a hiti me'i ninagu limo ilata nohinamoya ma huto ni'ibe. Bo moneuba mono ka keheliloto ekesa yigi bati hu'ehina supo huto ai nose'na'a samahi tito li huto hulata nohina'a ni'igo to bo moneuba babu lito li huto hulata nohina'a ni'igo to bo moneuba nesi'asi lito li huto hulata ni'ina yabe.

Matiu 13:23 Referans Kwoze

Filipai 1:11

To ana kanagu Yesu Kilisitou lenehe'menogo komopatini bati bati hite minelenogo bona'magi bu lenegete yege nofune lite Hu'mamofihi fokeha'a lilana'mu yabe.

Yoni 15:16

Lenali nani'i ya'ma nele'mo eto menehabe. Nani ya'ma lenele'mo eto hugo lenali bite legeya'i li huto hilenogo amuya moloto minoba minoba huto minalibe luto lu lepolo'ohuna. Ya hilete nani nigi'ni kehelite ana'ina henana'mufi Afo'nifitoga buka tilana'alo lepilube'mu hibe.

Matiu 12:33

To yafa moneuba bati huto mesebe lele tele huto tiloto legeya'a bati huto sipina holata nohibe. To numutopa loto tilata nohina yafauba legeya'a ana huto ho foipa lolata nohibe. To bona'magi yafa legeya'alo belelete be gelete ya yafaya bati huto notinagi lila to numutopa loto notinagi lila hite li kehelilata nehabe.

Matiu 13:8

To luga'a nose'na legeya'a enali me'i foba huto nogoya hina melugu limo ilata nehabe. Ya hite tilete, enali legeya'a bati hite helata nehabe. Luga'amagi babu lite yafa ho figi gite legeya helata nehabe, luga'a nesi bati hite helata nehabe, to luga'amagi loefi monefi hite helata nehabe.

Kolose 1:6

Ana ka lamana'auba lenali keheli'ahana kagauba buto asaga melugu bonatoga nehetito i futili huto enele'mo bati nohina yabe. Ana kaga hapa'a ma ni'ina. Hu'mau foipa bona'magihi enele'mo bati hulata bo nohibe. Lenali yata'a kehelite komopatini i gelehe hi'ahana supo hite fato fato bona'magi yatai ana hite hetofa kaga'a kehelite neminago Hu'mau lusa gi epololata nohibe.

Matiu 3:8

Lenali komopatini i gelehe hilete yalo etonaguti mineme binogo buto komopatini i gelehe i baga ilibe.

Luku 13:9

Ya hu'ehinogo mone kufu kanagu legeya'a halifi bu goloto menohenogomo kai ana yafa hetigilane, luto foya kaba bo'auba sipi bo'amofihi lu emi'ehina yabe.

1 Yoni 5:20

To ma luto mone'a hiti keheli'ohune. Hu'mamofihi pana'a ai'a melugu limito keheli fe lulata'na li huto hu limi'ehinamo ni'inaya, Hu'mamofihi lamana'amofihi hapa'a keheliya ito kehelilata nohune. To Hu'mamofihi ka lamana'alo i segito ya'ma pana'a Yesu Kilisitohi nosipenuga minoto lito nohune. Ai'a ya'ma Hu'mamofihi lamana'a to minoba minoba huse'namofihi afo'afu nohibe.

2 Pita 3:18

Ya nehite Sipi Botiuba lubuto bilata nohina bo, Yesu Kilisitohi lenehe'mose'na to ai hapa hapa'a keheli hokolo hite kehelise'na hiti lenalitoga minenogo yamu'i hofa tete minalo. To ai fana meha'auba minoto minomo buto yatai ana suhi huto mino lito buto mino bai toto mineno. Ma'naka.

Kolose 1:10

To yalo lenali asaga yupahi aitoga minete hetofana hite neminenogomo Sipi Boti ai lenofokehi lilina'mu yabe. Ya'ma le'ali loka noho'ibe. To lenali asaga yupahi Hu'mamofihi lagamo keheliba keheliba hite minete, to bona'i enehe'malata ya'ma hetofa lili'natini fato fato'i yamofihi legeya'a babu luto hilina ya hinogomo Hu'mamofihi hapa'a keheli bati hilete hetofana suhi hite minete ya hilabe luto loka noho'ibe.

Hibulu 8:10

Koyapa kana'a bulago alihi Isilaeli bona'i enali hiti ma luto ka'a lu mu tifilube'mu nohube luto Sipi Bouba lu'ehibe. To nani lu laga huse kaga'ni enegekesagu melenogo'ni minalina'mu yabe. Ya huloto komopa'anigu fayahi koyo melenogo minalibe. To nani Hu'ma'anifita lolo huto minalugi enali yagapana'ni lolo hite minalanagihe.

