Aposolo 13:43 - Ka Lamana'a Monoꞌi Lu Mu Tifiꞌehina Ka Yabe

⁴³ To li gehesa hite nehana bona'i bila ela nehago Yuta bona'i luga'a hiti to fegutoga bona'i Yuta bona'magihi mono ka keheli'ahana luga'a hiti Polunogo Banabasinogo etemege'i lifite bi'ahana yabe. Ya nehago etali kaga lu epite enele'mo amuya melete Hu'mau lenehe'menogo ai yanugu minalo lite li'aha'ina yabe.

Aposolo 13:43 Referans Kwoze

Aposolo 11:23

Banabasiu ana hepato buto henetiloto Hu'mamofihi boana'a bati hite nehago bu enogoloto gelo sipi biloto bati hite nehanagi ana suhi lite fulunaguti koguna ite asaga komopatini Sipi Bomofitoga emite mino mana hilo luto enogo'na bi'ehina yabe.

Aposolo 14:22

Ya hilete etali Yesuhi kaga'a kehelise bona'magihi amuya melete mono ka lu epiba epiba hite li pili kalo lite lu epi'aha'ina. Ketana babu luto yata'a kofito bulototi alihi Hu'mamofihi kapo'agu tilune lite Polugo Banabasiugo lu epi'aha'ina yabe.

2 Yoni 1:9

Luga'amagi enali Kilisitou mono ka lu limi'ehinamofihi li pili mekese be ligite ka'a mone lilete li sibi hilana enali Hu'mamofihi lite enali'na lolo mehilana'mu yabe. Luga'amagi enali ya mehise Kilisitohi ka lamana'a kehelite lilete minalana yamagi afotifu yagi to pana'a yagi li pili kete lite etalitoga malalana'mu yabe.

Hibulu 13:9

To fato fato'namofihi kosaba kaga nelite li lenelepinogomo kehelite kaba hu bati hilo. Ana kagauba lamana kapo i pebisa hete nebinogomo enemege'i memalalo. Hu'mau lenehe'mose'nauba komopatini le'mo hetofa hu lepelenogo ya'ma bebe salube'mu nohibe. Nose'na nolatanamofihi mo silatanamofihi lu laga hi'ahana ka yanauba mone lele'mo bati mehilina'mu yabe. Yamofihi kapo'alo bi'ahanamagihi legeya'a mone li huto mehi'ahanamo ni'ibe.

Hibulu 12:15

Lenalitogati bo mone Hu'mamofihi lehe'mose'na li he'mito i behe huto bu laligi kaba hite minalo. Ya nehite komopatinigu ekesa'namofihi foipana moneuba leneme'na leneme'na bito lulata nohina ya suhi huto komopatinimofihi ekesa'nauba sipi hulenogo bona'i yege yege'magihi komopa'ani haya kolo laligi kaba hi epelelete minalo.

Kolose 1:28

Hapa'a ya huto ni'inagi le'ali Kilisito kumu luto kaga lu yege hoto leli huto buto asaga bona'i lu epilata nohu'ibe. Le'ali amuya moloto asaga bona'i lipoti epiloto to asaga kaga lu hokolo hu noepito hulata nohu'ibe. Hena'mube? Enali Kilisitotoga mino hepite bati nehinogo Hu'mamofihi bulo enele'moto bilu'ibe luto nohu'ibe.

Kolose 1:23

To lenali yatai amuya melete Yesutoga minete komopatini emite minete ka lamana'amofihi yata'a keheli ule'ale hi'ahana kamu'i li pili kete ya'ma legeya'a huto hilinamofihi geba hite kehelise'natini mopo mopo mehilata nohigo ya hite minalo. Ya'ma nani Poluita, ka lamana'a nasanamofihi kele kele bo nohuna, asaga bona'i melugu neminanamofihi ya'ma nani ka lu yege holata nohunamofihi, ya'ma kehelilo.

Filipai 4:1

Ya'mu komopa'ni lepi'ohuna nalalu'nigita komopa'niuba ya'ma lenali kumu mone'a hiti nonebesibe. Lenali foya'nimofihi legeya'a lolo hi'ahago lenali kumu negelo bilata nohube. Lenali amuya melete Sipi Bomofitoga hepite mino hetofa hite ai naga'i lolo hite minalo.

Filipai 3:16

Ya hu'ehinaya bu'ohuta Hu'mau lelepi'ehina kapo moloko bilune.

