Aposolo 1:5 - Ka Lamana'a Monoꞌi Lu Mu Tifiꞌehina Ka Yabe

⁵ Yoniu nagami lafatu'i boana'i nagami'i folo epolo'ehina yabe, Ya hu'ehina lenali yatama kana mebu'ehinogo Sikalafu'uba komopa'anigu tilina'mu yabe.

Aposolo 1:5 Referans Kwoze

Matiu 3:11

Lenali komopatini i gelehe hana'mu luto nani fa'mene nagamitu nofolo lepolobe. Ya nohunaya ai bo mone nani nemegesalo alina bouba ai Sikalafu'i to logo'a hiti folo lepalalina'mu yabe luto Yoniu lu epi'ehina.

Luku 3:16

Ya higo Yoniu kehelito ma luto lu epi'ehina: Nani fa'mene nagamitu'i nofolo lepolobe. To alihi bo mone alina ai amuya'auba nani'i nebe ligito amuya'ni hoto alina'mu yabe. To naniya bati huto gigusa su'amofihi naga li he'miluna'a huto meni'ibe. To ai Hetofa Sikalafu'i lepilina'a hiti to logo'a suhi huto mone hiti folo lepalalina'mu yabe.

1 Koliti 12:13

Sikalafu'i moneko'uba lalitoga limiloto mono kagu lele'mo nupa higo lugufamofihi suhi huto moneko'i lolo huto nohune. Sikalafu'i moneko'uba lali'i asaga'i mono'i folo leto'ehina lugufamofihi suhi huto moneko lolo huto minalune luto lele'mo nupa hu'ehibe. Ya higo lali Yuta bona'i to Giliki bona'i, kele kele bona'i to fa'mene nohuta bona'i lali moneko Hu'mamofihi Sikalafu'i lito komopatigu molo su holoto moneko'i lolo nohune.

Maki 1:8

Nani nagamitu okala hu lepolo'ohuna, to ai Sikalafu'i ho lifinogo komopatini okala huto le'mo bati hu lepalalibe.

Aposolo 19:4

Ya lite lago Polu lu'ehina: Koyapa'i boana'i komopatini i behe hilo luto lu epito Yoniu nagami'i folo epolo'ehina. To bo mone nani nemege'i noana bo Yesu, aitogago komopatini emite minalo luto Isilaeli bona'i lu epi'ehina yabe.

Aposolo 10:45

Yuta bona'i Hu'mamofitoga komopa'ani emise bona'i luga'a Yopa hepatoti Pitahi mege'i e'ahanamagi fegutoga bona'magitoga Hu'ma fokehena Sikalafu'i epina be gelete topa he'ahana yabe.

Yoni 1:31

Nani ai'i keheli bati mehu'ohuna. Ya hu'ohunaya ya'mana bo Isilaeli bona'i enelepilube luto nagami lafahi boana'i folo epolo'ohuna yabe.

Matiu 3:6

Ya hite foipana'ani aitoga pa sago Yotani nagamilugu nagami folo epolo'ehina yabe.

Yoni 1:26

Ya lite loka hago Yoniu ka'anilo nona'a ma luto epi'ehina: Nani fa'mene nagami lafatu nagami'i nofolo epolonaya folagahatinigu bo mone ho tito nohina bu mege'ahabe.

Yoni 1:33

Nani ai'i keheli bati mehu'ohuna ni'inaya Hu'ma ai'a nagami'i buto folo epolobo luto noho lifi'ehina ma luto lu nimi'ehina: Kokulumaluguti limito bo mone'mofito lataha'alo nominenogo bu galata bouba ai bona'magitoga Hetofa Sikalafu ho lifigo limilina'mu yabe.