1 Timoti 4:6 - Ka Lamana'a Monoꞌi Lu Mu Tifiꞌehina Ka Yabe

⁶ Keheli amuya mololata nohuta kaga'a to mono kaga lamana'a ya'mu luto buto i hepi'ohuta yanauba komopakamofihi legeya'a lolo huto ni'inogo kai ya'ma Yesuhu naga'a minanamagihi ya'ma lu nokumuna kaga lu epilane. Ya'ma lu epito enele'mo lamana hilata ya'ma Yesu Kilisitohi hetofa lili'nalo bona'a minalane.

1 Timoti 4:6 Referans Kwoze

Kolose 3:16

Kilisitohi hetofa hetofa kaga'a komopatinigu mineno. Keheli bati hite ai ka lepinogo ai ka lepinogo hite minalo. To Hu'mamofihi gepohi lite yege fise nama litetini to Sikalafu'i komopatinigu lepi'ehina nama litetini laga hina nama ya'ma lite Hu'mamofitoga ana nama asaga'i lilo.

Taitasi 2:1

Kaiya ya'ma mono ka lamana'amofihi komopa'agutiko bona'magihi lu enelepilata bati huto lu epibo.

Kolose 4:7

Lalalutifu mone gi'a Tikiku nani lenalitoga ho lifilube. Ai ana huto Sipi Botimofihi lili'na bo nohuto kosele'i mehose nehe'molata nohina yabe. Ai lenalitoga buto lali kumu lu lepilenogo kehelilete komopatini keta holatana'mu babahi huto higo lenali lenegelo bilabe.

Matiu 13:52

Ya lago Yesu lu epi'ehina: Ya hu'ehigo asaga keya kaga enelepise bona'i enali kokulumamofihi kapo'alo kaga'mu enelepise lite akeheli su he'ahabe. Enali sipi nohi mone'mofihi afo'a legi hite nehabe. Ai situa noha'agu tiloto yuhufana hiti tafana hiti li munu munu huto lito fegutoga limilata nohina suhi lite nehabe.

Yute 1:5

Lenali ya'ma ka'a keheli su he'ahanamo anamofipo aku'i lu lepilube'mu nohube. Hu'mau ai ya'ma ligiko lagako bona'i Isilaeli bona'i Iyipi metogati gulu ho epoloto to luga'a aliha'a aitoga meminese to agoya hu meemi'ahana'amagihi enoho fili su ho'ehinamo ni'ibe.

2 Yoni 1:9

Luga'amagi enali Kilisitou mono ka lu limi'ehinamofihi li pili mekese be ligite ka'a mone lilete li sibi hilana enali Hu'mamofihi lite enali'na lolo mehilana'mu yabe. Luga'amagi enali ya mehise Kilisitohi ka lamana'a kehelite lilete minalana yamagi afotifu yagi to pana'a yagi li pili kete lite etalitoga malalana'mu yabe.

1 Pita 2:2

He'mi su hete yagapana'i ya suhi hite lenali Hu'mamofihi hetofa kaga'muko lepesinogo minalo. To yamofihi nemebite Hu'mamofihi ka'a hiti minete hofa talabe. To Hu'mau foipana nagaluguti lenele'mo gulu halibe.

2 Timoti 4:3

Minomo tito minoto kana mone tupa nohinogo ya'ma mono'mofihi lamana'amu iyo iyo hite ka lilete he'milana'mu yabe. Ya nehite ka mone enegekesaguti kehelinogo laga'a hiti minalina ya'asigo kehelilune lite babafi bo enele'mo nupa hilenogo fa'mene sibi kaga'mu enumu fililina ka'a lu epilenogo kehelilabe.

2 Timoti 3:10

To kaiba, nani hapa'ni akeheli'ahane. Nani minoto hu'ohuna kai ya'ma minoto lolo huto moloto hu'ohuna to mono ka fi lehe toto moloto hu'ohuna, foya li'ohuna yamofihi hapa'a kelepi'ohuna, to keheli amuya moloto mino'ohunamofihi ana'ina asaga'i kosele'i menehago amuya moloto mino'ohuna kai keheliloto nemege'i molo'ahane. To nemehi epito mino'ohuna, to baga'a hiti yamofihi nugupisalo tilago amanapa huto ho tito mino'ohuna, to kalana'i mele netago komopa'nigu gabu gise'namofihi komopa'agu mino'ohuna akeheli'ahane.

2 Timoti 1:6

Anana'mu keheliloto'ni lu'ohuna ka'a ya'ma aku'i kehelilane Nani koyapa'i nayahi latahakalo molo'ohugo lusa negi ketago Hu'mamofihi mono ka'amofihi amuya fi hele hu keto'ehinamofihi ya'ma kaba hu bati huto amuya moloto minomo tito minetogo logo libi suhi huto lolo hino.

1 Timoti 6:3

Bona'i mone'amagi enali ka lamana'a keheli he'mite fato mono ka lilana to Sipi Boti Yesu Kilisito ai ka'a keheli he'mite mono kamofihi kapo'agu kagalo enemegesa hi emilana bona'i enali kumu ya'ma luto lilugi,

1 Timoti 4:16

Kaika hapaka kaba huto to mono ka lu epilata kaga amuya'a hiti kaba huto kaga nokumuna amuya moloto lito minalane. Ya hilata ya'ma kai kaka kehelilata nehana bona'i to kaika hiti mino bati hinogo Hu'mau lenubuto bilibe.

1 Timoti 1:10

to moko hilata nehana, to bomagi lalu'afitoga buto i ke'molata nehana, bona'magihi yagapana'i gumina lilata nehana, to faga fagalo bo fakupa ka li epilata nehana, to ana'ina luga'a yamofihi mono kagagu faga fono ka nasana'a lilata suhi lite nehana. Ya'ma bona'magihi keya ka enali nasana ni'ibe. Enali kumu huto hu'ehina ni'ibe.