Efeso 2:8

Nekehelifiye? Hu'mau lali hetofa suhi huto minolatanatilo lubuto bina meni'ibe. O'e, ai'a ginaga fi leto'ehinalo agoya hu nimilata nehana'mu yabe luto lubuto bi'ehina ni'ibe. To ya'ma agoya hu emutana laliti meni'ibe. Ai Hu'mau fa'mene lele'mo ya huto hu'ehina yabe.

Galesia 5:1

Naga'i melepinogo minalabe luto Kilisitou ai'a gulu ho leto'ehinamo ni'ibe. Ya hu'ehina'mu bona'i luga'amagihi enali Mosehi keya kamofihi nagalugu aku'i lenele'mo melenogo kele kele'i hi etalabe lite nelinogomo o'e lite amuya malalo.

2 Koliti 6:1

Hu'mamofihi le'mo bati nehana bona'i lali lenegekesa lito ma luto lu lepilata nohune. Hu'mamofihi lehe'mose'na'a molo lepalalina buto fa'menena lolo mehino.

2 Koliti 5:11

Sipi Bomo lelesa nolinogo nohuta ni'ibe. Yamofihi keheli'ohutoti bona'magihi enegekesa lito ka lamana'a keheli emilo lu epilata nohune. Hu'mau ai hapati asaga'i bu golata nohibe. To lenali ana suhi hite hapa'ni ya'ma komopatinitu kehelilata nehafihe luto nokehelube.

Romu 11:6

Enali hetofa suhi lite mine'ahana bona'i nehago enele'mo'ehifiye? O'e, ai'a ginaga fi epolo'ehinalo enele'mo'ehibe. To hena'mube? Ai enali hetofa suhi lite mine'ahanalo enele'matita enali Hu'mau lusiga luto ginaga fi lepolo'ehifi ya mehu'ehifi lite mekehelitine.

Romu 5:21

To foipana'aniuba asaga bona'i kaba hu epolo'ehigo filise'namofihi nagalugu mine'ahana. To Hu'mau lehe'mose'nauba kaba hu letolenogo Sipi Boti Yesu Kilisitou Hu'mamofihi kapogu lelepito buto mino kosaba huse hepato lele'mo mololata nohibe.

Romu 5:2

Yatai ya'ma fulunagu minoto keheli ule'ale huse'namofihi ai'a kapo li hokolo hu letago Hu'mamofihi lehe'mose'nagu ti'ohune. Ya'mu luto Hu'mamofihi fana mehenagu bilune luto bu mego'ohutana geba hu'ohuta legelo bito nohuto lilune.

Romu 3:24

To Hu'mau ai pana'a Yesu Kilisito kumu lele'mo bati hu'ehina yalo nona'a emilutana'a meni'ibe. Ai fa'mene lele'mo bati huto foipanamofihi nagaluguti gulu fo leto'ehibe.

Aposolo 17:34

To luga'a bona'magi kaga'a keheli komopa'anigu melete mege'i mele'ahana. Ya hana bona'magi folagaha'aniguti bo mone Tionisiu ai Aleopagu kanisole bo hiti to mone a'i Tamalisi hiti to luga'a bona'i hiti ikelete mege'i mele'ahana yabe.

Aposolo 17:4

Luga'a boana'magi etali ka'atiti keheli komopa'anigu melete etemege'i mele'ahana. Giliki bona'i luga'a babu lite Hu'mamofitoga agoya hu emite mine'ahana bona'i ana hite, to enigihiti ana'magi ana suhi hite etemege'i mele'ahana yabe.

Aposolo 16:14

Ya'mana analuguti mone a'mofihi gi'a Litia yabe luto nohinauba kagati keheli'ehina. Ai Taitaila hepato a'uba safa guketelo bisinisi nomalana a'i yabe. Ai Hu'mamofitogago agoya hu emito nominana'mu luto Sipi Bouba ekesa'a li hokolo higo Polu lina kaga keheliya i'ehina.

Aposolo 14:3

Polugo Banabasiugo yatama kana'a Ikoniu hepato nehite amuya melete Sipi Bomofihi ka'a lu yege he'aha'ina. Ya ha'igo Sipi Bouba babeyafana lumofihi lumofihi fato fato'i topa hose nasana hiti li etayato higo li huto hi'aha'ina. To ya'mananauba ai fulu kaga'a lamana'a ni'ibe luto boana'i enelepilibe luto yabe.

2 Pita 3:14

Komopa'ni lepi'ohuna bona'ise. Lenali ana'ina ya suhi hana'mu geba hite Hu'mamofihi bulo komopatini ketipa ito fi fana toto gulu gulu linogo foipanatini meminenogo minalune lite aitoga bati hite amuya malalo.

