Zefaniya 3:2 - Bhiblia Yo Sawuleka

² Kha di engisi dipswi, kha di tumeli kukawukwa, kha di thembi Mkoma, hambi kutshuketa ka Txizimu txa dona.

Zefaniya 3:2 Referans Kwoze

Jeremiya 22:21

Ni wombawombile ni nawe ti txi ngadi ti kuhumela kwati, Aniko u txi khawe: “Kha ni na mbi engisa.” Ngu ona mahanyelo ako kukhukhela wananani, aku, khu na mbi pfa dipswi dangu.

Jeremiya 5:3

O Mkoma, ina maso ako kha ma vereli tinene kani? Awe u va pekile, aniko kha vapfa kupanda. U va lovisile, aniko kha va tumela kulaywa. Va bangisile tikhohe tawe kupinda ni dirigwi Va lambile kuhunduluka.

Jeremiya 32:33

Va ni tshuralete, kha va ni engisa; hambiko ni nga va gondisa kambe ni kambe, kha va engisa ti taku va kawukwa.

Jeremiya 2:30

Ni pekile walo vanana vanu, kha va tumela kukawukwa. Ditxhari danu di date vaprofeti vanu nga ngonyamo yi hasamulako.

Isaya 43:22

Hambi keto, khwa ni dhana awe Jakobe, aniko u karate ngu ngani, awe Israyeli.

Isaya 29:13

Nguko Mkoma a ti khene: Vathu vava koko va tshuketa hafuhi ni nani, se va ni dhumisa ngu sisofu, aniko timbilu tawe ti kule ni nani, ni txithavo txawe kwangu, nja kulondeta milayo ya vathu dwe, ayi va nga gondiswa yona;

Mavingu 5:12

se u txi khawe: Ni nyenyile walo kulaywa! Ni mbilu yangu yi lambile kukawukwa!

Masalmo 78:22

nguko kha va kholwa ka Txizimu kambe kha va themba kuvhunwa ngu txona.

Masalmo 73:28

Aniko kwangu, ndinene kuzumba hafuhi ka Txizimu. Awe, Mkoma, Txizimu txangu, u wuthavelo wangu; ni na huwelela totshe ti u nga maha.

Masalmo 50:17

na kuve khu tsaki, ngako ni txi kukawuka wo mbi khatala ngu mapswi angu kani?

Masalmo 10:4

Kutikulisani kwakwe m'thu wo biha kha khatali ngu Mkoma, a khene: “Txizimu kha txi mahi txilo ngu kuhenya ka txona.” Ene a pimisa tito; Txizimu kha txi nga ho.

Nehemiya 9:26

Hambi keto, kha va kuengisa, va to kuwukela, ve tshuralela mlayo wako, ve daya vaprofeti vako, va va nga ti ti womba-womba kwawe, ti to ve tshumelela kwako; se va to maha wubihi wa hombe.

Vahebheru 10:22

Ngu toneto, ahi tshuketeleni hi di ni mbilu yo lulama, na hi di tate ngu likholo, hi di ni mbilu yi yi nga basiswa ka wotshe wubihi wa livhalo, ni mmidi wo kuwulwa ngu mati o basa.

Ezekhiyele 24:13

Amu ka wubihi wako ku ni nduma yo biha, nguko ni ku sawulekisile, aniko awe khwa ti sawulekisa; khu na mbiswa u sawulekiswa ka wubihi wako, ngako ni si leki ku ku henyela.

Jeremiya 35:17

Mkoma, Txizimu txa Mabutho a Tiyimbi, Txizimu txa ka Israyeli, a womba tiya: Wona, ni na neha txitimwi ka Judha, ni ka votshe va zumbako Jerusalema, dotshe dikhombo ni ngadi womba kwawe; nguko ni khala ku va gela, aniko kha va engisa; ni va dhani, aniko kha va xamula.

Jeremiya 35:13

Mkoma wa Mabutho a Tiyimbi, Txizimu txa ka Israyeli, a khene: Tsula u txi ya va gela vathu va va ka Judha, ni vaaki va Jerusalema, u txi khawe: Ina kha mi na mbiswa mi amukela gondo ngu kupfa timhaka tangu kani? Kuwomba Mkoma.

Isaya 31:1

Dikhombo ka vale va relelako Egipta kuya kombela kuvhunwa; kambe va thembako mahantxhi! Va ku ni themba ni sikotxikani, nguko i ku sasingi, ni vagadhi va mahantxhi, nguko mba mtamo ngutu; va singako ni mhaka ni Msawuleki wa ka Israyeli, kambe kha va lavi Mkoma.

Isaya 1:5

Ngu kutxani mi no tsayiswa, nga kusimama miya masoni ngu kueyisa kani? Wotshe msungo wa lwala, ni yotshe mbilu yi pandisekile.

Mavingu 1:7

Kuthava Mkoma, ngona makhato a wuzivi; siphukuphuku sa txhipisa wutxhari ni gondo.

2 Timoti 3:16

Yotshe Mibhalo yi pimisilwe ngu Txizimu, ya vhuna kugondisa, kulaya, ni kukawuka ni kutolovetisa tinzila to lulama;

Jeremiya 13:25

Atxiya ngu txona txiningo txako, atxi ni ku dinganako, kuwomba Mkoma; nguko u ni divate, u themba makuhu.

Ezekhiyele 22:24

Awe mwanana wa m'thu, di gele ku khawe: Awe u ditiko daku va u nga mbi sawulekiswa, u si welwiko ngu mati ka ditshiku da kuhenyelwa.

Isaya 9:12

Vasiriya va nata ngu wutxani, se Vafilista va nata ngu wuphemba, ve ta khadamula Israyeli ngu txisofu txo asama; hambi keto, kuhenya kwakwe kha ka pinda, aniko dianza dakwe di ngadi nawulutilwe.

Zefaniya 1:6

ni va va lekako kulondeta Mkoma, ni vale va si laviko Mkoma, hambi ku wotisa txilo ngu ngene.