1 Tesalonika 3:2

To Hu'mamofihi koko pana'a lalalutifu, Timotihi ho lufugo he'mi netoto lenalitoga bilibe luto lu'ohuna. Kilisitohi ka lamana'a lulata nohina bouba monolugu lenele'mo babahi hilibe luto to lenele'mo amuya hilibe luto,

Kolose 2:19

Enali Kilisitotoga hepite meneminabe. Ai latahati nohinogo lali gumita'a nohuta hupa'atu to go'nuna'atu hiti li hepito ai hiti moneko'na nohuto Hu'mau lu molo'ehina suhi luto hofa notone. To enalimoya Kilisito latahatigati i pa sete he'mi'ahana bona'i nehabe.

Filipai 3:16

Ya hu'ehinaya bu'ohuta Hu'mau lelepi'ehina kapo moloko bilune.

Efeso 6:21

Minoto lito nohuna yamofihi hapa'a to foya'a lilata nohuna yamofihi kehelilabe luto Tikiku ai'ya buto ka lu lepilube'mu nohibe. Ai lalalutifu lamana'a Sipi Bomofihi agoya pana'a foyagu amuya moloto mino'ehina bo yabe.

2 Koliti 6:4

Lali Hu'mamofihi foyalo bo'a nohutagihe yamofihi hapa'a li huto huto ma luto molo lito bulata nohune. Keke'i luse'namofihi gupisa'alo nohutoti to ufeha'a hiti nasanamofihi gupisalo minoto to i'i o'enamofihi gupilo mino'ohuta yatai ketipanamofihi komopa'agu nominone.

2 Koliti 3:6

Hu'mau ai'a ya'ma lele'mo bati higo lu mu tifise'namofihi ka'a kosaba'namofihi foya'a ya'ma lilata nohune. Lu laga hi'ahana ka fayahi keye'ahana ya'ma keheliya ise'namofihi foya ni'igopa Sikalafu'i li emilata foya'a ni'ibe. Lu laga hi'ahana ka fayahi keye'ahana yauba lemehati filise'na li huto hu limilata nohibe. To Sikalafu'uba minoba minoba huto lemehiti minolata nasana ya'ma li huto hu limilata nohibe.

1 Koliti 4:17

Nani ya hilabe luto Timotihi ho lufugo lenalitoga foiya nobibe. Ai'i komopa'ni emi'ohuna bo Sipi Bomofihi mono kagu pana'ni lolo huto minoto ana'ina le'mo fu luto lolo hulata nohina bo ai buto nani Yesu Kilisitohi mono ka'amofihi kapo'a Kilisitohi naga'a noto noto nehana enelepito minolata nohunamofihi buto aku'i lu lepinogo kehelilabe.

Romu 15:15

Keheli'ohunaya aku'i lenali kumu koli mehuse nohuto'ni mone kaga amuya ka luto ya'ma fayahi koyoto nolepube. Lenali ana kaga beto hilabe luto amuya moloto akoyo'ohuna. Hu'mau lili'nalo bona'a nele'mo ho tito Yesuhi kaga lelili huto buto fegutoga bona'magihi lu epilane luto noho lifigo nani nelesa melulata nohinagihe.

Aposolo 20:35

Nani ya huto asaga yupahi sipi lili'na lito lenelepi'ohuna ya'ma lali asaga lili'na amuya menehana bona'i he'moto lilata suhi huto minolata ya'ma lenelepi'ohube. Sipi Boti, Yesu ai'a ma lu'ehina: Ana'ina lilata bati mehibe. To ana'ina fato bona'i epilata ya bati huto komopakagu gelo bilana yabe luto lu'ehina. Lali ya'ma ka'a beto huto bati huto nominone.

Aposolo 20:31

Ya hilanagi lenali kaba hite minalo. Nani loeyagi moneyagi foya kanagu etehi utehi hiti lenali kumu yibi huba huba nohuto mono kaga lu lenelepi'ohuta yamofihi mehe'mise mino'ohunagi ya'ma lenekesu meheno.

Luku 1:3

Ya higo nani ana huto ya'mana kaga fayahi goto'ni kaitoga he'minogo bilibe. Koyapa'i nani ya'mananamofihi hapa'amu le'mo bati huto nege'noka ho'ohube. Yatai nani le'mo fotogo huto nogobe.

Aposolo 1:15

Nunumu hite minana kana'a nesi'a babu luto enebe ligilago mone yupahi 120 bona'i li nupa hite minago Pitau ho tiloto ma luto lu epi'ehina:

2 Koliti 11:23

Enali'ani Kilisitohi kele kele bo'a nohune lite nelago nani ya'ma sibigopa negi nagi ka lilube. Nani enebe ligito Kilisitohi koko bo'a fato fato'mofihi nohube. Nani foyamofihi keke'i luse nohuna ya'ma fato fato suhi huto ni'ibe. To mono ka'mu luto naga nonugu tilata nohuna to segi osatu nehelago nagabu'i gilata hu'ehina. Babu yupahi nani filise'na hu'ohunamofihi fato fato legegeto tito ni'ibe.

Filipai 2:20

Bona'i ai tegi'a mone maga menehabe. Ai'a lamanana'atu lenali kumu kehelito komopa'atu lenele'mo hetofa hulata nohibe.

Filipai 2:22

Timotiu ai minoto lito nohinamofihi hapa'a bati hu'ehigo akeheli'ahanamo ni'ibe. Ai pana'i moneuba afo'afi he'malata suhi luto ka lamana'amofihi foya'a nehe'moto li'ehina yabe.