1 Pita 5:12

Nani kaga ya'ma Silibanuhi'ya ka lu emi emi nohugo fayahi ya'ma koyoto nolepibe. Nani ai kumu ya'ma nokehelugo nalalu'nifu lamana'a lolo nohibe. Naniya Hu'mamofihi lehe'mose'na'a kehelugo legeya'a lolo nohina ya'mu lusi kaga amuya'a hiti lu huto huto lu nolepuna'mu luto lenogo'na bito lu nolepube. Ana lehe'mose'namofihi komopa'agu ule'ale hite minalo.

Galesia 5:4

Lenali luga'amagi keya ka kehelinogo foipanati meminenogo Hu'mamofihi bulo lamana bona'i nohune lite nelana lenali Kilisito hiti hepite mu tifi'ahanamofihi laga hilete nehago aitogati lenehe'mose'na'a nehe'mibe.

Aposolo 28:23

To enali kana mone melelete ana kana'alo babu bona'i ete Polu nohina nonugu li nupa hi'ahana. Etehi hapi fito Polu kaga hapa hapa'a lu epiba lu epiba huto nohigo buto yege limi foloto sinihi gi'ehina. To ai ana huto Hu'mamofihi Kapo'amu kaga'a le'mo bati huto lu epi'ehina. To ai kaga koyapa'i lu huto huse bomagi hiti to Moseu hiti fayahi keye'ahanamofihi lu yege ho epi'ehina. To ya'ma kaga'atu enele'mo amuya moloto komopa'ani li keta mehuse hinogo Yesutoga komopa'ani emite minalabe luto lu'ehina yabe.

Aposolo 17:17

Ya higo kaga lu keheli fa keheli hilata nehana mono nonugu tiloto Yuta bona'i hiti to fegutoga bona'i luga'a Hu'mamofitoga komopa'ani emite minelata nehana bona'i hiti kenasabo bilata hu'ehina. To asaga yupahi babu boana'i hepa'i folagaha'agu limo gehesa hite minete kaga lu keheli fa keheli hilata hanalo Polu kaga lu epilata hu'ehina yabe.

Aposolo 13:50

To Yuta bona'magi fegutoga ana'i enikibinamagi Hu'mamofihi ka kehelilata nehana hiti to hepalugu olopa bona'i hiti enekesa li baga ilete Polunogo Banabasinogo enegene mane hite etele'mo hepa'aniguti fegutoga mele'ahana.

Aposolo 6:5

Asaga boana'magi aposolo bona'magi lu huto hana kalo enegelo bi'ahana. Ya hilete Sitifenitoga Sikalafu'uba bai tana bo le'mo ho ti'ahana. To Filipiu yagi Polokolu yagi Nikeno yagi Timoni yagi Pamenasiu yagi to Nikolasiu ai Atioki hepatogati fegutoga bo Yuta bona'magi mono kagamofitoga komopa'a molo'ehina bo hiti enele'mo ho ti'ahana yabe.

Aposolo 2:10

Filigia to Pamifilia kegi'ati, Iyipi bona'i Libia kegi'a Sailini lebatoti yagi, lali Lomu bo maga oto nominota.

Matiu 23:15

Keya kaga kehelise bo hiti Felosi bo, lenali ehetinio. Lenali loe kaga lulata bo lenabaga kaba hilo. Lenali koko boti lilune lite mone bo ai mono kagatimofihi mege'i malalibe lite hege nagami beletoga to hepato hepato sa sa hilata bo yabe. Ya hite, koko panatini le'meletemo aku'i lenali logo kapolo lenalitini suhi lite le'mo melelata nehabe. Ya hu'ehina ai lenebege ligito babu luto foipana'a nominabe.

1 Yoni 2:28

Palala'ni pana'nimagitabe, lenali komopatini bati hinogo minete Kilisitou ai nehetilina kana'a huto hu lamana nohinogo koli mehise amuya melete nehago olenogo lubuya mehuse minalune lite ai'a komopa'agu minalo.

Taitasi 2:11

Yana'mu luto Hu'mau silaga bona'i enubuto bilube luto ya suhi huto lehe'malata nohinamofihi ali huto hu'ehibe.

Aposolo 18:7

Ya luto luloto Polu ho tito buto fegutoga bo mone gi'a Titiu Yasitasi ai Hu'mamofitoga komopa'a emito nominana bomofihi noha'a Yuta bona'magi mono ka beto hilata nehana noho lebato ni'igo anaga kete mine'aha'ina yabe.