Hibulu 4:2

To ka lamana'a enali'i lu epi'ehina'ago huto lali'i lu limi'ehibe. To enali ya'ma ka'a kehelilete komopa'anigu li memalago limito keheli ule'ale hite memino'ehina to enalitoga futu'ago mino'ehina yabe.

2 Tesalonika 2:10

Ya huloto bona'i luga'a faga faga nasana babu luto yamofihi fato fato suhi foipanamofihi nasana lito enimi'i moloto logo hepatoga enele'moto bilibe. Enali ka lamana'amo kehelite lagati melebesibe lite enemegesa hi emi'ehinogo Hu'mau ana huto enubuto mebilina'mu yabe.

1 Tesalonika 4:1

Lalalutigita, Sipi Boti Yesuhi ai gi'alo lenegekesa lito ka mone lu lepilugi kehelilo. Lali Hu'ma kehelito lenofokehi lilina hapa'a alenelepi'ohuta yagi ana suko neminana keheli'ohutaya to lepiba lepiba ka mone hiti amuya melete mege'i malalo luto nolune.

Filipai 4:17

Nani ya'ma fe'nohi nimilabe luto noluna ka meni'ibe. O'e, nimi'ahanamofihi legeya'a lenalitoga huto huloto mino lito buto tilibe luto nolube.

2 Koliti 9:10

Hu'mamofihi ai'a biha'a nasana li huto hu limigo hekolo'ohuta anamofihi legeya'a silaga'i huto higo lito minoto ho tito nohune. Ai'a lenali hiti minoto bigaha'a li huto hu lepi su holoto lusa gito le'mo napa hulenogo enehe'mose'natini yamofihi legeya'a mino bai toloto i futili huto minalube'mu hibe.

Aposolo 17:11

Enali Yuta bona'i Belia hepalugu enegekesa hokolo nehanamagi hetofana hite koyone hi'ahana. To luga'a Yuta bona'i Tesalonika nehanamagi suhi lite memine'ahana. Enali Belia bona'magi ka'atiti keheli bati hite laga'ani epesigo asaga yupahi mono buku'ani hiti lite e'ehite Polugo Silasiugo faga lila'ifi ma'naka lila'ifi lite leka so bati hite bu golata hi'ahana.

Aposolo 16:14

Ya'mana analuguti mone a'mofihi gi'a Litia yabe luto nohinauba kagati keheli'ehina. Ai Taitaila hepato a'uba safa guketelo bisinisi nomalana a'i yabe. Ai Hu'mamofitogago agoya hu emito nominana'mu luto Sipi Bouba ekesa'a li hokolo higo Polu lina kaga keheliya i'ehina.

Yoni 8:47

Enali Hu'mamofihi pana'amagi asaga kaga'a kehelilata nehanamo ninaya aku lenali Hu'mamofihi pana'a menehabe. Yamo'mu lite nani ka'ni keheli menenimibe.

Luku 8:15

To nose'na biha'a me'i bati huto nogoya'a ninalo limo ito bati huto tinamofihi hapa'a ma huto ni'ibe, bona'i enali ka keheli ule'ale hite lilete amuya melete minago enaliluguti nose'na biha'a huto huba huba hulata nohibe, Yesu ya lu'ehina yabe.

Maki 10:15

Bo moneubafi moneuba lagaso yagapana'mofihi suhi huto Hu'mamofitoga agoya hu emilina bouba, ai Hu'mamofihi kapogu tilina'mu yabe. To bo moneubafi moneuba lagaso yagapana'mofihi suhi huto Hu'mamofitoga agoya hu meemilina bouba, ai Hu'mamofihi kapogu metilina'mu yabe.

Maki 4:20

To hetofa melugu limi'ehina'a ya'ma ma hise bona'i nehabe. Enali kagamo kehelite komopa'anigu li nemalabe. Ya nehago kagauba komopa'anigu tito legeya nohabe. Mone 30 hoto, mone 60 hoto, to mone 100 hoto nohabe. Ya'ma fono kamofihi hapa'a ya ni'ibe. Yesu ya luto lu epi'ehina yabe.

Matiu 3:10

Luhi loloba huto yafa hapa'alo ni'ibe. Asaga yafa legeya'a mehalinamofihi hetigi su hoto logogu genogo logouba lo su halibe.

Hibulu 6:7

Me'i monetoga ko'uba kana'amu kana'amu iba iba huto minoto le'mo gefa gefa noigo bona'magi foya lite nose'na he kelelata nehago nose'na li huto huto hu epilata nohinamofihi ya'ma Hu'mau lusa'amofihi legeya'a huto hulata nohibe.

Luku 8:8

To luga'a me'i nogoya hiti bati huto ninalo limo ina bati huto polo felana hofa toloto nose'na legeya'a babu luto legeya ho'ehina yabe. To Yesu molo emiloto ma luto lu epi'ehina: Kehelilo. Lenekesa ni'inogomo ya'ma ka keheliya ilo.